හමුදාව හැර ගිය 4000ක් යළි එක් වෙති
වන්නි මෙහෙයුමේ නිරතවී සිටින ආරක්ෂක හමුදාවල ප‍්‍රහාර හමුවේ පසු බසිමින් සිටින කොටි ත‍්‍රස්තවාදීන් මේ වන විට පාලම්පිඩ්ඩි ආරක්ෂක වළල්ලේ සිට කිලෝ මීටර් 45ක් පසු බැස තිබේ.
කොටි ත‍්‍රස්තවාදීන් මෙසේ පසු බසිමින් ගොස් ඔවුන්ගේ බංකර් දැනට මල්ලාවි තුනුක්කායි ප‍්‍රදේශයේ පිහිටුවා ඇතැයි බව හමුදා මාධ්‍ය ප‍්‍රකාශක බි‍්‍රගේඩියර් උදය නානායක්කාර පැවසීය. වන්නි මෙහෙයුම සාර්ථකව සිදුවෙයි.
ආරක්ෂක හමුදාවෝ කොටි ඉලක්කවලට ප‍්‍රහාර එල්ල කරමින් ඉදිරියටම ඇදෙති. වන්නි මෙහෙයුම් සඳහා වර්ෂ 2007 මාර්තුවේ එම ප‍්‍රදේශයේ පිහිටැවූ සේනාංකය පමණක් මේ වනවිට පාලම්පිඩ්ඩි මඩු ප‍්‍රදේශවල බලය තහවුරු කර ගනිමින් වර්ග කිලෝමීටර් හයසීයක භූමි ප‍්‍රමාණයක් අත්පත් කරගෙන තිබේ.
ගුවන් හමුදාව මිග්, කෆීර් හා අයි 26 සහ 24 යානා වලින් කොටි ඉලක්ක වලට එල්ල කළ ප‍්‍රහාරවලින් කොටින්ට බරපතළ හානි සිදුවී තිබේ. එහිදී ආන්දන්කුලම් උතුර ප‍්‍රදේශයට ඉකුත්26 වැනිදා එල්ල වූ ප‍්‍රහාරයකින් කොටි සංවිධානයේ බෝම්බ අංශයේ ප‍්‍රධාන නායිකාවක වූ ‘ඩෝරා’ මැරුම් කෑවාය.
ඒ බව කොටි පණිවිඩ හුවමාරු වලින් තහවුරු වී තිබේ. ඊට අමතරව කොටින්ගේ සාකච්ඡා පවත්වන ස්ථානයක් ද සාමාජිකයන් රැස්වන ස්ථානයක්ද මෙම ප‍්‍රහාරවලින් විනාශ වූ බවත් බි‍්‍රගේඩියර් උදය නානායක්කාර පැවසීය.
මේ අතර යුද්ධ හමුදාව අතහැර ගිය සෙබළුන් හාර දහසක් පමණ යළි හමුදාවට එක් වී ඇත.
එය විශේෂ සිද්ධියක් බව පවසන බි‍්‍රගේඩියර් උදය නානායක්කාර මහතා හමුදාවේ මෙහෙයුම්වල සාර්ථකත්වය කෙරෙහි ඇතිවූ පැහැදීම මත මෙසේ හැරගිය පිරිස් යළි හමුදාවට එක්වන බවද කීය.
No comments:
Post a Comment