අද සංවාදයට එක්වන්නේ මාර්ගස්ථ මගී ප‍්‍රවාහන ඇමැති ලසන්ත අලගියවන්න මහතායි. උතුරු මැද, සබරගමු පළාත් සභා මැතිවරණය, වෘත්තීය සමිති පවත්වනවායැයි කියන වැඩවර්ජනය සහ හිටපු ජනපතිනියගේ ප‍්‍රකාශ සම්බන්ධයෙන් මෙහි දී අමාත්‍යවරයා අදහස් දක්වයි.
ලෝක වෙළෙඳ පොළේ තෙල් මිල ඉහළයාම, ලෝකයේ ම ආර්ථිකය කඩා වැටීම ආදී තත්ත්වයන් ආණ්ඩුව ජනතාවට පෙන්වමින් සිටින බව පේනවා. ජනතාව විශාල ලෙස පීඩාවට පත්වෙලා තිබෙන එවැනි පසුබිමක ඡන්ද පැවැත්වීම සාධාරණ ද?
අපේ රටේ ඉතිහාසයේ විවිධ අර්බුදකාරී තත්ත්වයන් හා ප‍්‍රශ්නකාරී තත්ත්වයන් විවිධ කාලවල දී මතුවුණා. ඒවා දේශපාලන අර්බුද වෙන්න පුළුවන්. එහෙම නැත්නම් ස්වභාවික විපත් නැත්නම් ආර්ථික විපත් වෙන්න පුළුවන්.
නමුත් ඒ සෑම කාලයක ම අපි මැතිවරණ නිය ම වෙලාවට මැතිවරණ නීතියට අනුව තියලා තියෙනවා. එතකොට මේ සෑම නීතියක් ම හදන්නෙත් මහජනතාව විසින් තෝරාගන්නා පාලක පිරිස්වල දායකත්වයෙන්.
ඒ නිසා පළාත් සභා විසුරුවලා ඡන්දයකට යන්න අපිට කිසි ම බාධාවක් නැහැ. ප‍්‍රජාතන්ත‍්‍රවාදය ගරු කරන ඒ වෙනුවෙන් පෙනී සිටින ආණ්ඩුවක් වශයෙන් අපි කටයුතු කරන නිසයි මෙවැනි ඡන්දයකට යන්න තීරණය කරලා තියෙන්නේ.
අනික ඕනෑ ම පක්ෂයක් මැතිවරණයකට ඉදිරිපත් වෙන්නේ දිනන්න, ජයග‍්‍රහණය කරන්නයි. ආණ්ඩු පක්ෂය වශයෙන් අපිත් එහෙමයි. ඒ අනුව ආණ්ඩු පක්ෂයට වාසි සහගත අවස්ථාවක් බලලා තමයි අපි මේ මැතිවරණයට ගිහිල්ලා තියෙන්නේ. හැබැයි අපි ජනතාවට බලෙන් මැතිවරණ පැටෙව්වෙ නෑ.
මේ වෙලාවේ ආණ්ඩුවට තියෙන වාසිය මොකක් ද? මෙහෙයුම් පිට පටවලා නේද ඡන්ද දිනාගන්න හදන්නේ?
නැහැ. එහෙම කියන එක වැරැදියි. මෙහෙයුම් විතරක් පෙන්නලා ජයගන්න තරම් පටු තත්ත්වයකට අපි පත්වෙලා නැහැ. ඔබ ගිහින් ජනතාව එක්ක කතා කරලා බලන්න. කොළඹ වගේ දිස්ති‍්‍රක්කවල ජනතාවට බඩු මිල ආදිය පිළිබඳ යම් යම් ප‍්‍රශ්න තියෙන්න පුළුවන්.
ඒත් ඔය ඡන්ද තියෙන පළාත්වල ජනතාවට අපේ රජයේ ප‍්‍රතිපත්ති නිසා විශාල සහන ලැබිලා තියෙනවා. කෘෂිකර්මය ගත්තම අපි වී ගොවියාට විශාල සහනයක් ලබාදීලා ඔවුනගේ ආර්ථිකය නංවලා තියෙනවා.
එතකොට සුළු අපනයන බෝගවල මිල අද ශීඝ‍්‍රයෙන් ඉහළ ගිහිල්ල තියෙනවා. මේ වැඩිවීමේ වාසිය ඒවා නිෂ්පාදනය කරන ප‍්‍රදේශවල ජනතාවටයි. මෙහෙම ග‍්‍රාමීය ආර්ථිකය සංවර්ධනය කරන අතර ම අපි විශාල ලෙස ග‍්‍රාමීය ප‍්‍රදේශවල පහසුකම් නංවලා සංවර්ධනයක් කරලා තියෙනවා.
