දොම්පේ සමූහ – ජී. කේ. කරුණාරත්න
පැපිලියවල ශ‍්‍රී ආනන්දාරාම විහාරස්ථානයෙන් ජංගම දුරකථනයක් සොරාගත් අඹුසැමි යුවලකට පූගොඩ මහේස්ත‍්‍රාත් හා අතිරේක දිසා විනිසුරු සුජීව නිශ්ශංක මහතා දඩ නියම කළේය.
මේ සොරකම පිළිබඳව පැපිලියවල ශ‍්‍රී ආනන්දාරාම විහාරාධිපති මාරැබේ, පේ‍්‍රමාලෝක හිමියන් පූගොඩ පොලිසියට පැමිණිලි කිරීමෙන් පසුව පූගොඩ පොලිස් ස්ථානාධිපති වික‍්‍රමසිංහ, පොලිස් පරීක්ෂක රණසිංහ, පො.සැ. 29989 පියරත්න පො.කො. 27790 ජයරත්න යන පොලිස් නිලධාරින් පිරිස පරීක්ෂණ පවත්වා දෑතෑමුල්ලේදී සැකකාර යුවළ අත්අඩංගුවට ගෙන ඇත.
මේ යුවල විහාරස්ථානවලට නිතර යමින් එමින් පිරිකර වර්ග අඩු මිලට ගෙන ඒවා වැඩි මිලට විකිණීම කරගෙන යමින් සිටිය යුවලක් බව පොලිස් පරීක්ෂණවලදී හෙලිවී ඇත.
යුවලේ කාන්තාව පැපිලියවල ආනන්දාරාමයට මෙදින ගොස් මේ ජංගම දුරකථනය සොරාගෙන ගොස් සැමියාට භාරදී ඇති අතර, සැමියා එය කොළඹ මුස්ලිම් ව්‍යාපාරිකයකුට විකුණා මුදල් ලබාගෙන ඇති බව පොලිස් පරීක්ෂණවලින් හෙළිවිණි.
සැකකරු සමඟ ව්‍යාපාරිකයා වෙත ගිය පොලිසිය, ඔහු ළඟ තිබී, ජංගම දුරකථනය සොයාගෙන පූගොඩ මහේස්ත‍්‍රාත්වරයා වෙත සැකකරුවන් දෙදෙනා ඉදිරිපත් කළේය.
පූගොඩ පොලිස් නිලධාරින්ගේ කරුණු සැලකිල්ලට ගත් පූගොඩ මහේස්ත‍්‍රාත් හා අතිරේක දිසාවිනිසුරු සුජීව නිශ්ශංක මහතා ජංගම දුරකථනය සොරාගත් ඒ. ඉනෝකා දමයන්තිට මාස හයක සිරදඬුවම පස් වසරක් දක්වා අත්හිට වූ සිර දඬුවමක් හා රුපියල් 750.00 දඩයක්ද, ඇගේ සැමියා වූ ඇම්. ඒ. කේ. සුදත් ප‍්‍රියන්තට රුපියල් 750.00 ක දඩයක්ද නියම කළේය.
Subscribe to:
Post Comments (Atom)
No comments:
Post a Comment