යල් පිනූ යන්ත‍්‍ර වෙනුවට වරායට නව යන්ත‍්‍ර ගැනීමට ටෙන්ඩර් පත් කැඳවා තිබෙනවා- ඇමැති චමල් රාජපක්ෂ

දයා පෙරේරා දුමින්ද ගුරුගේ, ස්වර්ණා විජේකෝන්
මිහින් එයාර් සමාගමට වෙන් කළ මුදල් ජනතා සහනාධාරවලට යොදවන්න
- ජෝන් අමරතුංග
අපි හැම දෙයක්ම කරන්නේ රටේ ජනතාව වෙනුවෙන්
- ඇමැති රෝහිත බෝගොල්ලාගම
කොළඹ වරායේ යල් පිනූ සියලුම යන්ත‍්‍ර සූත‍්‍ර වෙනුවට අවුරුදු විසිතුනකට පසු අලුත් යන්ත‍්‍ර සූත‍්‍ර මිලදී ගැනීම සඳහා ටෙන්ඩර් කැඳවා තිබෙන බව වරාය හා ගුවන් සේවා ඇමැති චමල් රාජපක්ෂ මහතා අය වැය කාරක සභා අවස්ථාවේ සාකච්ඡාවේ පිළිතුරු කතාව කරමින් පාර්ලිමේන්තුවේ දී ඊයේ (25) ප‍්‍රකාශ කෙළේ ය.
වරාය හා ගුවන් අමාත්‍යාංශ වැය ශීර්ෂයෙන් රුපියල් දහයක් කපා හරින ලෙස යෝජනා කරමින් කතා කළ ගම්පහ දිස්ති‍්‍රක් මන්තී‍්‍ර ජෝන් අමරතුංග මහතා (එ.ජා.ප.) - මිහින් එයාර් ගුවන් සමාගම ගැන අපට ගැටළු තිබෙනවා.
මේ ගුවන් සමාගමට විශාල මුදලක් ආයෝජනය කර තිබෙනවා.
ගුවන් සමාගමේ පාලනාධිකාරියට පත්කර ඇති නිලධාරීන්ට ගුවන් සමාගම් පරිපාලනය ගැන අවබෝධයක් නෑ.
මිහින් ගුවන් සමාගමට වෙන්කර ඇති මුදල් ජනතාව ගේ සහනාධාර සඳහා වෙන් කරන්න.
විදේශ කටයුතු ඇමැති රෝහිත බෝගොල්ලාගම මහතා:- යම් දෙයක් දෙස හොඳ දෘෂ්ඨි කෝණයකින් බැලීමේ හැකියාව විපක්ෂයට දවසින් දවස නැති වෙනවා. ඒ ගැන මට කනගාටුයි.
අවුරුදු හතලිස් ගානකට පසුවයි මඟීන්ට ලාභදායී ලෙස ගමන් කළ හැකි ගුවන් සමාගමක් ලංකාවේ ආරම්භ කෙළේ. එහි නිර්මාතෘවරයා ලෙස මහින්ද රාජපක්ෂ මහතාට ප‍්‍රණාමය පුද කළ යුතුයි.
ශී‍්‍ර ලංකන් ගුවන් සමාගමෙන් ඉටුවන කාර්යභාරයට පරිභාහිර සේවයක් කිරීමටයි මිහින් ගුවන් සමාගම ආරම්භ කළේ. මැදපෙරදිග කළාපය තුළ විශාල පිරිසක් සේවය කරනවා.
ඔවුන්ට අඩු මුදලට ගුවන් ටිකට් පත් ලබා දිය යුතුයි. ජාත්‍යන්තර ගුවන් සේවයක් වුණත් මිහින් ලංකා මඟින් මැදපෙරදිග ජීවත් වන ශී‍්‍ර ලාංකිකයින්ට විශාල සේවයක් ඉටු වෙනවා. මේ සේවාව ජාත්‍යන්තර ගුවන් සමාගම්වලින් අපේක්ෂා කරන්නට බෑ.
අපි රටක් සංවර්ධනය කළ යුත්තේ ජනතාව ඉලක්ක කරමින්. එවැනි කාර්ය භාරයක් මිහින් ලංකා ආරම්භ කරමිනුත් අප ගේ රජය ඉටුකර තිබෙනවා.
