විජයානි එදිරිසිංහ
කොටි සංවිධානයට උදව් කළ රාජ්‍ය නොවන සංවිධාන 12 ක් එම සංවිධානයට උදව් කිරීම දැන් මඟ හරිමින් සිටින බවට තොරතුරු ලැබී ඇත. නැඟෙනහිර බලය අහිමි වූ කොටි සංවිධානයට උතුරේ බලය ද අහිමි වෙමින් යන බව පැහැදිලිව පෙනී යන බැවින් එම සංවිධානයට උදව් උපකාර කළ ජාත්‍යන්තර සංවිධාන මෙසේ මඟහරිමින් සිටින බව ජාත්‍යන්තර බුද්ධි තොරතුරුවලින් මෙරට බුද්ධි අංශවලට දැනගැනීමට ලැබී තිබේ.
උතුරු නැඟෙනහිර ප‍්‍රදේශවල බලය පැවැති කාලයේ කොටි සංවිධානයට අන්තර් ජාතික රාජ්‍ය නොවන සංවිධාන විස්සකින් පමණ උදව් ලැබී ඇත. ඔවුන් නැඟෙනහිර පළාතේ සහ උතුරේ කොටි සංවිධාන කටයුතු වැඩි ප‍්‍රමාණයක් කරගෙන ගොස් තිබුණේ එම රාජ්‍ය නොවන සංවිධානවලින් ලැබෙන ආධාරවලිනි. කොටි සංවිධානය සතුව තිබූ වාහන, සන්නිවේදන උපකරණ, දුරකථන, පහසුකම් ඇතුළු නවීන තාක්‍ෂණය ඔස්සේ ලැබී තිබූ බොහෝ දේවල් ලබාගැනීමට රාජ්‍ය නොවන සංවිධානවලින් සහාය ලැබී තිබුණි.
මූල්‍යමය වශයෙන්ද බොහෝ ද්‍රව්‍ය ඇතුළු වෛද්‍ය පහසුකම් ද එම රාජ්‍ය නොවන සංවිධානවලින් කොටි සංවිධානයට ලැබී තිබුණු බව මෙරට බුද්ධි අංශ මඟින් අනාවරණය කරගෙන තිබිණි.
අන්තර් ජාතික වශයෙන් පෙනී සිටින රාජ්‍ය නොවන සංවිධාන ගණනාවක සාමාජිකත්වය ලබාගත් සංගම් ගණනාවක්ද මෙරට සිටී. ඔවුන් සෘජුවම නැතත් වක‍්‍රාකාරව හෝ සංවිධානයට උදව් කරන බවට බුද්ධි අංශ අනාවරණය කරගෙන ඇත. ජාත්‍යන්තර රාජ්‍ය නොවන සංවිධාන ඒ සඳහා මෙම සංගම්වලට ඩොලර් මිලියන ගණනින් උදව් කර තිබේ.
විදේශීය රටවල සිටින කොටි සාමාජිකයන්ද අන්තර්ජාතික රාජ්‍ය නොවන සංවිධානවලින් උදව් ලැබීම අඩුවී ඇති බව කොටි සංවිධානයට දැනුම් දී ඇත.
නැඟෙනහිර පළාතේ කොටි බලය අහිමි වූ කොටි සංවිධානයට උතුරේ ද විශාල පරාජයකට මුහුණ දෙමින් සිටින නිසා රාජ්‍ය නොවන සංවිධාන තවදුරටත් කොටි සංවිධානයට උදව් දීමෙන් පළක් නොමැති බව තේරුම් ගෙන මෙසේ මඟහරිමින් සිටිනු ඇතැයි බුද්ධි අංශ විශ්වාස කරයි.
එම රාජ්‍ය නොවන සංවිධානවලින් ආධාර නොලැබීම නිසා මෙරට තිබෙන සංගම්වලටද විශාල මූල්‍ය හිඟයකට මුහුණ පෑමට සිදුවී ඇත.
Subscribe to:
Post Comments (Atom)
No comments:
Post a Comment