මහ සද්දෙන් ඇරඹුණු ජාතික නිදහස් පෙරමුණ මේ වන විට කිසිම සද්දයක් නැති තත්ත්වයකට පත්වෙලා . මේ නිහැඩියාවට හේතුව මොකක්ද කියල මුලින්ම අපට කියනවාද?
නිකම් බොරුවට සද්ද නො කළට රටේ කේන්ද්‍රිය ගැටලුව ඇතුළු ගැටලු රැසක් විසඳීම සම්බන්ධයෙන් අප සකි‍්‍රයව දායක වී ඉන්න බව ජනතාව ඉතා හොඳින් දන්නවා.
කොටි ත‍්‍රස්තවාදීන්ගේ ග‍්‍රහණයෙන් මිදී පලා එන අහිංසක දෙමළ ජනතාව වෙනුවෙන් කඩිනම් සහන සැලසීමට හා ඔවුන්ට අවශ්‍ය පහසුකම් ලබාදීමට " සහන සේවා මෙහෙයුම " නමින් පුළුල් වැඩ පිළිවෙළක් ප‍්‍රථමයෙන්ම ආරම්භ කළේ ජාතික නිදහස් පෙරමුණයි.
රටපුරා පිහිටි විහාරස්ථාන දහදහස් එකසියයක විශේෂ සහන සේවා මධ්‍යස්ථාන පිහිටුවලා ඒ ජනතාවට අවශ්‍ය ද්‍රව්‍ය එක්රැස් කරමින් තිබෙනවා.
මීට අමතරව වෙනත් ආගමික ස්ථානවල හා සුබ සාධන මධ්‍යස්ථානවල අපේ ඉල්ලීමට අනුව මේ කටයුතු කරගෙන යනවා. ජාතික නිදහස් පෙරමුණේ කාර්යාලවලත් මෙම මධ්‍යස්ථාන පිහිටුවා තිබෙනවා.
මේ සඳහා ජනතාවගෙන් අති විශාල ප‍්‍රතිචාරයක් ලැබෙමින් තිබෙනවා.
ඊට අමරතව ලෝක වෙළෙඳ පොළේ බොරතෙල් මිල අඩු වීමේ වාසිය ජනතාවට දෙන්න කියලා පාර්ලිමේන්තුවට විශේෂ ප‍්‍රකාශයක් කරමින් මුලින්ම ආණ්ඩුවෙන් ඉල්ලා සිටියේ ජාතික නිදහස් පෙරමුණේ සභාපති විමල් වීරවංශ සහෝදරයායි.
මෙමගින් ඉන්දියානු ඔයිල් සමාගම වැඩි වාසියක් ලබා ගන්නා බවත් එම වාසිය අපේ රටටත්, ජනතාවටත් ලබාදෙන ලෙසත් ජාතික නිදහස් පෙරමුණ ආණ්ඩුවට බලකර සිටියා.
නමුත් ඒ ඉල්ලීමට තවම ආණ්ඩුවෙන් ප‍්‍රතිචාර ලැබිල නැහැ නේද?
ප‍්‍රතිචාර ලැබුණා. ඉන්දියානු ඔයිල් සමාගමට බද්දක් පැනෙව්වා. මෙම බද්ද නිසා දැන් මාසෙකට රුපියල් මිලියන 620ක් ආණ්ඩුවට ලැබෙනවා.
ලංකා විදුලිබල මණ්ඩලයට, දුම්රිය දෙපාර්තමේන්තුවට ආදී රජයේ ආයතනවලින් තෙල් සංස්ථාවට ලැබිය යුතු මුදල් මෙමඟින් පියවගන්න හැකියාව ලැබෙනවා.
තෙල් සංස්ථාව ලබන පාඩුව මෙමගින් අවම කරගන්න පුළුවන්. ඒ සමගම රටේ ජනතාවටත් මෙම වාසිය ලබා දෙන්න පුළුවන්.
ඉන්දියානු ඔයිල් සමාගමට බදු පැනෙව්වට ලෝක වෙළඳ පොළේ තෙල් මිල අඩුවීමේ වාසිය ජනතාවට ලබාදීම සඳහා තවම ඉන්ධන මිල අඩුකරලා නැහැනේද?
