භක්ති ධර්මපි‍්‍රය මෙන්ඩිස් පුනරින් සිට
පුනරින් පරන්තන් මාර්ගයේ ඉදිරියට ඇදෙන 58 වන සේනාංකයේ සෙබළු කිලෝමීටර් 3 ක් දිගැති කොටින්ගේ ගුවන් පථයක් ඊයේ (20) සොයා ගැනීමට සමත් වූහ.
අඩි 40ක් පමණ පළලැති මෙම ගුවන් පථය කොටි ත‍්‍රස්තවාදීන් ප‍්‍රධාන මාර්ගයක් උපයෝගී කර ගනිමින් සකස් කර තිබෙනු දක්නට ලැබිණි.
පුනරින් පරන්තන් මාර්ගයේ පුනරින් සිට කිලෝමීටර් 13ක් දුරින් මෙම ගුවන් පථය සකස් කර තිබුණි. ගුවන් පථය දෙපස සුදු පැහැති කොන්කී‍්‍රට් කණු සිටවා ඒවා තද සුදු වර්ණයෙන් තීන්ත ආලේප කර තිබූ අතර දුර සිට පැහැදිලිව පෙනෙන සේ සකස් කර ඇත.
මෙම ගුවන් පථය කොටි ත‍්‍රස්තවාදීන් ප‍්‍රධාන මාර්ගයක සකස් කර ඇත්තේ හමුදාව නොමග යැවීම සඳහා බව හමුදා නිලධාරීන් සඳහන් කරයි.
ගුවන් පථය සකස් කිරීම සඳහා කොටි ත‍්‍රස්තවාදීන් විසින් රාජ්‍ය නොවන සංවිධාන වලින් ලබා දුන් භාණ්ඩ උපයෝගී කර ගෙන තිබූ ආකාරය පැහැදිලිව දැක ගත හැකි විය.
පුනරින් - පරන්තන් මාර්ගයේ පිහිටි නෙවිල් ගම්මානය ආසන්නයේ මෙම ගුවන් පථය සකස් කර තිබූ අතර ගම්මානයේ වැසියන් කොටින් විසින් බලහත්කාරයෙන් එලවා දමා ඇත.
උතුරේ මානුෂික මෙහෙයුම් වල නිරත යුද හමුදාවෝ සොයාගත් දෙවන ගුවන්පථය මෙය වේ. මේ අතර පුනරීන් හි සිට අඩම්පන් දෙසට කිලෝමීටර් 14 ක් ඉදිරියට ගමන් කිරීමට 58 වැනි සේනාංකයේ සෙබළුන් ඊයේ (20) වන විට සමත් වී තිබේ.
කොටින්ගේ ප‍්‍රබල කඳවුරු කිහිපයක් අත්පත් කර ගනිමින් 58 වැනි සේනාංකය පරන්තන්දෙසට ගමන් කරමින් සිටින බව 58 වැනි සේනාංකාධිපති බි‍්‍රගේඩියර් ශවේන්ද්‍ර සිල්වා මහතා පවසයි.
Subscribe to:
Post Comments (Atom)
No comments:
Post a Comment