දරුවන් රොබෝවරු කළොත් අපට විපාක විඳින්න වෙයි

ළමා සංවර්ධන හා කාන්තා අභිවෘද්ධි ඇමැතිනි - සුමේධා ජී. ජයසේන

අදට යෙදී ඇති ලෝක ළමා දිනය මුල්කරගෙන මෙරට දරුවනට බලපාන ගැටලු සහ ඒවා විසැඳීමට ගෙනයන වැඩපිළිවෙළ පිළිබඳ ළමා සංවර්ධන හා කාන්තා අභිවෘද්ධි ඇමැතිනි සුමේධා ජී. ජයසේන සමඟ කළ කතාබහකි.
‘ළමයා’ සහ ළමයින් වෙනුවෙන් වූ ළමා දිනය පිළිබඳ හැඳින්වීමක් කළොත්
ළමයා ගොඩනැගීම රටක් ගොඩනැගීමේ මුල්පියවර බව විද්වත් මතයයි. ශ‍්‍රී ලංකාවේ නීතිය යටතේ ළමයා අර්ථදැක්වීම විවිධාකාරයි.
‘ළමයකු’ යනු වයස අවුරුදු 14ට අඩු පුද්ගලයකු බව ළමයින් හා තරුණයන් පිළිබඳ පනතේ සඳහන් වෙනවා.
ශ‍්‍රී ලංකාවේ ළමා අයිතිවාසිකම් පිළිබඳ ප‍්‍රඥප්තියේ සඳහන් වන්නේ වයස අවුරුදු 18ට අඩු සෑම අයෙක් ම ළමයකු බවයි.
කාන්තාවන් තරුණයින් සහ ළමයින් සේවයේ යෙදවීම පිළිබඳ ආඥාපනත යටතේ ළමයෙක් කියන්නේ අවුරුදු 14ට අඩු කෙනෙක්.
1952 අවුරුද්දේ එක්සත් ජාතීන්ගේ සංවිධානයට ඉදිරිපත් කළ යෝජනාවක් අනුව එම සංවිධානය ජාත්‍යන්තර ළමා දිනයක් පැවැත්වීම ස්ථිර කරලා ජගත් ළමා දින සැමරුම් උත්සවය පැවැත්වූයේ 1954 අවුරුද්දේ ඔක්තෝබර් 01 දායි.
ඒ අනුව ශ‍්‍රී ලංකාවත් අවුරුදු 50ක විතර කාලයක සිටන් ජාත්‍යන්තර ළමා දිනය සමරනවා.
ලෝක ළමා දිනය සැමරීම අවුරුද්දක් ගානේ කළත් ඒකේ පසුබිම බොහෝ දෙනා දන්නේ නැහැ.
දෙවන ලෝක යුද්ධයෙන් පස්සේ ලෝකයේ බොහෝ රටවල්වල ඇතිවුණු සමාජ ආර්ථික බිඳවැටීම නිසා අහිමි වුනු ළමා සුරක්ෂිත බව ඔවුන් කෙරෙහි වූ අඩු අවධානය මේ සඳහා මුල පිරීමක් වුණා.
ලෝකේ පුරාම තිබුණු මේ තත්ත්වය නිරීක්ෂණය කළ එක්සත් ජාතීන්ගේ සංවිධානයට අනුබද්ධ ළමා සුබසාධනය පිළිබඳ ජාත්‍යන්තර සංවිධානය ළමයින්ගේ අයිතිවාසිකම් සහ අවශ්‍යතා ගැන යොමුකළ අවධානයේ ප‍්‍රතිඵලයක් විදිහටයි ජාත්‍යන්තර ළමා දිනය බිහි වී තිබෙන්නේ.
ළමා දිනයක් වෙන් කළත්, ලෝකේ පුරාම ඒක සැමරුවත් රට රටවල් වශයෙන් මොන නීති රීති තිබුණත් සෑම දිනකම, සෑම පැයකම ලෝකේ කොතැනක හෝ ළමයාගේ ළමා කාලය සොරා ගන්නා සිදුවීම් අනිවාර්යයෙන් සිද්ධ වෙනවා.