ඒක අපි පිළිගන්නවා. ඉන්ධන මිල අඩුකරලා ඒ වාසිය ජනතාවට දෙන්න ආණ්ඩුව කි‍්‍රයා කරලා නැහැ. ඒක ඉක්මණින්ම කළ යුතුයි. ඉන්දියානු ඔයිල් සමාගමට බදු පනවල විතරක් හරියන්නේ නැහැ.
ලෝක වෙළෙඳ පොළේ තෙල් මිල අඩුවීමේ වාසිය අනිවාර්යෙන්ම ජනතාවට ලබාදිය යුතුයි. ඒක ඉතා ඉක්මණින් සිදුවෙයි කියා අප සිතනවා. එහෙම නොවුණොත් එම වාසිය ජනතාවට ලබාදෙනතුරු දිගින් දිගටම අපි ආණ්ඩුවට විවිධ බලපෑම් කරනවා.
රටේ පවතින ආර්ථික ප‍්‍රශ්නවලින් ජනතාව බැටකනවා. ඒ වගේම ආණ්ඩුවේ තිබෙන ආකාර්යක්ෂමතාවන් මේ කරුණුවලට බලපාලා තියෙනවා. මාතෘ භූමියේ නාමයෙන් රටට තියෙන ආදරය නිසා මේ හැම දෙයක්ම ජනතාව අමාරුවෙන් හරි ඉවසගෙන ඉන්නවා.
ඒක නිසා ජනතාවට යම් සහනයක් ලබාදෙන්න පුළුවන් හැම අවස්ථාවකදීම නොපිරිහෙලා ඒ දේ ඉටු කිරීම ආණ්ඩුවේ යුතුකමක්. ඒ සෑම අවස්ථාවකදීම ජනතාව වෙනුවෙන් අප පෙනී ඉන්නවා.
ඔබේ පක්ෂය යටින් ආණ්ඩුවට කඩේ යමින් උඩින් ජනතාවට පේන්න බොරුවට පාර්ලිමෙන්තුවට එක එක ප‍්‍රකාශ කරන බවටත් චෝදනාවක් එල්ල වෙනවානේද?
ජාතික නිදහස් පෙරමුණ බිහිවෙන්නේ මේ රටේ කේන්ද්‍රීය ප‍්‍රශ්නයට අවශ්‍ය විසඳුම් ලබාදීම වෙනුවෙන්. ඒ ප‍්‍රශ්නය විසඳීමට ගන්නා අවස්ථාවලදි පමණක් අප ආණ්ඩුවට සහාය ලබා දෙනවා.
පසුගිය පළාත් සභා මැතිවරණවලදි ජනතාව ආණ්ඩුවට සහය ලබා දුන්නෙත් මෙම කේන්දී‍්‍රය ප‍්‍රශ්නය විසඳීම සඳහායි. නමුත් එයට පරිබාහිරව ආණ්ඩුව කරන වැඩ ගැන විවේචන ඕනෑ තරම් තියෙනවා. ඒවාට නොබියව අපේ විරුද්ධත්වය ප‍්‍රකාශ කර තිබෙනවා.
අනෙක මේ රටේ ඕනෑම ගැටලුවක් අදාළ වගකිවයුත්තන්ට ජනතාව වෙනුවෙන් ඉදිරිපත් කිරීමට තිබෙන හොඳම ස්ථානය පාර්ලිමේන්තුවයි.
ජාතික හෙළ උරුමය කියන්නේ ත‍්‍රස්තවාදය පරාජය කිරීම සඳහා කොන්දේසි විරහිතව ආණ්ඩුවට කඩේ යනවා කියලා. ජාතික නිදහස් පෙරමුණ එහෙමද?
මං කලිනුත් කිවා වගේ රට හමුවේ තිබෙන ප‍්‍රධානතම ගැටලුව මේ අවස්ථාවේ දී කොටි ත‍්‍රස්තවාදය පරාජය කිරීමයි. ඒක නිසා ඒ කි‍්‍රයාවලියට පමණක් අපේ වගකීම අපි ඉටු කරනවා. අනෙක් කාරණා එක්ක පටලවා ගතයුතු නැහැ.
නමුත් තීරණාත්මක අවස්ථාවලදී ජනතාව ගැන නොසිතා ආණ්ඩුව ආරක්‍ෂා කරන බවටත් ජාතික නිදහස් පෙරමුණ ගැන චෝදනා එල්ල වෙනවා.
