Saturday, May 24, 2008
ත‍්‍රස්තවාදය මෙන් ම ජාතිවාදයත් පරදවමු
රජය ඒ සඳහා උඩුගං බලා පිහිනන බව ජනපති කියයි
ත‍්‍රස්තවාදය මෙන්ම ජාතිවාදයද පරාජය කළ යුතු බවත් ජාතිවාදය පරාජය කිරීමට රජය උඩුගම් බලා පිහිනමින් සිටින බවත් ජනාධිපති මහින්ද රාජපක්ෂ මහතා අවධාරණය කරයි.
ශ‍්‍රී ලාංකිකයන්ගේ හදවත් තුළ ජාතිවාදය නොමැති බව ප‍්‍රකාශ කළ ජනාධිපතිවරයා ජාතිවාදය පරාජය කිරීමට රටත් ජාතියත් එකාවන්ව පෙළ ගැසී සිටින බවත් පැවසීය.
රට කරවන ආණ්ඩුව කුමක්දැයි ත‍්‍රස්තවාදීන් විසින් තීන්දු කරනු ලැබූ යුගය අවසන් කිරීමට තමන්ට හැකි වූ බව පැවසූ ජනාධිපතිවරයා ත‍්‍රස්තවාදීන් විසින් සීමා කර තිබූ ජනතාවගේ නිදහසද යළිත් ලබා දී ඇතැයි ද පැවසීය.
ජනාධිපතිවරයා මෙම අදහස් පළ කළේ ජාතික ප‍්‍රසංග කලා රඟහලට මුල් ගල් තැබීමේ උළෙලට ඊයේ (23) සහභාගි වෙමිනි. රුපියල් මිලියන 2430 ක වියදමකින් ඉදිකෙරෙන මෙම රඟහලට චීන රජයේ ආධාර සහ ණය මුදල් ලැබී ඇත.
කොළඹ නොමෑඩ්ස් පිටියේ ඉදිකෙරෙන මෙම රඟහල ආසන 1288 කින් සමන්විත ප‍්‍රධාන රඟහලකින්ද නේපත්‍යාගාර, චිත‍්‍රපට ප‍්‍රදර්ශනාගාර, සංවාද මණ්ඩප, පුහුණු මධ්‍යස්ථාන, පර්යේෂණ මධ්‍යස්ථාන, පුස්තකාල ආදී සියලු පහසුකම් වලින් සමන්විතය.
සෙත් පිරිත් සජ්ඣායනා මධ්‍යයේ ජනාධිපති මහින්ද රාජපක්ෂ මහතාගේ සහ ශ‍්‍රී ලංකාවේ චීන තානාපති යේ දාවෝ මහතාගේ අතින් ජාතික ප‍්‍රසංග කලා රඟහලට ඊයේ (23) උදෑසන මුල්ගල් තැබිණි.
ශ‍්‍රී ලාංකිකයන් කලාවෙන් පෝෂණය වූ ජාතියක් බව මෙහිදී සඳහන් කළ ජනාධිපති මහින්ද රාජපක්ෂ මහතා කලාව රසවිඳීමට අවශ්‍ය පරිසරයක් ජනතාවට සකස් කර දීම රජයේ යුතුකම බවත් ප‍්‍රකාශ කළේය.
අපේ සම්පත් විකුණාගෙන කන දූ දරු පිරිසක් බිහි කිරීමට රජය සූදානම් නැති බව අවධාරණය කළ ජනාධිපතිවරයා සංවර්ධනයේ උපරිම ඵල නෙළිය හැකි රටක් ගොඩ නැඟෙමින් පවතින බවත් ප‍්‍රකාශ කළේය.
ස්වභාවික විපතකින් දහස් ගණනක් අවතැන්ව සිටියදී පවා පොරොන්දු වූ පරිදිම ශ‍්‍රී ලංකාවට ආධාර කරන චීන රජයටත් ජනතාවටත් ස්තුතිය පළ කළ ජනාධිපතිවරයා සුනාමියෙන් දැඩි ප‍්‍රහාරයකට ලක් වූ ශ‍්‍රී ලංකාව නැඟී සිටියාක් මෙන්ම චීනයටත් යළි නැගී සිටීමට ශක්තිය ධෛර්ය ප‍්‍රාර්ථනා කළේය.
විපතේදී පවා අප අත් නොහරින චීනය අපගේ කල්‍යාණ මිත‍්‍රයකු බව සිහිපත් කළ ජනාධිපති මහින්ද රාජපක්ෂ මහතා චීනයේ භූමි කම්පාවෙන් විපතට පත් ජනතාවට ශ‍්‍රී ලංකාවේ ශෝකය පළ කළේය.
සංස්කෘතික හා ජාතික උරුමයන් පිළිබඳ ඇමැති මහින්ද යාපා අබේවර්ධන, චීන තානාපති යේ දාවෝ යන මහත්වරු ද මෙහිදී කථා කළ අතර මෛතී‍්‍රපාල සිරිසේන, රෝහිත බෝගොල්ලාගම, ඒ. එච්. එම්. ෆවුසි යන මහත්වරු ද තානාපති නිලධාරීහු ඇතුළු පිරිසක් ද මේ අවස්ථාවට සහභාගී වූහ.
Subscribe to:
Post Comments (Atom)
No comments:
Post a Comment