මහ ඇමැති පිල්ලෙයාන්

රටේ යහපත් උදාවක සංඥාවක් බව ජනපති කියයි

දශක තුනකට ආසන්න කාලයක් තිස්සේ පැවැති යුද්ධය නිසා ද්‍රවිඩ ජනතාවට අහිමි වු අභිලාශයන් මුදුන් පත් කර ගැනීමට ජනාධිපති මහින්ද රාජපක්ෂ මහතාගේ මඟ පෙන්වීම යටතේ පියවර තැබීමට සූදානම් බව නැඟෙනහිර පළාත් ප‍්‍රථම මහ ඇමැතිවරයා ලෙස දිවුරුම් දුන් සිවනේසතුරෙයි චන්ද්‍රකාන්තන් (පිල්ලෙයාන්) මහතා ඊයේ (16) පැවසීය.
තේරුමක් නොමැති යුද්ධයක් නිසා සී සීකඩ වී විසිරී සිටින ද්‍රවිඩ ජනතාව ඒකරාශි කිරීමට මෙවන් මහඟු අවස්ථාවක් ලබා දුන් ජනාධිපතිවරයාට සමස්ත දෙමළ ජනතාවගේම ප‍්‍රණාමය හිමි වන බවත් ඒ මහතා පැවසීය.
ජනපතිවරයා ඉදිරියේ නැඟෙනහිර මහ ඇමැති ලෙස ඊයේ (16) දිව්රුම් දුන් චන්ද්‍රකාන්තන් මහතා එසේ ප‍්‍රකාශ කළේය.
නැඟෙනහිර පළාතේ අභිනව මහ ඇමැතිවරයා ප‍්‍රමුඛ මහජන නියෝජිතයන් දිව්රුම් දෙන අද දවස ශී‍්‍ර ලාංකික ජනතාවට අලුත් ආරම්භයක් සනිටුහන් කෙරෙන දවසක් මෙන්ම දැනටත් ත‍්‍රස්තවාදී පාලනයට නතුව තිබෙන උතුරු පළාතේ ප‍්‍රදේශ දෙකද තුළත් යහපත් අනාගතයක උදාවට සංඥාවක් දෙන දවසක් බවත් ජනාධිපති මහින්ද රාජපක්ෂ මහතා මෙහිදී පැවසීය.
යුද්ධය ඕනෑ විටෙක යුද්ධයත් දේශපාලන විසඳුමක් අවශ්‍ය විටෙක දේශපාලන විසැඳුමකුත් දිය හැකි රජයක් බවට මුළු ලොවටම කියා පෑමට තමන් සමත් වූ බවත් ජනාධිපතිවරයා මෙහිදී ප‍්‍රකාශ කළේය.
නැඟෙනහිර පළාත් සභාවේ ප‍්‍රථම මහ ඇමතිවරයා සහ ඇමැතිවරුන්ද, එක්සත් ජනතා නිදහස් සන්ධානයේ මන්තී‍්‍ර කණ්ඩායමද සිය පදවිවල දිව්රුම් දීමේ උත්සවය ජනාධිපති මහින්ද රාජපක්ෂ මහතාගේ ප‍්‍රධානත්වයෙන් ජනාධිපති ලේකම් කාර්යාලයේදී ඊයේ (16) සවස අභිමානවත් අයුරෙන් පැවැත්විණ.
මඩකළපුව දිස්ති‍්‍රක්කයේ වාලච්චේන මැතිවරණ කොට්ඨාසයේ පේත්තාලේ නම් කුඩා ග‍්‍රාමයේ ඉපිද කලක් තුවක්කුව කෙරෙහි විශ්වාසය තබා කටයුතු කර පසුව ජනාධිපති මහින්ද රාජපක්ෂ මහතාගේ මඟ පෙන්වීම යටතේ ඉකුත් 10 වැනිදා නැඟෙනහිර පළාත් ප‍්‍රථම මැතිවරණයෙන් ජය ගත් සිවනේශතුරේ චන්ද්‍රකාන්තන් මහතා ජනාධිපති මහින්ද රාජපක්ෂ මහතා ඉදිරියේ දිව්රුම් ජන්නේ ඊයේ (16) සවස 6.03 ට පමණය.
ත‍්‍රස්තවාදී ග‍්‍රහණයෙන් දශක ගණනාවක් පීඩා විඳි ස්වකීය ජාතියේ ගැළවුම්කරු වශයෙන් ඔවුන්ගේම වැඩි මනාපයෙන් තේරී පත් වූ සිවනේශතුරේ චන්ද්‍රකාන්තන් මහතා දිව්රුම් දීමෙන් අනතුරුව ජනාධිපතිවරයා සිය උණුසුම් සුබ පැතුම් ඔහුට එක් කළේය.
