ඇමැතිවරුන්ට ඉන්ධන සීමාවක් අදාළ යෝජනා ඇමැති මණ්ඩලයට

ඉන්ධන පරිභෝජනය අවම කිරීම සඳහා ජනාධිපති මහින්ද රාජපක්ෂ මහතා මුදල් ඇමැතිවරයා වශයෙන් කැබිනට් මණ්ඩලයට ඉදිරිපත් කළ යෝජනාවට ඇමැතිවරුන්ගේ ප‍්‍රතිචාර ලබන කැබිනට් මණ්ඩල රැස්වීමේදී ඉදිරිපත් කිරීමට නියමිත බව කැබිනට් ප‍්‍රකාශක ජනමාධ්‍ය හා තොරතුරු ඇමැති අනුර ප‍්‍රියදර්ශන යාපා මහතා ප‍්‍රකාශ කෙළේය.
ඉහළ යන ඉන්ධන මිල හමුවේ සියලුදෙනාගේ කැපවීම අවශ්‍ය බව ද, ඇමැතිවරුන්ගේ ඉන්ධන වියදම් සීමා කිරීමට ජනාධිපති මහින්ද රාජපක්ෂ මහතා අදාළ යෝජනාව ඉදිරිපත් කළ බවද ඇමැතිවරයා කීවේය.
මේ අනුව ඇමැතිවරුන්ගේ ඉන්ධන පරිභෝජනය සීමාකිරීම පිළිබඳව යෝජනා ලබන කැබිනට් මණ්ඩල රැස්වීමේ දී ඉදිරිපත් කිරීමට නියමිත බව ද ඇමැතිවරයා කීවේය.
ලෝක වෙළෙඳපොළේ ශීඝ‍්‍රයෙන් ඉහළ යන ඉන්ධන මිල හමුවේ ජනතාවට යම් සහනයක් ලබාදීම සඳහා රජය උපරිම කැපවීමෙන් කටයුතු කරන බවද, ලෝක වෙළෙඳපොළේ ඉන්ධන මිල ඉහළ පහළ යනවිට ඊට සාපේක්ෂව මේ රටේ ඉන්ධන මිල සැකසීමේ සූත‍්‍රයක් හඳුන්වා දුන් එ.ජා.ප.ය ඉන්ධන මිල ඉහළ යෑම පිළිබඳව රජයට චෝදනා කිරීම ගැන කනගාටු වන බව ද ඇමැති අනුර ප‍්‍රියදර්ශන යාපා මහතා පැවැසුවේය.
මේක ජාත්‍යන්තර තත්ත්වයක්. යම් තරමක් ඉන්ධන නිෂ්පාදනය කරන ඉන්දියාව පවා මේ තෙල් අර්බුදයට මුහුණ පා සිටිනවා.
මෙවැනි ජාත්‍යන්තර තත්ත්වයක් තිබිය දී ප‍්‍රධාන විපක්ෂය වන එ.ජා.ප.ය ඉන්ධන මිල ඉහළ යෑමට එරෙහිව ගොන් කරත්ත දැක්කීම ගැන කනගාටුව පළ කරනවා යැයිද ඇමැතිවරයා කීවේය.
දැනටත් ආණ්ඩුව ඩීසල් සහ භූමිතෙල් සඳහා විශාල පාඩුවක් ද, පෙට‍්‍රල් සඳහා සුළු පාඩුවක් ද දරන බවද වසර පහක් වැනි කෙටි කලක් තුළ තෙල් බැරලයක මිල ඩොලර් සියයකින් පමණ ඉහළ යෑම මේ අර්බුදයට ප‍්‍රධාන හේතුව බව ද ඇමැති අනුර යාපා මහතා අවධාරණය කළේය.
වෙළෙඳ, අලෙවි සංවර්ධන, සමූපකාර හා පාරිභෝගික සේවා ඇමැති බන්දුල ගුණවර්ධන මහතා -
මේ ඉන්ධන මිල ප‍්‍රශ්නයට රජය උපරිමයෙන් මැදිහත් වෙනවා.
ලෝක ;වළෙඳපොළේ ශීඝ‍්‍රයෙන් ඉහළ යන තෙල් මිල හමුවේ රජයට කළ හැකි දේ සීමාසහිතයි.
2003 දී තෙල් බැරලය අමෙරිකන් ඩොලර් 29 යි. 2008 දී ඩොලර් 136 යි. වසර 5 ක් වැනි කෙටි කාලයක් තුළ තෙල් බැරලය ඩොලර් 100 කටත් වැඩි මුදලකින් ඉහළ ගියා.
2003 දී තෙල් ආනයනයට වැය වුණේ අමෙරිකන් ඩොලර් මිලියන 838 යි.
2007 දී ඩොලර් මිලියන 2497 යි. එය තුන් ගුණයකින් ඉහළ ගිහින්.
2003 මිල තිබුණා නම් වසරකට ඩොලර් බිලියන 1.6 ක ඉතිරියක් කරගන්නට තිබුණා. 2008 වසරේදී අමෙරිකන් ඩොලර් මිලියන 3500 ක් (රුපියල්) කෝටි 35,000 ක්) තෙල් සඳහා වැය වනු ඇතැයි රජය බලාපොරොත්තු වෙනවා.
කවර ආණ්ඩුවක් තිබුණත් මේ ඉන්ධන මිල ඉහළ යෑමට මුහුණ දෙන්නට ඕනෑ. එදා 2003 දී මෙවැනි තත්ත්වයක් තිබුණේ නැහැ.