උතුරේ අවතැන් ජනතාවගේ ප‍්‍රශ්න සම්බන්ධව විපක්‍ෂයෙන් ආණ්ඩුවට එල්ල වෙන චෝදනා හා ත‍්‍රස්තවාදය පරාජය කිරීමට ජාත්‍යන්තර වශයෙන් හිමි වන සහාය පිළිබඳ ආපදා කළමනාකරණ හා මානව හිමිකම් ඇමැති මහින්ද සමරසිංහ මහතා සමග කළ සාකච්ඡාවක් පහත පළවේ.
ත‍්‍රස්තවාදයෙන් ජනතාව මුදා ගැනීම සඳහා වන්නි මෙහෙයුම ඉතා සාර්ථකව සිදු වන නමුත් මෙහිදී උතුරු ප‍්‍රදේශයේ පුද්ගලයින් විශාල වශයෙන් අවතැන් වී සිටින බවත් ඔවුන් ගැන ආණ්ඩුව කිසිම සොයා බැලීමක් නොකරන බවටත් චෝදනා එල්ල වෙනවා.
එම චෝදනාව පදනම් විරහිතයි. අවතැන්වන ජනතාවට අවශ්‍ය සියලු පහසුකම් ලබාදීමට ආණ්ඩුව කි‍්‍රයා කරමින් සිටිනවා.
මේ ගැන තවදුරටත් කටයුතු කිරීම සඳහා ජනාධිපතිතුමා කමිටුවක් පත්කර තිබෙනවා, මගේ ප‍්‍රධානත්වයෙන්. ආරක්ෂක අමාත්‍යාංශයේ සම්බන්ධීකරණ කටයුතු, මානුෂික ආධාර ලබාදීම ඇතුළු කරුණු ගණනාවක් මෙහිදී සාකච්ඡා වෙනවා.
ආරක්ෂක ලේකම් ගෝඨාභය රාජපක්ෂ මහතා, ජාත්‍යන්තර ප‍්‍රජාව, එක්සත් ජාතීන්ගේ සංවිධානයේ ප‍්‍රධාන නියෝජිතයින්, තානාපතිවරුන්, රාජ්‍ය නොවන සංවිධාන, රජයේ අදාළ සියලු අමාත්‍යාංශවල ලේකම්වරුන්, පොලිසිය හා ති‍්‍රවිධ හමුදාවත් නියෝජනය වෙනවා.
මේ සියලු නියෝජිතයින් ඉදිරියේදී මෙම කාරණා සාකච්ඡා කරන නිසා අභූත චෝදනා රජයට එරෙහිව එල්ල කිරීමට කිසිවෙකුට බැහැ.
පසුගියදා තිබුණු රැස්වීමට කිලිනොච්චිය, මන්නාරම, මුලතිව්, වව්නියාව දිසාපතිවරුන් පැමිණ සිිටියා. එහි තිබෙන නියම තත්ත්වය ජාත්‍යන්තර ප‍්‍රජාවට අවබෝධ කරලා දෙන්න අවස්ථාවක් ලැබුණා.
නමුත් මේ වන විට අවතැන් වූවන් විශාල පිරිසක් ඒ 9 මාර්ගය දෙපසේ ගස් යට සිටින බවට ඇතැම් මාධ්‍ය හා ඇතැම් දේශපාලන පක්ෂ පෙන්වා දෙනවා
ඒ ගොල්ලන් විතරක් නොවෙයි. කොටි සංවිධානයත් වෙබ් අඩවිවලට අසත්‍ය තොරතුරු ඇතුළත් කරලා විශාල ප‍්‍රචාරයක් ගෙන යනවා.
මේ ගැන එම රැස්වීමේදී අදාළ දිසාපතිවරුන්ගෙන් විමසීමක් කළා. කිසිම වැසියෙක් ඒ 9 මාර්ගය දෙපසේ ගස් යට නැහැ කියලා දිසාපතිවරුන් අවධාරණයෙන් කියා සිටියා.
