කොළඹ හිල්ටන් හෝටලය අසලදී පසුගියදා සිදුවූ මරාගෙන මැරෙන කොටි බෝම්බ ප‍්‍රහාර සිද්ධිය සම්බන්ධයෙන් සැකපිට ප‍්‍රශ්න කිරීම සඳහා තවත් පුද්ගලයන් හය දෙනකු ති‍්‍රකුණාමලයේ දී අත්අඩංගුවට ගෙන ඇත.
මොවුන් මරාගෙන මැරෙන කොටි ත‍්‍රස්තවාදියා පැදවූ යතුරු පැදියේ හිමිකරුගේ ඥාතීන් බව සිද්ධිය සම්බන්ධව පරීක්ෂණ පවත්වන ජ්‍යෙෂ්ඨ පොලිස් නිලධාරියෙක් “දිනමිණ” ට පැවසීය.
ර්ඛ - 3875 දරන යතුරු පැදියේ හිමිකරු මෙම සිද්ධියේ ප‍්‍රධාන සැකකරු වශයෙන් සැලකෙන අතර බෝම්බ පිපිරීමේ සිද්ධිය වූ දිනයේම ති‍්‍රකුණාමලයේ දී අත්අඩංගුවට පත් විය.
ප‍්‍රසිද්ධ මෝටර්රථ අලෙවි සමාගමකින් මෙම යතුරු පැදිය මිලදී ගෙන ඇති බව හෙළිදරව් වී ඇත. එය මීට මාස කීපයකට පෙර ති‍්‍රකුණාමලයට ගෙන ගොස් තිබෙන බවත් හෙළි විය.
එසේ ගෙන යන අවස්ථාවේ දී ති‍්‍රකුණාමලයට ආසන්නම පොලිස් මුරපොළේ දී මෙම යතුරු පැදියේ තොරතුරු සටහන් කිරීමේ දී එහි අයිතිකරු වශයෙන් සටහන් කර ඇත්තේ මුස්ලිම් පුද්ගලයෙකුගේ නමකි.
මෝටර් රථ ප‍්‍රවාහන දෙපාර්තමේන්තුවේ එහි අයිතිකරු වශයෙන් ලියාපදිංචි වී තිබෙන්නේ දැනට ප‍්‍රධාන සැකකරු වශයෙන් අත්අඩංගුවට පත්ව සිටින ද්‍රවිඩ ජාතික පුද්ගලයා ය.
අත්අඩංගුවට පත් සෙසු සැකකරුවන් හය දෙනා සහ ප‍්‍රධාන සැකකරු එල්. ටී. ටී. ඊ සංවිධානයට සම්බන්ධව මෙම යතුරු පැදිය මිලදී ගෙන මරාගෙන මැරෙන ප‍්‍රහාරයකට යෙදවීම පිණිස සහාය දී ඇති බව පරීක්ෂණ අංශවල විශ්වාසයයි.
එම යතුරු පැදිය ති‍්‍රකුණාමලයේ සිට නැවත කොළඹට ගෙන ආ බවට කිසිදු පොලිස් මුර පොළක සටහන් වී නැති අතර මෙය ති‍්‍රකුණාමලයෙන් පිට කළේ කෙබඳු ක‍්‍රමයකට දැයි සොයා බැලීමට පුළුල් පරීක්ෂණ සිදු කෙරේ.
කොළඹ දී මෙම මරාගෙන මැරෙන කොටි ත‍්‍රස්තවාදියාට රැකවරණය ලබා දුන් පුද්ගලයන් සම්බන්ධව ද පරීක්ෂණ අංශවලට තොරතුරු රැසක් ලැබී ඇත.
සිද්ධිය වූ ස්ථානය අවට සිටි අය ඇතුළුව මේ වන විට 50 කගෙන් පමණ ප‍්‍රශ්න කර ඇත. සිද්ධියේ ප‍්‍රධාන සැකකරු කොළඹට ගෙනවිත් ඇති අතර සෙසු සැකකරුවන් ද ගෙන ඒමට නියමිතව ඇත.
Subscribe to:
Post Comments (Atom)
No comments:
Post a Comment