ඡායා අගමැති’ වජිර බව ගයන්ත කියයි

ශ‍්‍රී ලංකාවේ තෙවැනි විධායක ජනාධිපති ඩිංගිරි බණ්ඩා විජේතුංග (ඩී. බී. විජේතුංග) මහතාගේ දේහය පිළිබඳ අවසන් කටයුතු ඊයේ සවස පූර්ණ රාජ්‍ය ගෞරව සහිතව මහනුවර ගැටඹේ කී‍්‍රඩාංගණයේදී සිදු කෙරිණි.
විජේතුංග මහතා වචනයේ පරිසමාප්ත අර්ථයෙන්ම ගැමියෙකි. ඔහු රටේ අගමැති ජනාධිපති වුවද ඔහුගේ ගැමිකම කිසි විටෙක විජේතුංග මහතා අමතක නොකළේය.
ඔහු හැමවිටම තරුණ දේශපාලඥයින්ට අත දුන්නේය. විරුද්ධ පක්ෂයේ දේශපාලඥයින් සමගද කි‍්‍රයා කළේ ඉතාමත් සුහද ආකාරයෙනි.
වත්මන් ජනාධිපති මහින්ද රාජපක්ෂ මහතා මන්තී‍්‍රවරයෙකුව සිටි කාලයේද විජේතුංග මහතා ඔහු සමග තිබුණු මිත‍්‍රත්වය මහින්ද රාජපක්ෂ මහතා ජනාධිපති වූ පසුව ද පැවතියේ එකහා සමාන මට්ටමකය.
මහින්ද රාජපක්ෂ මහතා ද ගමෙන් පැමිණි දේශපාලඥයෙකු වශයෙන් ගැමිකම හොඳින් හඳුනන ඩී. බී. විජේතුංග මහතා නිතරම අගය කෙළේය.
ඩී. බී. විජේතුංග මහතාගේ දුක සැප නිතරම සොයා බැලූ මහින්ද රාජපක්ෂ ජනාධිපතිතුමා විජේතුංග මහතා මිය ගිය පුවත දැන ගන්නා විට සිටියේ ඇමෙරිකාව බලා ගමන් කරමින්ය.
විජේතුංග මහතාගේ පවුලේ සාමාජිකයින් වෙත ශෝකය පළ කළ ජනාධිපතිතුමා අගමැති ප‍්‍රමුඛ ඇමැතිවරුන්ට දැනුම් දුන්නේ පූර්ණ රාජ්‍ය ගෞරව සහිතව අවමගුල් උත්සවය පැවැත්වීමට අවශ්‍ය කටයුතු සලසන ලෙසයි.
විජේතුංග හිටපු ජනාධිපතිවරයාගේ අභාවය ගැන දැනගන්නා විට විපක්ෂ නායක රනිල් වික‍්‍රමසිංහ මහතා සිටියේ කුලියාපිටියේ පිහිටි තම වත්ත වෙත ගමන් කරමින්ය.
රනිල් වික‍්‍රමසිංහ මහතාට මෙම පණිවුඩය දැනුම් දුන්නේ එක්සත් ජාතික පක්ෂයේ මහ ලේකම් තිස්ස අත්තනායක මහතා විසිනි.
ඒ විගසම මහනුවර අවට සිටි මන්තී‍්‍රවරුන්ට දුරකථනයෙන් කථා කළ රනිල් වික‍්‍රමසිංහ මහතා කියා සිටියේ මහනුවර රෝහලට ගොස් අවශ්‍ය කටයුතු සොයා බලන ලෙසයි.
විජේතුංග මහතා ප‍්‍රතිකාර ලබමින් සිටින අතරතුර මිය ගියේ මහනුවර මහ රෝහලේදීය. එක්සත් ජාතික පක්ෂයේ ප‍්‍රජාතන්ත‍්‍රවාදී කණ්ඩායමේ නායක කරූ ජයසූරිය, රාජිත සේනාරත්න සහ ඇමැතිවරුන් ඇතුළු පිරිස විජේතුංග හිටපු ජනාධිපතිතුමාගේ අභාවය දැනගත් විගස ඊට අදාළ කටයුතු පිළිබඳ සොයා බැලීමට පියවර ගත්හ.
