කොළඹ ලෝටස් පාරේ හිල්ටන් හෝටලය අසලදී පසුගියදා පිපිරී ගිය කොටි මරාගෙන මැරෙන ප‍්‍රහාරයට කොටි ත‍්‍රස්තවාදීන් යොදාගත් යතුරු පැදියේ තොරතුරු ඇතුළත් ලිපි ගොනුව කිසිම ආකාරයකින් අස්ථාන ගතවී නොතිබුණු බව මෝටර් රථ කොමසාරිස් දෙපාර්තමේන්තුවේ නියෝජ්‍ය කොමසාරිස් අනුරාධ විජේකෝන් මහතා පැවසීය.
ර්ඛ 3875 අංක දරන එම යතුරු පැදියේ ලියාපදිංචි විස්තර අදාළ පරීක්‍ෂණ අංශ වෙත ඉදිරිපත් කිරීමට මෝටර් රථ කොමසාරිස් දෙපාර්තමේන්තුවට නොහැකිව ඇතැයි යන ප‍්‍රචාරය සම්බන්ධව කරුණු පැහැදිලි කරමින් නියෝජ්‍ය කොමසාරිස්වරයා එසේ පැවසීය.
මෙම බෝම්බ පිපිරීම සිදුවූයේ පසුගිය 16 වැනිදා ය. ඒ සම්බන්ධව පරීක්‍ෂණ පවත්වන පරීක්‍ෂණ අංශ මගින් අදාල යතුරු පැදියට අදාල තොරතුරු ඇතුළත් ලිපි ගොනුව ඉල්ලා තිබුණි.
මෝටර් රථ කොමසාරිස් දෙපාර්තමේන්තුවේ පරිගණක ගත කර ඇති තොරතුරුවලින් එම අවස්ථාවේ ම අදාළ ලියාපදිංචියට අදාළ පුද්ගලයාගේ තොරතුරු ලබා දුන් අතර සැකකරු පැය භාගයක් යාමටත් පෙර ති‍්‍රකුණාමලයේ දී අත්අඩංගුවට ගැනීමට පරීක්‍ෂණ අංශවලට හැකිවිය.
අනතුරුව අවශ්‍ය වූයේ එම සැකකාර කොටි ත‍්‍රස්තවාදියාගේ ඡායාරූප ඇතුළත් ලිපි ලේඛන සහිත ලිපි ගොනුවයි.
දිවයිනේ විවිධ ප‍්‍රදේශවලින් එන යතුරු පැදිද ඇතුළු දිනකට මෝටර් රථ කොමසාරිස් කාර්යාලයෙන් යතුරුපැදි පන්සියයකට වැඩි ප‍්‍රමාණයක් ලියා පදිංචි කරයි.
මේ සෑම යතුරු පැදියකටම අදාළ ලිපි ගොනු මෝටර් රථ කොමසාරිස් කාර්යාලයේ නාරාහේන්පිට සහ වේරහැර ශාඛාවල ගබඩා කර තබයි. ඒ අනුව ලක්‍ෂ ගණනක් ලිපි ගොනු මෙහි ගබඩා කර තිබේ.
වාහනයක තොරතුරු පරිගණක ගත කිරීමේ දී සියලු ලේඛන තොරතුරු ඊට ඇතුළත් කළත් අදාළ හිමිකරුගේ ඡායාරූපය පරිගණකයට යෙදීමේ තාක්‍ෂණික පහසුකම් මෝටර් රථ කොමසාරිස් කාර්යාලයට නැති බව අනුරාධ විජේකෝන් මහතා පවසයි.
ඒ අනුව අදාළ ඡායාරූප ඇතුළත් ලිපි ගොනුව සොයා ගත යුත්තේ ලක්‍ෂ සංඛ්‍යාත ලිපි ගොනු අතරින් ය.
මෙම මරාගෙන මැරෙන ප‍්‍රහාරයට යොදාගත් යතුරු පැදියේ ලිපිගොනුව සෙවීම ආරම්භ කළේ බෝම්බ පිපිරීම සිදුවූ දිනයේ දීම ය.
එදින පැය කීපයක් තුළ එය සොයා ගැනීමට අපහසු විය.
පසුදින නිවාඩු දිනයක් වුවද එම දෙපාර්තමේන්තු කොමසාරිස් බී. විජේරත්න මහතා ඇතුළු කණ්ඩායමක් එම ලිපිගොනුව සෙවූහ. කොළඹ අපරාධ කොට්ඨාසයේ නිලධාරිහු ද ඊට සහාය වූහ.
පළමුව වේරහැර ශාඛාවේ ලිපිගොනු අතර සොයා බලා අනතුරුව නාරාහේන්පිට ශාඛාවේ ලිපිගොනු අතර සොයා බැලීමේදී එය හමුවී තිබෙන්නේ වේරහැරට ගෙන යාමට වෙන්කර තිබූ දහසක පමණ ලිපි ගොනු අතර තිබී බවද නියෝජ්‍ය කොමසාරිස් අනුරාධ විජේකෝන් මහතා පැවසී ය.
Subscribe to:
Post Comments (Atom)
No comments:
Post a Comment