සියලුම දෙනාට නවාතැන් ලබාදීලා අවශ්‍ය පහසුකම් සලසා දී ඇති බවට කිලිනොච්චිය දිසාපතිවරයාත් සහතික වුණා. පිසූ ආහාර හා වියළි සලාක ලබා දෙන බවටත් දිසාපතිවරයා කියා සිටියා.
සති දෙකකට ප‍්‍රමාණවත් ආහාර මේ වන විටත් ගබඩා කරලා තියෙනවා. මුලතිව් දිසාපතිවරයාත් මේ කරුණු පැහැදිලි කළා.
අවතැන් වී එන පිරිස ඉහළ ගියොත් ඔවුන්ට පහසුකම් ක්ෂණිකව සැලසීමට තිබෙන වැඩපිළිවෙළ කුමක්ද ?
කිලිනොච්චි හා මුලතිව් දිසාපතිවරුන් කියා සිටියේ එවැනි තත්ත්වයක් ඇතිවුවහොත් දැනටමත් අදාළ ස්ථාන සකස්කර ඊට සූදානම් වී ඇති බවයි.
එවන් අවශ්‍යතාවකදී අවතැන් වූ සියලු ජනතාවට තාවකාලික වාසස්ථාන ලබාදීම කෙරෙහිත් අවධානය යොමු වෙලා තියෙනවා. මේ ප‍්‍රශ්න මමත් ජාත්‍යන්තර ප‍්‍රජාව ඉදිරියේදී අදාළ දිසාපතිවරුන්ගෙන් විමසා සිටියා.
කොටි සංවිධානය බොරු ප‍්‍රචාරයක් ගෙනි යනවා, ලක්ෂ ගණනක් අවතැන්වෙලා. ඒ ජනතාවට අවශ්‍ය පහසුකම් ලබාදෙන්න ආණ්ඩුව ඉදිරිපත් වෙලා නැහැ කියලා.
මේ ප‍්‍රශ්නයට පිළිතුරු දෙමින් අදාළ දිසාපතිවරුන් කියා සිටියේ අවතැන් වී සිටින ජනතාවට අවශ්‍ය සියලු පහසුකම් ලබාදී ඇති බවයි. දිසාපතිවරුන්ගේ ප‍්‍රකාශ ජාත්‍යන්තර ප‍්‍රජාව පිළිගත්තා.
ඔබ කියන ආකාරයට අසත්‍ය ප‍්‍රචාර ගෙන යන්න කොටි සංවිධානයට යම් කිසි අවශ්‍යතාවක් ඇතිවෙලාද ?
ආරක්ෂක අංශ ගෙන යන සාර්ථක මෙහෙයුම් එක්ක විශාල ගැටලුවකට මුහුණ පාන්න කොටි සංවිධානයට සිදුව තිබෙනවා. ඉතා ශීඝ‍්‍රයෙන් අපේ ආරක්ෂක අංශ ත‍්‍රස්තවාදී බලකොටු බිඳදමමින් ඉදිරියට යමින් සිටිනවා.
කිලිනොච්චියේ ගම්මාන කිහිපයකම බලය මෙතරම් ඉක්මනට හමුදාව යටතට ගන්න පුළුවන් වෙයි කියලා සමහරුන් හිතුවෙත් නැහැ.
කොටි සංවිධානය මේ වන විට අභ්‍යන්තර අවුල් ජාලයකට මුහුණ දී ඇති බව ඔවුන්ගේ පණිවිඩ හුවමාරුවලින් පැහැදිලි වෙලා තියෙනවා.
කිලිනොච්චිය, මුලතිව් දිස්ති‍්‍රක්කවල සාමාන්‍ය ජනතාවගේ සහයෝගයත් ආරක්ෂක අංශවලට ලැබෙන්න පටන් අරගෙන.
කොටි සංවිධානය දිගින් දිගටම පරාජයට පත්වෙන නිසාත් ජනතාවගේ සහයෝගය නොලැබෙන නිසාත් ඔවුන්ට වුවමනා වෙලා තියෙන්නේ කෙසේ හෝ ජාත්‍යන්තර ප‍්‍රජාවගේ අවධානය දිනා ගන්නයි.