දිගු කලක් මෙරට ජනතාවට විශාල සේවයක් කරමින් හිටපු ජනාධිපතිවරයෙකු ලෙස අවසන් ගමන් යන ඩී. බී. විජේතුංග මහතා පිළිබඳ මතකය දේශපාලන ක්ෂේත‍්‍රයේ දීර්ඝ කාලයක් පවතිනු ඇත.
එ. ජා. සමුළු සැසිවාරයට ධම්ම පදයෙන් ගාථාවක්
එක්සත් ජාතීන්ගේ 63 වෙනි සමුළුව ජනාධිපති මහින්ද රාජපක්‍ෂ මහතා භාෂා තුනෙන් ඇමතීමත් බුදුරජාණන් වහන්සේ දේශනා කරන ලද ධම්මපදයේ ගාථාවකින් දේශනය අවසන් කිරීමත් බොහෝ දෙනෙකුගේ අවධානයට ලක්විය.
ත‍්‍රස්තවාදී ගැටලුවටත්, ආහාර අර්බුදයටත් සාර්ථකව මුහුණ දෙන රටක් ලෙස ශී‍්‍ර ලංකාව ලෝක ප‍්‍රජාවගේ දැඩි අවධානයට ලක්වන තිබෙන අවස්ථාවක ශී‍්‍ර ලංකා ජනාධිපතිවරයාගේ දේශනයට කොයි කාගේත් එල්ල වී තිබුණේ දැඩි අවධානයකි.
ත‍්‍රස්තවාදය ලෝකයටම විශාල ගැටලුවක්ව පවතින අවස්ථාවේදී එය නැති කිරීමේ වැදගත්කම ජනාධිපතිතුමා පෙන්වා දුන්නේය.
දෙමළ ජනතාවගේ සියලු අයිතීන් යටපත් කරන කොටි ත‍්‍රස්තවාදය නැති කිරීමට ගෙන ඇති පියවර වෙනත් රටවල රාජ්‍ය නායකයින්ගේ ද පැසසුමට ලක්විය.
මේ වන විට දෙමළ ජනතාව දැඩි ලෙස කොටි සංවිධානය ප‍්‍රතික්ෂේප කරන තැනකට පැමිණ සිටීමද විශේෂත්වයකි. මුළු රටම ත‍්‍රස්තවාදයෙන් මුදා ගන්නා දිනය වැඩි ඈතක නොවන බවද ජනාධිපතිතුමා අවධාරණය කර සිටියේය.
සිංහල දෙමළ ශී‍්‍ර ලාංකික ජනතාවගේ භාෂාවන් බවත් එම භාෂා දෙකම නිල රාජ්‍ය භාෂා වශයෙන් පිළිගෙන තිබෙන බව ජනාධිපතිතුමා කියා සිටියේ දෙමළ භාෂාවෙන් වීම තවත් විශේෂත්වයකි.
ධම්ම පදයේ ගාථාවක් කියමින් ජනාධිපතිතුමා දේශනය අවසන් කරන විට බොහෝ දෙනෙකුගේ අවධානය ඒ වෙත යොමු වී තිබුණි. ඇමෙරිකාවේ ජීවත්වන සිංහල, දෙමළ ශී‍්‍ර ලාංකිකයින් තම පවුල් පිටින් පැමිණ ජනාධිපතිතුමා හමුවීමද විශේෂත්වයකි.
