ශ‍්‍රී ලංකා-සිම්බාබ්වේ සිවුවැනි තරගය අද

’ඩයලොග් කුසලාන’ සිම්බාබ්වේ - ශ‍්‍රී ලංකා එක්දින කි‍්‍රකට් තරගාවලියේ සිවුවැනි තරගය අද හරාරේ නුවර ජාතික කී‍්‍රඩාංගණයේදී පැවැත්වේ.
ප‍්‍රථම තරග තුනම ජය ලැබූ සංචාරක ශ‍්‍රී ලංකා පිල තරගාවලිය ජයගෙන ඇති බැවින් ඉදිරි තරග ජයගෙන තරග පරාජ අවම කරගැනීමට සිම්බාබ්වේ කී‍්‍රඩකයෝ බලාපොරොත්තුවෙන් සිටිති.
ප‍්‍රථම තරගය කඩුලු 6 කින්ද දෙවැනි තරගය කඩුලු 9 කින් ද පරාජය වූ සිම්බාබ්වේ පිල වෙතින් තෙවැනි තරගයේ දී ශ‍්‍රී ලංකා පිලට ප‍්‍රබල තර්ජනයක් එල්ල වුණි.
හරාරේ නුවරට ඇදහැලුණු වර්ෂාව හේතුවෙන් තෙවැනි තරගය ඕවර් 28 කට සීමා වී ලකුණු 5 ක තියුණු ජයක් ශ‍්‍රීී ලංකා පිල ලබාගත්තේය.
තරගාවලිය ජයගෙන ඇති බැවින් මෙතෙක් එක්දින තරගාවලියට කී‍්‍රඩා නොකළ තිළිණ කණ්ඩම්බි, දිල්හාර ප‍්‍රනාන්දු, ඇන්ජලෝ මැතිව්ස් හා ධම්මික ප‍්‍රසාද් යන කී‍්‍රඩකයන්ගෙන් එක් අයෙකුට හෝ අද අවස්ථාව උදාකර දීමට බොහෝ සෙයින් හැකියාව උදාවනු ඇත.
තුන් ඉරියව් දක්ෂතා දක්වන ඇන්ජලෝ මැතිව්ස්ට අද තරගයේ ක‍්‍රීඩා කිරීමට අවස්ථාව උදාවුවහොත් එය ඔහුගේ මංගල අන්තර්ජාතික එක්දින තරගය වනු ඇත.
මේ සංචාරයේ පුහුණු තරගයේදී ඇන්ජලෝ මැතිව්ස් පන්දු යවමින් ලකුණු 17කට කඩුලු 2ක් හා ලකුණු 12 කට එක් කඩුල්ලක් බිඳහෙළීමට සමත් විය.

හැමිල්ටන් මැට්සකෙන්යාරි
තිළිණ කණ්ඩම්බි මෙතෙක් එක්දින අන්තර්ජාතික තරග 4 කට කී‍්‍රඩා කර ඇති අතර 2004 වසරේ සිම්බාබ්වේ පිලට එරෙහිව මංගල එක්දින තරගයට සහභාගි විය.
කණ්ඩම්බි 2004 වසරේ පාකිස්තානයට එරෙහිව සහභාගි වූ තරගයට පසුව මෙතෙක් ශ‍්‍රී ලංකාව එක්දින තරගවලදී නියෝජනය කර නැත.
නිමාවට පත් වූ තරග තුනේ දී ශ‍්‍රී ලංකා පිලේ කැපී පෙනෙන කී‍්‍රඩකයා බවට පත්වූයේ අජන්ත මෙන්ඩිස්ය. දෙවැනි තරගයේ වීරයාට හිමි සම්මානය ද දිනාගත් අජන්ත තරග තුනේ දී කඩුලු 9 ක් බිඳ හෙළීය.
සිම්බාබ්වේ පිලේ හැමිල්ටන් මැට්සකෙන්යාරි තරග තුනේදී ලකුණු 98 ක් ලබාගැනීමට සමත් විය. තෙවැනි තරගයේදී පන්දු 71 කට පමණක් මුහුණ දී මැට්සකෙන්යාරි ලකුණු 77 ක් ලබාගැනීම කැපී පෙනුණි.
හරාරේ කී‍්‍රඩාංගණයේ ශ‍්‍රී ලංකාව හා සිම්බාබ්වේ අතර තරග 12 ක් පවත්වා තරග 10කම ජය ශ‍්‍රී ලංකාව සතු කරගත්තේය. තරග 2 කින් සිම්බාබ්වේ ජයගෙන ඇත.
සිම්බාබ්වේ පිල 2004 වසරේ පැවැති තරගාවලියේදී සංචාරක ශ‍්‍රී ලංකා පිල ඉදිරියේ හරාරේ කී‍්‍රඩාංගණයේදී ලකුණු 35 කට දැවී යෑම වාර්තා වූ අඩුම ලකුණු සංඛ්‍යාව වේ.
මෙවර තරගාවලියේ දෙවැනි තරගයේ දී ද සිම්බාබ්වේ පිල ලකුණු 67කට දැවී ගියේය. ශ‍්‍රී ලංකාවට සෑම අතින්ම අද තරගයද වාසි සහගත තත්ත්වයක පවතී.