එල්. ටී. ටී. ඊ. ත‍්‍රස්තවාදීන් සමඟ රජයට සාකච්ඡා කළ හැකි වන්නේ ඔවුන් අවි බිම තබා යුදමය හැකියාවන් විසුරුවා හැර ප‍්‍රජාතන්ත‍්‍රවාදයට පිවිසුණොත් පමණක් බව ජනාධිපති මහින්ද රාජපක්‍ෂ මහතා එක්සත් ජාතීන්ගේ 63 වැනි සැසිවාරය අමතා පැවසීය.
ජනපති මෙසේද කීවේය.
සභාපතිතුමනි, මෙම උසස් පදවියට පත් වූ ඔබතුමන්ට ශී‍්‍ර ලංකාවෙන් උණුසුම් සුභපැතුම්.
මිනිස් වර්ගයාට මුහුණදීමට සිදුවී ඇති වැදගත් ප‍්‍රශ්නවලට විසඳුම් සෙවීමට ඔබතුමන්ගේ මඟ පෙන්වීමෙන් මේ ජගත් සමුළුවට හැකිවේවි. එසේම බිලියන ගණනක් වන ලෝක ප‍්‍රජාවගේ ජීවිත වඩා අර්ථවත් කර ගැනීමට එක්සත් ජාතීන්ගේ සංගමයට මග පෙන්වීමටත් ඔබතුමන්ට හැකි වේ යැයි අපේ විශ්වාසයයි.
අද අපි කථා කරන තේමාව ලෝකයේ සමහර ජන කොටස්වල දිළිඳුකම හා කුසගින්න කෙරෙහි මොන ආකාරයට ගෝලීය ආහාර අර්බුදය බලපෑ හැකිද යන්නත්, එක්සත් ජාතින්ගේ සංගමය වඩාත් ප‍්‍රජාතන්ත‍්‍රවාදී බවට පත් කරන්නේ කෙසේද යන්නත් සැබවින්ම දූරදර්ශි ප‍්‍රවේශයක්.
එය මිනිස් සංහතියේ ඉදිරි පැවැත්ම කෙරෙහි වාගේම, එක්සත් ජාතින්ගේ සංවිධානයේ වැදගත් ආයතනික අවශ්‍යතාවන් කෙරෙහි ද අවධානය යොමු කෙරෙනවා.
අද පවත්නා ලෝක ආහාර අර්බුදය අවාසනාවන්ත ලෙස භයානක යථාර්ථයක් බවට පත් වී තිබෙනවා. අප විසින් මේ පිළිබඳව සාමුහික මෙන්ම හදිසි කි‍්‍රයාමාර්ගයන් නොගතහොත් එය තිබෙනවාටත් වඩා බැරෑරුම් තත්ත්වයකට පත්වීමට බොහෝ සෙයින් ඉඩකඩ තිබෙනවා. එමෙන්ම, ප‍්‍රජාතන්ත‍්‍රවාදී බව දියාරු වූ එක්සත් ජාතීන්ගේ සංවිධානයේත් මතු පැවැත්ම තීරණාත්මක අවස්ථාවකට එළඹ තිබෙනවා.
දකුණු ආසියානු කලාපයට බලපෑම් ඇති කළ හැකි ව්‍යාපෘති තුළින් කෘෂිකර්මයට හා කෘෂිකාර්මික පර්යේෂණවලට වැඩියෙන් ආයෝජනය කිරීමෙනුත්, විශිෂ්ට ක‍්‍රමවේදයන් සහ තාක්ෂණයන් බෙදාහදා ගැනීමෙනුත්, විශාල දායකත්වයක් සැපයීමට ශී‍්‍ර ලංකාව බලාපොරොත්තු වෙනවා. මෙය සංවර්ධනය වන රටවල ජීවත් වන ග‍්‍රාමීය ජනතාව සවිබල ගැන්වීමට අත්‍යවශ්‍ය සාධකයක් බැව් අමතක නොකළ යුතුයි.
සංවර්ධනය වන රටවල සිටින ජනතාවගෙන් බහුතරයක් ග‍්‍රාමීය ප‍්‍රදේශවල ජීවත් වීමත් ඒවාගේ ම තම ජීවනෝපාය සඳහා කෘෂිකර්මය මත යැපීමත් මෙයට හේතුවයි.
