චමින්ද වාස්ගෙන් බලාපොරොත්තු වූ තරම් සහායක් නොලැබෙද්දී ඒ අඩුව ධම්මික ප‍්‍රසාද් වැනි නවකයෙකු පිරවීම පිළිබඳ තමන් සතුටුවන බව ශ‍්‍රී ලංකා කි‍්‍රකට් නායක මහේල ජයවර්ධන පසුගියදා ප‍්‍රකාශ කර තිබුණි.
කාරියවසම් තිරාණගමගේ ධම්මික ප‍්‍රසාද් ටෙස්ට් භෞතිස්මය ලැබූ තරගයේදී ම දැක් වූ දක්ෂතා අගයනු වස් මහේල මෙය ප‍්‍රකාශ කරන්නට ඇත.
‘මහේල මට ලබාදුන් සහතිකය ඉතා වටිනවා. මම නිතර ම උත්සාහ කළේ හොඳින් පන්දුයවා කඩුලු දවාගන්න. මහේල කී‍්‍රඩාංගණයේ දී ත් පැවසුවේ සාමාන්‍ය තරගයක් ලෙස හිතා හොඳින් සෙල්ලම් කරන්න කියලයි. ඒ වගේ ම අනෙකුත් කී‍්‍රඩකයන් ද මට උපරිම සහයෝගයක් දැක්වූවා’. ධම්මික ප‍්‍රසාද් ‘දිනමිණ’ හා කෙටි කතාබහකට එක්වෙමින් පැවසීය.
දකුණත් වේග පන්දුයවන්නෙකු ලෙස ශ‍්‍රී ලංකා ඉන්දියා තෙවැනි ටෙස්ට් තරගයට එක් වූ ධම්මික පළමු ඉනිමේ දී ලකුණු 82කට කඩුලු 3ක් ද දෙවැනි ඉනිමේ දී ලකුණු 60කට කඩුලු 2ක් ද දවාලමින් දක්ෂතා දැක්වූවේ ය. ඔහුගේ ප‍්‍රථම කඩුලු ගොදුර බවට පත්වූයේ විජේන්ද්‍ර ෂෙවාග් ය.
‘මම හොඳ විශ්වාසයකින් යුතුව තරගයට පිවිසියේ. මට උවමනා වුණේ වාස්ට හොඳ සහයෝගයක් දෙන්න. ෂෙවාග් වගේ දක්ෂ කී‍්‍රඩකයෙක්ගෙ කඩුල්ල ලබා ගනිමින් මේ ගමන ආරම්භ කරන්නට ලැබීම සතුටක්...’ ධම්මික පවසනුයේ නිහතමානීව ය.
ධම්මික ඉන්දියාව සමඟ වූ පුහුණු තුන්දින තරගයේ දී දක්ෂ ලෙස කී‍්‍රඩා කළේ ය. ඒ දක්ෂතා හේතුවෙන් ම දෙවැනි ටෙස්ට් තරගයේ සිට ශ‍්‍රී ලංකා සංචිතයට එක්වීමට ධම්මික සමත් විය.
‘සංචිතයට කැදවද්දීම මට හිතුනා තරගයක් ලැබෙයි කියලා. තරගයට එක් වෙද්දී බයක්, චකිතයක් තිබුණෙ ම නෑ. හැමෝම මා පිළිබඳ තබා තිබූ විශ්වාසය ඉටු කරන්නයි මට අවශ්‍ය වුණේ.’
ධම්මික වේගයෙන් පන්දු යැවීමට දැඩි කැමැත්තක් දක්වන ලෙසත් දිස්වේ. ඔහුගේ රිද්මය ද ඒ බවක් පෙන්නුම් කරයි. නමුත් පෙනෙන දේ සත්‍යයක් නොවන බව ඔහු පවසයි.
‘මම තරගයක දී කරන්නෙ නායකයට අවශ්‍ය දේ. මම උත්සාහ කරන්නෙ කඩුලු දවාගන්න. ඒක වේග පන්දුවකින් ද මදවේග පන්දුවකින් ද කියල වර්ගීකරණයක් මම කරන්නෙ නෑ. කඩුල්ලක් දවාගන්න පුලුවන්නම් මම ඕනෑම පන්දුවක් යවනවා. අනිත් එක විවිධාකාරයෙන් පන්දුයවා පිතිකරුවා අමාරුවේ දාන තරමට විප්ලවයක් කරන්නයි මම නිතර ම උත්සාහ කරන්නේ.’
වේග පන්දුයවන්නෙක් ලෙස කණ්ඩායමට එක්වෙද්දී චමින්ද වාස්ගෙන් ලැබූ උපදෙස් ඉතා වැදගත් වූ බව ද ධම්මික පැවසුවේ ය.
‘වාස් මට පැවසූ මුල් ම දේ තමයි ලයින් ඇන්ඩ් ලෙන්ත් බෝල් කරන්න කියලා. කඩුලු දවා ගැනීමට නම් ඒ රිද්මය දිගට ම පවත්වාගෙන යන්න කියල උපදෙස් දුන්නා. ක‍්‍රීඩා පිටියේ දී වගේ ම ඩේරසින් රූම් එකේදීත් වාස් දීපු උපදෙස් මට ඉතා වටිනවා.’
ධම්මික ටෙස්ට් පිටියට පිවිසීමට ප‍්‍රථම එක්දින ජාත්‍යන්තර තරග ති‍්‍රත්වයක දී ශ‍්‍රී ලංකාව නියෝජනය කර තිබේ. එමෙන් ම 2002 වසරේ වයස අවුරුදු 19න් පහළ ලෝක කුසලාන කි‍්‍රකට් තරගාවලිය නියෝජනය කිරීමට ද ධම්මික වාසනාවන්ත වී තිබේ. කදාන ද මැසිනද් විද්‍යාලයෙන් කි‍්‍රකට් පිටියට පිවිසි ධම්මික එකල දිල්හාර ප‍්‍රනාන්දු සමඟ පාසල් කණ්ඩායමේ දී කී‍්‍රඩා කර ඇත.
‘මම අද පැමිණි ගමන ගැන සතුටු වෙනවා. මේ ගමන පිටුපස මගේ අම්මා, තාත්තාගෙ සිට විශාල පිරිසක් සිටිනවා. ඔවුන්ව මේ අවස්ථාවේ සිහිපත් කරන්නෙ ඉතා ගෞරවයෙන්.
ධම්මික මේ මස 19 දා ශ‍්‍රී ලංකා ‘ඒ’ කණ්ඩායම සමග දකුණු අප‍්‍රිකානු සංචාරයට එක් වෙයි. එහි දී උපරිම දක්ෂතා දැක්වීමට බලාපොරොත්තුවෙන් සිටින ධම්මිකගේ දිගු කාලීන සලසුම වී ඇත්තේ ශ‍්‍රී ලංකා කණ්ඩායමේ තමන්ට ලැබුණ ස්ථානයේ තවදුරටත් රැදී සිටීමට හැකිවන ලෙස දක්ෂතා දැක්වීමයි.
සටහන - ජගත් පේර්මචන්ද්ර
Subscribe to:
Post Comments (Atom)
No comments:
Post a Comment