එක්සත් ජාතික පක්ෂයේ පාර්ලිමේන්තු මන්තී‍්‍ර කණ්ඩායමේ රැස්වීම පසුගිය 22 වෙනිදා පාර්ලිමේන්තු සංකීර්ණයේදී රැස්වූයේ විපක්ෂ නායක රනිල් වික‍්‍රමසිංහ මහතාගේ ප‍්‍රධානත්වයෙනි. ඩී.බී.විජේතුංග හිටපු ජනාධිපතිවරයා වෙනුවෙන් ප‍්‍රථමයෙන්ම මෙහිදී ශෝකය පළ කරන්නට විය.
ඡායා කැබිනට්ටුවක් සකස් කිරීමට වන ජේ්‍යෂ්ඨයින්ගේ නිර්දේශ රැස්වීමට ඉදිරිපත් කරන ලද්දේ විරුද්ධ පක්ෂයේ ප‍්‍රධාන සංවිධායක ජෝශප් මයිකල් පෙරේරා මහතා විසිනි.
ඡායා කැබිනෙට්ටුවේ මන්තී‍්‍රවරුන්ට විෂය බෙදාදීම ගැන මෙහිදී දීර්ඝ වශයෙන් සාකච්ඡා කෙරිණි. 'නායකතුමනි, මන්තී‍්‍රවරුන්ට බෙදා දෙන විෂයන්ට අනුවද යූ.ඇන්.පී. ආණ්ඩුවක් ආවොත් ඇමැතිකම් ලබා දෙන්නේ" දැයි විමසුවේ දයාසිරි ජයසේකර මන්තී‍්‍රවරයා විසිනි.
දයාසිරි ජයසේකර මන්තී‍්‍රවරයාගේ කතාවට බොහෝ දෙනෙකුගේ අවධානය යොමු විය. ඉස්සරවෙලාම අපි කරන්න ඕන ආණ්ඩුවක් හදන එකයි.
මන්තී‍්‍රවරුන් ඡායා කැබිනෙට්ටුවේදී දක්වන කැපවීම මතයි ඇමැතිකම් ලබාදීම රඳ්‍ර පවතින්නේ. තමන් උනන්දුවක් දක්වන ජාලයන් 3ක් ගැන දැනුම් දෙන්න.
ඒවාට පත්කරන මන්තී‍්‍රවරුන්ට පමණයි, අදාළ උපදේශක කාරක සභාවටත් , පාර්ලිමේන්තුවේදීත්, ඉන් පිටතදීත් අදහස් දක්වන්න හැකි වෙන්නේ." යනුවෙන් ඡායා කැබිනෙට්ටුව ගැන දීර්ඝ විස්තරයක් කෙළේ විපක්ෂ නායක රනිල් වික‍්‍රමසිංහ මහතාය.
මේ අවස්ථාවේදී රංජිත් මද්දුමබණ්ඩාර මන්තී‍්‍රවරයා ගයන්ත කරුණාතිලක මන්තී‍්‍රවරයාගෙන් විමසා සිටියේ ඡායා අගමැති හෙවත් අගමැති විෂය භාර දෙන්නේ කාටද? කියායි.
එම ස්ථානයේ සිටි වජිර අබේවර්ධන මන්තී‍්‍රවරයා පෙන්නමින් ගයන්ත කරුණාතිලක මන්තී‍්‍රවරයා කියා සිටියේ "මේ ඉන්නේ අපේ ඡායා අගමැතිතුමා" කියායි.
මේ කතාවට වජිර අබේවර්ධන, මහ ලේකම් තිස්ස අත්තනායක යන මන්තී‍්‍රවරුට සිනහ ගියහ. ගයන්ත කරුණාතිලක මන්තී‍්‍රවරයාගේ ඡායා අගමැතිගේ කතාව විපක්ෂ නායක රනිල් වික‍්‍රමසිංහ මහතාට නම් ඇසුණේ නැත.
"මානෙල් මල්" වවුනියාවට
රණවිරුවන්ගේ දුක සැප සොයාබැලීම සඳහා 'මානෙල් මල්' ව්‍යාපාරයේ නියමුවෝ පසුගිය සෙනසුරාදා වවුනියාව බලා පිටත් වූහ. ඔවුන් වවුනියාවට ගියේ නිකම්ම නොවේ.