ආහාර සුරක්ෂිතතාව තහවුරු කර ගැනීමට නම් කෘෂිකාර්මික ක්ෂේත‍්‍රය ශක්තිමත් කරමින් එයට නව ජවයක් එකතු කළ යුතුයි. මෙය කළ හැක්කේ කි‍්‍රයාදාමයන් රැසක් ඔස්සේ කුඩා හා මධ්‍ය පරිමාණ ගොවීන් සවිබල ගැන්වීමෙන් පමණයි.
ආහාර අර්බුදයෙන් මිදීමට නම් ස්වයංපෝෂණය කරා අනිවාර්යයෙන්ම යා යුතුයි. ඒ අනුව අපනයන වෙළෙඳ පොළට හුදෙක්ම ද්‍රව්‍ය නිපදවන්නන් ලෙස අප රටවල ගොවි ජනතාව පෙළඹවීම තවදුරටත් කළ යුතු නැහැ. සමාජ ආරක්ෂණ කි‍්‍රයාවලින්ට ප‍්‍රමුඛත්වය දිය යුතුයි. ග‍්‍රාමීය ජනතාව සවිබල ගැන්වීමක් ලෙසයි අප එය දැකිය යුත්තේ. මේ නිසා ඔවුන්ගේ විශ්වාසය ගොඩ නගා ගැනීමටත් අපට පුළුවන් වෙනවා.
අපේ රටේ පොහොර සහානාධාරය, ධීවර සහනාධාරය වැනි සමාජ ආරක්ෂණ කි‍්‍රයා අප දියත් කෙළේ මේ නිසයි. සමහර බලගතු රටවලින් බලගතු ආයතන වලින් අපට මේ පිළිබඳව ලබා දෙන උපදෙස් මීට ප‍්‍රතිවිරුද්ධයි. නමුත් අපි ඒවා ගැන නොතකා අපේ රටවල අහිංසක ජනතාවට හිතකර දේ පමණක් කිරීමට ඉටාගත යුතුයි.
මෑතක දී පැවැත්වූ සාර්ක් රාජ්‍ය නායක සමුළුවේ දී, ආහාර අර්බුදය ජය ගැනීමට කලාපයක් වශයෙන් කි‍්‍රයා කිරීමට අප අධිෂ්ඨාන කරගත් බව එම සංවිධානයේ සභාපති වශයෙන් මා අභිමානයෙන් යුතුව ප‍්‍රකාශ කරනවා.
පෙර දවස ආහාර නිෂ්පාදනය සඳහා අප අනුගමනය කළ වැදගත් ඓතිහාසික කාර්යභාරයන්, යළි පණගන්වමින්, අපගේ කලාපය ලෝකයේ ප‍්‍රමුඛ පෙළේ ධාන්‍යාගාරයක් බවට පත්කිරීම අපේ අරමුණුයි. ඒ සඳහා අප සියලු දෙනාම ඇපකැප වී කි‍්‍රයා කිරීමටත් එකඟ වුණා.
ඒ වාගේම , සාර්ක් කලාප ආහාර බැංකුව පිහිටුවා, කි‍්‍රයාත්මක කිරීමටත්, අප තීරණය කළා. මේ නිසා දකුණු ආසියාතික ජනතාවගේ ආහාර හා පෝෂණ සුරක්ෂිතතාව සහතික කිරීමට අපට හැකි වෙනවා.
ආහාර අර්බුදයෙන් ඇති විය හැකි අහිතකර බලපෑම් වැළැක්වීමට මේ වසරේ ජුනි මස ;ර¤මයේ දී අප විසින් දියත් කළ පුළුල් ප‍්‍රයත්නයටත් මේ නිසා දායකත්වය නිසැකව ලැබෙනවා.
ආහාර අර්බුදයට පිළියම් සොයන අතරේ, බලශක්ති අර්බුදයටත්, සාධාරණ වූත්, ප‍්‍රායෝගික වූත් පිළියම් සොයා ගත යුතුයි. ගුණාත්මක බවින් උසස්, හානිදායක නොවන, ඒ වගේම කාර්යක්ෂම හා වියදම් සාධාරණිකරණය කළ හැකි තාක්ෂණයන් භාවිතා කොට, අපගේ පොසිල ඉන්ධන හා විකල්ප බලශක්ති සැපයීම, නව ක්ෂේත‍්‍රයන්ට යොමු කිරීමත් අවශ්‍ය කරුණක්.
