එල්ටීටීඊය තුවක්කු බලයෙන් සිවිල් ජනතාව රඳවන් ඉන්නවා

ජනපති මහින්ද රාජපක්‍ෂ
නිව් ඉන්ඩියන් එක්ස්ප‍්‍රස් පුවත්පත, ඉකුත් බ‍්‍රහස්පතින්දා කොළඹ ජනාධිපති මන්දිරයේ දී ජනාධිපති මහින්ද රාජපක්‍ෂ මහතා සමග පැවැත්වූ සම්මුඛ සාකච්ඡාවේ දී ජනාධිපතිතුමා දැක්වූ අදහස් මෙසේ පළකෙරේ.
වත්මන් සංවර්ධනයේ ඉතාම සිත්ගන්නා කරුණකින් මම මේ සම්මුඛ සාකච්ඡාව ආරම්භ කරනවා. ශී‍්‍ර ලංකාවේ ජනවාර්ගික ප‍්‍රශ්නයට යුදමය විසඳුමක් නැති බව ඔබතුමා සඳහන් කර තිබෙනවා. ඔබ මේ ප‍්‍රශ්නය විසඳීමට අදහස් කරන්නේ කෙසේ ද?
ඔබ කියන දේ නිවැරැදියි; ශී‍්‍ර ලංකාවේ වත්මන් ගැටලුවට යුදමය විසඳුමක් නැති බව මම තරයේ විශ්වාස කරනවා. මම දිගින් දිගටම කීවේ මෙයයි. ත‍්‍රස්තවාදීන්ට යුදමය පිළිතුරු දෙන අතර, ශී‍්‍ර ලංකා වාසීන් වෙනුවෙන් දේශපාලන විසඳුමක් ලබාදීමට අප උනන්දු වෙනවා.
නොබෙදු ශී‍්‍ර ලංකාවක සාකච්ඡාමය දේශපාලන විසඳුමකට එළඹීමට අප ඇප කැපවී සිටින බව මම යළිත් අවධාරණය කරන්නට කැමැතියි. දමිළ ජාතිකයන් ඇතුළු සියලුම ජන කොටස්වල අපේක්ෂාවන් පිළිබද මෙහිදී සැලකිල්ලට යොමු කරනවා.
මීට අදාළ දේශපාලනමය කි‍්‍රයාදාමය සර්ව පාක්ෂික කමිටුව විසින් දැනට සකසාගෙන යනවා. මෙය තවදුරටත් ව්‍යාප්ත කරන්න, දෙමළ ජාතික සන්ධානයටත් (ටී. එන්. ඒ) සහභාගි වන ලෙස අප ආරාධනා කළා.
නොබෙදුණු රටක සියල්ලන්ටම සාධාරණය ඉටුකිරීම සඳහා වන ඔවුන්ගේ යෝජනා සහ අදහස් සතුටින් පිළිගැනීමට අප කැමැත්තෙන් ඉන්නවා.
මා බලා ඉන්නේ සර්ව පාක්ෂික කමිටුවේ අවසන් යෝජනාව ලැබෙන තුරුයි. ඒ කමිටුව මා වෙත ඉදිරිපත් කළ අන්තර් යෝජනාව දැනටමත් කි‍්‍රයාත්මක කර අවසන් ත‍්‍රස්තවාදී ග‍්‍රහණයෙන් මුදාගත් නැඟෙනහිර පළාතේ ඡන්දය පැවැත්වූයේ එය පදනම් කරගෙනයි.
ඒ පළාතේ නායකත්වයට අප දමිළ ප‍්‍රධාන ඇමැතිවරයෙක් තෝරාගත්තා. අප දැන් නැඟෙනහිර පළාතට තවත් බලය බෙදාහැරීමට කටයුතු කරගෙන යනවා.
එහි කොටසක් වශයෙන් නැඟෙනහිර පළාතේ නියෝජ්‍ය පොලිස්පති වශයෙන් දමිළ ජාතිකයෙක් පත්කර තිබෙනවා. නැඟෙනහිර පළාතේ අප ලැබූ මේ සාර්ථකත්වය, උතුරු පළාතේත් ඇති කරන්නට අප බලාපොරොත්තු වෙනවා.
කරුණා සහ පිල්ලෙයාන් සමඟ කරන කටයුතු බලාපොරොත්තු වූ තරම් හොඳින් සිදුනොවන බව අපට වාර්තා වී තිබෙනවා.
