පරිසර ඇමැතිට ජගත් තනතුරක් හිමිවීම පාර්ලිමේන්තුවට ඉමහත් ගෞරවයක් - කතානායක වි. ජ. මු. ලොකුබණ්ඩාර

දයා පෙරේරා, දුමින්ද ගුරුගේ සහ ස්වර්ණා විජේකෝන්
මහින්ද චින්තන ප‍්‍රතිපත්තියට අනුව පාරිසරික අමාත්‍යංශය දක්ෂ ලෙස මෙහෙයවමින් ආණ්ඩුවට ශක්තියක් වී ඇති පාඨලී චම්පික රණවක ඇමැතිතුමා පාර්ලිමේන්තුවටත් ගෞරවයක් බව කතානායක වි. ජ. මු. ලොකුබණ්ඩාර මහතා පැවැසීය.
දෝහා කටාර්හිදී පසුගියදා පැවැති වියනා සම්මුතියේ 8 වැනි සැසිවාරයේ දී ඉදිරි තෙවසර සඳහා එම සම්මේලනයේ සභාපති ධූරයට පත් වූ ඇමැති පාඨලී චම්පික රණවක මහතා පිළිගැනීම සඳහා පාර්ලිමේන්තු සංකීර්ණයේ දී ඊයේ (24) පැවැති උත්සවයේ දී කතානායක වි. ජ. මු. ලොකුබණ්ඩාර මහතා මේ බව පැවසීය.
කතානායක වි. ජ. මු. ලොකුබණ්ඩාර මහතා එහි දී මෙසේ ද කීවේය.
චම්පික රණවක ඇමැතිතුමා මේ ආණ්ඩුවේ සිටින දක්ෂ ඇමැතිවරයෙක්. මන්තී‍්‍රවරයකුව සිට ඇමැතිවරයකු බවට පත් වී ඉතාම කෙටි කලක් තුළ දී ජාත්‍යන්තර වශයෙන් මෙවැනි උසස් තනතුරකට පත්වීමට හැකි වූයේ එතුමාගේ දක්ෂතාව නිසයි. එතුමා මෙවන් උසස් තනතුරට පත් වීම මේ රටට කීර්තියක්. අපේ පාර්ලිමේන්තුවට ගෞරවයක්.
අපේ රටේ සිටින්නේ අපට ම අනන්‍ය වූ දක්ෂතාවලින් පිරිපුන් ජනතාවක්. අපේ රට ඉතා පුංචි දූප්පත් රටක්.
ඒත් දෙස බස රැස රැක ගැනීම අතින් අප පොහොසත් බුදුරජාණන් වහන්සේගේ දහමෙන් පෝෂණය වූ මේ රටේ මිහිඳු මහ රහතුන් වහන්සේ හඳුන්වා දුන් ආගමික හර පද්ධතිය තවමත් සුරැකී තිබෙනවා.
අපේ රටේ අනන්‍යතාව හර පද්ධතිය මැනවින් හඳුනාගත් ඇමැතිවරයකු වශයෙන් චම්පික රණවක ඇමැතිතුමා හඳුන්වන්නට පුළුවන්.
එතුමාට ඉතා පැහැදිලි නිරවුල් දර්ශනයක් තිබෙනවා. එබඳු න්‍යායවාදී දර්ශනවාදි නායකත්වයට සුදුසු පුද්ගලයකු මේ තත්ත්වයට පත් කිරීම ගැන ජාතික හෙළ උරුමයට අප ස්තූතිවන්ත විය යුතුයි.
මහින්ද චින්තන ප‍්‍රතිපත්තිය ඉදිරියට ගෙන යමින් එතුමා රජයට ද ශක්තියක් වී තිබෙනවා. මෙවන් උතුම් පුත‍්‍ර රත්නයක් මෙලොවට බිහිකළ මවුපියන් ද මේ අවස්ථාවේ දී සිහිපත් කළ යුතුයි.