ඒ හරහා කොටි සංවිධානයට අවශ්‍ය වෙලා තියෙන්නේ අපේ ආරක්ෂක අංශ වලට එරෙහිව බොරු මානව හිමිකම් චෝදනා එල්ල කරන්න.
ඒ හරහා ජාත්‍යන්තර ප‍්‍රජාව ලව්වා ආණ්ඩුවට බලපෑම් කරන්න උත්සාහ ගන්නවා, මෙහෙයුම් නවත්වන්න කියලා.
එම නිසා කොටි සංවිධානයට කලින් ඉස්සර වෙලා ඇත්ත තත්ත්වය ජාත්‍යන්තර ප‍්‍රජාවට තේරුම් කර දෙන්න අපි කි‍්‍රයා කරනවා. කොටි සංවිධානයේ අවසන් තුරුම්පුවටත් ආණ්ඩුව සූදානම්.
උතුරේ කොපමණ පිරිසක් අවතැන් වෙලා සිටිනවාද කියලා වාර්තා වෙලා තියෙනවාද ?
කොටි සංවිධානය ඇතුළු බෙදුම්වාදයට පක්ෂ ඇතැම් දේශපාලඥයින් කියන්නේ ලක්ෂ දෙකක් අවතැන් වෙලා කියලා. ඒ කතාව අසත්‍යයක්. එතරම් ප‍්‍රමාණයක් කිසිම අයුරකින් අවතැන් වෙලා නැහැ.
සංඛ්‍යා ලේඛන වැඩිපුර ප‍්‍රකාශ වෙන්නේ කොහොමද කියලා අපි හොඳ හැටි දන්නවා. නැගෙනහිර මුදා ගැනීමේදී වාකරේ ඇතිවූ තත්ත්වය උදාහරණයක් ලෙස පෙන්නන්න පුළුවන්.
වාකරේ අවතැන් වූවන් හතලිස් හත් දහසක් ඉන්නවා කියලා දිසාපතිවරුන්, ප‍්‍රාදේශීය ලේකම්වරුන් කිව්වා. අන්තිමට අවතැන් වූවන් වශයෙන් වාකරේ හිටියේ දොළොස්දහසක් පමණයි.
කොටි සංවිධානයේ බලපෑම් මත කිලිනොච්චියෙන් පැමිණෙන සංඛ්‍යා වාර්තා වැඩිවෙලා තියෙන බව අපි දන්නවා.
අපි කිලිනොච්චියේ මුලතිව් සිටින සාමාන්‍ය ජනතාවට යවන ආහාර ද්‍රව්‍ය ඖෂධ කොටසක් කොටි සංවිධානය පැහැරගෙන ඔවුන්ගේ සාමාජිකයින්ට ලබා දෙනවා.
මා ජාත්‍යන්තර සමුළුවලට ගියාම මේ බව සඳහන් කරලා පෙන්වා දෙන්නේ ශ‍්‍රී ලංකාව සුවිශේෂී රටක් හැටියටයි. මේවගේ දරුණු ත‍්‍රස්තවාදයකට මුහුණ දෙන ගමන් අවතැන්වන ජනතාව අමතක නොකරන එකම රට ශ‍්‍රී ලංකාව වෙන්න ඇති කියලා මං ජාත්‍යන්තර ප‍්‍රජාවට දැනුම් දුන්නා.
කිලිනොච්චිය, මුලතිව් දිසාපතිවරුන්ට කොටි සංවිධානය බලපෑම් කරලා වැඩි සංඛ්‍යා ලේඛන දාගන්නේ එම බඩු ඔවුන්ට ගන්න තියෙන වුවමනාව නිසයි. ඒකනිසා ලක්ෂ ගණන් අවතැන් වූ පිරිස් කිලිනොච්චියේ මුලතිව්වල නැහැ. ඉතාම අඩු පිරිසක් තමයි අවතැන් වෙලා ඉන්නේ.