ශී‍්‍ර ලංකාවේ කටයුතු සහ උතුරු - නැඟෙනහිර යුද්ධය පිළිබඳ උනන්දුවකින් කටයුතු කළ ඔබ, ප‍්‍රධාන අමාත්‍ය චන්ද්‍රකාන්තන් (පිල්ලෙයාන්) සහ පාර්ලිමේන්තු මන්තී‍්‍ර මුරලිදරන් (කරුණා) එල්. ටී. ටී. ඊ යේ සාමාජිකයන්ව සිටියදී රජයට විරුද්ධව අවුරුදු ගණනාවක් යුද වැදී සිටි බව දන්නවා විය යුතුයි.
ඔවුන් ප‍්‍රචණ්ඩ කි‍්‍රයා අත්හැර, ඡන්ද කි‍්‍රයාපද්ධතියේ සහ ආණ්ඩුවේ කොටස්කරුවන් බවට පත්වන තරම් ප‍්‍රජාතන්ත‍්‍රවාදී ගමන් මඟට යොමුවීමම ජයග‍්‍රහණයක්.
එකම පක්ෂයේ නායකයන් දෙදෙනෙක් වෙනස් මත දැරීම, ප‍්‍රජාතන්ත‍්‍රවාදයේ දක්නට ලැබෙන ප‍්‍රකට දෙයක්. ප‍්‍රජාතන්ත‍්‍රවාදී පක්ෂවල බොහෝවිට මෙය දක්නට ලැබෙනවා. ඒ නිසා, ඔවුන් නියෝජනය කරන ජනතාවගේ පොදු යහපත උදෙසා, ඔවුන් අතර ඇති මතභේද නිරාකරණය කර ගන්නවා ඇතැයි මම සිතනවා.
යුද කි‍්‍රයාපද්ධතියේ දී සිවිල් වැසියන් මරා දමන බවට තමිල්නාඩුවේ මත පළවී තිබෙනවා. ඔබතුමා මීට ප‍්‍රතිචාර දක්වන්නේ කොහොමද?
මෙය සම්පූර්ණයෙන්ම වැරැදි මතයක් බව මම පැහැදිලිව කියනවා. අපේ යුදමය කි‍්‍රයාපද්ධතිය හුදෙක්ම එල්. ටී. ටී. ඊයට විරුද්ධ එකක්, එය දමිළ ජාතිකයනට විරුද්ධව කෙරෙන්නක් නොවන බව, මම දිගටම කියා තිබෙනවා.
සිවිල් ජනයා අනතුරට පත් නොකරන ලෙසට මම හමුදාවට දැඩි නියෝග දී තිබෙනවා. මේ අතර, එසේ නොවන්නට වගබලා ගැනීමට හමුදාවද උපරිමයෙන් කැපවී කටයුතු කරනවා.
කෙසේ වෙතත්, මේ ගැටුමේ ස්වභාවය නිසා සිවිල් වැසියන්ගේ දේපළවලට හානි සිදුවී ඇති බව මමත් පිළිගන්නවා.
නැඟෙනහිර පළාතේ කළාක් මෙන් ත‍්‍රස්තවාදීන්ගේ ග‍්‍රහණයෙන් මුදාගත් වහාම රජය මේවා නැවත ගොඩනැගීමටත්, ජන ජීවිතය යථා තත්ත්වයට පත් කිරීමටත් කටයුතු කරනවා. ඉදිරි වසර තුන ඇතුළත නැඟෙනහිර පළාත් සංවර්ධනයට රජය ඩොලර් බිලියන 1.8 ක් වැය කරනවා.
කෙසේවෙතත්, එල්. ටී. ටී. ඊ ය අහිංසක සිවිල් වැසියන් තම ආරක්ෂාවට පළිහක් ලෙස යොදා ගන්නවා.
යුද හමුදාව සහ ආණ්ඩුව සපයා ඇති දකුණට පැමිණිය හැකි ආරක්ෂිත ‘කොරිඩෝව’ හරහා වඩා සුරක්ෂිත ප‍්‍රදේශ කරා ඔවුනගේ පැමිණීම එල්. ටී. ටී. ඊ ය වළකා තිබෙනවා.
