පෑලියගොඩ ප‍්‍රදේශයේ තාර සහ තීන්ත නිෂ්පාදන ආයතනයක් සිදුකළ තීන්ත ටින් තුළ දමා බෝම්බ නිෂ්පාදනයට ගන්නා යකඩ බෝල උතුරට යැවීමේ මහා ජාවාරමක් පිළිබදව කොළඹ ත‍්‍රස්ත විමර්ශන ඒකකය සහ රහස් පොලිසිය පරීක්ෂණ අරඹා ඇත..
ධනවත් දෙමළ ව්‍යාපාරිකයකුට අයිති මෙම තීන්ත ආයතනයේ තීන්ත යවන මුවාවෙන් තීන්ත ටින් සමඟ තීන්තවල බරට සරිලන ප‍්‍රමාණයේ යකඩ බෝල යැවීමේ ජාවාරම ආරම්භ කර ඇත්තේ මීට වසර දාහතරකට පමණ පෙර බව අනාවරණය වී තිබේ.
මෙම ව්‍යාපාරිකයා නිතරම විදේශගතවී සිටින පුද්ගලයකු බව ද හෙළිවී තිබේ.
කොටි අඩවියට භාණ්ඩ ප‍්‍රවාහනය කරන ආයතන සහ ව්‍යාපාරිකයන්ගෙන් බදු අය කළත් මෙම සමාගමෙන් කොටි බදු අය කර නැති බවට ද තොරතුරු හෙළි වී ඇත.
මෙම සමාගමේ යැයි කියන තරුණයෙකු රුපියල් ලක්‍ෂ හතරක මුදලක් රැගෙන කොළඹට පැමිණෙමින් සිටියදී අත්අඩංගුවට ගෙන ප‍්‍රශ්න කර තිබිණි.
මෙම ආයතනය ඛනිජ තෙල් නීතිගත සංස්ථාවෙන් නිෂ්පාදන කටයුතුවලට තාර මිලදී ගනියි.
එසේ මිලදී ගන්නා තාර පිටතට විකිණිය හැක්කේ රුපියල් 280 කට පමණක් වුවත් රුපියල් 2150 ක මිලකට විකුණන බවට ලැබුණු තොරතුරු ගැන ද පරීක්ෂණ ආරම්භ කර ඇත.
එම ආයතනයේ ප‍්‍රධාන නිලධාරියකුගේ අස්සන හොරට යොදා ව්‍යාජ ඉන්වොයිස් යොදා බදු වංචාවක් කිරීම සම්බන්ධව රහස් පොලිසිය පරීක්ෂණ පවත්වයි.
එම ආයතනයේ කිහිපදෙනකුගෙන් ද මේ සම්බන්ධව ප‍්‍රශ්න කර ඇත.
මෙම සමාගමේ හිමිකරු කොටි සංවිධානය සමඟ සමීප සම්බන්ධතාවක් පවත්වමින් කාලයක් තිස්සේ ඔවුන් දකුණේ සිදුකළ අපරාධවලටද උදව් කරමින් තීන්ත ප‍්‍රවාහනය කරන මුවාවෙන් උතුරට පුපුරණ ද්‍රව්‍ය ප‍්‍රවාහනය කර ඇතැයි පරීක්ෂණ අංශ සැක කරයි.
No comments:
Post a Comment