වත්තේගම මඩවල හන්දියේ සඟවා තිබූ කාල බෝම්බයක් ඊයේ (25) උදේත්, මොරටුව රාවතාවත්තේදී සහ ගනේමුල්ලේදී බස්රථ දෙකක් තුළ තබා තිබූ කාල බෝම්බ දෙකක් පෙරේදා (24) උදේත් ආරක්ෂක අංශ මගින් සොයාගෙන තිබේ.
ඊයේ උදේ 9.20 ට පමණ වත්තේගම, මඩවල හන්දියේ විදුලි ට‍්‍රාන්ස්ෆෝමරයක සවිකර තිබූ කිලෝ ග‍්‍රෑම් 1ක් බර කාල බෝම්බයක් ප‍්‍රදේශවාසියකුගෙන් ලැබුණු තොරතුරකට අනුව පොලිසිය මගින් සොයා ගෙන තිබේ.
පෙරේදා උදේ මොරටුව රාවතාවත්තේදී සොයාගත් කාලබෝම්බය පිටකොටුව සිට මොරටුව බලා ගමන්ගත් බස්රථයක සඟවා තිබියදී බස් රථයේ කොන්දොස්තරවරයා දැක බස් රථය වහා නවත්වා මගීන් ඉවත් කැර මොරටුව පොලීසියට දැනුම් දී ඇත.
පොලීසිය වහා කි‍්‍රයාත්මක වී යුද හමුදා බෝම්බ නිෂ්කී‍්‍රය අංශය කැඳවා බෝම්බය නිෂ්කී‍්‍රය කර තිබේ. මෙම බෝම්බය කිලෝ 4ක් බරැති සී - 4 පුපුරණද්‍රව්‍ය අඩංගු කර කම්බි කණු සඳහා යොදාගන්නා කොකු ඇණ යොදා සකස්කල අමුතුම ආකාරයේ කාල බෝම්බයක් බව පොලීසිය පවසයි.
ගනේමුල්ලේ බස් බෝම්බය හමුවී ඇත්තේ කොටුව සිට පරකන්දෙණිය බලා ගමන් කළ මාර්ග අංක 218 බස් රථයක වන අතර බස් රථයේ මගීන් සියල්ල බැසයාමෙන් පසු කොන්දොස්තරවරයා බස් රථය පරීක්‍ෂා කිරීමේදී ඉංගී‍්‍රසි පත්තරයකින් ඔතන ලද බෝම්බ පාර්සලය හමුවී තිබේ.
පසුව එම පාර්සලය අසල පිහිටි කොස්සින්න විහාරස්ථානය අසල මාර්ගයට විසිකර තිබෙන අතර 119 හදිසි දුරකථනයට දැනුම්දීමෙන් පසු ගනේමුල්ල පොලීසිය වහා පැමිණ යුද හමුදා බෝම්බ නිෂ්කී‍්‍රය අංශය කැඳවා නිෂ්කී‍්‍රය කර තිබේ.
පොලිසිය මහජනතාව, කොන්දොස්තරවරු සහ රියැදුරන් දැනුවත්කර තිබූ නිසා මෙම බෝම්බ සොයාගැනීමට හැකිවූ බව ගනේමුල්ල පොලිස් ස්ථානාධිපති කේ. ආර්. පි‍්‍රයන්ත මහතා පැවසීය .මේ පිළිබඳ පොලිසිය වැඩිදුර පරීක්‍ෂණ පවත්වයි.
Subscribe to:
Post Comments (Atom)
No comments:
Post a Comment