ගැටුම් පවතින ප‍්‍රදේශවල සිවිල් වැසියන්ගේ ආරක්ෂාව පිළිබඳ උනන්දුව දක්වන දේශපාලන නායකයන්, මෙම කොරිඩෝව හරහා ආරක්ෂිත ප‍්‍රදේශවලට සිවිල් වැසියන්ට පැමිණීමට අවසර දීමට එල්. ටී. ටී. ඊ ය නම්මාගැනීමට කටයුතු කරනවා නම් හොඳයි.
ගැටුම් පවතින ප‍්‍රදේශවලට ප‍්‍රමාණවත් තරම් සහන නොලැබෙන බව තමිල්නාඩුව මැසිවිලි නඟනවා. ඊට පිළියම් යෙදීමට ගෙන ඇති පියවර මොනවා ද?
කවරකුගේ වුවත් සත්‍ය මත පදනම් නොවූ මැසිවිලිවලට ප‍්‍රතිචාරය දැක්වීම අසීරුයි. අභ්‍යන්තරික වශයෙන් අවතැන්වී ඇතැයි මාධ්‍ය කියන සංඛ්‍යාව අතිශයෝක්තියෙන් දක්වා තිබෙනවා.
දැනට ඇති සංඛ්‍යා ලේඛන අනුව අවතැන්වූ සංඛ්‍යාව දළ වශයෙන් ලක්ෂයක් පමණ වනවා.
කිලිනොච්චි සහ මුලතිව් දිස්ති‍්‍රක්ක දෙකේ සහ වවුනියා දිස්ති‍්‍රක්කයේ කොටසක වාසය කරන අය විදින දුක් කම්කටොලු ගැන සලකා, මේ ප‍්‍රදේශවල සිටින සියලුම සිවිල් වැසියන්ට නොමිලේ සහනාධාර ලබාදීමට මම නියෝග කර තිබෙනවා. මේ ආහාර ද්‍රව්‍යවලින් කොටසක් නිසැකවම එල්. ටී. ටී. ඊ ය අතට පත්වන බව මම හොඳින්ම දන්නවා.
මේ වසරේ සැප්තැම්බර් සිට අද දක්වා, අප ආහාර ටොන් 11,058 ක්, ආහාර නොවන ද්‍රව්‍ය ටොන් 598 ක් කිලිනොච්චි සහ මුලතිව් දිස්ති‍්‍රක්කවලට යැව්වා. මේ අතර, මෙම කාලය ඇතුළත, ලෝක ආහාර වැඩසටහන යටතේ මෙම ප‍්‍රදේශවල ආහාර ටොන් 4,370 ක් බෙදා දී තිබෙනවා.
තමිල්නාඩුවේ ජනතාව විසින් එවන ලද ආහාර ද්‍රව්‍ය මෙහි එවීමට කටයුතු කිරීම සම්බන්ධයෙන් අප ඉන්දීය ආණ්ඩුවට කෘතඥ වෙනවා. මේ සියලුම ආහාර ද්‍රව්‍ය, ගැටුම් පවතින ප‍්‍රදේශවල සිවිල් වැසියන් අතර දැනටමත් බෙදා දී තිබෙනවා.
සරණාගතයන් විශාල වශයෙන් තමිල්නාඩුවට යාම නිසා ගැටලුවක් ඇතිවේදැයි ඔබතුමා සිතනවාද?
සරණාගතයන් විශාල වශයෙන් යන වගක් නම්, මා දන්නේ නැහැ. නිවැරැදි තත්ත්වය මම කියන්නම්. පසුගිය වසරේ නැඟෙනහිර පළාත මුදාගැනීමේ දී අභ්‍යන්තරික වශයෙන් අවතැන්වුවන් 1,70,000 ක් පමණ සිටියා.
දැනට උතුරේ අවතැන්වුවන් 1,00,000 පමණ සිටිනවා. තමිල්නාඩු ප‍්‍රාන්ත රජයේ සංඛ්‍යා ලේඛන අනුව, 2006 ජනවාරි සිට තමිල්නාඩුවට ගොස් සිටින සරණාගතයන් සංඛ්‍යාව 22,800 යි.
මොවුන් අතුරින් 5,429 ක් සිය කැමැත්තෙන්ම ශ‍්‍රී ලංකාවට පැමිණ තිබෙනවා. සරණාගතයින් විශාල වශයෙන් තමිල්නාඩුවට ඇදීනොයන බව මෙයින්ම පෙනී යනවා.
