එල්.ටී.ටී.ඊ. ත්‍රස්තවාදීන් විසින් සිය මිලේච්ඡත්වය තවත් වරක් ලොවට විදහා පාමින් අද (මැයි 26) දින සවස් කාලයේදී දෙහිවල දුම්රිය ස්ථා‍නයේදී කාර්යාල දුම්රියක් තුල බෝම්බයක් පුපුරුවා හැර ඇත. සවස 4.15 ට පමණ මරදාන දුම්රිය ස්ථානයේ සිට පානදුර බලා ගමන් කරමින් සිටි මෙම දුම්රියේ ගමන් කරන ලද වැඩිමනක් දෙන‍ා වාර ප්‍රවේශපත්‍ර මගින් දෛනිකව මෙම දුම්රියේ ගමන් ගන්නා සාමාන්‍ය කාර්යාල සේවකයන් විය. සවස 4.55 ට පමණ දෙහිවල දුම්රිය ස්ථානය තුලදී මිලේච්ඡ ත්‍රස්තවාදීන් විසින් බෝම්බය පුපුරුවා හැරීමත් සමග එහි ගමන් ගත් 7 දෙනෙකුට සුපුරුදු පරිදි ගමනාන්තයෙන් බැස සිය අඹු දරුවන් නෑසියන් බලා යාමේ භාග්‍යය අහිමි විය. මේ අතර වූ තවත් තැනැත්තියක් තවත් නොබෝ කලකදී මවක් වන්නට පෙරුම් පිරූ ගර්භණී මාතාවක් වූවාය. මෙම බෝම්බ ප්‍රහාරයෙන් එහි ගමන් ගත් තවත් 62 ක් ද තුවාල ලැබීය. පුපුරවා හරින ලද බෝම්බය එම දුම්රියේ ගමන් මළු අසුරා තබන රාක්කයක් තුළ සඟවා තබන්නට ඇති බව පොලීසිය විසින් සැක පල කරයි. තුවාල කරුවන් කළුබෝවිල ශික්ෂණ රෝහල හා ජාතික රෝහල වෙත වහා ඇතුලත් කරනු ලැබ ඇත. සිවිල් වැසියන් ඉලක්ක කර ගෙන සහසික අපරාධ නිරතුරු සිදු කරනු ලබන එල්.ටී.ටී.ඊ. සංවිධානය විසින් දමිළ ජනතාව උදෙසා සිය මනෝරාජික රාජ්‍යය ඉදි කිරීමේ අරමුණින් දශක දෙකහමාරකට ආසන්න කාලසීමාවක් මුළුල්ලේ සිංහල, දෙමළ හා මුස්ලිම් ජාතීන් ට අයත් ශ්‍රී ලාංකීය බාල, තරුණ, මහළු අනේක විධ පුද්ගලයන් හා දේශපාලන නායකයන් රැසක් කිසිදු වග විභාගයකින් තොරව සිදු කරනු ලබන බෝම්බ පුපුරුවා හැරී‍ම් තුලින් මරණයට හා අකර්මණ්‍යත්වයට පත් කරමින් සිටී. අමෙරිකානු මධ්‍යම බුද්ධි කාරයංශය පවා මෑතකදී ප්‍රකාශයට පත් කර ඇත්තේ ලොව මහත් භයානක ත්‍රස්ත කල්ලි අතර එල්.ටී.ටී.ඊ. සංවිධානය පෙරමුණ ගන්නා ත්‍රස්තවාදී සංවිධානයක් බවයි. එල්.ටී.ටී.ඊ. ත්‍රස්තවාදීන් විසින් කොල්ල කන ලද මාවිල්-ආරූ අවිහිංසක ගොවි ජනතාවගේ ජල අයිතිය ජීවිතය පරිත්‍යා‍ගයෙන් රැක දුන් අපගේ විරෝධාර රණවිරුවන්ගේ නාමයෙන් සොරොව් දොර විවර වීමේ උද්ධාමයත් සමග ඇරඹි මානූෂවාදී මෙහෙයුම් ත්‍රස්තවාදීන් මෙරටින් අතුගා දැමීම දක්වා දිගු කිරීමට ආරක්ෂක අංශ විසින් තීරණය කරනු ලැබිණි. මෙම දිගු ගමනේදි විඩා නොලද අපගේ විරෝධාර රණවිරුවන් මේ අතර කාල සීමාව තුල ලද ජයග්‍රහණයන් ප්‍රමාණය විශ්මය ජණකය. පිට පිට ලද අ‍නපේක්ෂිත පරාජයන් හමුවේ වියරු වැටී සිටින කුරිරු ත්‍රස්තවාදීන් විසින් අවිහිංසක සිවිල් වැසියන් ඉලක්ක කරගෙන මෙවන් බියසුළු ප්‍රහාරයන් එල්ල කිරීම මේ අතරතුර සිය ක්‍රමවේදය බවට පත් කර ගන්නා ලද බවක් පෙනෙන්නට ඇත. පසුගිය ජූනි 25 දින මහානුවර - මඩවල හංදියේ විදුලි ට්‍රාන්ස්ෆෝමරයක් අසල සවි කර තිබූ ක්ලේමෝ බෝම්බයක් වත්තේගම පොලීසිය විසින් සොයා ගනු ලැබුවේ සුපරික්ෂාකාරී මහජනතාවගේ සහයෙනි. පසුගිය 24 දින කොළඹ සිට මොරටුව බලා ගමන් කරමින් තිබූ බස්රථයක වූ කිලෝ 3 ක් පමණ බෝම්බය සොයා ගෙන ජීවිත හානි රැසක් වලක්වාලනු ලැබුවේද සුපරික්ෂාකාරී මහජනයා විසිනි. එදිනම සවස් කාලයේදී පරකන්දෙනිය සිට කොළඹ බලා ගමන් කරමින් තිබූ බස්රියක වූ කිලෝ 1.25 ක් පමණ වූ කාල බෝම්බය සොයා ගත හැකි වූයේ බසයේ කොන්දොස්තර මහතාගේ සුපරික්ෂාකාරී බව නිසාවෙනි. කුරිරු ත්‍රස්තවාදයේ අවසානය අපගේ විරෝධාර රණවිරුවන් විසින් උදාකරදෙමින් සිටී. මවුබිමේ නාමයෙන් වෙනදාට වඩා අවධියෙන් සිටීමට ඔබටත් මටත් හැකිනම් එයද ත්‍රස්තවාදයට එරෙහි බැඳි කොටු පවුරක් වන බව නම් ඒකාන්තය.
No comments:
Post a Comment