මේ සඳහා අපට දැන් තිබෙන බලශක්තිය අරපිරිමැස්සෙන් භාවිතා කළ යුතු වෙනවා. තව බොහෝ කලක් පොසිල ඉන්ධන මත යැපීමට සිදුවන බවත් අමතක නොකළ යුතුයි.
සංවර්ධනය වෙමින් පවතින රටවලට නව තාක්ෂණය ලබා දීම අත්‍යවශ්‍යයි. එය අවිවාදයෙන් ම පිළිගත යුතුයි. දකුණු ආසියාවේ සංවර්ධනය වෙමින් පවතින මානව හා විද්‍යාත්මක කුසලතා හා සම්පත් භාවිතා කරමින්, අපගේම යැයි කිව හැකි තාක්ෂණයෙන් නිපදවීමට දැන් කාලය ඇවිත්, අපගේ කලාපයේ සුලභව ඇති ස්වභාවික සම්පත් වන හිරු එළියෙන්, සුළගෙන් හා සමුද්‍රයෙන් උපරිම ප‍්‍රයෝජන ලබා ගත යුතුයි.
මිනිස් වර්ගයාගේ අවශ්‍යතාවන්, ලාබ ලැබීමේ පරමාර්ථය පමණක් ඇති ඒකාධිකාරි වෙළෙඳ පොළකට තීරණය කිරීමට තවදුරටත් ඉඩ තැබීමට බැහැ.
ඉහත කී අරමුණු ඉටු කර ගැනීමට නම් එක්සත් ජාතීන්ගේ සංවිධානය හා එහි නියෝජිතායතනයන්, ප‍්‍රතිපත්ති රාමුවක් නිර්මාණය කිරීමට නායකත්වය ගතයුතු බැව් ශ‍්‍රී ලංකාවේ මතයයි.
මෙසේ කළහොත් නොයෙකුත් තර්ජනයන්ට මුහුණ පා සිටින සංවර්ධනය වන්නා වූ රටවල්වලටත් න්‍යෂ්ටික පුනරුදය තුළින් සාධාරණ වූ විසැඳුම් ලබා ගැනීමට හැකි වේවි.
මෙවැන්නකින් බලශක්ති සහස‍්‍ර සංවර්ධන ඉලක්ක දේශගුණික වෙනස්වීම් යන ක්ෂේත‍්‍රවලට පමණක් නොව අවි පාලනයට පවා බලපෑම් ඇති කළහැකි යැයි අප විශශ්වාස කරනවා.
ෆොසිල බලශක්ති මත යැපීමෙන් ඉවත් වී වෙනත් විවිධ බලශක්ති යොදා ගැනීමට කරන හදිසි ප‍්‍රයත්නයන් ගැන අප මීට වඩා කල්පනාකාරී විය යුතුයි. ජීව ඉන්ධන භාවිතය සඳහා දක්වන හදිසිය හා කලබලය නිසා ආහාර මිල ද ඉහළ ගොස් තිබෙන බව අප දුටුවා. කෙටි කාලීනව කෙතරම් ලාභදායී වූවත්, ජීව ඉන්ධන නිපදවීම සඳහා කෘෂිකාර්මික ඉඩම් යොදා නොගත යුතුයි යන්න අපගේ දැඩි පරමාර්ථයයි. වාසනාවකට ශ‍්‍රී ලංකාව පසුගිය අවුරුදු තුන තුළ නොයෙකුත් බලපෑම්වලට යටත් නොවී ස්වාධීනව කටයුතු කළ නිසා අපගේ අහිංසක ජනතාවට මොනම අවස්ථාවකවත් බඩගින්නේ හා හාමතේ ඉන්නට සිදුවුනේ නැහැ.
දේශගුණික වෙනස්වීම් සම්බන්ධයෙන්, සාර්ක් කලාපයේ රාජ්‍ය නායකයන් යළි යළිත් අවධාරණය කෙළේ, වඩාත් පළල් වූ රාමුවක් තුළ පරිසර ආරක්ෂාව, පරිසර සංරක්ෂණ ය හා ඒ පිළිබඳ යුක්තිය පසිඳලීම යන කරුණු සඳහා දැඩි ප‍්‍රයත්නයක් යෙදිය යුතු බවයි. දකුණු ආසියාවේ උරුමයේ කොටසක් වූ ස්වභාව ධර්මයට එරෙහිව කටයුතු නොකිරීම පණ ගැන්විය යුතු බැව් ද අප අවධාරණය කළා. මිනිස් වර්ගයා බොහෝ කලක සිට අනවශ්‍ය ලෙස සොබා දහමේ පැවැත්මට අහිතකර ලෙස බලපෑම් කොට තිබෙනවා. අහිතකර දේශගුණික වෙනස්වීම් ඇති වී තිබෙන්නේ මිනිසාගේම කි‍්‍රයාකාරකම් වලින්, ඒ නිසා ඒවාට විසඳුම් සෙවිය යුත්තෙත් මිනිසාමය.