ජාත්‍යන්තර ළමා දින සැමරුම් ජාතික උත්සවයේ මෙවර තේමාව මොකක් ද? ඔබ එය අර්ථ දක්වන්නේ කොහොමද?
ළමයින් විශේෂ කුසලතාවලින් දස්කම් – විස්කම්වලින් පිරුණ සුන්දර අදහස් තියෙන පිරිසක්. මේක වටහාගෙන කටයුතු කරන්න මෙවර ජාතික උත්සවයේ තේමාව විදිහට අපි යොදා ගත්තේ ‘ළමුන්ට සවන්දීමෙන් ඔවුනගේ ලෝකය සුන්දර කරමු’ කියන අදහසයි.
මේ තේමාව ඉතා ම කාලෝචිතයි කියල අපට හිතෙන්නේ අද සමාජයේ තියෙන කාර්ය බහුලත්වය නිසා දරුවන් වෙනුවෙන් කාලය වෙන් කරන්න බැරි සමාජයක් අපි අතරින් ම බිහිවෙමින් තියෙන නිසායි.
අද මව්පියන්ට තමන්ගේ දූ දරුවන් එක්ක කාලය ගත කරන්න තියා කතා කරන්නවත් කාලය නැති තරම්.
ගැමි සංස්කෘතියේ මේ තත්ත්වය වැඩිපුර නොවුණත් එතැනටත් යම් බලපෑමක් නෑයි කියන්න බෑ. නගරබද අපේ බොහෝ සමාජවල සමහර මව්පියන්, වැඩිහිටියන් දරුවන් එක්ක කතා බහ කරන්නේ දුරකථනයෙන් නැත්නම් ඊමේල් වලින්.
උදේ ඉස්කෝලෙට පිටත්වන දරුවා හවස ගෙදර ඇවිත් නැත්නම් ටියුෂන් පංති ගිහින් හැන්දෑ කළුවරේ ගෙදරට එනකොටත් ළමයා එක්ක කතා බහ කරන්න අම්මලා තාත්තලා ගෙදර ඇවිත් නැහැ.
අද අපේ බොහෝ ගෙවල්වල දකින්නට තියෙන වාතාවරණය මේකයි. ළමයි නින්දට යන මොහොතේ ගෙදර එන අම්මලා තාත්තලා එක්ක කරන කතා බහ මොකක්ද කියා අපි අපෙන් ම අහන්න ඕන වනවා නේද?
බොහෝ මව්පියන් දරුවන්ට කතා කරනවා මිසක් දරුවන් කියන්නේ මොනවාද කියලා අහන්නට ඔවුනට වෙලාවක් නැහැ. මේ හුදකලා බව දරුවාගේ දක්ෂතා මොට කරනවා.
දරුවාට හොඳ අධ්‍යාපනයක් ලබාදීලා පතපොතේ දැනුමෙන් පරිපූර්ණ කළ යුතු බව බොහෝ වැඩිහිටියන් අදහන මතයකි. දරුවන් රොබෝවරුන් නොකරන අනාගතයක් අපේක්ෂාවෙන් මෙවර ළමා දින ජාතික තේමාව අප ඉදිරිපත් කළේ මේ නිසාවෙන්.
ජාත්‍යන්තර ළමා දින ජාතික උත්සවය පිළිබඳ තොරතුරු පැවසුවහොත්
ජාත්‍යන්තර ළමා දින ජාතික උත්සවය මෙවරත් කොළඹින් බැහැරව පැවැත්වීමටයි කටයුතු යොදා තිබෙන්නේ. ජාත්‍යන්තර ළමා දිනය වෙනුවෙන් වන කොඩිය අද (01දා) නිකුත් කරනවා.
ඒ කොඩි අලෙවියෙන් ලැබෙන මුදල ජාතික ළමා සංවර්ධන අරමුදලට බැරකෙරෙනවා. ජගත් ළමා දින ජාතික උත්සවය මේ 02 දා මොණරාගල මහානාම ජාතික පාසලේ දී ආරම්භ කෙරෙනවා. 02 දා සිට 04 දා දක්වා ළමා කඳවුරක් පැවැත්වීමටත් කටයුතු යොදා තිබෙනවා.
