ඉහළ යන ජීවන වියදම හමුවේ ජනතාව මුහුණ දෙන ගැටලු අවම කිරීම සඳහා පෞද්ගලික අංශයේ වැටුප් වහාම කි‍්‍රයාත්මක වන පරිදි සියයට 15 සිට 25 දක්වා ඉහළ දැමීමට රජය තීරණය කැර ඇත.
මේ සම්බන්ධයෙන් වන ගැසට් නිවේදනය ලබන සතියේ නිකුත් කිරීමට නියමිත බව කම්කරු සබඳතා හා මිනිස් බල ඇමැති අතාවුද සෙනෙවිරත්න මහතා ඊයේ (25) දිනමිණට පැවසීය.
ජනාධිපති මහින්ද රාජපක්ෂ මහතාගේ උපදෙස් මත පඩිපාලක සභාව සමඟ සාකච්ඡා කිරීමෙන් පසු පෞද්ගලික අංශයේ වැටුප් වැඩි කිරීමේ තීරණයට එළඹි බව පවසන අමාත්‍යවරයා ජුනි මාසයේ අවසානය වන විට එය කි‍්‍රයාත්මක කිරීමට හැකිවනු ඇතැයි පැවසීය.
රජයේ වගකීමක් හා යුතුකමක් ලෙස පෞද්ගලික අංශයේ වැටුප් වැඩිකිරීමට ගෙන ඇති තීරණය සම්බන්ධව අදහස් හා යෝජනා ඉදිරිපත් කිරීමට සියලුම පාර්ශ්වවලට ආරාධනා කරන බව හෙතෙම කීය.
ආයතනයේ ස්භාවය අනුව වැටුප් සියයට 15 සිට - 25 දක්වා ඉහළ දැමීම තීරණය කළ හැකි බවත්, එය ආයතනයේ සියලු පාර්ශ්වයන්ගේ අදහස් අනුව කි‍්‍රයාත්මක කිරීමට පියවර ගන්නා බවත් පැවසීය.
දිනෙන් දින ඉහළ යන ජීවන වියදම හේතුවෙන් පෞද්ගලික අංශයේ වැටුප් වැඩිකරන ලෙස ඉල්ලීම් ලැබුණු බවත් මහජනතාවගෙන් පත්වූ රජයක් ලෙස එය ඉටුකිරීමට රජය බැදී සිටින බවත් ඇමැතිවරයා අවධාරණය කෙළේය.
ලක්ෂ 35ක් පමණ වන පෞද්ගලික අංශයේ සේවකයන් සඳහා අවම හා මූලික වැටුපක් ලබාදීමට රජය මීට පෙර පියවර ගනු ලැබූ අතර 2006 වසරේදී පෞද්ගලික අංශයේ සියලු දෙනාට රුපියල් දහසකින් වැටුප් වැඩි කිරීමට පියවර ගත් බවද රජය දුන් පොරොන්දු ඉටු කර ඇති බවද ඇමැතිවරයා වැඩිදුරටත් පැවසීය.
Subscribe to:
Post Comments (Atom)
No comments:
Post a Comment