එක්සත් ජාතීන්ගේ සම්මුතියත් සමගම, අන්තර් මහාද්වීපික යුද්ධ විශාල වශයෙන් වැළකී ගොස් තිබෙන බව අප පිළිගන්නවා. එය එසේ වූවත් ස්වකීය රාජ්‍ය ගොඩ නගා ගැනීම සඳහා පලස්තීනයට සාධාරණ අරගලයක යෙදීමට සිදු වී ඇති බව අප අමතක නොකළ යුතු යි.
අද ආසියා, අප‍්‍රිකා සහ ලතින් අමෙරිකානු කලාපවල අප ජනතාව විවිධාකාර රුදුරු ත‍්‍රස්තවාදී ව්‍යසනයන්ට මුහුණ දෙනවා. මේ නිසා මෙවන් උවදුරු වලින් වර්තමාන සහ අනාගත පරම්පරාවන් බේරා ගැනීම, එක්සත් ජාතීන්ගේ සංවිධානයේ බලවත් වගකීමක් බැව් මා ප‍්‍රකාශ කරනවා. අපි මේ ගැන කථා කරකර සිටියා ඇති මේ ගැන නිශ්චිත කි‍්‍රයාමාර්ගයක් ගත යුතුයි.
බොහෝ රටවල්වලට මෙන්ම, ශ‍්‍රී ලංකාවටත් මෙම උවදුරෙන් ගැලවීමට හැකි වී නැහැ. දේශපාලන ක‍්‍රමවේදයන් තුළින් විසදා ගතහැකි බොහෝ දේ ජනවාර්ගික දුක් ගැනවිලි ලෙස මවාපාමින්, සැඟවුනු අරමුණු ඇති ත‍්‍රස්තවාදී කණ්ඩායමක් අතිශයින් දරුණු වූත්, මෘග වූත් ත‍්‍රස්තවාදී කි‍්‍රයාදාමයන්ට එළඹි ඇති බැව් රහසක් නොවේ.
මෙම එල්.ටී.ටී.ඊ. නම් ත‍්‍රස්තවාදී කණ්ඩායම, මරාගෙන මැරෙන බෝම්බකරුවන් යොදා ගනිමින් තමන්ට වාසිදායක වාතාවරණයක් ඇති කිරීමට උත්සාහ ගන්නේ නිත්‍යානුකූූල භාවයත්, දේශපාලන වශයෙන් පිළිගැනීමත් අරමුණු කර ගෙන බැව් අපි අමතක නොකළ යුතුයි.
පකිස්තානයේ දැන් ඇති වී තිබෙන්නේ රුදුරු ත‍්‍රස්තවාදීන්ගේ විනාශකාරී ක‍්‍රියාදාමයක්. පසුගිය දිනෙක එහි ඇති වූ ත‍්‍රස්තවාදී ප‍්‍රහාරයෙන් සිදු වූ විනාශය ගැන මා මාගේ කනගාටුව ප‍්‍රකාශ කරනවා.
අපේ රජය මැනවින් කරුණු සොයා බලා, සෑම ජන කොටසකම අපේක්ෂාවන් හා අයිතිවාසිකම් ඉටුවෙන ලෙසට දේශපාලන හා ව්‍යවස්ථාමය කි‍්‍රයාමාර්ග ගැනීමට, හැමවිටම සූදානම්, අපගේ ම ජනකොටසක් වූ දෙමළ ජනතාවගෙන් සුළුතරයක් බිය ගන්වමින් ඔවුන් උතුරු පළාතේ බලහත්කාරයෙන් රඳවා ගනිමින් එම ජන කොටසට ප‍්‍රජාතන්ත‍්‍රවාදය අහිමි කරන එල්.ටී.ටී.ඊ. ත‍්‍රස්තවාදීන්ට අපේ රජය කිසිවිටෙකත් යට වෙන්නේ නැහැ. මෙතෙක් ගත් කි‍්‍රයාමාර්ගයන් තුළින් අප එය ඔප්පු කර තිබෙනවා.