ඒක පදනම් විරහිත චෝදනාවක්. තීරණාත්මක අවස්ථාවලදීද අපි ජනතාව වෙනුවෙන් කටයුතු නොකරපු එක් අවස්ථාවක් හෝ තියෙනවා නම් කියන්න කියලා චෝදනා කරන අයගෙන් මා ඉල්ලා සිටිනවා.
මේ රටේ ප‍්‍රධානතම ගැටලුව ත‍්‍රස්තවාදී ප‍්‍රශ්නය. මෙය අනෙක් ගැටලුවලට සෘජුවත් වක‍්‍රවත් බලපානවා. ඒක නිසා මෙම ගැටලු විසඳීමට සහාය ලබාදීම වරදක්ද? කියලා ඔය චෝදනා කරන පාර්ශවයන්ගෙන් මං අහන්න කැමතියි.
ආණ්ඩුව යුද්ධය ඉස්සරහට දමාගෙන වංචා දූෂණ වහ ගන්නා බවත් ආණ්ඩුව අකාර්යක්ෂම බවත් එක්සත් ජාතික පක්ෂයත්, ජනතා විමුක්ති පෙරමුණත් චෝදනා කරනවා ඒ කතාවේ ඇත්තක් තියෙනවාද?
පසුගිය ආණ්ඩුවල වාගේම මේ ආණ්ඩුවෙත් වංචාව, දුෂණය, අකාර්යක්ෂමතාව තියෙනවා. ඒ වගේම කොටි ත‍්‍රස්තවාදය මුළුමණින්ම පරාජය කිරීම සඳහා මීට පෙර ආණ්ඩු ක‍්‍රියා නොකළ ආකාරයෙන් මේ ආණ්ඩුව කටයුතු කරනවා.
ඒක නිසා අපි මේ අවස්ථාවේදී ඉන්නේ කේන්දි‍්‍රය ප‍්‍රශ්නය කෙසේ හෝ විසදාගත යුතුයි කියන ස්ථාවරයේ.
ඒ වගේම වංචාව, දුෂණය, නාස්තිය නැතිකිරීම වෙනුවෙනුත් අප පෙනී ඉන්නවා. ඊට අවශ්‍ය පියවර දැනටමත් අපි අරගෙනයි ඉන්නේ. කේන්දී‍්‍රය ප‍්‍රශ්නය තේරුම් ගෙන ඉන්න අපි අනෙක් කරුණු ගැනත් දැඩි අවධානයකිනුයි ඉන්නේ.
ඉන්දියානු තෙල් සමාගම අසාධාරණ ආකාරයෙන් විශාල ලාභයක් උපයන විට ඒක මුලින්ම පෙන්නලා දීලා එම වරද නිවැරදි කරගැනීමට කි‍්‍රයා කළේ ජාතික නිදහස් පෙරමුණයි.
සමහර විටෙක ඉන්දියානු සමාගමක් සමග එකතුවෙලා ඇතැම් දේශපාලඥයින් හා නිලධාරීන් හොඳ ගණනක් හම්බකරන්න සැළසුම් කළාද? දන්නෙත් නැහැ. ඒ ගැනත් අපි සොයා බැලීමක් කරනවා.
17 වෙනි සංශෝධනය බලාත්මක කර රටේ පාලනයක් ඇති කිරීම සඳහා විරුද්ධ පක්ෂය ගෙන වැඩපිළිවෙළට ජාතික නිදහස් පෙරමුණ නියමාකාරයෙන් දායකත්වයක් නොදක්වන බවටත් චෝදනා එල්ල වෙනවා.
රටේ ප‍්‍රජාතන්ත‍්‍රවාදය ශක්තිමත් කිරීම සඳහා යහපාලනය ගොඩනැගීම සඳහා ගෙන එනු ලබන ඕනෑම වැඩපිළිවෙළකට ජාතික නිදහස් පෙරමුණ තම උපරිම සහාය දෙනවා.
17 වෙනි ව්‍යවස්ථා සංශෝධනය බලාත්මක කිරීමේ වැඩසටහනත් එහෙමයි. ව්‍යවස්ථාදායකයට උඩින් ජනතාවට වග නොකියන ව්‍යුහයක් සඳහා බලයක් ලැබෙන ව්‍යුහයක් සකස් කරනවා නම් ඒ ගැන ඉතා ගැඹුරින් සාකච්ඡා කළ යුතුයි.
