සුසන්තිකා මීටර් 200 අවසන් පූර්ව වටයට ශී‍්‍ර ලංකාවේ එකම අපේක්ෂාව අද තරග බිමේ

බීජිං ඔලිම්පික් උළෙලේ මීටර් 200 (කාන්තා) දෙවැනි වටයේ දෙවැනි තරගයට සහභාගි වූ සුසන්තිකා ජයසිංහ තත්පර 22.94 කින් තරගය නිම කරමින් තුන්වැනි ස්ථානය ලබා එම ඉසව්වේ අවසන් පූර්ව වටයට සුදුසුකම් ලබා ගත්තාය.
එම දෙවැනි වටයේ තරගයේ ප‍්‍රථම ස්ථානය ලබා ගත්තේ තවත් ආසියානු රටක කී‍්‍රඩිකාවකි. ඇය අල් ගසාරා ය. ඇය බහරේනයේ කී‍්‍රඩිකාවකි.
ඇය තරගය නිම කළේ තත්පර 22.76 ක කාලයක් සටහන් කරමිනි.
තත්පර 22.89 කින් තරගය නිම කළ ප‍්‍රංශයේ හර්ට්ස් හුආරි මුරියෙල් දෙවැනි ස්ථානය ලබා ගත්තාය.
බහරේනයේ අල් ගසාරා 2006 වසරේ දෙසැම්බර් මාසයේ කටාර් රාජ්‍යයේ දී පැවැති ආසියානු කී‍්‍රඩා උළෙලේදී මීටර් 200 ඉසව්වෙන් රන් පදක්කම දිනූ කී‍්‍රඩිකාවයි. (සුසන්තිකාට එහිදී හිමි වූයේ ලෝකඩ පදක්කමයි)
මීටර් 200 (කාන්තා) ඉසව්වේ අවසන් පූර්ව තරග අද (20) පස්වරුවේ පැවැත්වීමට නියමිතය.
අවසන් පූර්ව තරගයෙන් අවසන් තරගයට සුදුසුකම් ලබා රටට කීර්තිය ගෙන ඒම තම බලාපොරොත්තුව බව තරගය අවසානයේ සුසන්තිකා පවසා සිටියාය.
මීටර් 200 කාන්තා ඉසව්වේ අවසන් පූර්ව වටයට සුදුසුකම් ලැබූ සුසන්තිකා ජයසිංහ කී‍්‍රඩිකාවට එම ඉසව්වෙන් ඔලිම්පික් පදක්කම් ලබා ගැනීමට ශක්තිය හා ධෛර්යය ලැබේවායි කී‍්‍රඩා හා පොදු විනෝද කටයුතු ඇමැති ගාමිණී ලොකුගේ මහතා සුසන්තිකා වෙත සුබ පැතුම් පණිවිඩයක් යවමින් කියා සිටියේය.
බීජිං ඔලිම්පික් උළෙලේ ඊයේ උදෑසන පැවැතී මීටර් 200 ඉසව්වේ ප‍්‍රථම වටයේ තරගයෙන් දෙවැනි ස්ථානය ලැබූූ ශී‍්‍ර ලංකාවේ වේග රැජින සුසන්තිකා ජයසිංහ දෙවැනි වටයට සුදුසුකම් ලබා ගත්තාය. (තත්පර 23.04)
ඇය පරාජයට පත් වූයේ ඇමරිකා එක්සත් ජනපදයේ ඇලියන් ෆිලික්ස් වෙතිනි. (තත්. 23.02) ඇය ලෝක සූරතා මලල කී‍්‍රඩා තරගාවලි දෙකක මීටර් 200 ඉසව්ව ජයග‍්‍රහණය කිරීමට සමත් වූ කී‍්‍රඩිකාවකි.
2004 වසරේ ඇතැන්ස් ඔලිම්පික් කී‍්‍රඩා උළෙලේ මීටර් 200 ඉසව්වෙන් රිදී පදක්කම ලැබූූ ඇය සුසන්තිකාට එල්ල විය හැකි ප‍්‍රබලතම තර්ජනය බවට අනාවැකි පළ වූයේ තරගාවලිය ආරම්භයේ සිටය.
මීටර් 200 ඉසව්වේ පළමු වටයේ සමස්ත ප‍්‍රතිඵල සටහන අනුව ඉදිරියෙන්ම සිටින්නේ ඇමරිකා එක්සත් ජනපදයේ මුතාලීය. ඇය තරගය අවසන් කළ කාලය තත්ත්පර 22.71 කි.
26 හැවිරිදි මුතාලී ඇමරිකානු තේරීම් තරගවලදී මීටර් 100 ඉසව්ව ජයග‍්‍රහණය කළ කී‍්‍රඩිකාවයි.
මුතාලී 2004 වසරේ ඇතැන්ස් ඔලිම්පික් උළෙලේ මීටර් 200 ඉසව්ව නිම කළේ සත්වැන්නිය ලෙසය. සුසන්තිකා ජයසිංහ පළමු වටයේ තරගය නිම කළේ තත්පර 23.04 ක් සටහන් කරමිණි.
මේ කාලය අනුව ඇය මූලික වටයට සහභාගි වූ කී‍්‍රඩිකාවන් 46 දෙනෙකු අතර 11 වැන්නිය ලෙස පසු වූවාය.
ජැමෙයිකාවේ වෙරෝනිකා කැම්බල් ද එම කාලයම වාර්තා කර තිබිණි. පළමු වටයෙන් කී‍්‍රඩිකාවන් තිස් දෙදෙනෙකු දෙවැනි වටයට සුදුසුකම් ලැබූහ.
ෂැරොන් සිම්සන් (ජැමෙයිකාව), කෙරන් ස්ටිවර්ට් (ජැමෙයිකාව), වෙරොනිකා කැම්බල් (ජැමෙයිකාව), ඩෙබී ෆර්ගියුසන් (බහමාස්) මීටර් 200 ඉසව්වට ඉදිරිපත් වී සිටින ලොව සුපිරිතම කී‍්‍රඩිකාවෝය.
මේ අතරින් ෂැරොන් සිම්සන් මීටර් 100 ඉසව්වේ රිදී පදක්කමද, කෙරන් ස්ටිවර්ට් ලෝකඩ පදක්කමද දිනාගත් කී‍්‍රඩිකාවන් බව සඳහන් කළයුතුය.