ශතවර්ෂ ගණනාවක් තිස්සේ ම ශ‍්‍රී ලංකාවේ අනිකුත් ජන කොටස් සමඟ සමගි සම්පන්නව ජීවත් වී ඇති දෙමළ ජනතාවගේ ප‍්‍රජාතන්ත‍්‍රවාදී නායකයන් සමඟ අප රජය නිරතුරුවම සංවාදයක යෙදෙන බැව් මා ප‍්‍රකාශ කිරීමට කැමතියි. දෙමළ නායකයන් අපගේ රජයේ කි‍්‍රයාකාරී සාමාජික අමාත්‍යවරුන් ලෙසත් ඉන්නවා. ශ‍්‍රී ලංකාවේ ඇටෝර්නි ජනරාල්වරයකු ලෙස කීර්තිමත් ලෙස කටයුතු කළ ඒවාගේ ම කාගේත් ගෞරවාදරයට පාත‍්‍ර වූ දෙමළ දේශපාලනඥයකු වූ ශ‍්‍රීමත් පොන්නම්බලම් රාමනාදන් මැතිතුමා 1904 සැප්තැම්බර් මාසයේ දී කරන ලද ප‍්‍රකාශයක් මා දැන් උපුටා දක්වනවා. මම ලෝකයේ බොහෝ රටවල සංචාරය කර ඇත්තෙමි.
එහෙත් සිංහල මිනිසුන් පමණ හිතමිත‍්‍ර, ප‍්‍රියමනාප ජාතියක්වත්, ඒ තරම් උසස් ගුණධර්ම රකින ජාතියක්වත් ලොව කිසිම තැනක දැක නැත. එතුමාගේ මේ ප‍්‍රකාශයෙන් අපට එක් දෙයක් පැහැදිළියි. එනම් දෙමළ ජනතාවත්, සිංහල ජනතාවත් අතර පැවති සමඟි සම්පන්න බවයි.
නමුත් අද ද්වේශ සහගතව කි‍්‍රයාත්මකවන එක් කණ්ඩායමක් විසින් ඒ සියල්ල උඩු යටිකුරු කර තිබෙනවා.
ශ‍්‍රී ලංකාවේ පැවති සෑම රජයක්ම අද මේ තිබෙන ප‍්‍රශ්නය විසඳීමට විසි පස් වසරක් තුළ ප‍්‍රයත්න දරා තිබෙනවා. සම සභාපතිවරුන්ගේ අධීක්ෂණයට ලක්ව තිබූ ඒ වගේම නෝර්වේජියානුවන්ගේ පහසුකම් සැළසීම මත කි‍්‍රයාත්මක වූ ඊනියා සාම කි‍්‍රයාදාමය මෙයට ඇතුළත්.
මේ සාම කි‍්‍රයාදාමය දෙස වූවත් කොටි ත‍්‍රස්තවාදීන් බැලුවේ මහත් අවඥාවෙන්. කොටි ත‍්‍රස්තවාදීන් සෑම අවස්ථාවකම සාම සාකච්ඡාවලින් බැහැරව ගියේ පිළිගත නොහැකි සුළු හේතු දක්වමින්.
ඉන් පසු ඔවුන් නැවතත් අහිංසක සිවිල් වැසියන් ඝාතනය කිරීම වැනි ම්ලේච්ඡ කි‍්‍රයාදාමයන්ට යොමු වුණා. සෑම අවස්ථාවකදීම ඔවුන් කෙළේ මේ වැඩපිළිවෙළයි.
මේ ත‍්‍රස්තවාදී කණ්ඩායම සමඟ අප රජයට සාකච්ඡා කළ හැකි වන්නේ ඔවුන් තම සියලු අවි බිම තබා ඔවුන්ගේ යුදමය හැකියාවන් සියල්ල විසුරුවා හැර, ප‍්‍රජාතන්ත‍්‍රවාදී රාමුවකට එළඹුනොත් පමණයි.
නීත්‍යානුකූලව තේරී පත් වූ රජයක් ලෙසත්, එක්සත් ජාතීන්ගේ සංවිධානයේ පූර්ණ සාමාජිකයකු ලෙසත්, ශ‍්‍රී ලංකාවේ භෞමික අඛණ්ඩතාව කඩා බිඳ දමා රට බෙදීමට කිසිසේත් ඉඩ නොදෙන බව රජය තරයේ ප‍්‍රකාශ කරනවා.