මේ ළමා කඳවුරට අම්පාර, මොණරාගල, බදුල්ල, හම්බන්තොට දිස්ති‍්‍රක්කයන් ගෙන් ළමයින් 800ක් පමණ සහභාගි වෙනවා.
ඒ දරුවන්ගේ අදහස් යෝජනාවලට සවන්දීම ඔවුන්ගේ සැඟවුණු කුසලතා හදුනාගැනීම ඒ දක්ෂතා ඉදිරියට ගෙනයාමට වැඩසටහන් සකස් කිරීම මෙහි දී සිදු කිරීමට අපේක්ෂා කරනවා.
ජාත්‍යන්තර ළමා දිනය නිමිත්තෙන්, පැවැත් වූ චිත‍්‍ර, පෝස්ටර්, කථික තරගවල ජයග‍්‍රහණ සඳහා ත්‍යාග හා සහතිකපත් ප‍්‍රදානය, හොඳම ළමා සමාජය අගැයීම, ළමයින්ගේ සෞඛ්‍ය වර්ධන, මානසික සංවර්ධන වැඩසටහන් පැවැත්වීම, ළමයින් සඳහා අක්ෂි සායන, දන්ත සායන පැවැත්වීම, ළමා සාහිත්‍ය දැනුම වර්ධනය සඳහා පොත් සහ පාසල් උපකරණ ලබාදීම ඇතුළු වැඩසටහන් රාශියක් මේ ළමා කඳවුරේ දී පැවැත්වීමට ළමා සංවර්ධන අමාත්‍යාංශය කටයුතු සුදානම් කර තියෙනවා.
මේ ළමා කඳවුරෙන් අපි බලාපොරොත්තු වෙන්නේ මේ දිස්ති‍්‍රක්ක 04 නියෝජනය කරමින් පැමිණෙන දරුවන්ට සවන් දීලා ඔවුනගේ අවශ්‍යතා හදුනාගැනීමත් ඔවුනගේ ගැටලු මොනවාද කියලා විමසිලිමත්ව කටයුතු කිරීමත්ය.
මෙම ගැටලු වලට පිළියම් සකස් කර ඒ ළමයින් තුළින්ම ඒ දිස්ති‍්‍රක්කවල ළමයාගේ අවශ්‍යතා සඳහා දිගු කාලීන් වැඩසටහන් හඳුන්වාදීම ළමා සංවර්ධන අමාත්‍යාංශයේ අරමුණයි.
ඉදිරි සෑම අවුරුද්දකදීම ජාත්‍යන්තර ළමා දිනය නිමිත්තෙන් ඒ වගේ ළමා කඳවුරු පවත්වා දීප ව්‍යාප්ත දරුවන්ගේ අවශ්‍යතා ගැටලු හඳුනාගැනීම අපගේ අපේක්ෂාවයි.
මේ දිස්ති‍්‍රක්කවල සිටින ආබාධිත දරුවන් සිටින දිළිඳු පවුල් 02ක් තෝරාගෙන ඔවුනට අංග සම්පූර්ණ නිවාස සාදා දීමත් මෙවර ජාත්‍යන්තර ළමා දිනය වෙනුවෙන් අපි ඉටු කරන සද්කාර්යයක්.
මෙවර ජාත්‍යන්තර ළමා දිනයේදී අපේ අවධානය යොමුවන තවත් විශේෂිත කොටසක් වෙන්නේ යුද්ධය නිසා පීඩාවට පත්වූ දරුවන්.
විශේෂයෙන්ම උතුරු පළාතේ සිටින එවැනි දරුවන් සඳහා ඒ පළාතේ පරිවාස කොමසාරිස් කාර්යාල හරහා අවශ්‍ය මූලික අවශ්‍යතා ඇතුළු සහන සැපයීමට කටයුතු යොදා තියෙනවා.
දැනට මුලතිව් හා කිලිනොච්චි ප‍්‍රදේශවල කි‍්‍රයාත්මක මානුෂික මෙහෙයුම් නිසා අවතැන්වන ළමයින්ටත් කාන්තාවන්ටත් සුබසාධනය හා ආරක්ෂාව සැපයීමට විශේෂ ඒකකයක් මේ වනවිට වවුනියාවේ පිහිටුවා තිබෙනවා. ජාතික ළමා ආරක්ෂණ අධිකාරිය මේ කටයුතු අධීක්ෂණය කරනවා.