ඔවුන් ගියේ 'ජයෝදයේ රණඝෝෂා' රථ පෙරහර වටා ඒකරාශි වූ ජනතාව ලබාදුන් තෑගි බෝග ආශිර්වාද කිරීම සඳහා පිරිත් පැන් හා පිරිත් නූල් ද රැගෙනය.
රණවිරුවන්ට ලබාදීම සඳහා 'හෙළබිම පදනම' වැහිකබා තොගයක්ද පරිත්‍යාග කර තිබිණි. ඊට අමතරව උතුරේ ත‍්‍රස්තවාදී ග‍්‍රහණයෙන් මිදී සිවිල් පාලනය සහිත ප‍්‍රදේශ වෙත එන ජනතාවට පරිත්‍යාග කිරීම සඳහා වියළි ආහාර ද්‍රව්‍ය හා ඇඳුම් පැළඳුම් ද ඔවුන් රැගෙන ගොස් තිබිණ.
වවුනියාවේ පිහිටි ශ‍්‍රී ලංකා යුද හමුදාවේ 56 වෙනි සේනාංකය වෙත පැමිණි පිරිස පිළිගන්නා ලද්දේ එම සේනාංකයේ සේනාංකාධිපති මේජර් ජෙනරාල් කේ. සී. රඹුක්පොත මහතා විසිනි.
අධිනීතිඥ එස්. එල්. ගුණසේකර, විමල් වීරවංශ, මහාචාර්ය උපාලි ජයසේකර, බුද්ධදාස විතනාරච්චි, සිරිල් වික‍්‍රමගේ, කර්නල් අනිල් සමරසේකර යන 'මානෙල් මල්' ව්‍යාපාරයේ නායකයෝ ද බෙංගමුවේ නාලක හා කොටපොල මංගල යන හිමිවරු ද මෙම අවස්ථාවට සහභාගි වූහ.
අනතුරුව 563 වෙනි බල සේනා මූලස්ථානයේ සංවිධාන කර තිබුණු උත්සවයකට මෙම පිරිස සහභාගි වූහ. 563 වෙනි බල සේනා මූලස්ථානයේ බල සේනාධිපති ලෙෆ්ටිනන්ට් කර්නල් ජාලිය සේනාරත්න මහතා ඇතුළු නිලධාරීහු පිරිසක් ද මෙම අවස්ථාවට එක්ව සිටියහ.
මෙහිදී බෙංගමුවේ නාලක හිමියන් රණවිරුවන්ට ආශිර්වාද කළ අතර 'මානෙල් මල්' ව්‍යාපාරයේ කැඳවුම්කරු එස්. එල්. ගුණසේකර මහතා ද මෙම අවස්ථාවට සහභාගි වූයේය.
ඉන් අනතුරුව මානෙල් මල් ව්‍යාපාරයේ නායකයින් ගමන් කළේ ඕමන්තේ ඉදිරි ආරක්ෂක වළල්ල වෙතය. එහි සිට හමුදා සෙබළුන්ට ආශිර්වාද කළ පිරිස නැවත වවුනියාව වෙත පැමිණ මන්නාරම මාර්ගය ඔස්සේ ගජසිංහපුර පිහිටි 21 වැනි සේනාංකය වෙත පැමිණියහ.
එහිදී පිරිස පිළිගන්නා ලද්දේ 21 වැනි සේනාංකයේ සේනාංකාධිපති බි‍්‍රගේඩියර් ප‍්‍රියන්ත ජයසුන්දර මහතා විසිනි.
අවතැන්වූවන් ගැන ජනපතිගේ අවධානය
ජනාධිපති මහින්ද රාජපක්ෂ මහතා එක්සත් ජාතීන්ගේ 63 වෙනි සැසිවාරයට සහභාගිවීම සඳහා අමෙරිකාව බලා පිටත්ව යාමට පෙර ඇමැතිවරුන් හා නිලධාරින්ගේ සහභාගිත්වයෙන් අරලියගහ මන්දිරයේදී පැවති රැස්වීමකට සහභාගි වූහ.
