ශ‍්‍රී ලංකාවට අති විශාල කීර්තියක් ලබා දෙමින් රටවල් එකසිය අනූ තුනක ඒකමතික ඡන්දයෙන් සෞඛ්‍ය ආරක්‍ෂණ හා පෝෂණ ඇමැති නිමල් සිරිපාල ද සිල්වා මහතා ලෝක සෞඛ්‍ය සංවිධානයේ සභාපති තනතුරට පත් වී සිටියි.
ලෝක සෞඛ්‍ය සංවිධානයේ මෙතෙක් එම උසස් පදවියකින් පිදුම් ලත් එකම හා පළමු වන ශ‍්‍රී ලාංකිකයා වීමේ ගෞරවය ද මෙයින් ඒ මහතාට හිමිවේ. ස්විට්සර්ලන්තයේ ජිනීවා නුවරදී ඊයේ (26) පෙරවරුවේ පැවැති ලෝක සෞඛ්‍ය සංවිධාන විධායක කමිටු රැස්වීමේ දී එම සංවිධානයේ සභාපති තනතුරට ඒ මහතා පත්කරනු ලැබුවේ ඔහුගේ දක්‍ෂතාවයත් කැපවීමත් නිසා බව එම සංවිධානය පවසයි. සාමාජිකයන් තිස්හතර දෙනෙකුගෙන් සමන්විත විධායක සභාව ඒකමතිකව ගනු ලැබූ මෙම තීරණය ශ‍්‍රී ලංකාවට විශාල ගෞරවයක් බව ඇමැතිවරයා පවසයි.
ඒ මහතා 1998 වසරේ දී ලෝක සෞඛ්‍ය සංවිධානයේ විධායක සභාවේ සාමාජිකයකු වශයෙන් හා එහි උප සභාපතිවරයකු වශයෙන් තෝරාපත් කරගන්නා ලද අතර 2000 වර්ෂය දක්වාම එම තනතුර දැරීමට සමත් විය.
නැවත 2005 වර්ෂයේ දී දකුණු ආසියානු කලාපය නියෝජනය කරමින් ලෝක සෞඛ්‍ය සංවිධානයේ විධායක සභා සාමාජිකයකු බවට පත් වූ ඒ මහතා, රැස්වීම්වල දී මෙන් ම සහා රැස්විම්වල දී සෞඛ්‍ය විෂයට අදාළ කරුණු ඉදිරිපත් කිරීමේ දී ලද ප‍්‍රවනතාවය නිසාම ඉතාමත් ජනප‍්‍රිය විධායක සභිකයකු බවට පත්වූයේ ය.
සාමාජික රටවල් අතර ඇති කරගන්නා ලද සුහදතාවයට අමතරව ලෝක සෞඛ්‍ය සංවිධානයේ වාර්ෂික අයවැය මඟින් කලාපීය වශයෙන් මුදල් වෙන්කිරීම පිළිබඳව පැන නැගී තිබූ ගැටලුව විසඳීමේ කාර්යභාරය, ඒ මහතා වෙත පවරනු ලැබීමෙන් අනතුරුව, එම කාර්යභාරය ඉතාමත් සාර්ථකව ඉටු කිරීම නිසා ඔහුගේ හැකියාව හා දක්‍ෂතාවය විධායක සභාව විසින් අගැයීමකට ලක් කරනු ලැබීය.
ඔහු ලැබූ මෙම ජයග‍්‍රහණ නිසා ලෝක සෞඛ්‍ය සංවිධානය මඟින් එහි ජාත්‍යන්තර සම්බන්ධීකරණ කමිටුවේ සභාපති ධූරයට නිමල් සිරිපාල මහතා පත් කරන ලදි.
නෝර්වේ රාජ්‍යයේ හිටපු අග‍්‍රාමාත්‍ය නෝ කාර්ලන් රූට්ලන්ඩ් මහත්මිය, එක්සත් ජාතීන්ගේ සංවිධානයේ ජනගහන අරමුදලේ අධ්‍යක්‍ෂ ජනරාල්වරිය වූ හෆීක් සදීක් මහත්මිය යුනිසෙෆ් සංවිධානයේ විධායක අධ්‍යක්ෂිකා කැරොල් වෙලම් මහත්මිය මෙන් ම ලෝක බැංකුවේ විධායක අධ්‍යක්‍ෂවරයා ද එහි අනෙකුත් සාමාජිකයින් ලෙස පත් වී සිටියහ. ලෝක සෞඛ්‍ය සංවිධානයේ විශේෂ අවධානයකට ශ‍්‍රී ලංකාවේ සෞඛ්‍ය ඇමැතිවරයා පත්වූයේ දුම්වැටි හා මත්ද්‍රව්‍ය පාලනය පිළිබඳව ඇති වූ ගැටලු පිළිබඳව විශාල හඬක් නගා ඒ වෙනුවෙන් මහඟු දායකත්වයක් ලබාදීම වෙනුවෙනි.
එසේම සෞඛ්‍ය වෘත්තිකයින් තුන්වන ලෝකයේ රටවල් අතහැර දමා දියුණු රටවල්වලට සංක‍්‍රමණය වීම තුළින් ඇතිවන ගැටලු පිළිබඳව මහත් හඬක් නැගූ ඒ මහතා ප‍්‍රබල මතවාදයක් ගොඩනැගීමට මූලිකව කටයුතු කිරීම ප‍්‍රතිඵලදායක වීම ද සංවිධානයේ අගැයීමට ලක් වී ඇත.
ලෝක සෞඛ්‍ය සංවිධානය මගින් ඉදිරිපත් කරන ලද Social Determinants and Health පිළිබඳ වූ කොමිෂන් සභාව ස්ථාපිත කිරීම පිළිබඳව මූලික අදහස් ඉදිරිපත් කළේ ද ඒ මහතා විසින් වන අතර ආසියානු කලාපය තුළ සෞඛ්‍ය ප‍්‍රවර්ධන කටයුතු වල දී විශිෂ්ට නායකත්වයක් ප‍්‍රදර්ශනය කරන ලද අතර අග්නිදිග ආසියාවේ සෞඛ්‍ය අමාත්‍යවරුන්ගේ සම්මේලනයේ සභාපතිවරයා ද වූයේ ය.
ගැඹුරු ලෙස කරුණු ඉදිරිපත් කරන චතුර කථිකයකු ලෙස නමක් දිනා ඇති නිමල් සිරිපාල මහතා ලබාගත් මෙම කීර්තිය ඔහුගේ පුද්ගලික කීර්තියක් හෝ ජයග‍්‍රහණයක් නොවන අතර තමන් ජන්ම ලාභය ලද රටට ලබා දුන් කීර්තියක් බව ඒ මහතා ප‍්‍රකාශ කර සිටියි.
Subscribe to:
Post Comments (Atom)
No comments:
Post a Comment