සභානායක නිමල් සිරිපාල ද සිල්වා මහතා- ශ‍්‍රී ලංකාවේ නාමය අන්තර්ජාතික තලයට ගෙන යමින් රටට කීර්තියක් අත්කර දීමට පරිසර ඇමැතිවරයා වශයෙන් චම්පික රණවක මහතා කි‍්‍රයා කර තිබෙනවා.
එතුමා නවක ඇමැතිවරයකු වුවත් එතුමාට බාරදුන් වගකීම ඉතා ම හොඳින් කි‍්‍රයාත්මක කරනවා. විෂය පිළිබඳ හොඳ අවබෝධයක් එතුමාට තිබෙනවා. මේ විෂය පිළිබඳ පමණක් නොව එතුමා ඕනෑම ප‍්‍රශ්නයක් පිළිබඳ හෘද සාක්ෂියට එකඟව කටයුතු කරනවා.
මා ලෝක සෞඛ්‍ය සංවිධානයේ සභාපති ධූරයට පත් වූයේ එහි විධායක සභාවේ වසර 10ක් කටයුතු කළ පසුවයි. එහෙත් මෙතුමා මේ තනතුරට පත් වූයේ ඉතාම කෙටි කලකින්. එතුමා මටත් වඩා ඉදිරියෙන් සිටිනවා. එතුමා සතු දක්ෂතාව නිසයි මෙතරම් කෙටි කලකින් මෙවන් උසස් තනතුරකට පත්විමට රණවක ඇමැතිතුමාට හැකි වී තිබෙන්නේ.
මෙය අන්තර්ජාතික වශයෙන් විශාල පිළිගැනීමට ලක් වූ සංවිධානයක්.
මෙරට පරිසර ප‍්‍රශ්නවලට මෙන් ම අන්තර්ජාතික පරිසර ප‍්‍රශ්නවලට ද විසඳුම් සෙවීම සඳහා අප රටේ දායකත්වය යෙදවීමට මෙමගින් හැකි වෙනවා. මෙය රටට කලාතුරකින් ලැබෙන අවස්ථාවක්. එසේ ම රටට විශාල ගෞරවයක්. කීර්තියක් අත් වෙනවා.
විදේශ කටයුතු ඇමැති රෝහිත බෝගොල්ලාගම මහතා- අන්තර්ජාතික තලයේ ශ‍්‍රී ලංකාව ඉහළ තත්ත්වයක් අත්කර ගැනීමට නම් විවිධ ක්‍ෂේත‍්‍රවල අප රටේ කි‍්‍රයාකාරිත්වය ඉස්මතු විය යුතුයි.
අපේ රටෙත් පරිසර ක්‍ෂේත‍්‍රයේ ඉටු කෙරෙන සේවය අපට අන්තර්ජාතික වශයෙන් ඉහළ තත්ත්වයක් ලැබීමට හේතු වී තිබෙනවා.
වියනා සම්මේලනයේ සභාපති ධූරය ඉදිරි වසර 3 සඳහා අප රටේ පරිසර ඇමැති මා මිත‍්‍ර චම්පික රණවක මහතාට හිමි වීම මීට හොඳම උදාහරණයයි. පරිසර ඇමැතිවරයාගේ දක්ෂතාව හා කැපවීම නිසා අපට මේ අවස්ථාව උදා වී තිබෙනවා.
ආණ්ඩු පක්ෂ ප‍්‍රධාන සංවිධායක දිනේෂ් ගුණවර්ධන මහතා- අපේ රටේ පරිසර ක්‍ෂේත‍්‍රයේ නව කාල පරිච්ඡේදයක් උදා කිරීමට වත්මන් පරිසර ඇමැතිවරයා සමත් වී තිබෙනවා.
චම්පික රණවක ඇමැතිතුමාට හිමි වු මේ තනතුර රටට ගෞරවයක්, කීර්තියක්, පරිසර සංරක්ෂණ ක්‍ෂේත‍්‍රය සඳහා අප රටේ දායකත්වය ලොවට වැඩි වැඩියෙන් ලබා දීමට මේ නව තනතුර හේතු වනු ඇත. මේ තනතුරට පත් වූ ඇමැති චම්පික රණවක මහතාට අප සුබ පතනවා.