ඔබ කියන්නේ අදාළ දිසාපතිවරුන් අසත්‍ය තොරතුරු ඉදිරිපත් කරනවා කියලද ?
මං දිසාපතිවරුන්ට චෝදනා එල්ල කරන්නේ නැහැ. ඔවුන්ට කොටි සංවිධානයෙන් සිදුවන බලපෑම් අකමැත්තෙන් හරි වැඩිපුර සංඛ්‍යා ලේඛන හරිගස්සන්න වෙනවා.
කිලිනොච්චියේ ජීවත්වන රජයේ නිලධාරීන්ට ඇත්ත කියන්න බැහැ. ඇත්ත කිව්වොත් කොටි ත‍්‍රස්තවාදීන් ඇවිල්ලා එම නිලධාරියා ඝාතනය කරාවි. මීට පෙරත් එවැනි සිද්ධි වලට ඕන තරම් උදාහරණ අපි දැකලා තියෙනවා.
ඉන්දියාවේ ආරක්ෂක උපදේශක නාරායන් මහතා ප‍්‍රකාශයක් කරලා තිබුණා. ශ‍්‍රී ලංකාවේ ආණ්ඩුව මෙහෙයුම් දිනුවට යුද්ධය දිනන්න නම් දේශපාලන විසඳුමකට යන්න අවශ්‍යයි කියලා. මේ ප‍්‍රකාශය ගැන ඔබ හිතන්නේ කුමක්ද ?
ඒ ප‍්‍රකාශයට අපේ ආරක්ෂක ලේකම් ගෝඨාභය රාජපක්ෂ මහතා ඉතා හොඳ පිළිතුරක් ලබාදී තිබුණා. සාර්ථක මෙහෙයුම ඉවරවුණාට පසුව එම පළාතේ සිටින සියලු ශ‍්‍රී ලාංකිකයින්ගේ අයිතිවාසිකම් සුරක්ෂිත කෙරෙන වැඩපිළිවෙළකට යනවා කියලා ගෝඨාභය රාජපක්ෂ මහතා පෙන්වා දුන්නා.
දේශපාලන විසඳුමක් මේ ප‍්‍රශ්නයට දෙන්න ඕන කියන කාරණය ඉන්දියාව වගේම අපිත් පිළිගන්නවා. ඒ සඳහා තමයි, ජනාධිපතිතුමා සර්ව පාක්ෂික කමිටුව රැස් කළේ.
ඉන්දියාව කියන ස්ථාවරයේම තමයි අපිත් ඉන්නේ. ඒක නිසා මෙවැනි ප‍්‍රකාශ උලුප්පලා අනවශ්‍ය ගැටුම් ඇති කරන්න සමහරුන් උත්සාහ ගත්තට ඒවට අහුවෙන්න නරකයි.
මේකට හොඳම උත්තරය ගෝඨාභය රාජපක්ෂ මහතා ආරක්ෂක ලේකම් වරයා වශයෙන් කියල තියෙනවා. තමිල්නාඩුවෙන් කෑගහන්න කලින් අපි සියලු ශ‍්‍රී ලාංකිකයින්ගේ ආරක්ෂාව තහවුරු කරගන්න කි‍්‍රයා කරනවා.
ත‍්‍රස්තවාදයට එරෙහිව පමණයි, මෙහෙයුම් සිදු කරන බව ඉන්දියාවත්, ජාත්‍යන්තර ප‍්‍රජාවත් දන්නවා.
උතුරු ප‍්‍රදේශය මුළුමනින්ම මුදා ගන්නාතුරු අවතැන් වී සිටින ජනතාවට අවශ්‍ය ආහාර පාන සෞඛ්‍ය ඇතුළු පහසුකම් ලබාදීමට ප‍්‍රමාණවත් තොග තිබෙනවාද ?
ඒ ගැන කිසිම ප‍්‍රශ්නයක් නැහැ. ජනතාවට ලැබිය යුතු ආහාර පාන ඇතුළු සියලු පහසුකම් ඕනෑම තරම් කාලයකට තියෙනවා.