දඹදිව යන බැතිමනªත්ටත් විශාල සේවාවක් මිහින් ලංකා සමාගමෙන් ඉටුවෙනවා. අප සිංගප්පූරුවට මේ සේවාව මඟින් ගියා. අප වගේම ජනාධිපතිවරයාත් මේ ගුවන් සේවාව මඟින් ගමන් කළා. මොන රටේ ජනාධිපතිවරයාද බජට් එයාර් ලයින් එකකින් ගමන් කරන්නේ. නමුත් අපේ ජනාධිපතිවරයා එවැනි ආදර්ශයක් ලෝකයට ලබා දුන්නා.
ඕනෑම ආයතනයක ගිණුම් පාර්ලිමේන්තුවට යටත්. මෙවැනි ව්‍යවසායන් අපි සිදු කරන්නෙ ජනතාව වෙනුවෙන්. මේවා දෙස දේශපාලන දෘෂ්ඨි කෝණයකින් බලන්නට එපා. අපි හැම දෙයක්ම කරන්නේ රට සහ ජනතාව වෙනුවෙන්. ඒ නිසා මෙවැනි දේවල් රට වෙනුවෙන් ආයෝජනය කළ යුතුයි.
කොළඹ දිස්ති‍්‍රක් මන්තී‍්‍ර සුනිල් හඳුන්නෙත්ති මහතා (ජ.වි.පෙ.) - මෙම කරුණ දෙස දේශපාලන දෘෂ්ඨි කෝණයකින් නොව, ජනතාවගේ දෘෂ්ඨි කෝණයකින් බලන කෙනෙක් ලෙස මම අදහස් දක්වන්නම්.
(නියෝජ්‍ය කාරක සභා සභාපති රාමලිංගම් චන්ද්‍රසේකර මහතා මූලාසනයට පැමිණියේය.)
හඳුන්නෙත්ති මහතා:- වරාය හා ගුවන් සේවා අමාත්‍යංශ වාර්තාවෙහි මිහින් ලංකා සමාගම ගැන දීර්ඝව සඳහන් කරල නෑ. අමාත්‍යංශ කිහිපයකට වෙන් කරන මුදල් එක් ආයතනයක් වෙනුවෙන් වෙන් කරලා. 2006 දී ලැබූ ආදායමට වඩා පාඩුවක් වරාය 2007 දී ලබාගෙන තිබෙනවා. ඒ වගේම 2007 දී වරායේ වියදම් වැඩිවෙලා. 2006 දී මිලියන පන්දහසකට වැඩි මෙහෙයුම් ආදායම 2007 වෙනකොට මිලියන තුන්දහස දක්වා අඩුවෙලා. මේවා සඳහන් වෙන්නේ වරායෙ ගිණුම් වාර්තාවල.
අමාත්‍යංශ විසි ගණනක ප‍්‍රාග්ධනය කප්පාදු කරලා. එහෙත් වරාය හා ගුවන් සේවා අමාත්‍යංශයට විශාල මුදලක් වෙන්කරලා. මේ මුදල් වෙන් කර තිබෙන්නෙ මොන මොන ව්‍යාපෘතිවලට ද යන්න පැහැදිලිව දක්වා නැහැ.
වරාය සංවර්ධන ඇමැති ඩිලාන් පෙරේරා මහතා:– මහින්ද චින්තනයේ වරාය පිළිබඳ බොහෝ දේ සඳහන් වෙනවා. ඇමැති චමල් රාජපක්ෂ මහතා යටතේත් වරායේ විශාල සේවාවක් ඉටුවෙනවා. අතීතයේ දී උතුරු කලාපයේ වරායන් ව්‍යාප්ත වී තිබුණා. මාන්තොට එයින් එකක්. දුටුගැමුණු රජු පවා තමාට අවශ්‍ය අලි ඇතුන් වරායයන් ඔස්සෙ විදේශයන්ගෙන් ගෙනවිත් තිබෙනවා.
ජ.වි.පෙ. මන්තී‍්‍රවරු බොරුවට චෝදනා කරන්නෙ නැතිව මේව බලන්න යන්න එන්න. බොරුවට අපට චෝදනා කරන්න එපා. දියකඩනයේ වැඩ අවසන් කිරීමෙන් පසු ටර්මිනල් හතරක් සෑදිය හැකිවෙයි. ඒ ටර්මිනල් හතරෙන් දෙකක් වත් වරාය අධිකාරිය සතු වුණොත් හොඳයි.
පහළොස්වැනි ශත වර්ෂයේ දී චීන නැව් පැමිණියේ හම්බන්තොට වරායටයි. මේ වරාය ඉදිකිරීමෙන් අපට නැව්වලට තෙල් සැපයිය හැකියි.