ළමයින් වෙනුවෙන් කටයුතු කරන රාජ්‍ය ආයතනවල කටයුතු පිළිබඳ ළමා සංවර්ධන ඇමැතිවරිය වශයෙන් ඔබ සෑහීමකට පත්වනවාද?
පසුගිය කාලයේදී තිබුණ රජයන් ඒ රාජ්‍ය ආයතන උපයෝගි කරගෙන ළමයින් වෙනුවෙන් කළ දේවල් ගැන සෑහීමකට පත්වන්නට බැහැ. පැවැති රජයන් යටතේ් ළමයින් සම්බන්ධව කටයුතු කිරීම පැවැරී තිබුණේ වනිතා කටයුතු අමාත්‍යාංශය, සමාජ සේවා අමාත්‍යාංශය වගේ අමාත්‍යාංශවලටයි.
නමුත් ජනාධිපති මහින්ද රාජපක්ෂ මහතා ‘මහින්ද චින්තන’ ප‍්‍රතිපත්ති මාලාවේ තිබූ තවත් පොරොන්දුවක් ඉටුකරමින් ළමයින් වෙනුවෙන්ම කටයුතු කිරීමට ළමා සංවර්ධන අමාත්‍යාංශයක් බිහි කළා.
මේ තුළින් අපේ දරුවන් වෙනුවෙන් ඍජුවම කටයුතු කරන්න අපිට හැකියාව ලැබී තිබෙනවා. ඊට අමතරව ජාතික ළමා ආරක්ෂක අධිකාරිය, පරිවාස හා ළමාරක්ෂක සේවා දෙපාර්තමේන්තුව සහ ළමා ලේකම් කාර්යාලය අපේ දරුවන්ගේ ආරක්ෂාව, අයිතිවාසිකම් සහ අත්‍යවශ්‍ය සේවා සැපයීමට කටයුතු කරනවා.
මේ කටයුතු පිළිබඳ පූර්ණ වශයෙන් සෑහීමකට පත්වෙන්න අපි කාටත් බැහැ. ඒකට හේතුව, ළමයින් සම්බන්ධ ගැටලු , අවශ්‍යතා දිනෙන් දින ඉහළ යාමයි. ඒත් මේ ආයතන වලින් ඉටු කරන කාර්යයන් ඉතා සතුටුදායක මට්ටමක පවතිනවා.
බොහෝ විට එල්ලවන චෝදනාවක් වන්නේ ළමයින් වෙනුවෙන් වැඩසටහන් කි‍්‍රයාත්මක වන්නේ ‘ළමා දිනයේදී පමණක් ‘ කියලයි
නැහැ ඒක වැරැදියි. ඒ කාලේ එහෙම වෙන්න ඇති. ඒත් මේකාලේ එහෙම නැහැ. දැන් බලන්න අපි කි‍්‍රයාත්මක කළ ළමා දින ජාතික උත්සවය ඉස්සර ඒක හැම අවුරුද්දකම පැවැත්වුණේ කොළඹ.
දරුවෝ කොළඹට ගෙනත් ශාලාවල නැතිනම් කී‍්‍රඩාංගණවල උත්සවයක් පවත්වලා මොන මොනවා හරි තරග පවත්වලා තෑගි බෝග දීලා සතුටු කරලා යවනවා. ඔක්තෝබර් 02 දා ඉඳලා ළමයා ආයෙත් සුපුරුදු හුදෙකලා ලෝකයට එකතු වනවා.
නමුත් පසුගිය අවුරුද්දේ ඉඳන් ඒක අපි වෙනස් කළා. 2007 වසරේ ලෝක ළමා දිනය ජාතික උත්සවය පැවැත්වූණේ අනුරාධපුරයේ.
එහි සිටින අහිංසක දරු දැරියන් එකතු කරගෙන ඔවුනගේ හැකියාවන් ඔපවත් කරන්නට අපි කටයුතු කළා. ඒ දරුවන් වෙනුවෙන් එදා ඇරැඹුණ , වැඩසටහන් ව්‍යාපෘති අදටත් සාර්ථක ඵල නෙලාගනිමින් තියෙනවා.
