තෙල් මිල ඉහළ දැමීමෙන් සියලුම රටවලට දුෂ්කරතා

ලෝක වෙළෙඳපොළේ බොර තෙල් බැරලයක මිල අමෙරිකා ඩොලර් 135 දක්වා ශීඝ‍්‍ර ලෙස ඉහළ යෑමෙන් තෙල් පරිභෝජනය කරන සෑම රටක්ම පාහේ දැඩි ආර්ථික දුෂ්කරතාවලට මුහුණ දී ඇත.
ආසියානු කලාපීය රටවලද මේ තත්ත්වයෙන් මිදීමට නොහැකිවීම මත ඒ සෑම රටක්ම පාහේ තෙල් මිල ඉහළ දැමීමේ කි‍්‍රයාදාමයට යොමු වී තිබේ.
ඊට අනුගත වෙමින් අපේ අසල්වැසි රටවල් වන ඉන්දියාව හා බංග්ලාදේශය ඉදිරි දිනවලදී ඉන්ධන මිල ඉහළ දැමීමට පියවර ගෙන තිබේ.
ඉන්දියාව තෙල් සහනාධාරය ලබාදීමෙන් දිනකට ඩොලර් මිලියන 100 ක පාඩුවක් අත්විඳින බව පවසන එරට ඛනිජ තෙල් අමාත්‍යාංශය පවතින තත්ත්වය යටතේ තෙල් මිල ඉහළ දැමීම හැර වෙනත් විකල්පයක් නැති බව පවසා තිබේ.
ඒ අනුව පෙට්රල් ලීටරක මිල සියයට 22 කින් හා ඩීසල් ලීටරයක මිල සියයට 16 කින් වැඩි කිරීමට එම අමාත්‍යාංශය රජයට උපදෙස් දී ඇත.
බංග්ලාදේශය ද වත්මන් මූල්‍ය වර්ෂයේ තෙල් සහනාධාරය සැපැයීමෙන් ඩොලර් බිලියන 1.2 ක පාඩුවක් අත්විඳි ඇති බවත්, හැකි ඉක්මනින් තෙල් මිල ඉහළ දැමීම හැර වෙනත් විකල්පයක් නැති බවත් පවසා තිබේ.
මේ හැර ඉන්දුනීසියාව, තායිවානය හා මැලේසියාව වැනි ආසියාතික රටවල්ද දැනටම සියයට 33 කින් තෙල් මිල ඉහළ නංවා තිබේ.