නැඟෙනහිර පළාත මුදාගැනීමෙන් පසුව, තමිල්නාඩුවේ සිටි නැගෙනහිර පළාතේ සරණාගතයන් සමහරෙක් නැවත ශ‍්‍රී ලංකාවට පැමිණීමට කැමැත්තෙන් සිටින බව මට දැනගන්නට ලැබී තිබෙනවා.
එසේ නැවත පැමිණෙන සියලුම සරණාගතයන්ට හැකි සෑම සහයක්ම ලබාදීමට මගේ රජය සූදානම්.
ඔබතුමා ධීවර ඇමැතිවරයා වශයෙන් කලක් කටයුතු කළා. දිනකට තමිල්නාඩු යාත‍්‍රා ඔබගේ මුහුදු සීමාව ඇතුළත ධීවර කටයුතුවල කොතරම් දුරට යෙදෙනවාද කියා ඔබතුමාට කියන්න පුළුවන්ද?
නාවුක හමුදාව සපයා ඇති තොරතුරු අනුව, සාමාන්‍යයෙන් තමිල්නාඩු ධීවර යාත‍්‍රා 500 ක් පමණ දිනකට ශ‍්‍රී ලංකා මුහුදු සීමාවට ඇතුල් වී ධීවර කටයුතුවල යෙදෙනවා.
මෙය කලක සිටම කෙරීගෙන යනවා. මා ධීවර ඇමැතිවරයාව සිටි කාලයෙත් මෙසේ සිදුවුණා. අසල්වාසි රටවල් දෙකක් වන අප දෙරට මෙය මිත‍්‍රශීලිව විසඳ්‍රගත යුතුයි.
එල්.ටී.ටී.ඊ.ය පැහැදිලිවම සටන් විරාමයකට සූදානම්. තමිල්නාඩු මහ ඇමැතිවරයා මෙයට සහාය පළ කරනවා. එහෙත් ඔබතුමා මෙම යෝජනාව ප‍්‍රතික්ෂේප කළා. ඒ ඇයි?
සටන් විරාමයක් ඇතිකරන ලෙස එල්.ටී.ටී.ඊ.ය ඉල්ලා සිටීමට හේතුවී ඇති පසුබිම ඔබ හඳුනාගත යුතුයි. තමන් යුදමය වශයෙන් දුබල වූ විට, සටන් විරාම ඉල්ලා සිටීම එල්.ටී.ටී.ඊ.ය දිගින් දිගටම කර ඇති දෙයක්.
ඔවුනට අලුතින් යුද හමුදාව ලබා ගැනීමට සහ සටන්කරුවන් බඳවා ගැනීමට කාලය අවශ්‍ය වූ විට මෙසේ කරනවා. 2005 නොවැම්බරයේ දී මා ජනාධිපති ධූරයට පත් වූ පසුව මහවිරු දින කථාවේදී එල්.ටී.ටී.ඊ. නායකයා මා “ප‍්‍රඥාගෝචර” නායකයෙක් ලෙස හඳුන්වා දුන්නා. ජනවාර්ගික ගැටලුව විසඳීමට මගේ රජයට එක් අවුරුදු කාලයක් ලබාදෙන බවත් කීවා.
කෙසේ වෙතත්, මා ප‍්‍රඥාගෝචර නායකයෙක්ද යන්න ඔප්පු කිරීමට ඔහු මට සුළු ඉඩ ප‍්‍රස්ථාවක් දුන්නේ නැහැ. එම කථාව පවත්වා සති දෙකක් ඇතුළත ඔහු අපේ හමුදාවට ප‍්‍රහාර එල්ල කළා. අහිංසක සිවිල් වැසියන්ටත් හානි කළා.
මේ අනුවත් අප අතීතයේ ලැබූ වෙනත් අත්දැකීම් පදනම් අනුවත් සටන් විරාමයක් සඳහා වූ එල්.ටී.ටී.ඊ.යේ ඉල්ලීම අවංක එකක් යැයි සිතන්නට බැහැ.