අත්‍යාවශ්‍ය සේවා කොමසාරිස් ජෙනරාල්වරයා කියලා තියෙනවා, වව්නියාව ප‍්‍රදේශයේ ගබඩා යොදාගෙන මෙම ආහාර ඇතුළු අත්‍යාවශ්‍ය ද්‍රව්‍ය බෙදා හරින්න කි‍්‍රයා කරනවා කියලා. ලෝක ආහාර සංවිධානයත් මේ සඳහා එක්වෙන්න කැමැත්ත පළ කරලා තියෙනවා.
සති දෙකකට අවශ්‍ය ආහාර දැනටමත් අදාළ ගබඩාවල තියෙනවා. ඒ අතරතුර ඉදිරි කාලයට අවශ්‍ය ආහාර ගබඩා කෙරෙමින් පවතිනවා.
උතුරු පළාත මුළුමනින්ම මුදා ගන්නාතුරු අවතැන්වී සිටින ජනතාවගේ සියලු වගකීම ආණ්ඩුව ගෙන ඔවුන්ට අවශ්‍ය සියලු පහසුකම් ලබාදීමට කි‍්‍රයා කරනවා. ඒ ගැන සැකයක් ඇති කරගත යුතු නැහැ.
සාක් රාජ්‍ය නායක සමුළුව අවසන් වුණා. මෙහිදී ශ‍්‍රී ලංකාවට වාසි රැසක් අත්වූ බව ආණ්ඩුව කියා සිටින විට විරුද්ධ පක්ෂය කියා සිටින්නේ නිකරුණේ මුදල් නාස්තියක් පමණක් සිදුවුණු බවයි. ජාත්‍යන්තර දේශපාලනය ගැන උනන්දුවක් දක්වන දේශපාලනඥයකු ලෙස මේ ගැන ඔබේ ස්ථාවරය කුමක්ද ?
කොටි සංවිධානය වෙනුවෙන් හඬ නගන උදවිය මොනව කිව්වත් ශ‍්‍රී ලංකාවේ කිසිදු ගැටලුවක් නොමැතිව ජාත්‍යන්තර මට්ටමේ ඕනෑම උත්සවයක් පැවැත්වීමට හැකි බව මුළු ලෝකයම පිළිගත්තා.
ආයෝජකයින් පැමිණීම, සංචාරක ව්‍යාපාරය දියුණු වීම, වෙළෙඳ ගිවිසුම්වලින් ප‍්‍රතිලාභ ලැබීම ඇතුළු ප‍්‍රතිලාබ රැසක් මෙමගින් ශ‍්‍රී ලංකාවට හිමි වෙනවා.
ජනාධිපතිතුමා සාක් සමුළුවේ සභාපතිධුරයට පත්වීම මහින්ද රාජපක්ෂ මහතාගේ ජාත්‍යන්තර ප‍්‍රතිරූපයට හොඳයි.
ජනාධිපතිතුමාගේ ප‍්‍රතිරූපයට හොඳක්වුණා කියලා රටට සිදුවෙන යහපතක් නොමැති බවයි විරුද්ධ පක්ෂය පෙන්වා දෙන්නේ
ඒක බොළඳ තර්කයක්. ජනාධිපතිතුමාගේ ජාත්‍යන්තර ප‍්‍රතිරූපයට හොඳයි කියන්නේ රටට හොඳයි කියන එකනේ. මේ රටේ රාජ්‍ය නායකයා ජනාධිපතිතුමායි.
මීළඟ හමුව දක්වාම සාක් කලාපයේ නායකයා අපේ ජනාධිපතිතුමා. එ්කට විපක්ෂය ලාමක විහිළු කළාට ඒ තනතුර සුළුවෙන් තකන්න බැහැ. ඉදිරි කාලයේදී එම තනතුර නිසාම විශාල ප‍්‍රතිලාභ අපේ රටට ලැබෙනවා.
සාකච්ඡා කෙළේඩබ්ලිව්.කේ. ප‍්‍රසාද්මංජු
Subscribe to:
Post Comments (Atom)
No comments:
Post a Comment