මෙතනදි යම් වැරැද්දක් සිදුවුණොත් ඒක ජනතා පරිමාධිපත්‍යට බාධාවක් වෙන්න පුළුවන්. ඊට හානියක් නොවන ලෙස ප‍්‍රජාතන්ත‍්‍රවාදය සුරැකෙන ලෙස පරිස්සමෙන් මේ දේ කළ යුතුයි.
උතුරේ අවතැන් වන ජනතාව වෙනුවෙන් සහන ලබාදීමේ වැඩසටහන ප‍්‍රථමයෙන්ම ආරම්භ කළේ ජනතාව හරහා දේශපාලන වාසි ලබාගැනීමටද කියල ඇහුවොත් ?
ජාතික නිදහස් පෙරමුණ කියන්නේ දේශපාලන ව්‍යාපාරයක්. කොටි ග‍්‍රහණයෙන් මිදී එන අහිංසක දෙමළ ජනතාවට සහෝදරත්වයේ දෑත් දිගු කිරීම සද්භාවයෙන් කළ දෙයක්.
දෙමළ ජනතාව වෙනුවෙන් කෑගහන වෙනත් දේශපාලන පක්‍ෂවලට හා ඇතැම් සංවිධානවලින් අපිව ආදර්ශයට අරගෙන මේ වගේ සත්කාරක සේවා සහන සේවා පටන්ගන්න කියලා මා ඉල්ලීමක් කරනවා.
එවැනි සහන සේවා පවත්වාගෙන යන්න රාජ්‍ය නොවන සංවිධාන ඕනෑතරම් තියෙනවා නේ ද?
ඉතා පැහැදිලියි. අපේ රටේ ත‍්‍රස්තවාදය, බෙදුම්වාදය ආරක්‍ෂා කරන ඇතැම් රාජ්‍ය නොවන සංවිධාන තියෙනවා. කොටි ත‍්‍රස්තවාදීන් බේරා ගැනීම සඳහා අවතැන්වූවන් යොදා ගැනීමට කි‍්‍රයාකරන ඇතැම් රාජ්‍ය නොවන සංවිධානය තිබෙනවා.
ඔවුන් අහිංසක දෙමළ ජනතාව වෙනුවෙන් කිඹුල් කඳුළු හෙළලා කොටි ත‍්‍රස්තවාදයට පක්ෂව කි‍්‍රයා කරන්න හදනවා. දෙමළ ජනතාව කොටි ත‍්‍රස්තවාදීන්ගෙන් පීඩා විඳිනකොට සද්ද නැතුව ඉන්න ඒ සංවිධාන දෙමළ ජනතාවට ආරක්ෂක අංශවලින් හිරිහැර සිදුවන බවට අභූත චෝදනා එල්ල කරනවා.
තමන් මිත‍්‍රත්වයේ දෑත දෙමළ ජනතාව වෙත ලබා දෙන බවට මෙම සංවිධාන උඩින් පෙන්නුවට යටින් ඔවුන් මිත‍්‍රත්වයේ දෑත් දිගු කරන්නේ කොටි සංවිධානයටයි.
එම නිසා රටට සතුරු ඇතැම් රාජ්‍ය නොවන සංවිධාන ගැන අවධියෙන් සිටීම ඉතා වැදගත්. අපට මතකයි, සුනාමි ඛේදවාචකයේදී මෙරටට පැමිණි ඇතැම් රාජ්‍ය නොවන සංවිධාන කොටි සංවිධානයට නොයෙකුත් දේවල් ලබාදීමට පසුබට වුණේ නැහැ.
ඒක නිසා මෙවරත් අවතැන් වූවන් ගැන කියමින් එම සංවිධාන යළිත් වතාවක් කොටි සංවිධානයට වාසි සහගත වන ආකාරයෙන් කි‍්‍රයා කරන්න පුළුවන්. ජාතික සමගිය රටේ ඒකීයභාවය ආරක්‍ෂා වෙන ආකාරයෙන් කි‍්‍රයා කරන සංවිධාන ආයතන ඉතිහාසයේ ඕනෑ තරම් තියෙනවා.
