ප‍්‍රින්ස් ගුණසේකර
වෙන්නප්පුව ඇල්බට් එෆ්. පීරිස් කී‍්‍රඩාංගණයේ පැවැති නිව්යංග්ස් හා රිනවුන් අතර පාපන්දු තරගයේ විනිසුරුවන්ට මරණීය තර්ජන එල්ලවීම හේතුවෙන් තරගය වර්ජනය කළහ.
තරගය ආරම්භ කිරීමට පැය දෙකකට කලින් ඩිලාන් පෙරේරා හා මිරැන්ඩෝ යන විනිසුරුවන් දෙපළ තරගය වර්ජනය කරන බව දැනගත් ශ‍්‍රී ලංකා පාපන්දු සම්මේලනයේ විනිසුරු අධ්‍යක්ෂ ඒ. එම්. යාපා මහතා කී‍්‍රඩාපිටියට අවතීර්ණ වී තරග විනිශ්චය ලබාදුන්නේය.
ඔහු සමඟ දෙවැනි පෙළ තරග විනිසුරුවන් දෙදෙනෙකුද කටයුතු කළහ. තරගයේ ජය ගෝල් 1 – 0 කින් රිනවුන් පිල සතුවිය.
වෙන්නප්පුව නිව්යංග්ස් කී‍්‍රඩා සමාජයේ සභාපති රෝහිත ප‍්‍රනාන්දු මහතා ඇතුළු පිරිසක් කළ තර්ජනයට පරීක්ෂණයක් පවත්වන ලෙස පසුගිය සතියේ පාපන්දු සම්මේලනයෙන් ඉල්ලා සිටියද ඒ සඳහා විසඳුම් ලබානොදීම හේතුවෙන් වෙන්නප්පුවේ තරග වර්ජනය කිරීමට ප‍්‍රධාන පෙලේ පාපන්දු විනිසුරුවෝ කිහිප දෙනකුම තීරණය කළහ.
පාපන්දු සම්මේලනයේ ඉහළම නිලධාරින් රැස්වූ අවස්ථාවකදී තර්ජන ගැන පරීක්ෂණයක් කරන ලෙස විවෘතව කළ ඉල්ලීම නොසලකා හැරීම මෙයට ප‍්‍රධානතම හේතුව බව පාපන්දු විනිසුරුවෝ පෙන්වා දෙති.
තමන් කිසිදු අවස්ථාවක පාපන්දු විනිසුරුවන්ට තර්ජනය නොකළ බව නිව්යංග්ස් සභාපති රෝහිත ප‍්‍රනාන්දු මහතා ‘දිනමිණ’ට පැවැසීය.
වසරකට ලක්ෂ 10 කට අධික මුදලක් වැයකරමින් පාපන්දු කී‍්‍රඩාව නගාසිටුවීමට කි‍්‍රයාකරන තමාට එරෙහිව නිලධාරින් පිරිසක් හා විනිසුරුවන් පිරිසක් ගෙනයන කුමන්ත‍්‍රණයක එක් පියවරක් බව පෙන්වා දුන්නේය.
“කිසිම සිද්ධියක් වෙලා නෑ. වෙන්නප්පුවේ ඉදිරි තරග 5 ක් සම්මේලනය නවතා දමා තිබෙනවා. මගේ විරෝධය ලිඛිතව අද සම්මේලනයට භාරදෙනවා” යැයි ප‍්‍රනාන්දු මහතා පැවැසීය.
විනිසුරුවන් වෙන්නප්පුවට නොයෑම හේතුවෙන් ඊයේ පැවැත්වීමට නියමිතව තිබූ ‘නිගම්බු යූත්’, ‘බ්ලුස්ටාර්’ අතර තරගයද කල් දැමිණි.
Subscribe to:
Post Comments (Atom)
No comments:
Post a Comment