කොළඹ ලෝටස් පාරේ හිල්ටන් හෝටලය ඉදිරිපිට මරාගෙන මැරෙන ප‍්‍රහාරයට යොදා ගත් යතුරු පැදිය මිලදී ගැනීමට මුදල් දුන්නේ කොටි සංවිධානය බව යතුරු පැදියේ හිමිකරු ප‍්‍රකාශ කර තිබේ.
දැනට අත්අඩංගුවේ සිටින ති‍්‍රකුණාමලයේදී අසු වූ ජෙයබාල් නමැත්තා ප‍්‍රකාශ කර ඇති පරිදි යතුරු පැදිය මිලදී ගැනීමට කොටි සංවිධානය එහි වටිනාකම මෙන් දෙගුණයක් මුදල් ලබා දී ඇත.
ජෙයබාල් නැමැත්තාගේ නමට මිලදී ගත් යතුරු පැදියේ සියලු තොරතුරු අයිතිකරුගේ ඡායාරූපය ද සහිත ලිය කියවිලි ඇතුළත් ලිපි ගොනුව මෝටර් රථ කොමසාරිස් කාර්යාලය කොළඹ අපරාධ කොට්ඨාසයට ඊයේ බාර දුන්නේය.
මෙම මරාගෙන මැරෙන ප‍්‍රහාරයට පිල්ලෙයාන්ගේ ටී. එම්. වී. පී. සාමාජිකයෙක් සම්බන්ධ බවත් යතුරු පැදියට අදාළ ලිපි ගොනුව මෝටර් රථ කොමසාරිස් කාර්යාලයෙන් ඉවත් කළ බවත් කොටි සංවිධානයට හිතවත් දේශපාලන පක්ෂ ප‍්‍රචාරය කර තිබුණි.
එම්. ඉසෙඩ් 3785 දරන අංකය සහිත යතුරු පැදියේ සියලු තොරතුරු සහිත ලිපි ගොනුව ඉදිරිපත් කිරීමෙන් එම ප‍්‍රචාරය අමූලික බොරුවක් බව හෙළිවිය. දැනට අත්අඩංගුවේ පසුවන කොටි ත‍්‍රස්තවාදියා වූ ති‍්‍රකුණාමලයේ පදිංචි ජෙයබාල් ගේ සියලු තොරතුරු මෙම ලිපි ගොනුවට ඇතුළත් වේ.
ඒ අනුව ප‍්‍රශ්න කිරීමේදී ජෙයබාල් ප‍්‍රකාශ කර තිබෙන්නේ යතුරු පැදිය මිලදී ගැනීමට කොටි සංවිධානය එහි වටිනාකම මෙන් දෙගුණයක් මුදල් දුන් බවයි මෙම යතුරු පැදිය පාවිච්චියට නොගත් (බ‍්‍රෑන්ඩ් නිව්) හීරෝ හොන්ඩා වර්ගයේ යතුරු පැදියකි.
මරාගෙන මැරෙන ප‍්‍රහාරයකට යෙදවීම පිණිසම ජෙයබාල් යොදා කොටි සංවිධානය එය මිලදී ගෙන තිබේ.
එය මිලදී ගෙන ති‍්‍රකුණාමලයට ගෙන ගොස් ඉන් අනතුරුව මරාගෙන මැරෙන ප‍්‍රහාරයට යෙදවීම පිණිස ඇටවීමට යොදා තිබේ.
එම යතුරු පැදියේ ඉන්ධන ටැංකිය තුළ ඉන්ධන පිරවීමට වෙනම කොටසක් සකස් කර ඉතිරි කොටස තුළ පුපුරණ ද්‍රව්‍ය යොදා සකස් කර තිබෙන්නේ ති‍්‍රකුණාමලයේදී ජෙයබාල්ගේ සම්පූර්ණ අනු දැනුම ඇතිවය.
මරාගෙන මැරෙන ප‍්‍රහාරයට පැමිණි කොටි ත‍්‍රස්තවාදියාට සම්බන්ධ තොරතුරු ද මේ වන විට කොළඹ අපරාධ කොට්ඨාසය මගින් හෙළි කර ගෙන තිබේ. කොටි ත‍්‍රස්තවාදීන්ගේ ඉලක්කය වී තිබෙන්නේ පොලිස් බස් රථය නොව ප‍්‍රභූවරයකු බව පරීක්ෂණ අංශවල විශ්වාසයයි.
මෙම තොරතුරු හෙළි කර ගැනීම පිණිස කොළඹ අපරාධ කොට්ඨාසය ජෙයබාල් ඇතුලු සැකකරුවන් හය දෙනාගෙන් දිගින් දිගටම ප‍්‍රශ්න කරගෙන යයි.
Subscribe to:
Post Comments (Atom)
No comments:
Post a Comment