මහින්ද සමරසිංහ, බැසිල් රාජපක්ෂ, ලලිත් වීරතුංග යන මහත්වරුන් ඇතුළු පිරිසක් මීට සහභාගි වූහ. කොටි ත‍්‍රස්තවාදීන්ගෙන් මිදී රජයේ පාලන ප‍්‍රදේශවලට පැමිණෙන සියලු වැසියන්ට ලබා දිය යුතු සියලු පහසුකම් ලබාදීමට අවශ්‍ය සෑම පියවරක්ම ගන්නා ලෙස ජනාධිපතිතුමා උපදෙස් ලබා දුන්නේ ය.
දැනට එම ජනතාව වෙනුවෙන් සලසා ඇති සියලු පහසුකම් සම්බන්ධයෙන් මහින්ද සමරසිංහ අමාත්‍යවරයා විසින් ජනාධිපතිතුමා දැනුවත් කරන ලදි. රජයේ පාලනයට අයත් නොවන ප‍්‍රදේශවල ජීවත්වන වැසියන්ට අවශ්‍ය පහසුකම් ලබාදීමට ගෙන ඇති පියවරද ඇමැතිවරයා පැහැදිලි කෙළේ ය.
කිළිනොච්චියේ ජනතාව ජාත්‍යන්තර සමුළුවකට
2006 වසරට පෙර ගැටුම්වලින් අවතැන්වූවන් ගැන සොයා බැලෙන ජාත්‍යන්තර සම්මන්ත‍්‍රණයක් කොළඹදී පැවැත්විණි. එක්සත් ජාතින්ගේ සංවිධානයේ මහ ලේකම් බින්කී මුන් මහතා නියෝජනය කරමින් වෝල්ටර් ක්ලීන් මහත්මියද මීට සහභාගි විය.
රිෂාඩ් බද්යුදීන් අමාත්‍යවරයා ඇතුළු පිරිසක් ද මීට සහභාගි වූහ.
මෙහි ඇති විශේෂත්වයක් වන්නේ වවුනියාව, කිළිනොච්චිය නියෝජනය කරමින් සාමාන්‍ය වැසියන් සහභාගි වීමයි. කොළඹ දරුණු බවත් මෙයට සහභාගි නොවන ලෙසත් පිරිසක් තමන්ට දැන් වූ බවත් කොළඹට පැමිණි පසු එම කතා සියල්ල බොරු වූ බවත් මෙම පිරිස මෙම සමුළුවේදී ප‍්‍රකාශ කිරීම තවත් විශේෂත්වයකි.
වෘත්තීය සමිති ගැන බි‍්‍රතාන්‍ය මහකොමසාරිස් ලාල්කාන්තගෙන් අසයි
ශී‍්‍ර ලංකාවේ බි‍්‍රතාන්‍ය මහ කොමසාරිස් පීටර් රිචඩ් මහතා පසුගියදා 23 වෙනිදා පැලවත්තේ පිහිටි ජනතා විමුක්ති පෙරමුණේ පක්ෂ මූලස්ථානයට පැමිණියේ කේ. ඩී. ලාල්කාන්ත මන්තී‍්‍රවරයා හමුවීමටය.
ශී‍්‍ර ලංකාවේ වෘත්තිය සමිති ව්‍යාපාරය ගැන පැහැදිලි කළ ලාල්කාන්ත මන්තී‍්‍රවරයා කියා සිටියේ තම පක්ෂයේ සහාය නොමැතිව ජාතික මට්ටමේ වෘත්තිය සමිති කි‍්‍රයා මාර්ග සිදුකිරීමට නොහැකි බවයි.