මෙවර අපි ජාතික උත්සවය පවත්වන්නේ මොණරාගල. එයට බදුල්ල, අම්පාර , හම්බන්තොට දිස්ති‍්‍රක්කයන් හි ළමයිනුත් එක්වනවා. මේ ළමා නියෝජනය තුළින් ඒ ඒ දිස්ති‍්‍රක්කවල ළමයින්ගේ ගැටලු අවශ්‍යතා අපි හඳුනා ගන්නවා.
ඒ තුළින් ඉදිරි කාලයේදී ඒ දරුවන් වෙනුවෙන් ව්‍යාපෘති , වැඩසටහන් රැසක් කි‍්‍රයාත්මක කිරීමට සැලසුම් කැරෙනවා.
ළමා දිනය නිමිත්තෙන් මොණරාගල මහානාම විද්‍යාලයේ ළමා කඳවුරට සහභාගි වන දරුවන් වෙනුවෙන් අක්ෂි, දන්ත, වෛද්‍ය සායන ජීවන කුසලතා වැඩසටහන් , දැනුවත් කිරීමේ වැඩසටහන්, සංස්කෘතික වැඩ මුළු පවත්වනවා.
මේවායේ ප‍්‍රතිඵල ළමා දිනය දාට විතරක් සීමා වන්නේ නැහැ. ඒවා ඔවුනගේ අනාගතය අර්ථවත් කරන වැඩසටහන්වල මුල් පියවරයි.
ළමා සංවර්ධන අමාත්‍යාංශය යටතේ පවතින ළමයින් වෙනුවෙන් කි‍්‍රයා කරන රාජ්‍ය ආයතන ති‍්‍රත්වය විවිධ රාජ්‍ය නොවන සංවිධාන ද එකමුතු කරගෙන වැඩසටහන් රාශියක් අපේ දරුවන් වෙනුවෙන් කි‍්‍රයාත්මක කරනවා.
මේ සැම කටයුත්තකින්ම අප බලාපොරොත්තු වන්නේ දරුවනට සුරක්ෂිත හෙට දවසක් උදා කර දීමයි.
ඔබ පවසන පරිදි අපේ ළමා පරපුරෙහි යහපත්වූ හෙට දිනක් සදහා ගෙන ඇති දීර්ඝ කාලීන වැඩපිළිවෙළ මොනවාද?
ශී‍්‍ර ලංකාවේ ඇතැම් දරුවන් සුළු අපරාධ, යාචක වෘත්තිය, මෙහෙකාර සේවය, ළමා ගණිකා වෘත්තිය , ළමා කම්කරු සේවය වගේ විවිධ අයථා ක‍්‍රම මගින් මුදල් ඉපැයීමට පෙළඹී තිබෙනවා.
මේ බොහෝ දෙනා මේවාට පෙළඹී තියෙන්නේ ඔවුනගේ දුප්පත්කම නිසයි. මේ අය සැම දෙනෙක්ම වගේ දුප්පත්කම නිසා අධ්‍යාපනයට නැවතීමේ ලකුණ තැබූ අය.
මෙන්න මෙවැනි දරුවන් සමාජයට එක්වීම දිගින් දිගටම සිදු නොවීමට , ඔවුනගේ අධ්‍යාපන වගේම අවශ්‍ය මූලිකම අවශ්‍යතා සපුරාලීමටත් ජනාධිපති මහින්ද රාජපක්ෂ මහතාගේ මගපෙන්වීම යටතේ ජාතික ළමා සංවර්ධන අරමුදලක් ඇරැඹුවා.
දීපව්‍යාප්ත කොඩි අලෙවියකින් සහ පරිත්‍යාගශීලින්ගේ ආධාර මත මේ අරමුදල කි‍්‍රයාත්මක වනවා. එය දශක ගණනාවක් පුරා කි‍්‍රයාත්මක වන වැඩපිළිවෙළක්.
සාකච්ඡා කෙළේ බුද්ධිකා ඉඹුලාන