පළාත් සභා ඡන්දයෙන් එක්සත් ජාතික පක්‍ෂය පැරදී නැහැ. තිබුණු ජයග්‍රහණය සන්ධානය විසින් අවසන් මොහොතේ බලහත්කාරයෙන් උදුරා ගත්තා. ඒනිසා මේ අසික්ඛිත දේශපාලනය තුරන් කිරීමට මා රජරට ජනතාව සමඟ තවදුරටත් කටයුතු කරනවා යැයි උතුරු මැද පළාත් සභාවට අනුරාධපුර දිස්ත්‍රික්කය සඳහා එක්සත් ජාතික පක්‍ෂයෙන් තරඟ කළ මේ ජර් ජෙනරාල් ජානක පෙරේරා මහතා පැවසීය.
උතුරු මැද පළාත් සභා ඡන්දයෙන් පසුව එක්සත් ජාතික පක්‍ෂ නායක රනිල් වික්‍රමසිංහ මහතාගේ කැඳවීමක් අනුව ඔහු පසුගිය 24 වැනිදා කොළඹ බලා පිටත්ව ගිය අතර, ඉදිරි දේශපාලන කටයුතු පිළිබඳව එක්සත් ජාතික පක්‍ෂ නායකයා සමඟ පැවැත්වූ සාකච්ඡාවලින් අනතුරුව අනුරාධපුරයට නැවතත් පැමිණියේ 26 වැනිදා පෙරවරුවේය.
ඒ මහතා අනුරාධපුරයට පැමිණි අවස්ථාවේ එක්සත් ජාතික පක්‍ෂ පාක්‍ෂිකයෝ විශාල පිරිසක් පැමිණ මේජර් ජෙනරාල් ජානක පෙරේරා මහතා මහත් හරසරින් පිළිගත්හ. ඉන්පසු පැවති රැස්වීමේදී එක්සත් ජාතික පක්‍ෂ පාක්‍ෂිකයින් අමතා ඔහු මෙසේද කීය.
අපි ඡන්ද ගණන් කරත්දී ලොකු භීෂණයකට මුහුණ දී සිටියා. එක්තරා ඇමැතිවරයෙකු ගණන් කිරිමේ මධ්‍යස්ථානයට ඇතුළු වුණා. එජාප බලයලත් නියෝජිතයින් බිය ගන්වා පලවා හැරියා. මේ ගැන අප පරීක්‍ෂණයක් පවත්වන්න බලාපොරොත්තු වෙනවා.
මේ ඡන්ද ප්‍රතිඵල අනුව මා වැඩිම මනාප ලබාගෙන තිබෙනවා. මට ලැබුණු මනාප ඡන්ද ගණන 116,430 යි. මේ මනාප ගැන මට ලොකු සතුටක් ඇති වුණා. දේශපාලනයට ඇවිත් සති හයක් පමණයි ගත වුණේ. මේ තරම් විශාල මනාප ඡන්ද ප්‍රමාණයකින් මාව පිළිගැනීම ගැන ආඩම්බරයක් ඇති වෙනවා.
සන්ධානයේ මහ ඇමති අපේක්‍ෂක බර්ටි ප්‍රේමලාල් මහතා ලැබුණු මනාප ඡන්ද ප්‍රතිශතය සියයට 52යි. නමුත් මට ලැබුණු මනාප ප්‍රතිශතය සියයට 81කටත් වැඩියි.
මේ මැතිවරණයෙන් මට ලැබුණ ජයග්‍රහණය අනුව ඉදිරියේදී මා අනුරාධපුරයේ ස්ථීර පදිංචියට එනවා. රජරට දුක් විඳින ජනතාවට සේවය කිරීම සඳහා ගම් මට්ටමින් විවිධ ව්‍යාපෘති ක්‍රියාත්මක කිරීම මාගේ අරමුණයි.
මා කෙරෙහි විශ්වාසය තැබූ සියලුම දෙනාට ස්තූතිය පුද කරනවා.
මිහින්තලේ රජමහා විහාරස්ථානයේ විහාරාධිකාරී වළවාහැංගුණවැවේ ධම්මරතන හිමියෝ ද මෙම අවස්ථාවට වැඩම කළහ.
අනුරාධපුර දිස්ත්‍රික් පාර්ලිමේන්තු මන්ත්‍රීනි චන්ද්‍රානි බණ්ඩාර මහත්මිය සහ එජාප පළාත් සභා අපේක්‍ෂක අපේක්‍ෂිකාවෝ ද සහභාගී වූහ.
Subscribe to:
Post Comments (Atom)
No comments:
Post a Comment