අපේ ජනතාවට ප‍්‍රජාතන්ත‍්‍රවාදී කි‍්‍රයාදමයේ ප‍්‍රතිඵල භªක්ති විඳීමට අවස්ථාව ලබාදීම තමයි අපේ අරමුණ. ඒ වගේම දැනට ත‍්‍රස්තවාදීන් සිය ග‍්‍රහණයේ තබා ගෙන සිටින ප‍්‍රදේශවල ජනතාවට හැකි ඉක්මණින් සංවර්ධන කි‍්‍රයාදාමයට ඇතුළත් වීමට ඉඩ කඩ සැළැස්වීමත් අපේ තවත් අරමුණක්. දැනට ශ‍්‍රී ලංකාවේ නැඟෙනහිර පළාතේ කි‍්‍රයාත්මක වන කඩිනම් ආර්ථික දියුණුවට සමාන දියුණුවක් උතුරේත් අප දියත් කිරීමට අපේක්ෂා කරනවා.
කළින් එල්.ටී.ටී.ඊ. ත‍්‍රස්තවාදීන් ලෙස කි‍්‍රයා කළ සමහර අය අද නැඟෙනහිර පළාත් සභාවේ සාමාජිකයන් ලෙස ප‍්‍රජාතන්ත‍්‍රවාදීව තෝරා පත් කරගෙන තිබෙනවා. එමෙන්ම, කළින් එල්.ටී.ටී.ඊ.ය. ළමා සොල්දාදුවකු ලෙස යොදවාගෙන සිටි පුද්ගලයකු අද එහි ප‍්‍රධාන අමාත්‍යවරයා ලෙස පාලන කටයුතුවල නියැළී සිටිනවා. මේ සියල්ල අප කෙළේ නැඟෙනහිර මුදාගෙන අවුරුද්දකටත් අඩු කාලයක් තුළදී.
අප රටේ අභ්‍යන්තර වශයෙන් අවතැන් වී සිටින පුද්ගලයන්ට මානුෂික ආධාර සැපයීම සඳහා අපගේ ඉල්ලීමට ප‍්‍රතිචාරයක් ලෙස ජගත් සංවිධානවල සහයෝගය ලැබුණා.
අභ්‍යන්තරව අවතැන් වී සිටින පුද්ගලයන් පිළිබඳව එක්සත් ජාතීන්ගේ සංවිධානයේ මහ ලේකම්වරයාගේ විශේෂ නියෝජිතයෙක් ශ‍්‍රී ලංකාවට පැමිණි අවස්ථාවක මෙසේ ප‍්‍රකාශ කළා. ප‍්‍රධාන ත‍්‍රස්ත කණ්ඩායම් යටතේ සිටින පුද්ගලයන්ට සහනාධාර රජය විසින් සැපයීමේ අපූරු තත්ත්වයක් ශ‍්‍රී ලංකාවේ දැකිය හැකියි. රාජ්‍ය මෙන්ම කැරලි කණ්ඩායම් සිවිල් ජනතාවට එරෙහිව පාවිච්චි කරන හිංසාකාරී ආයුධයක් ලෙස අහාර යොදාගත් අවස්ථා ලෝකයේ අපට දැකිය හැකියි. නමුත් ශ‍්‍රී ලංකාවේ පවත්නා තත්ත්වය මේ අතින් බලන විට දැඩි අවධානයක් යොමු කොට පූර්වාදර්ශයක් ලෙස වැඩි ප‍්‍රසිද්ධියක් ලබාදිය යුත්තක්.
අප හොඳ්‍රකාරවම දන්නවා මානුෂිය ආධාර වශයෙන් සපයනු ලබන ද්‍රව්‍යවලින් විශාල ප‍්‍රමාණයක් එල්. ටී. ටී. ඊ. ත‍්‍රස්තවාදීන් පැහැර ගන්නා බව. එහෙත් අප රජය මේ දක්වාම මෙම මානුෂිය ප‍්‍රතිපත්ති නොකඩවා පවත්වාගෙන යනවා. අප ලබාදෙන ද්‍රව්‍ය ආහාරවලට පමණක් සීමා වන්නේ නැහැ. ඖෂධ වර්ග හා වෙනත් අත්‍යවශ්‍ය ද්‍රව්‍ය, එසේම පාසල් හා රෝහල් වලට අවශ්‍ය දෑ, ගුරුවරුන්, වෛද්‍යවරුන්, සාත්තු සේවිකාවන් හා වෙනත් අත්‍යවශ්‍ය කාර්ය මණ්ඩලයත් මෙයට ඇතුළත්.
