විපක්ෂ නායක හා එක්සත් ජාතික පක්ෂයේ නායක රනිල් වික‍්‍රමසිංහ මහතා මෙරට මුස්ලිම් ජාතියට කිසිම සේවාවක් ඉටු නොකළ මුස්ලිම් විරෝධියකු බවට මුස්ලිම් ජන නායකයෝ චෝදනා කරති.
ඒ මහතා අධ්‍යාපන ඇමැතිවරයා වශයෙන් කටයුතු කළ කාලයේ මුස්ලිම් ජාතීන්ගේ ඉල්ලීම් කිසිවක් ඉටුකැර නැතැයි ද ඔව්හු පවසති.
ඉස්ලාම් ආගම මුස්ලිම් දරුවන්ට ඉගැන්වීම සඳහා මවිලවි ගුරුවරුන් පත්කරන ලෙස රනිල් වික‍්‍රමසිංහ මහතා ගෙන් දිගින් දිගටම ඉල්ලා සිටි බවත්, අධ්‍යාපන ඇමැතිවරයා ලෙස කටයුතු කළ කාලයේ ඔහු එම ඉල්ලීම ඉටුකැර දී නොමැති බවත් ඔවුහු පවසති.
පලස්තීනුවන් ගේ ප‍්‍රශ්නය සම්බන්ධයෙන් ද රනිල් වික‍්‍රමසිංහ මහතා නියෝජනය කැර ඇත්තේ පලස්තීන විරෝධී ප‍්‍රතිපත්තියක් බවද මුස්ලිම් නායකයෝ පෙන්වා දෙති.
වත්මන් ජනාධිපති මහින්ද රාජපක්‍ෂ මහතා පලස්තීන සහයෝගිතා කමිටුවේ සභාපතිවරයා වශයෙන් ද, විපක්ෂ නායක වරයා වශයෙන් ද පලස්තීනයට සහාය පළකිරීමේ යෝජනාවක් පාර්ලිමේන්තුවට ඉදිරිපත් කළ අවස්ථාවේ දී එවකට අගමැතිවරයා වශයෙන් කටයුතු කරමින් සිටි රනිල් වික‍්‍රමසිංහ මහතා එම යෝජනාවට සහාය පළකැර නැත.
එපමණක් නොව, එම යෝජනාවට පක්ෂව එවකට පාර්ලිමේන්තු කටයුතු ඇමතිවරයා වශයෙන් කටයුතු කළ ඒ. එච්. එම්. අස්වර් මහතාටත්, ජනමාධ්‍ය ඇමැතිවරයා ලෙස කටයුතු කරමින් සිටි ඉමිටියාස් බාකීර් මාකර් මහතාටත් පලස්තීනයට සහාය පළ කරන යෝජනාවට පක්ෂව පාර්ලිමේන්තුවේ කතා කිරීමට පවා අවසර දී නොමැත.
එවකට පාර්ලිමේන්තුවේ සභානායක වරයා වශයෙන් කටයුතු කළ වි. ජ. මු. ලොකු බණ්ඩාර මහතා ද ඉහතින් සඳහන් කළ ඇමතිවරුන්ට එම යෝජනාවට පක්ෂව අදහස් පළ කිරීමට අවස්ථාව ලබාදෙන ලෙස රනිල් වික‍්‍රමසිංහ මහතා ගෙන් ඉල්ලා ඇත.
ඇමති තනතුරුවලින් ඉල්ලා අස්වී පලස්තීනයට සහාය පළ කරන යෝජනාවට පක්ෂව කතා කරන ලෙස රනිල් වික‍්‍රමසිංහ මහතා එහිදී දැනුම් දී තිබේ.
ඇමෙරිකාව විසින් ඉරාකය ආක‍්‍රමණය කරනු ලැබූ අවස්ථාවේ ලෝක වාසී සමස්ත මුස්ලිම් ජනතාවට ද්‍රෝහි වෙමින් එක්සත් ජාතීන්ගේ සංවිධානයේ දී ඇමෙරිකාව ඉරාකය ආක‍්‍රමණය කිරීම අනුමත කරමින් රනිල් වික‍්‍රමසිංහ මහතා ඇමෙරිකාවට සහාය දක්වා ඇත.
රනිල් වික‍්‍රමසිංහ මහතා විවිධ තනතුරු දැරූ අවස්ථාවල සහිරා විද්‍යාලයේ අත්‍යවශ්‍ය උත්සව කටයුතුවලට ආරාධනා කැර ඇතත් කිසි දවසක ඔහු සහිරා විද්‍යාලයට පැමිණ නැත.
මුස්ලිම් ජාතියේ අධ්‍යාපන කේන්ද්‍රස්ථානය වන සහිරා විද්‍යාලයට මෙරට ආණ්ඩුකාර වරුන් සහ ප‍්‍රථම අගමැති ඩී. එස්. සේනානායක මහතා වැනි නායකයන් පවා සහිරා විද්‍යාලයට පැමිණ සහාය පළකැර ඇත.
එහෙත් රනිල් වික‍්‍රමසිංහ මහතා මෙයට පෙර කිසිම දවසක සහිරා විද්‍යාලයට පැමිණ නැතැයි ද මුස්ලිම් ජනනායකයෝ පවසති.
මෙයට පෙර මෙරට දේශපාලනයේ නියැළුණු සෑම ජන නායකයකුම මුස්ලිම් ජාතීන් සමඟ සහයෝගයෙන් කි‍්‍රයා කැර ඇතත් රනිල් වික‍්‍රමසිංහ මහතා මුස්ලිම් ජාතියේ උන්නතියට කිසිදු සහයෝගයක් නොදුන් අයෙකු ලෙසත් ඔව්හු සඳහන් කරති.
Subscribe to:
Post Comments (Atom)
No comments:
Post a Comment