සම්පත් බණ්ඩාර
ශ‍්‍රී ලංකා කි‍්‍රකට් නායක මහේල ජයවර්ධන හා ඉන්දීය එක්දින කි‍්‍රකට් නායක මහේන්ද්‍ර සිං ද්‍රෝනි . ඡායාරූපය – හර්බට් පෙරේර
ශ‍්‍රී ලංකා කණ්ඩායමේ නවතම දඟ පන්දු යවන්නා වන අජන්ත මෙන්ඩිස් වෙත තම පිතිකරුවන් එළැඹෙන එක්දින තරගාවලියේ දී ධන ප‍්‍රතිචාරයක් දැක්විය යුතු යැයි ඉන්දීය එක්දින කණ්ඩායමේ නායක මහේන්ද්‍ර සිං දෝනි පැවැසීය. ‘අපි ඔහුට මුහුනදීමට සුදානම් විය යුතුයි.’
දෝනි මේ බව ප‍්‍රකාශ කළේ ශ‍්‍රී ලංකාවත් ඉන්දියාවත් අතර පැවැත්වෙන එක්දින කි‍්‍රකට් තරගාවලිය පිළිබඳව කොළඹ ‘ටාජ්’ සමුද්‍ර හෝටලයේ දී පැවැති මාධ්‍ය හමුවකදීය.
අජන්ත මෙන්ඩිස්ගේ පන්දු හඳුනා ගැනීමට කල්වේලා ගත වෙනවා යැයි ද ද්‍රෝනි කීය.
ඉන්දීය පිල එක්දින තරගයක දී අජන්ත මෙන්ඩිස්ට මුහුණ දී ඇත්තේ එක්වරක් පමණි. ඒ කරච්චියේ දී පැවැති ආසියානු කුසලාන අවසන් තරගයේදී ය. එහි දී ඔහු ලකුණු 13 ට කඩුලු 6ක් බිඳ දමමින් තීරණාත්මක කාර්ය භාරයක් ඉටු කළේය.
ඉන්දීය පිතිකරුවන් අජන්ත මෙන්ඩිස් ඇතුළු ශ‍්‍රී ලාංකික පන්දු යවන්නන්ට මුහුණදෙන නව සැලැසුම කුමක්දැයි ඇසූ පැනයට පිළිතුරුදුන් මහේන්ද්‍ර දෝනි එය දැන්ම ප‍්‍රකාශ කිරීම අපහසුයි. නමුත් අප කළ යුත්තේ කුමක් දැයි දන්නවා. අපේ හැකියාවන් ගැන හොඳ තක්සේරුවක් මෙන් ම විශ්වාසයක් ද අප තුළ තිබෙනවා යැයි පැවසීය.
ශ‍්‍රී ලංකා කි‍්‍රකට් නායක මහේල ජයවර්ධන සිය අදහස් දක්වමින් ප‍්‍රකාශ කළේ ‘දැන් අපට තරග දිනවන දඟ පන්දු යවන්නන් දෙදෙනකු ම සිටිනවා. අපට දැන් ප‍්‍රහාරක විකල්ප වැඩියෙන් තිබෙනවා’ යනුවෙනි.
‘මුරලිට අවශ්‍ය සහය දැන් අජන්තගෙන් ලැබෙනවා. එය නායකයකු වශයෙන් මට විශාල සහනයක්. ඒ වුණත් හැම විට ම මෙය කණ්ඩායම් තරගයක් බවත් අප අමතක නොකළ යුතුයි.’
‘ටෙස්ට් තරගාවලියේ ජයග‍්‍රහණයෙන් පමණක් අපි තෘප්තිමත් වෙන්නේ නෑ. එක්දින තරග ටෙස්ට් තරගවලට වඩා සම්පූර්ණයෙන් ම වෙනස්.’
සචින් තෙන්ඩුල්කාර් එක්දින තරගාවලියට නොමැතිවීම පිළිබඳව අදහස් දැක් වූ ඉන්දීය නායකයා ‘සචින් වැලමිටේ ඇති වූ තුවාලයක් නිසා තරගාවලියෙන් ඉවත් වුනා. ඔහුගේ අඩුව සම්පූර්ණ කිරීම අපහසු කාර්යයක්, ඔහු පිතිකරුවකු හා පන්දු යවන්නකු ලෙස පමණක් නොවෙයි වැදගත් උපදෙස් ලබාදෙන්නකු ලෙසත් ඉතාමත් වැදගත් පුද්ගලයෙක් යැයි කීවේය.
Subscribe to:
Post Comments (Atom)
No comments:
Post a Comment