ජාත්‍යන්තර වෙළෙඳපොළේ ඛනිජ තෙල් මිල ශීඝ‍්‍රයෙන් ඉහළ යාම නිසා මෙරට ඉන්ධන මිලද ඉහළ දැමීමට රජයට සිදුව ඇතැයි රජයේ ඇමැතිවරු පෙන්වා දෙති.
ඉන්ධන මිල ඉහළ නොදමා ජනතාවට සහනාධාරයක් ලබාදීමට රජය කටයුතු කළද, එමගින් රජය මසකට රුපියල් කෝටි දහසක පාඩුවක් ලබන බව පෙන්වා දෙන ඔවුහු පවතින ආර්ථික වාතාවරණය තුළ එම සහනාධාරය තවදුරටත් පවත්වාගෙන යාමට හැකියාවක් නැතැයි පවසයි.
තවදුරටත් එසේ සහනාධාරය ලබා දුන්නොත් මෙරට ආර්ථිකය කඩා වැටීම නොවැළැක්විය හැකි බව පවසන තොරතුරු හා ජනමාධ්‍ය ඇමැති අනුර ප‍්‍රියදර්ශන යාපා මහතා, ජාත්‍යන්තර වෙළෙඳපොළේ මිලත් සමඟ මෙරට ඉන්ධන මිල තීරණය කළ යුතු බවත් ඊට එරෙහිව යාමට කිසිදු රටකට නොහැකි බවත් පෙන්වා දෙයි.
අප රටේ තෙල් නිෂ්පාදනය නොකෙරෙන බැවින් රජයට ඉන්ධන මිල ජාත්‍යන්තරයට අනුව ඉහළ දැමීමට සිදුවී ඇති බව පැවැසු ඇමැතිවරයා රජය ඉන්ධන මිල ඉහළ දැමීමට තීරණය කළේ වෘත්තීය සමිති, ගොවි සමිති ආදී පොදුජන සංවිධාන සමඟ කළ සාකච්ඡාවලින් පසුව බවත් ප‍්‍රකාශ කෙළේය.
2004 වසරේදී අමෙරිකානු ඩොලර් 28 ට තිබූ තෙල් බැරලයක මිල අද වනවිට ඩොලර් 132 ක් දක්වා ඉහළ ගොස් ඇති බවත් අන්තර්ජාතික වෙළෙඳපොළේ තෙල් මිල ශීඝ‍්‍රයෙන් ඉහළ යද්දී රජය ජනතාව වෙනුවෙන් විශාල බරක් දරන බව සමහර දේශපාලන පක්ෂවලට අමතකව ඇතැයිද රාජ්‍ය ආදායම් ඇමැති සහ මුදල් නියෝජ්‍ය ඇමැති රංජිත් සියඹලාපිටිය මහතා පවසයි.
ජාත්‍යන්තර වෙළෙඳ පොළේ මිල දිනෙන් දිනම ඉහළ යමින් පවතින බව පෙන්වා දෙන ව්‍යවසාය සංවර්ධන හා ආයෝජන ප‍්‍රවර්ධන ඇමැති ආචාර්ය සරත් අමුණුගම මහතා ඊට පිළියම් වශයෙන් අප කළ යුතුව ඇත්තේ කෙසේ හෝ රට තුළ තිබෙන තෙල් සම්පත සොයාගෙන පරිභෝජනයට ගැනීම බව පවසයි.
Subscribe to:
Post Comments (Atom)
No comments:
Post a Comment