පත්කළ මන්තී‍්‍ර රාවුෆ් හකීම් මහතා - ( ශී‍්‍ර.ල.මු.කො.) :- අපේ වරායට ඉන්දීය නැව් පැමිණීම අපට විශාල වාසියක්. ඉන්දියාවේ කන්ටේනර් බෑමේ කටයුතු ඉතා සෙමින් සිදුවන නිසා තමයි එරට නැව් මෙරට පැමිණෙන්නේ.
පත්කළ මන්තී‍්‍ර මොහොමඩ් මුසම්මිල් මහතා (ජා.නි.පෙ) වරාය සංවර්ධනයට මෙවර අයවැයෙන් ලබා දී ඇති මුලධන වියදම වැඩි කිරීම ඉතා හොඳ දෙයක්.
ගුවන් සේවා නියෝජ්‍ය ඇමැති සරත් කුමාර ගුණරත්න මහතා :-මිහින් එයාර් සම්බන්ධයෙන් වාර 7 ක දී මේ පාර්ලිමේන්තුවේ කරුණු දක්වා තිබෙනවා.
(නියෝජ්‍ය කතානායක පියංකර ජයරත්න මහතා මූලාසනයට පැමිණියේය.)
‘නිල් අහස ජය ගැනීම’ ගැන මහින්ද චින්තන ප‍්‍රතිපත්ති ප‍්‍රකාශයේ පැහැදිලිව සඳහන් වුණා. අපටම කියා ගුවන් සේවයක් නොතිබූ නිසයි මේ ගුවන් සේවය යෝජනා වුණේ.
කොළඹ දිස්ති‍්‍රක් මන්තී‍්‍ර රවි කරුණානායක මහතා (එ.ජා.ප)- කොළඹ වරායේ 12457ක් වැඩ කරනවා. වියදම මිලියන 5652 යි. එහෙත් එස්. ජී. ටී. ටී. ආයතනය සේවකයන් 612කින් වරාය ලබන ලාභයම ලබාගන්නවා.
වරාය හා ගුවන් සේවා ඇමැති චමල් රාජපක්‍ෂ මහතා- මිහින් එයාර් ගැන මේ සභාවේ කතා කරන්නේ හත් වැනි වරටයි. අඩුපාඩු සකස් කර ඉවරයි. දෙසැම්බර් 15 වැනිදා වන විට ගුවන්සේවා ආරම්භකර ප‍්‍රතිඵලයන් පෙන්වනවා. ඒ සඳහා සැලැස්ම සකස්කර අවසානයි.
කොළඹ වරායේ දැනට භාවිත වන යන්ත‍්‍ර සුත‍්‍ර බොහෝමයක් අවුරුදු 23කට වඩා පැරැණියි. අලුතින් සැපයීමක් වී නැහැ. ඒ නිසා අවශ්‍ය සියලුම යන්ත‍්‍ර සුත‍්‍ර මිලදී ගැනීමට ටෙන්ඩර් කැඳවා තිබෙනවා. තරගකාරිත්වයේ අඩුවක් සිදුවුණේ මේ යල් පිනූ යන්ත‍්‍ර සුත‍්‍ර නිසයි.
හම්බන්තොට වරායේ කටයුතු ආරම්භ වී තිබෙනවා. තායිලන්තයේ යෝජිත ට‍්‍රාඇල නිසා හම්බන්තොට වරායට ආර්ථික වශයෙන් වඩා ඵලදායක වෙනවා ඇති.
සංචාරක වරායක් ලෙස ගාලු වරාය සංවර්ධනය කරනවා. ඔළුවිල් වරායේ කටයුතු සිදු කැරෙනවා. වරාය සංවර්ධනයට හා වරාය අධිකාරියට ප‍්‍රයෝජනවත් ආදායම් ලැබිය හැකි ව්‍යාපෘතිද කි‍්‍රයාත්මක කරනවා.
වැය ශිර්ෂ සඳහා ඡන්දයක් නොඉල්ලන බවත් එක්සත් ජාතික පක්‍ෂයේ විරෝධතාව සටහන් කර ගන්නා ලෙසත් ජෝන් අමරතුංග මහතා ප‍්‍රකාශ කෙළේය.
වැය ශිර්ෂ සංශෝධන සහිතව සම්මත විය.
පාර්ලිමේන්තුව අද (26) පෙරවරු 9.30ට යළි රැස්වේ.