ජාතික නිදහස් පෙරමුණ අද දවසේ කරන්නේත් ඒ දේයි.
උතුරේ අවතැන් වන ජනතාව ගැන බොරුවට කිඹුල් කඳුළු හලන ජාතික නිදහස් පෙරමුණ කියුබානු දේශපේර්මින් වෙනුවෙන් ඇමෙරිකාවට එරෙහිව පෙළපාලි යාම විහිළුවක් බවයි, සමහරුන් කියන්නේ.
මේවා ප‍්‍රශ්න දෙක සමාන්තර ගැටලු දෙකක්. කොටි ත‍්‍රස්තවාදීන්ගේ ෆැසිස්ට් මිලිටරි බලයට යටවෙලා ඉන්න අහිංසක දෙමළ ජනතාව කොටින්ගෙන් නිදහස්වෙලා එනවිට ඔවුන්ට සහන ලබාදීමට ඉදිරිපත් වීමයි, කියුබානු දේශපේර්මීය පස්දෙනා නිදහස් කරන ලෙසට අමෙරිකාවට බලපෑම් කිරීමයි එක හා සමාන දෙයක්. දේශීයව හා ජාත්‍යන්තරව එකම අවස්ථාවක අප සහෝදරත්වයේ දෑත් දිගුකර තිබෙනවා.
මේ කාරණා දෙකම බටහිර අධිරාජ්‍යවාදයට සම්බන්ධයි. කොටි ත‍්‍රස්තවාදය මෙහෙයවන්නේ බටහිර අධිරාජ්‍යවාදයයි. ඒ නිසා බටහිර අධිරාජ්‍යවාදයට එරෙහිව අවස්ථා දෙකේදීම කි‍්‍රයා කිරීම සමහරුන්ට විහිළුවක් වුණාම අපට විහිළුවක් නොවෙයි.
සමාජවාදය ගැන මහ ලොකුවට කතාකරන බොහෝ දේශපාලන පක්‍ෂ, සංවිධාන නිහඬව සිටින අවස්ථාවක ප‍්‍රථමයෙන්ම කි‍්‍රයාත්මක වීමට හැකිවීම ගැන අප සතුටු වෙනවා. අපේ මැදිහත්වීම ශී‍්‍ර ලංකාවේ සිටින කියුබානු තානාපතිවරියගේද දැඩි පැසසුමට ලක් වී තිබෙනවා.
මීළඟ අයවැයේදී ඔබ ඇතුළු කණ්ඩායම කුමක් කරන්නද හිතාගෙන ඉන්නේ
මෙවර අයවැයේදී කේන්ද්‍රීය සාධකය වන්නේත් කොටි ත‍්‍රස්තවාදය මුළුමනින්ම පරාජය කළ යුතුයි කියන කරුණයි. මවුබිම ත‍්‍රස්තවාදයෙන් නිදහස් කර ගැනීම වෙනුවෙන් හා ආර්ථික පීඩනයෙන් ජනතාව නිදහස් කරගැනීම වෙනුවෙන් හා අය වැය සකස්විය යුතු බවයි අප කියා සිටින්නේ.
එවැනි අයවැයක් ඉදිරිපත් කිරීම සඳහා අපට කළ හැකි සියලු බලපෑමක්ම අපි ආණ්ඩුවට කරනවා.
අප ආණ්ඩුවට ලබාදීම සඳහා යෝජනාවලියක්් සකස් කිරීමට පෙර දේශයට ලැදි සියලු කොටස් හා බලවේග සමග මේ ගැන දීර්ඝ වශයෙන් සාකච්ඡා කරනවා.
පසුගිය අය වැය පරාජය කිරීමට බෙදුම්වාදයට හිතවත් පිරිස් විවිධ උත්සාහයන් ගත්තත් එය ව්‍යර්ථ වුණා. මෙවරත් එවැනි ආකාරයේ යම් යම් බලවේග අයවැයට බලපෑම් කරන්න ඒවි. ඒ දෙසත් අප විමසිල්ලෙන් බලා සිටිනවා.
සාකච්ඡා කෙළේ ඩබ්ලිව්. කේ. ප‍්‍රසාද් මංජු
Subscribe to:
Post Comments (Atom)
No comments:
Post a Comment