පාරිසරික හා ස්වභාවික සම්පත් ඇමැති චම්පික රණවක මහතා- දෝහා කටාර්හි දී පසුගිය දිනවල පැවැති වියානා සම්මුතියේ 8වන සම්මේලනයේ දී ඉදිරි වසර 3 සඳහා එහි සභාපති ධූරය අප රටට හිමි වුණා. මෙය මාගේ පෞද්ගලික ජයග‍්‍රහණයක් නොවේ. අපේ අමාත්‍යංශ ලේකම්තුමා ඕසෝන් ඒකකයේ අධ්‍යක්‍ෂ ආචාර්ය සුමතිපාල මහතා ඇතුළු නිලධාරීන්ගේ කැපවීම නිසා ලැබූ ජයග‍්‍රහණයක්.
ඕසෝන් වියන සුරැකීම මැනවින් ම කළ රට වශයෙන් 2007 වසරේ දී අප රට පත් වුණා. ආචාර්ය සුමතිපාල මහතා මේ සඳහා කළ කාර්යභාරය වෙනුවෙන් සම්මානයට පාත‍්‍ර වුණා. එතුමා මේ ක්‍ෂේත‍්‍රයට විශාල සේවයක් කළ පුද්ගලයෙක්.
අප වැනි රටවලට ධනය බලය එතරම් නැති නිසා අපේ දැනුමෙන් ප‍්‍රයෝජන ගත යුතුයි. අපේ නිලධාරීන් මේ කාර්යය සාර්ථක කරනවා.
ඉදිරි වසර 3 සඳහා වසරකට ඩොලර් මිලියන 450 බැගින් ඕසෝන් සංරක්ෂණ කටයුතු වෙනුවෙන් හිමි වෙනවා. මේ මුදල් නිසි කළමනාකරණයෙන් යුතුව පරිහරණය කිරීමේ වගකීම අපට පැවරෙනවා.
අපේ රටේ අධෝරක්ත කිරණ මධ්‍යස්ථානයක් ඉදි කිරීමට අප යෝජනා කළා. මෙරටට භූගෝලීය වශයෙන් හිමි ව තිබෙන වැදගත්කම සලකා එම අවස්ථාව අපට හිමි කර දීමට හේතු වී තිබෙනවා.
පසුගියදා අප ඉදිරිපත් කළ චිරස්ථායි පාරිසරික දර්ශකය ලොව විශාල පිළිගැනීමකට ලක්ව තිබෙනවා.
අපේ රටේ එක් පුද්ගලයකු ඩොලර් මිලියන 300ක් විදේශයන්ට ණයයි. එහෙත් දියුණු රටවල් අපේ පරිසරයට කර තිබෙන විනාශය නිසා අපට ණයයි. ඒ අනුව විදේශ රටවල් අපට ණය බව පෙන්වා දීමට අප නිර්භීත විය යුතුයි.
පාරිසරික ක්‍ෂේත‍්‍රයේ නම් ජාත්‍යන්තර වශයෙන් අපට කිසිම බලපෑමක් කළ නොහැකියි. පසුගියදා ජී. එස්. පී. ප්ලස් සඳහා පැවැති සාකච්ඡාවල දී අප රටට නොයෙක් කොන්දේසි පැනවීමට උත්සාහ කළත් පාරිසරික අංශයෙන් කිසිඳු කොන්දේසියක් පැනවූයේ නෑ.
ජාතික හෙළ උරුමය පාර්ලිමේන්තු මන්තී‍්‍ර එල්ලාවල මේධානන්ද හිමියෝ අනුශාසනාවක් කළ අතර ජාතික නිදහස් පෙරමුණු මන්තී‍්‍ර විමල් වීරවංශ මහතා ඇතුළු මැති ඇමැතිවරු රැසක් මේ අවස්ථාවට සහභාගි වූහ.