ඊට වඩාත් හේතුවන්නේ එල්.ටී.ටී.ඊ.ය මෙවර ඉල්ලීම කරන්නේත් අපගේ හමුදාව ඔවුන් දැඩිසේ දුර්වල කළ අවස්ථාවක වන නිසයි. එල්. ටී. ටී. ඊ ය වැනි ත‍්‍රස්තවාදී කණ්ඩායමක් සමඟ කටයුතු කළ යුත්තේ යථාර්වාදීවයි.
යුද්ධමය ජයග‍්‍රහණයක් ප‍්‍රකාශයට පත්කිරීමට අවශ්‍ය කොන්දේසි මොනවාද? එය කිලිනොච්චියෙන් අවසන් වනවාද?
මම දැනටමත් කියූ පරිදි, මම යුද්ධමය විසඳුමකට කැමැති නැහැ. කෙසේ වෙතත්, රජයට නීත්‍යානුකූල ලෙස පාවිච්චි කළ හැකි බලය යෙදවීම අනිවාර්ය වී තිබෙනවා.
ජනතාවට ප‍්‍රජාතන්ත‍්‍රවාදය ලබාදීමට, ප‍්‍රජාතන්ත‍්‍රවාදී ලෙස තෝරාපත්වූ රජයකට එසේ කරන්නට පුළුවන්. ඒ නිසා, කිලිනොච්චිය වැටීම, එම ප‍්‍රදේශයේ ජනතාවට ප‍්‍රජාතන්ත‍්‍රවාදය භුක්තිවිදීමට ඉඩ සලසන කි‍්‍රයාපද්ධතියේ එක් ඉදිරි පියවරක් පමණයි.
මේ ප‍්‍රදේශවල ජනයා එල්. ටී. ටී. ඊ යේ අමානුෂික කි‍්‍රයාවලින් දුක්ගැහැට විඳී අය. මෙය යුදමය ජයග‍්‍රහණයක් වනවාට වඩා, ප‍්‍රජාතන්ත‍්‍රික නිදහස යළි ලබා දීමක් වෙනවා ඇති. සැබෑ ජයග‍්‍රහණය මෙයයි.
කිලිනොච්චි සහ මුලතිව් ප‍්‍රදේශ වාසීන් සහ සරණාගතයන් ලක්ෂ හතරක් පමණ සිටිනවා යයි මම සිතනවා. මෙවැනි ජනාකීර්ණ ප‍්‍රදේශයක යුද්ධයක් තුළින් මෙම ගැටලුවට විසඳුම් සෙවිය හැකිද? සාමාන්‍ය ජනතාව එල්. ටී. ටී. ඊ යෙන් බැහැර කරවා ගැනීමට සිතන්නේ කවර ආකාරයෙන් ද?
ඔබ සඳහන් කළ සංඛ්‍යා ලේඛන ප‍්‍රශ්න සහගතයි. නමුත් මම ඒ ගැන කථා කරන්නේ නැහැ. සිවිල් වැසියන් එල්. ටී. ටී. ඊ යෙන් බැහැර කර ගත යුතු බව සිතීම වැරැදියි. ඔවුන් එල්. ටී. ටී. ඊ ය ට ඇපකැපවී ඇති බව පෙන්වීමට කිසිම සාක්ෂියක් නැහැ.
එමෙන්ම ඔවුන් එල්. ටී. ටී. ඊ පෝෂණය කළ අයත් නොවේ. වැරැදි සහගත බලාපෙරොත්තු ලබාදුන් නොමග ගිය සුළු පිරිසක් පමණක් තවමත් ඔවුන් සමග ඉන්නට පුළුවන්.
එල්. ටී. ටී. ඊ ය කිසිවිටකත් දමිළ ජනතාව ගේ සැබෑ නියෝජිතයා වුණේ නැහැ. කිලිනොච්චියේ සහ මුලතිව්හි සිටින සුළු පිරිස රඳවාගෙන සිටින්නේ එල්. ටී. ටී. ඊ යේ තුවක්කුවේ බලයෙන්.
එම බලය බිඳ දැමූ පසුව දෙමළ ජාතිකයන්ට නිදහසේ තම නායකයන් තෝරා ගෙන ප‍්‍රජාතන්ත‍්‍රවාදී කි‍්‍රයාදාමයට එකතුවීමට පුළුවන්. උතුරේ සංවර්ධන වැඩසටහන් කි‍්‍රයාත්මක කිරීමෙන් අප බලාපොරොත්තු වන්නේ එයයි.