ඒ විතරක් නොවේ, ඒ ප‍්‍රදේශවල නිපදවන වී හා අනිකුත් ආහාර ද්‍රව්‍යයත් රජය මිලදී ගන්නවා.
මා හිතන්නේ නැහැ ලෝකයේ කිසිම රටක තමන්ට පහර දෙන ත‍්‍රස්තවාදීන්ටත් මෙවැනි මානුෂීය ආධාර සපයන රජයක් තිබෙනවායි කියලා. අපගේ රජය මෙම මානුෂිය ආධාර සැපයීම තම පරම වගකීමක් හැටියටයි කල්පනා කරන්නේ. මේ අපේ ප‍්‍රතිපත්තියයි.
ශී‍්‍ර ලංකාවේ පවත්නා සංකීර්ණ තත්ත්වයන්ට මුහුණදිය යුත්තේ ප‍්‍රවේශමෙන්. එය එක් පැත්තකින් අපරාධවලට වැට බඳින නීතිය හා සාමය පවත්වන කි‍්‍රයාදාමයකිනුත් එසේම පොදු ජන සම්මුතියක් ගොඩනැගීම සඳහා යොමු වූ ඉවසිලිවන්ත දේශපාලන ප‍්‍රයත්නයක සැකසිය යුත්තක්.
දුෂ්කරවුවත් අත්‍යවශ්‍ය වූ ප‍්‍රජාතන්ත‍්‍රවාදය ගොඩ නැගීම අප නැඟෙනහිර පළාතේ ඉටු කර ගෙන තිබෙනවා. එසේම එය අපේ රටේ උතුරු පළාතේ ද කළ හැකි බැව් අපි දැඩිව විශ්වාස කරනවා.
මෙම සැසිවාරය සහස‍්‍ර සංවර්ධන ඉලක්කවල ප‍්‍රගතිය මැන බැලීමට හොඳ අවස්ථාවක්. බොහෝ කි‍්‍රයාදාමයන්හි ප‍්‍රගතිය පසුබෑමට ලක්ව තිබීම කනගාටුවට කරුණක්. ලෝකයේ ආර්ථික වර්ධන වේගයේ පසුබෑම, මූල්‍ය ක්ෂේත‍්‍රය අවුල්වීම, ලාභ ඉපයීම පමණක් ඉලක්ක කර ගැනීම, ආහාර හා ඉන්ධන මිල වැඩිවීම, එසේම දේශගුණික වෙනස්වීම් වල බලපෑම පැහැදිලිව පෙනෙන්න තිබෙන අතර, ඒවා සහස‍්‍ර සංවර්ධන ඉලක්ක වෙත දැඩි අසුබවාදී බලපෑමක් එල්ල කොට තිබෙනවා.
එසේම දේශපාලන භූමිකාව පදනම් කොට ගෙන සමහර රටවල නායකයන්ට ඒ වගේම නායකත්වයට, ඇති යම් විරෝධතා නිසා පනවා ඇති සම්බාධක ඇත්ත වශයෙන් එල්ල වෙන්නේ ඒ ඒ රටවල අහිංසක ජනතාවටයි.
ක‍්‍රම ක‍්‍රමයෙන් දැඩිව වර්ධනය වෙමින් පවතින ජාත්‍යන්තර ත‍්‍රස්තවාදය පමණක් නෙවෙයි එයට සමගාමීව තිබෙන හොර අවි ජාවාරම්, නීත්‍යානුකූල නොවන සංක‍්‍රමණික ජාවාරම්, මත්ද්‍රව්‍ය වෙළෙඳ්‍රම්, හොර මුදල් ජාවාරම් මෙන්ම ත‍්‍රස්තවාදී කණ්ඩායම් විසින් පවත්වාගෙන යනු ලබන විශාල ව්‍යාපාරත් මනුෂ්‍යත්වයේ හා ශිෂ්ටාචාරයේ මුලධර්මවලට දැඩි බලපෑම් එල්ලකොට තිබෙනවා.
