චීනය අභිමානවත්ව ඉදිරියෙන්....

“බීජිං” ඔලිම්පික් කී‍්‍රඩා උළෙලේ මේ වන විට සත්කාරක චීනය රන් පදක්කම් 42 ක්, රිදී පදක්කම් 14 ක් හා ලෝකඩ පදක්කම් 18 ක් දිනා ගනිමින් ඉදිරියෙන් ම පසුවන්නේ කිසිදු රටකට අභිබවා යෑමට අපහසු තරම් ඉහළම දක්ෂතා ප‍්‍රකට කරමිනි. චීනය ඉදිරියේදී තවත් රන් පදක්කම් 4 ක් බලාපොරොත්තුවෙන් පසුවෙයි.
ඇමරිකා එක්සත් ජනපදයේ “රන් ආකරය” මයිකල් ෆෙල්ප්ස් පිහිනුම් ඉසව්වලදී ලබාගත් වාර්තාගත රන් පදක්කම් 8 ත් සමග ඇමරිකා එක්සත් ජනපදය රන් පදක්කම් 25ක්, ලෝකඩ පදක්කම් 26ක් හා රිදී පදක්කම් 26ක් දිනා ගනිමින් දෙවැනි ස්ථානයේ පසුවන අතර තුන්වැනි ස්ථානය ලබාගෙන ඇති එංගලන්තය ලබාගෙන ඇති රන් පදක්කම් සංඛ්‍යාව 15 කි.
සිව් වැනි ස්ථානයට ඔස්ටේ‍්‍රලියාවද, පස්වැනි ස්ථානයට ජර්මනිය ද මේ වනවිට පත්ව සිටී.
මීටර් 400 (කාන්තා) තරගයෙන් රන් පදක්කම දිනා ගත්තේ එංගලන්තයේ කි‍්‍රස්ටින් ඔහුරොගොය. ඇය මේ වසරේ ඇගේ හොඳම කාලය සටහන් කරමින් තත්පර 49.62 කින් තරගය නිම කළාය. රිදී පදක්කම දිනාගත් ජැමෙයිකාවේ ෂෙරිකා විලියම්ස් (තත්පර 49.69) ය. ලෝකඩ පදක්කම හිමි වූයේ ඇමරිකා එක්සත් ජනපදයේ සාන්යා රිචඩ්ස් (තත්පර 49.93) ට ය.
බහරේනයට ප‍්‍රථම ඔලිම්පික් පදක්කම
බහරේන් රාජ්‍යයේ රෂීඩ් රම්සි මීටර් 1500 ඉසව්වෙන් රන් පදක්කම දිනා ගනිමින් බහරේනයට ප‍්‍රථම ඔලිම්පික් පදක්කම දිනා දීමට සමත් විය. මෙය 1984 වසරේ ලෝස් ඇන්ජලීස් නුවර පැවති ඔලිම්පික් කී‍්‍රඩා උළෙලින් පසු ගල්ෆ් කලාපයේ රටක් ලැබූ පළමු පදක්කම ලෙස ද හැඳින්විය හැකිය.
28 හැවිරිදි රෂීඩ් රම්සි මොරොක්කෝවේ උපත ලැබූවෙකි. 2005 වසරේ පින්ලන්තයේ හෙල්සින්කි නුවර පැවති ලෝක සූරතා මලල කී‍්‍රඩා තරගාවලියේදී ද මීටර් 1500 ඉසව්වෙන් රන් පදක්කම දිනා ගත්තේ ඔහුය. ;ම් ඉසව්වේ රිදී පදක්කම කෙන්යාවේ ඇස්බෙල් කිප්රුටෝ ටද, ලෝකඩ පදක්කම නවසීලන්තයේ විලිස්ට ද හිමි විය.
මීටර් 200ටත් උසේන් බෝල්ට්
බෙයිජිං ඔලිම්පික් උලෙළේ වේගවත්ම කී‍්‍රඩකයා බවට පත්වූ ජැමෙයිකාවේ උසේන් බෝල්ට් මීටර් 200 ඉසව්වද ජය ගැනීමට සූදානමින් පසුවෙයි.
මීටර් 200 ඉසව්වේ අවසන් පූර්ව තරගවල හොඳම කාලය (20.09) වාර්තා කිරීමට උසේන් බෝල්ට් සමත්විය.
උසේන් බෝල්ට් මීටර් 100 ඉසව්ව තත්පර 9.69 කින් අවසන් කරමින් නව ලෝක වාර්තාවක් පිහිටුවීය.
පාපන්දු අවසන් තරගයට ආජෙන්ටිනාව හා නයිජීරියාව
අජෙන්ටිනාව හා නයිජීරියාව බෙයිජිං ඔලිම්පික් කී‍්‍රඩා උලෙළේ පාපන්දු අවසන් තරගයට සුදුසුකම් ලබා සිටී. දෙරට අතර අවසන් මහ තරගය සෙනසුරාදා ජාතික කී‍්‍රඩාංගණයේදී පැවැත්වේ.
ආජෙන්ටිනාව බ‍්‍රසීලය පරාජය කරමින්ද, නයිජීරියාව බෙල්ජියම පරාජය කරමින්ද, අවසන් තරගය සඳහා සුදුසුකම් ලැබූහ.
මේ අතර බීච් වොලිබෝල් අවසන් තරගයට චීනය හා ඇමරිකා එක්සත් ජනපදය සුදුසුකම් ලබා සිටී.