අටක් මරුට: 72කට තුවාල

සුනෙත් රොද්‍රිගෝ, දයා පෙරේරා, අනුර ප්‍රේමලාල්, වෙල්ලස්සේ බණ්ඩාර, එම්. ඩී. ධර්මසිරි, මහින්ද කුලතුංග, භක්ති ධර්මපි‍්‍රය මෙන්ඩිස් සහ දෙහිවල ගල්කිස්ස සමූහ සුරන්ජිත් පෙරේරා, ඡායාරූප – රංජිත් ජයවීර සහ තුෂාර ප‍්‍රනාන්දු
දෙහිවල දුම්රිය ස්ථානයේදී ඊයේ (26) සවස කාර්යාල දුම්රියක් තුළ බෝම්බයක් පුපුරා යාමෙන් එහි ගමන් ගත් මගීහු අට දෙනෙක් මිය ගොස් තවත් 72ක් තුවාල ලැබූහ.
කොළඹ කොටුවෙන් ඊයේ සවස පානදුර බලා ගමන්ගත් කාර්යාල දුම්රියේ මෙම බෝම්බය පුපුරා ගිය අතර මියගිය සහ තුවාල ලැබුවන්ගෙන් වැඩිදෙනා රජයේ සහ පෞද්ගලික අංශයේ සේවකයෝ වෙති.
මිය ගිය අටදෙනා අතර කාන්තාවෝ හයදෙනෙක් සහ පිරිමි දෙදෙනෙක් වෙති. තුවාලකරුවන් කළුබෝවිල රෝහලට ඇතුළත් කෙරුණු අතර රෝගීන් පස් දෙනකු හදිසි ශල්‍යකර්මවලට ලක්කළ බව රෝහල් අධ්‍යක්‍ෂක වෛද්‍ය විල්ෆඩ් කුමාරසිරි මහතා කීය. බරපතළ තුවාල ලත් රෝගීන් දෙදෙනෙක් කොළඹ ජාතික රෝහලට ඇතුළත් කරනු ලැබ සිටිති.
කොළඹ කොටුවෙන් ඊයේ සවස 4.25 පිටත් වූ අංක 763 දරන කාර්යාල දුම්රියේ පස්වැනි මැදිරියේ මෙම බෝම්බය පිපිරී තිබේ. දුම්රිය මැදිරියේ වම්පස උඩ පිහිටි ගමන්මලු රාක්කයේ බෝම්බය තිබී ඇති ආකාරයක් පෙනීයයි. දුම්රියේ වහළය කොටසට දැඩි හානි සිදුවී තිබේ.
බෝම්බය පිපිරීමත් සමඟම මගීන්ගේ මරලතෝනි හඬ පැතිරී ගිය අතර මැදිරිය එකම ලේ විලක් බඳු විය.
විශාල පිපිරුම් හඬකින් මුළු දෙහිවල ප‍්‍රදේශයම ගිඟුම් දුන් අතර බෝම්බ පිපිරීමත් සමඟම එම ස්ථානයට පැමිණි අවට පදිංචිකරුවෝ තී‍්‍රරෝද රියදුරෝ හා ආරක්ෂක අංශ සාමාජිකයෝ සහ යාබද මැදිරිවල සිටි මගීන්ද යුහුසුළුව ඉදිරිපත් වී තුවාලකරුවන් කළුබෝවිල රෝහල කරා ගෙනයාමට කටයුතු කළහ.
සිද්ධියට අදාළ දුම්රියේ මැදිරි 12 ක් තිබී ඇති අතර මෙම බෝම්බය පිපිරුණු අවස්ථාවේදී එම දුම්රිය මැදිරියේ මගීන් 200 ක් පමණ සිට ඇති බවත් වාර්තා විය.
එම පිරිස වෙනත් මැදිරිවල සිටි පිරිසට වඩා අඩු පිරිසකි.
බෝම්බය පිපිරීගිය පස්වැනි මැදිරියේ භාණ්ඩ පාර්සල් වැඩි සංඛ්‍යාවක් තිබූ බවත් අනාවරණය විය.
මෙම බෝම්බය පිපිරීමත් සමඟම මුහුදුබඩ දුම්රිය මාර්ගයේ දුම්රිය ගමනා ගමනය තාවකාලිකව නවතා දැමූ අතර සවස 6.00 සිට දුම්රිය යථා තත්ත්වයට පත්විණි.
තුවාලකරුවන් කළුබෝවිල රෝහලට ගෙන ඒමත් සමඟම තම ඥාතීන් හිතවතුන් පිළිබඳ සොයා බැලීම සඳහා විශාල පිරිස් රෝහල් කරා පැමිණියහ.
මෙම බෝම්බ සිද්ධිය සම්බන්ධයෙන් පොලිසියත් දුම්රිය දෙපාර්තමේන්තුවත් විශේෂ පරීක්ෂණ පවත්වති.
දුම්රියේ පුපුරා ගිය මෙම බෝම්බයට පුපුරණ ද්‍රව්‍ය කිලෝ එකහමාරක් පමණ යොදා ඇති බවට විශ්වාස කරන්නේ යැයි යුද හමුදා මාධ්‍ය ප‍්‍රකාශක බි‍්‍රගේඩියර් උදය නානායක්කාර මහතා “දිනමිණ” ට කීය.