සමහර වෙලාවට ඒක සියයට 300ක, 400 ක විතර ගුණයකින් වැඩිවෙලා කිව්වොත් නිවැරැදියි.
ඒ නිසා මෙහෙයුම් පිට දාලා අපි ඡන්ද ජයගන්න යන්නේ නැහැ.
අපිට එහෙම වුවමනාවක් නැහැ. අපි පසුගිය කාලේ රජයක් වශයෙන් කරපු සේවය මේ රටේ ජනතාව දන්නවා. ඒ නිසා ඒ ජනතාව අපි ගැන ඉහළ විශ්වාසයක් තියෙනවා. අපිට මේ මැතිවරණය ජයගන්න එක කොහෙත් ම අභියෝගයකුත් නෙවෙයි.
එක්සත් ජනතා නිදහස් සන්ධානය, උතුරු මැද හා සබරගමු පළාත් සදහා ඉදිරිපත් කර තිබෙන අපේක්ෂක ලැයිස්තුව බලපුවාම ඇමැති ඥාති සංග‍්‍රහයන් තිබෙන බවක් හැඟෙනවා. ජානක පෙරේරා, රන්ජන් රාමනායක යන මහත්වරුන් පිට පළාත්වලින් පැමිණ ඡන්දයට ඉදිරිපත් වෙන බවත්, එජාපයට පළාතේ අපේක්ෂකයකු හොයා ගන්න බැරිබවත් කියන සන්ධානයට ඥාති පවුල්වලින් තොර අපේක්ෂකයන් හොයාගන්න බැරි ද?
ඒ ප‍්‍රශ්නයට මට එකඟ වෙන්න බැහැ. සන්ධානයේ අපේක්ෂකයෝ තෝරාගෙන ඉන්නේ ඇමැති පවුල්වලින් විතරක් ම නෙමෙයි. සුළු පිරිසක් එහෙම ඉන්නවා තමයි. නමුත් බහුතරයක් ම ඉන්නේ වෙනස් අයයි.
මේ වගේ දේවල් අපි වගේ රටවල දක්නට තිබෙන ප‍්‍රවණතාවක් විදිහටයි මම දකින්නේ. ඒ නිසා මේක අපේ රටට විතරක්, අපේ පක්ෂයට විතරක්, මේ මැතිවරණයට විතරක් සීමා වුණු දෙයක් නෙවෙයි.
පළාතේ අපේක්ෂකයෝ දාන්න ඕනේ කියන කතාව අපි කියපු දෙයක් නො වේ. ඒක ඒකාලේ ජේ. ආර්. ජයවර්ධන මහත්තයා ම කියපු දෙයක්. මම මේ ළඟක දී ඒ සම්බන්ධ ඔහු කළ කතාවකුත් නාලිකාවක විකාශනය වෙනවා අහගෙන හිටියා.
ඒ නිසා පළාත් සභා ක‍්‍රමයේ නිර්මාතෘවරයා හඳුන්වා දුන්නු දේවල් අද අමතක කරලා තියෙන්නේ එජාපයමයි' කොහොමටත් එජාපයට අද පරණ දේවල් අමතක වෙලා වගේ තමයි කතා කරන විදිහට පෙන්නේ.
හැබැයි ජනතාවට ඒවා අමතක වෙලා නැහැ. ඒ නිසා ජනතාව නියම සුදුස්සෝ තෝරා ගනීවි.
මැතිවරණ ප‍්‍රචණ්ඩ ක‍්‍රියා සිය ගණනක් මේ වන විටත් සිදු වී තිබෙන බව වාර්තා වෙනවා. ආණ්ඩුවට මේ හා සම්බන්ධව විශාල චෝදනාවකුත් තියෙනවා. ආණ්ඩුව මැතිවරණයට බයවෙලා ද?
අපට වාසිසහගත වෙලාවක් බලලයි අපි ඡන්දවලට යායුත්තෙ. එතකොට අපිට වාසියක් තියෙන මේ වෙලාවේ, අපි මොකට ද මේ ඡන්දයට බය වෙන්නේ. අනික ඔබ ඔය ප‍්‍රශ්නය ආණ්ඩුව පැත්තට විතරක් දාලා කතා කරන්න එපා.
ඇයි එජාපයයි, ජවිපෙයි ගැටෙන්නෙ නැද්ද ගැටෙනවා. ජවිපෙයි අපියි ගැටෙනවා. අපියි එජාපයයි අතරත් ගැටුම් ඇතිවෙලා තියෙනවා. එතකොට මේවා අපේ පැත්තටම දාලා ප‍්‍රශ්න කරන එක සාධාරණ නැහැ.
මොකද අපි විතරක් සංවිධානවෙලා නොවේනේ මේවා කරන්නේ. මේවා පසුපස අනිවාර්යෙන් ම වෙනත් දේශපාලන පක්ෂත් ඉන්නවා.