නැඟෙනහිර පළාත් සභාවේ මහ ඇමැති සිවනේශතුරේ චන්ද්‍රකාන්තන් මහතා එම ධුරයට අමතරව මුදල්, නීතිය හා සාමය, පළාත් පාලන, මිනිස් සම්පත් ඇතුළු අමාත්‍ය තනතුරුවලද ඊයේ (16) දිව්රුම් දුන්නේය.
තුරේ අප්පා නවරත්න රාජා මහතා කෘෂිකර්ම, සත්ව නිෂ්පාදන සංවර්ධන, ග‍්‍රාමීය කර්මාන්ත සංවර්ධන හා ධීවර කටයුතු ඇමැතිවරයා ලෙසත් මීරා සහිබු උදුලෙ ලෙබ්බෙ මහතා මාර්ග සංවර්ධන වාරිමාර්ග, නිවාස ඉදිකිරීම් හා ජල සම්පාදන ඇමැතිවරයා ලෙසත් විමලවීර දිසානායක මහතා අධ්‍යාපන, සංස්කෘතික, ඉඩම් හා ප‍්‍රවාහන ඇමැතිවරයා ලෙසත් ඊයේ (16) දිව්රුම් දුන්නේය.
මීට අමතරව තව ඇමැති ධුරයක පුරප්පාඩුවක් පවතින අතර එම ඇමැති ධුරය සහ පළාත් සභාවේ සභාපති, නියෝජ්‍ය සභාපති, ආණ්ඩු පක්ෂයේ ප‍්‍රධාන සංවිධායක යන තනතුරු පළාත් සභා ප‍්‍රථම රැස්වීමේදී පිරවීමට නියමිතය.
නැඟෙනහිර පළාත් සභා ඡන්දයට එක්සත් ජනතා නිදහස් සන්ධානයෙන් තරගකර තේරී පත් වූ මන්තී‍්‍රවරු 16 දෙනෙක්ද මෙහිදී ජනාධිපතිවරයා ඉදිරියේ දිව්රුම් දුන්හ.
මහ ඇමැතිවරයා සිංහලද, දෙමළද මුස්ලිම්ද යන්න කල්පනා නොකොට මේ අභිනව මහ ඇමැතිවරයා නැඟෙනහිර සියලු ජාතීන්ගේ මහ ඇමැති ලෙස සැළකිය යුතු බව අවධාරණය කළ ජනාධිපතිවරයා නැඟෙනහිරින් ලද ජයග‍්‍රහණය රැක ගැනීමට නම් අපි සියලු දෙනාම ජාතිවාදයෙන් තොරව සිතීමට පුරුදු විය යුතු බවත් පැවසීය.
නැඟෙනහිර නිදහස රැකගෙන සිංහල, මුස්ලිම්, දෙමළ සමානාත්මතාව, දූ පුතුන්ගේ අනාගතය මෙන්ම උතුරේ ජනතාවගේ ප‍්‍රජාතන්ත‍්‍රවාදී අයිතිය තහවුරු කිරීමට බුලත් කොළයට ඡන්දය දෙන ලෙස තමන් කළ ඉල්ලීමට කන් දී සන්ධානය ජයග‍්‍රහණය කරවීමට උරදුන් නැඟෙනහිර ජනතාවගේ ඡන්දය අර්ථවත් කරන ලෙස ජනාධිපතිවරයා මෙහිදී අභිනව මහ ඇමැතිවරයා ප‍්‍රමුඛ මහජන නියෝජිතයන්ගෙන් ඉල්ලා සිටියේය.
මෙම අවස්ථාවට මහා සංඝරත්නය ප‍්‍රමුඛ පූජ්‍ය පක්ෂයද අගමැති රත්නසිරි වික‍්‍රමනායක, ශී‍්‍ර ලංකා නිදහස් පක්ෂයේ මහ ලේකම් ඇමැති මෛතී‍්‍රපාල සිරිසේන, එක්සත් ජනතා සන්ධානයේ මහ ලේකම් ඇමැති සුසිල් පෙ‍්‍ර්මජයන්ත යන මහත්වරු ප‍්‍රමුඛ ඇමැති මණ්ඩලය, පළාත් මහ ඇමැතිවරු, පළාත් සභා මන්තී‍්‍රවරු ඇතුළු පිරිසක් සහභාගී වූහ.