ජාතික නිදහස් පෙරමුණ ගැන ලාල්කාන්ත මන්තී‍්‍රවරයාගෙන් ඇසීමටද බි‍්‍රතාන්‍ය මහ කොමසාරිස්වරයා අමතක නොකළේය. " තවත් දේශපාලන පක්ෂයකට ශී‍්‍ර ලංකාවේ ඉඩකඩක් නැහැ.
නව පක්ෂ පිහිටෙනවානම් බිහිවෙන්නේත් පවතිනවානම් පවතින්නේත් කාටහරි හේත්තුවෙලා ඉන්න විතරයි' යනුවෙන් ලාල්කාන්ත මන්තී‍්‍රවරයා පිළිතුරු දුන්නේය.
පක්ෂ නායක රැස්වීම
පක්ෂ නායක රැස්වීම පසුගිය අඟහරුවාදා දහවල් 12.30 ට පාර්ලිමේන්තු සංකීර්ණයේදී රැස්වුණේ කථානායක වි. ජ. මු. ලොකුබණ්ඩාර මහතාගේ ප‍්‍රධානත්වයෙනි.
ඩබ්ලිව්. ඩී. ජේ. සෙනෙවිරත්න, දිනේෂ් ගුණවර්ධන, අනුර ප‍්‍රියදර්ශන යාපා, ඩිව් ගුණසේකර යන අමතා්‍යවරු ආණ්ඩු පක්ෂය වෙනුවෙන් සහභාගි වූහ. විරුද්ධ පක්ෂය වෙනුවෙන් සහභාගි වූයේ ජෝශප් මයිකල් පෙරේරා, අනුර දිසානායක, විමල් වීරවංශ යන මන්තී‍්‍රවරුන්ය.
මෙහිදී මූලිකව කතාබහ කෙළේ අභාවප‍්‍රාප්ත ඩී. බී. විජේතුංග හිටපු ජනාධිපතිවරයාට ගෞරව දැක්වීම සඳහා 25 වෙනිදා පාර්ලිමේන්තුවේ කටයුතු අත්හිටුවීමට තීරණය කිරීම පිළිබඳවයි.
එදින විජේතුංග මහතාගේ දේහය පාර්ලිමේන්තුව සංකීර්ණයට ගෙනවිත් ගෞරව දැක්වීමටත් එදින පාර්ලිමේන්තු රැස්වීම් නොපැවැත්වීමටත් තීරණය කෙරිණ.
විශ‍්‍රාමිකයින්ගේ වැටුප් විසමතා ගැටලුව පිළිබඳව සාකච්ඡා කිරීමට අපට කාලය අවශ්‍යයයි" යනුවෙන් විමල් වීරවංශ මන්තී‍්‍රවරයා පැවසීය.
ජනතා විමුක්ති පෙරමුණ හා ජාතික නිදහස් පෙරමුණ යන පක්ෂ දෙකටම මෙසේ විවාදය සඳහා කාලය වෙන් කිරීමෙන් එක්සත් ජාතික පක්ෂයට අවාසියක් සිදුවන බව පවසමින් ඊට විරුද්ධ වූයේ විරුද්ධ පක්ෂයේ ප‍්‍රධාන සංවිධායක ජෝශප් මයිකල් පෙරේරා මහතාය.
එම අදහස පිළිගත් විමල් වීරවංශ මහතා කියා සිටියේ ජාතික නිදහස් පෙරමුණට මන්තී‍්‍රවරුන් 12 දෙනෙකු සිටින නිසා තම පක්ෂයට ප‍්‍රමාණවත් කාලයක් අවශ්‍ය බවයි.
අවසානයේදී තීරණය වූයේ "විශ‍්‍රාමිකයින්ගේ වැටුප් විසමතා ගැටලුව" පිළිබඳ ප‍්‍රශ්නය සිකුරාදා (අද) දින සවස 2.00 සිට 4.30 දක්වා පාර්ලිමේන්තුවේ විවාදයට ගැනීමටය.