අප විසින් මෙතෙක් ගන්නා ලද කි‍්‍රයාදාමයන් මගින් මේවා මැඬ පැවැත්වීමට අපොහොසත් වී ඇති බැව් පැහැදිලියි. ජාතික වශයෙන් හා ජාත්‍යන්තර වශයෙන් සහශ‍්‍ර සංවර්ධන ඉලක්ක කරා යාම මේ නිසා තවත් සංකීර්ණවී තිබෙනවා. බොහෝ අවස්ථාවලදී අප ප‍්‍රකාශ කර ඇති ආකාරයට, ත‍්‍රස්තවාදය නිසා අප සුළු වශයෙන් හෝ ලබාගෙන ඇති ජයග‍්‍රහණ සියල්ල පසු පසට තල්ලු වී තිබෙනවා.
ගෝලීය ත‍්‍රස්තවාදය වගේම සෑම ජාතියකම වටිනාම සම්පත වූ ළමා පරපුර ගිල දැමීමට වලිකන තවත් ව්‍යසනයක් තිබෙනවා. එනම් සයිබර් අවකාශය නැතිනම් අන්තර් ජාලය හරහා ඇති වී ඇති තර්ජනයයි. අන්තර් ජාලයෙන් එන බලවේගයන් අප ළමා පරපුරේ සිත් දූෂ්‍ය කරනවා පමණක් නොවේ නොයෙකුත් ලිංගික අපචාරවලට යොදා ගැනීම මෙන්ම විෂ මත්ද්‍රව්‍ය භාවිතා කරන්නන් හා අසභ්‍ය වෙබ් අඩවි පවත්වන්නන්ගේ ගොදුරු බවට පත්වීමත් සිදු වෙනවා.
ශ‍්‍රී ලංකාව තුළ මෙම අසභ්‍ය වෙබ් අඩවි රජය විසින් තහනම් කොට තිබෙනවා. ජංගම දුරකථන භාවිතයෙන් කරන මෙවන් කටයුතුත් අප විසින් පාලනය කර තිබෙනවා. මේ ජගත් නායකයන්ගේ අවධානය යොමු විය යුතු වැදගත් ක්ෂේත‍්‍රයක් බව මා අවධාරණය කරනවා.
මෙම අහිතකර ප‍්‍රවනතා ඉදිරියට යාම මර්දනය කිරීමට ජගත් නායකයන් විසින් කෙටි කාලීන මෙන්ම දීර්ඝ කාලීනව හැකි ඉක්මණින් සාමූහික කි‍්‍රයාමාර්ග ගත යුතුයි.
සහස‍්‍ර සංවර්ධන ඉලක්ක හා අපගේ අනිකුත් සංවර්ධන අරමුණු සාක්ෂාත් කර ගැනීමට මෙන්ම අප ලබා තිබෙන ජයග‍්‍රහණ විනාශ කර චපමට උත්සාහ කරන කණ්ඩායම් පරාජය කිරීමට හැකි වන්නේ අප විසින් ගනු ලබන අධිෂ්ඨානශීලී ප‍්‍රයත්න තුළින් පමණයි.
එක්සත් ජාතින්ගේ සංවිධානයේ සාමාජිකයින් ලෙස අප විසින් දැඩි කැපවීමක් කළ යුතු යැයි මා විශ්වාස කරනවා. ඒ නිසා මානව ප‍්‍රජාවට වෙන් වූ මෙම මහඟු ආයතන බිහි කිරීමට මුල් වූ පුද්ගලයින් නොදුටු සීමා පවා බිඳ දමා ඉදිරියට අප ගමන් කළ යුතුයි. අපට එය දැන් කළ නොහැකි වුවහොත් අනාගත පරම්පරාව අපට දොස් පවරාවි යැයි මා සිතනවා.
අවසන් වශයෙන් මාගේ කථාව බුදුරජාණන් වහන්සේ දේශනා කරන ලද ධම්ම පදයේ ගාථාවකින් නිම කිරීමට අවසර පතනවා
ජයං වෙරං පසවතී
දුක්ඛං සෙති පරාජිතො
උපසන්තො සුඛං සෙති
හිත්වා ජයපරාජයං
මෙයින් පවසන්නේ දිනන්නා පරදින්නා තුළ වෛරය ඇති කරයි පරාජිතයා දුක සේ වෙසේ සන්සුන් තැනැත්තා දිනුම් පැරදුම් හැර සුවසේ වසයි
ඔබ සියලු දෙනාට
ති‍්‍රවිධ රත්නයේ සරණයි !
Subscribe to:
Post Comments (Atom)
No comments:
Post a Comment