මම ඔබට නැවතත් කියන්නේ අපිට මේ ඡන්දය ගැන කිසි ම බයක් නැහැ. අපිට එරෙහිව තරගයක් දෙන්න තරම් පුළුවන් පක්ෂයක්, අපේක්ෂකයෙක් ජවිපෙවත්, එජාපයේවත් ඉන්නවද? එහෙම තත්ත්වයක් අපිට පෙන්නේ නැහැ.
මැතිවරණ ප‍්‍රචණ්ඩ කි‍්‍රයා වළක්වා ගැනීම සම්බන්ධයෙන්, ආරක්ෂා ව සම්බන්ධයෙන් වැඩි වගකීමක් ආණ්ඩුවටයි තියෙන්නේ?
ඔව්, ඇත්ත. ආණ්ඩුව සම්පූර්ණයෙන් ම ඒවට වගකියනවා. අපි නීතියට කිසි ම බලපෑමක් කරලා නැහැ. පොලීසියට ස්වාධීනව තමන්ගේ පැමිණිලි ඉදිරිපත් කරන්න ඉඩ දීලා තියෙනවා. ඒවාට අපි ඇගිලි ගහන්න යන්නේ නැහැ. ඒ නිසා රජය ආරක්ෂාව සම්බන්ධයෙන් කිසි ම බලපෑමක් කරලවත්, වගකීම්වලින් ඉවත්වෙලාවත් නැහැ.
නැවත වරක් වෘත්තීය සමිති දීප ව්‍යාප්ත වැඩවර්ජනයකට යන බවට අනතුරු අඟවලා තියෙනවා. පෞද්ගලික බස් සංගම් පවා මේකට එකතුවෙන බවට දැනට ප‍්‍රකාශ කරලා තියෙනවා. කොහොම ද ආණ්ඩුව මේකට මුහුණ දෙන්නේ?
අපි ගියවර වර්ජනයට මුහුණ දුන්න ආකාරයට ම තමයි ඉදිරියටත් මේවාට මුහුණ දෙන්නේ. පසුගිය වැඩවර්ජනයක් තියලා කෑගහපු අයට මේ රටේ ජනතාව හොඳ පාඩමක් කියලා දුන්නා.
රජයක් වශයෙන් අපි ගත්තු කි‍්‍රයාමාර්ග වගේ ම අපි එතෙන්දිත් බුද්ධිමත් ජනතාවගේ තීරණයට ගරු කරලා කතා කරන්න ඕනේ. අපේ රටේ සමස්ත ජනතාව එදා හඳුනාගත්තා මේ රටේ මේ වගේ තීරණාත්මක මොහොතක කරන්න ඕනේ වැඩවර්ජනයක් නොවේ, ආණ්ඩුවට සහය දීම කියල.
ඒ අනුව ජනතාව කි‍්‍රයා කළා, බුද්ධිමත් ජනතාවක් රටේ ඉන්නකම් වර්ජනවලට මුහුණ දෙන්න අපිට අපහසුනැහැ. ජනතාවගේ සහාය අපටයි තියෙන්නේ කියන විශ්වාසය අපිට තියෙනවා.
ඔබ ඔහොම කිව්වට ගියවර වැඩවර්ජයට දින දෙක තුනක් ම ආණ්ඩුව ආයතන සේවකයන්ට විවිධ බලපෑම් එල්ල කළ බවට වාර්තා වෙලා තියෙනවා. විශේෂයෙන් ම සේවකයන්ට සිය රැකියා අහිමි කරන බවට තර්ජනය කළ බවට වාර්තාවෙනවා. වර්ජකයන්ගේ ප‍්‍රධාන ඉලක්කයක් බවට පත්වෙලා තිබුණ බස් රථ ප‍්‍රවාහනය අඩාලකිරීමට එරෙහිව ඔබ අමාත්‍යාංශයන් කි‍්‍රයා කළේ එවැනි ම ආකාරයකින් නේද?
දැන් මෙතැන බිය ගැන්වීම කියන එක විවිධාකාරයෙන් අර්ථ නිරූපණය කරන්න පුළුවන්. දැන් 80 වර්ජනයේ දී ලක්ෂ ගණනක් රැකියාවලින් එළියට දැම්මා. නමුත් අපි එහෙම කිසි ම කෙනෙකුට වෘත්තීමය කි‍්‍රයා මාර්ග අරගන්නේ නැහැ.
නීතිමය කි‍්‍රයා මාර්ග අරගෙන නැහැ. රටේ තියෙන නීති රීති අනුව ඔබේ සේවය අවශ්‍යයි කියන පණිවිඩය අපි ප‍්‍රධානීන්ට දන්වලා තියෙනවා. ලංගමේ වුණත් සිද්ධ වුණේ ඒකයි.