ජාතික නිදහස් පෙරමුණේ පාර්ලිමේන්තු මන්තී‍්‍ර කණ්ඩායම පසුගිය අඟහරුවාදා උදෑසන 8.30 ට පාර්ලිමේන්තු සංකීර්ණයේදී රැස්වූහ.
විමල් වීරවංශ, නන්දන ගුණතිලක, පියසිරි විජේනායක මන්තී‍්‍රවරුන්ගේ මූලිකත්වයෙන් රැස්වීම ඇරඹිණ. මේ වන විට සමාජයේ වැඩිපුර කතාබහ වෙන මාතෘකා ගැන අවධානය යොමු කෙරිණි.
ආණ්ඩුව ඛනිජ තෙල් සඳහා වූ බදු වැඩිකර ඇති බව පෙන්වා දුන්නේ වීරකුමාර දිසානායක මන්තී‍්‍රවරයාය. "පසුගියදා පාර්ලිමේන්තුවේදී සිදුකළ විශේෂ ප‍්‍රකාශයක් මගින් මා ඉල්ලා සිටියා, තෙල් මිල අඩුකරන තෙක් ඉන්දියානු තෙල් සමාගම ලබන අතිරේක ලාභය රජයට ලබාගැනීමට අතිරේක බද්දක් අයකරන්න කියලා.
ඒ බද්ද තමයි මේ අයකරන්නේ" යනුවෙන් පෙන්වා දුන්නේ විමල් වීරවංශ මන්තී‍්‍රවරයායි. මෙම අතිරේක බද්ධ අයකිරීම කල්තියා දැනගත් ඉන්දියානු තෙල් සමාගම තෙල් නැව් දෙකක තෙල් රැගෙන ඇති බව මොහොමඩ් මුසම්මිල් මන්තී‍්‍රවරයා පෙන්වා දුන්නේය.
විමල් වීරවංශ මන්තී‍්‍රවරයා ඊට පිළිතුරු ලබාදෙමින් කියා සිටියේ ශී‍්‍ර ලංකා මහ බැංකුවේද ඉන්දියානු තෙල් සමාගමේ ඒජන්තයෙකු සිටින බවයි. විශ‍්‍රාමිකයින්ගේ වැටුප් විසමතා ගැන පාර්ලිමේන්තුවේදී ඉල්ලා තිබෙන විවාදය ගැන ද වීරවංශ මහතා මතක් කෙළේය.
එය ඉතා කාලීන ප‍්‍රශ්නයක් බව පවසමින් එම විවාදය පැවැත්විය යුතුයි කියන යෝජනාව ස්ථිර කරනු ලැබුවේ දීපාල් ගුණසේකර මන්තී‍්‍රවරයා විසිනි.
බඩගිනි සිංහයා
මෙම පාර්ලිමේන්තු මන්තී‍්‍ර කණ්ඩායම් රැස්වීමේදී විමල් වීරවංශ මහතා විශේෂ කරුණක් අවධාරණය කෙළේය. "අපි බඩගිනි සිංහයෙක් වගේ අහුවෙන අහුවෙන ගොදුර ගිලින ප‍්‍රතිපත්තියක සිටිය යුතු නැහැ.
තරගයකට වාගේ වෙනත් අය තෝරන කි‍්‍රයා මාර්ගවලට අපි කි‍්‍රයාමාර්ග තේරිය යුතු නැහැ. එහෙම වුණොත් ඔවුන් පරදිනවිට අපටත් පරදින්නයි, වෙන්නේ.' යනුවෙන් විමල් වීරවංශ මන්තී‍්‍රවරයා පෙන්වා දුන්නේ ය.
තම පක්ෂය කි‍්‍රයා මාර්ග තේරිය යුත්තේ මෙරට කේන්ද්‍රීය ප‍්‍රශ්නය වූ ජාතික ගැටලුව පිළිබඳවද සලකා බලමින් බව විමල් වීරවංශ , නන්දන ගුණතිලක යන මන්තී‍්‍රවරු තම සගයින්ට අවධාරණය කළහ.
