නිමල් රාජපක්ෂ
පාසල් පෙළ පොත් හා නිල ඇඳුම් පාසල් නිවාඩුවට පෙර දින (දෙසැම්බර් 4 වැනිදා) බෙදා දීමට පියවර ගන්නා බව අධ්‍යාපන ඇමැති සුසිල් පේර්මජයන්ත මහතා පැවසීය.
අධ්‍යාපන ඇමැතිවරයා මේ අදහස් පළකෙළේ පළාත් අධ්‍යාපන අධ්‍යක්ෂවරුන් ඉදිරියේ ගුරුමාරු උපදේශන සංග‍්‍රහය අමාත්‍යාංශ ශ‍්‍රවණාගාරයේදී එළිදැක්වූ අවස්ථාවේ දීය.
මෙහිදී අදහස් දැක්වූ සුසිල් පේර්මජයන්ත මහතා. පෙළපොත් හා නිලඇඳුම් යාපනය ඇතුළු දුෂ්කර ප‍්‍රදේශවලට යැවීම සඳහා කොටස් දෙකකට නැව්ගත කර තිබෙනවා. පෙළපොත් හා නිල ඇඳුම් කලට වේලාවට සියලු පාසල්වලට යවා පාසල් දරුවනට බෙදාදීමට අදාළ නිලධාරීන්ට උපදෙස් දී ඇතැයිද කීවේය.
මීට පෙර වසර වලදී ගුරු උපදේශන නිර්දේශ බෙදා හැරීමට ප‍්‍රමාද වූවා. එහෙත් මෙවර 2009 වසර සඳහා සියලු මාර්ග උපදේශන සංග‍්‍රහයන් සූදානම් කර තිබෙනවා.
දැනටමත් ලබන වසරේ අටවන ශ්‍රේණිය පෙළපොත් සියයට අනුපහක් (95%) මුද්‍රණය කර නිකුත්කර අවසන් බවද කීවේය. සිසුන් දෙදහසකට වැඩි පාසල් සඳහා සෘජුව පොත් නිකුත්කර තිබෙනවා.
2009 වසර සඳහා ගුරුමාර්ග උපදේශන පොතද දෙසැම්බර් 4 වැනිදාට ගුරුවරුන්ට ලැබෙන්න සැලැස්විය යුතු වෙනවා.
සමහර පාසල්වලට ලැබිය යුතු පෙළපොත් ප‍්‍රමාණය ලියා එවා නොතිබීම නිසා පැමිණිලි ඒමට ඉඩ තිබෙනවා.
පාසල් දෙසැම්බර් මස 5 දින නිවාඩු දෙන බැවින්ඊට පෙර බෙදාදීම සඳහා බස්නාහිර පළාතේ සියයට අනූඅටයි දශම දෙකක් පෙළපොත් බෙදාහැර තිබෙනවා. පළාත් නවයට පෙළපොත් මිලියන 26ක් අවශ්‍යව ඇතත් මේ වනවිට මිලියන 24.6ක් බෙදාහැර තිබෙනවා. ඉතිරි පෙළපොත් ඉදිරි දින දහය ඇතුළත බෙදා හැරීමට කටයුතු කරන බවද අධ්‍යාපන ඇමැතිවරයා ප‍්‍රකාශ කෙළේය.
දෙසැම්බර් මස 5 දින පාසල් නිවාඩු දී ජනවාරි මස 5 දින නව පාසල් වාරය ආරම්භ කරන බැවින් දෙසැම්බර් මස 8 දින අ.පො. ස. සා.පෙළ විභාගය පටන්ගෙන 20 දින අවසන් කිරීමට කටයුතු යොදා තිබෙනවා. සාමාන්‍ය පෙළ විභාගයට පන්ලක්ෂ පනස්දහසක් පෙනී සිටින බැවින් උත්තර පත‍්‍ර සමීක්ෂණය කිරීම දෙසැම්බර් මස 28 දින ආරම්භ කරන බවද කීය. ජාතික පාසල් සඳහා උපාධිධාරී ගරුවරුන් බඳවා ගැනීම සඳහා සති දෙකක් ඇතුළත සම්මුඛ පරීක්ෂණ පවත්වා ජනවාරි මාසය ආරම්භ වනවිට ගුරුපත්වීම් ලබාදීමට පියවර ගන්නවා.
පළමු ශ්‍රේණියට ළමයින් ඇතුළත් කිරීමේ ප‍්‍රථම වටය මේ වනවිට අවසන් වී ඇත. පළාත් අධ්‍යාපන අධ්‍යක්ෂක වරුන් දෙසැම්බර් මස 5 දින වනවිට සෑම පාසලකම එම ලේඛන ප‍්‍රදර්ශනය කළ යුතුයි.
පාසලක් නොලැබුන මවුපියන් පළාත් අධ්‍යාපන අධ්‍යක්ෂ හමුවී දැන්වූ විට තමන් පදිංචි ප‍්‍රදේශයට තිබෙන ඊළඟ පාසල ලබාදීමේ පදනම මත කි‍්‍රයා කරනු ඇත. මේ වනවිට දෙවැනි වටයේ අභියාචනා බාරගෙන අවසාන බැවින් පාසල් ආරම්භ කිරීමට පෙර අදාළ ලිපි ලබාදීමට පියවර ගන්නා බවද කීය.
ජාතික පාසල් ඉල්ලුම් කර නොලැබුනු දරුවන් සඳහා කොළඹ නගරයේ පාසල් දෙකක් ළමයින් ඇතුළත් කිරීම සඳහා සූදානම් කර ඇත.
මේ ක‍්‍රමයෙන් ලබන වසර වන විට ළමයින් ඇතුළත් කිරීම සඳහා අධ්‍යාපන අමාත්‍යංශයට ඒම අවශ්‍ය නොවෙනු ඇත.
කි‍්‍රයාන්විත රාජකාරියේ සිටින අයගේ දරුවන් පළමු වසරට ඇතුළත් කිරීමේදී පන්තියකට හත්දෙනා බැගින් ඇතුළත් කිරීමට තීරණය කර ඇත.
මේ කටයුතු නිම කිරීමත් සමඟ 2009 වසරේ පළමුවැනි ශ්‍රේණියේ පංති ජනවාරි මස 12 වැනි දින ආරම්භ වන බවද අධ්‍යාපන ඇමැතිවරයා ප‍්‍රකාශ කෙළේය. මේ අවස්ථාවට විභාග කොමසාරිස් අනුර එදිරිසිංහ, ප‍්‍රකාශන කොමසාරිස් ජෙනරාල් ඩබ්ලිව්.එම්.එස්.ජේ. පුෂ්පකුමාර යන මහත්වරු ඇතුළු නිලධාරීහු රැසක් සහභාගී වූහ.
Subscribe to:
Post Comments (Atom)
No comments:
Post a Comment