ඔබ කියන්නේ අපිට ඒකත් නො කර ඉන්න කියලද? මතක තියාගන්න එදා මේ රටේ වර්ජකයෝ උත්සාහ කළේ පාසල් වහන්න, මගී ජනතාව අතරමං කරන්න, සෞඛ්‍ය සේවා කඩා කප්පල් කරන්නයි.
එතකොට අපි වගකිව යුතු රජයක් හැටියට මැදිහත්වෙලා පාසල් නිසි පරිදි පවත්වාගෙන යාමට කටයුතු කිරීම, ප‍්‍රවාහනය නිසි ආකාරව කරගෙන යාම, සෞඛ්‍ය සේවය නිසි අයුරින් කරගෙන යාම කරන්න ඕනේ.
නැතිනම් මේවායින් පීඩාවට පත්වෙන්නේ මේ රටේ අහිංසක ජනතාව මිසක් අවස්ථාවාදී දේශපාලඥයෝ නොවේ. කාටහරි වර්ජනය කරන්න, ඒ ගැන මතවාදයන් පළ කරන්න තියෙන අයිතිය වගේ ම ඒක වළක්වා ගන්න කටයුතු කරන්න, මතවාදයක් පතුරවන්න රජයට වගකීමක් තියෙනවා.
අපි ඒක වටහාගෙන නිසි පරිදි එදා කටයුතු කළා. ඒකයි එතැන්දි වුණේ.
මෙවර පවත්වනවා යැයි කියන වර්ජනයට පෞද්ගලික බස් සංගම් සහයෝගය ලබාදෙන බවට ප‍්‍රකාශවෙලා තියෙනවා. ඔවුන් මෙහි දිී රජයට ඉන්ධන සහනාධාරය ගැන ලබාදුන්නු පොරොන්දුවක් පදනම් කරගෙන තියෙනවා නේද?
ඉන්ධන සහනාධාරය අපි නිකම්ම දෙනවා කියලා නැහැ. ඒ සඳහා ක‍්‍රම වේදයක් සකස් කරන්න ඕනේ. ගමනා ගමන කොමිෂන් සභාවටයි, පෞද්ගලික බස් සංගම්වලටයි තමා ඒ වගකීම අපි බාරදීලා තියෙන්නේ. එතකොට එතෙන්දි පෞද්ගලික බස් හිමියන්ගේ වගකීමකුත් තියෙනවා.
විශේෂයෙන් ම සමාගම් පිහිටුවීම ආදී කි‍්‍රයාමාර්ග ඉක්මනින් කරනවා නම් මේ ගැන අපිට ඉක්මණින් කටයුතු කරන්න තිබුණා. සහනාධාරය ගැන සාකච්ඡා පවත්වපු දවසට පහුවෙනිදා ඉදන් ම සහනාධාරය දෙනවා කියලා අපි පොරොන්දු වෙලා නැහැ.
සහනාධාරය දෙන්න අපි පොරොන්දු වුණේ ඒ සඳහා නිසි පරිපාලන ව්‍යුහය පිහිටුවා ගැනීමෙන් පසුවයි. එතකොට ඒ පරිපාලන ව්‍යුහය සකස් කර ගැනීමේ වගකීමක් පෞද්ගලික බස් හිමියන්ටත් තියෙනවා.
හිටපු ජනාධිපතිතුමිය විශේෂයෙන් ම අත්තනගල්ල ප‍්‍රදේශයේ පවත්වන මහජන රැස්වීම්වලදීත්, ජනමාධ්‍ය මගිනුත් නිතර ම ප‍්‍රකාශ කරනවා. ඇගෙන් කාපු අය ඇයට ම අද ගරහන තත්ත්වයකට පත්වෙලා කියලා. ඔබත් එතුමියත් අතරේ බොහෝ ළඟ සම්බන්ධයක් තිබුණා. ඔබට මේ ප‍්‍රකාශය වලංගු වෙන්නේ නැද්ද?
මගේ දේශපාලන ජීවිතයේ මුල් ම කාලයේ අතහිත දුන් ප‍්‍රධානතම කෙනෙක් තමයි චන්ද්‍රිකා මැතිනිය. ඒ ගෞරවය මගේ එදත් තිබුණා. අදත් තියෙනවා. ඒහින්දා ඔබ අහපු ප‍්‍රශ්නයට යනවා නම් ඇය විවිධ තැන්වල කියන ප‍්‍රකාශ මට අදාළ වෙන්නේ නැහැ.
සංවාදය – මලික් චමින්ද ධර්මවර්ධන
Subscribe to:
Post Comments (Atom)
No comments:
Post a Comment