තක්කඩි සක්විති
අහිංසක ජනතාවගේ රුපියල් කෝටි 900කට අධික මුදලක් වංචාකරන ලදැයි කියන 'සක්විති' කියා පුද්ගලයෙක් ගැන පසුගිය දිනවල මුළු රටේම අවධානය යොමු විය. මෙම සක්විතිවරයා ගැන පාර්ලිමේන්තුවේදී ද කතාබහ කෙරිණි.
"මේ රටේ අහිංසක මිනිසුන්ගේ රුපියල් කෝටි 900 කට අධික මුදලක් හොරකම් කරන ලදැයි කියන සක්විතිවරයෙක් රටින් පැනල ගිහිල්ලා මේ තරම් දෙයක් වෙනකම් වගකිවයුත්තන් මොකද කළේ යනුවෙන් විමල් වීරවංශ මහතා ආණ්ඩු පක්ෂයෙන් විමසා සිටියේ ය.
ඒ සම්බන්ධයෙන් නීතිය කි‍්‍රයාත්මක කර ඇති බව ආණ්ඩු පක්ෂයේ නියෝජිතයෝ පැවසූහ. වීරවංශ මහතා මෙම ප‍්‍රශ්නය ඉදිරිපත් කළේ එක්සත් ජාතික පක්ෂයේ මන්තී‍්‍රවරයෙකු ඉදිරිපත් කරන ලද ප‍්‍රශ්නයකට අතුරු ප‍්‍රශ්නයක් හැටියටයි.
මෙවැනි වංචා සිදුවීමට වගකීමකින් තොරව ඇතැම් මාධ්‍ය ලබාදෙන ප‍්‍රචාරයන්ද බලපාන බව කථානායක වි. ජ. මු. ලොකුබණ්ඩාර මහතා කියා සිටියේය.
"ගරු කථානායකතුමනි, ජනමාධ්‍යවලටද යම් වගකීමක් තියෙනවා. නමුත් ඒ පළකරන දැන්වීම් පිළිබඳ සොයා බැලීම මහ බැංකුව සතු වගකීමක්.
ජනතාවගෙන් මුදල් රැස්කරන්න දැන්වීම් දානකොට මහ බැංකුව කියන්න ඕන තමන් ඒ ආයතනය පිළිගන්නවාද? නැද්ද? කියලා එහෙම සඳහනක් තිබුණානම් මෙවැනි දෙයක් නොවන්න ඉඩ තිබුණා." යනුවෙන් පැවසුවේ විමල් වීරවංශ මන්තී‍්‍රවරයා ය.
එකම චීනයක්
ජනතා විමුක්ති පෙරමුණේ පාර්ලිමේන්තු මන්තී‍්‍ර කණ්ඩායම පසුගිය බදාදා පෙරවරවේ රැස්වූයේ පැලවත්තේ පිහිටි පක්ෂ මූලස්ථානයේදී ය. ලබන 30 වැනිදා චීනයේ ජාතික දිනය වෙනුවෙන් කොළඹදී උත්සවයක් පවත්වනවා.
ඒකට සහභාගි වෙන්න ඕන. දිරියේදී ටිබෙටයත් ජාත්‍යන්තර සමුළු චීනයට එරෙහිව පවත්වන්න සැලසුම් කරනවා. ඒවට සහභාගි වෙනන එපා කියලා චීන තානාපති කාර්යාලය විදේශ කටයුතු අමාත්‍යංශය හරහා දැනුම් දීලා තිබෙනවා.
අපි ඒවට යන්නේ නැහැ. අපි පිළිගන්නේ එකම චීනයක්' පමණක් යනුවෙන් අදහස් දැක්වූයේ විජිත හේරත් මන්තී‍්‍රවරයාය.
ඩබ්ලිව්. කේ. ප‍්‍රසාද් මංජු