මහින්ද කුලතුංග සහ භක්ති මෙන්ඩිස්
කිලිනොච්චියේ සිට පරන්තන් දක්වා දිවෙන එල්.ටී.ටී.ඊ ඉදිරි ආරක්ෂක බැම්මේ කිලෝ මීටර පහක බලය ඊයේ (16) තහවුරු කරගත් ආරක්ෂක හමුදාව එම සටනේ දී කොටි ත‍්‍රස්තවාදීන් 120 ක් මරාදමා තවත් 250 ක පමණ පිරිසකට තුවාල සිදු කැර තිබේ.
ඊයේ දවස පුරාම කිලිනොච්චිය ඉරණමඩු, කිලිනොච්චිය දකුණ සහ අඩම්පන් යන ප‍්‍රදේශවලදීත් මුහමාලෙයි ඉදිරි ආරක්ෂක වළල්ලේත් හමුදාව සහ ත‍්‍රස්තවාදීන් අතර ඉතා දරුණු සටන් ඇවිලී ඇත.
මේ සටන්වලදී ත‍්‍රස්තවාදීන් විශාල පිරිසක් මියගිය බව යුද හමුදා මාධ්‍ය ප‍්‍රකාශක බි‍්‍රගේඩියර් උදය නානායක්කාර මහතා “දිනමිණ” ට කීය.
එම සටන්වලදී යුද හමුදාවේ රණවිරුවන් 25 දෙනකු මියගොස් 10 ක් අතුරුදන්ව 160 දෙනකු තුවාල ලද බවත් ඒ මහතා කීය.
ඉරණමඩු සිට පරන්තන් දක්වා කිලෝමීටර් ගණනාවක් දිගට එල්.ටී.ටී.ඊ ය විසින් අගල් කපා මහ පස්කදු නිර්මාණය කැර ඒවා අතර බංකර තනා තිබිණි. ඊයේ පැවැති සටන්වලින් ත‍්‍රස්තවාදීන් එම බංකර අතහැර පලාගොස් ඇති බවත් බි‍්‍රගේඩියර්වරයා කීය.
කිලිනොච්චිය නගරය වටකොට තිබූ එම මහ පස් බැම්මේ ස්ථාන පහකින් හමුදාව ඇතුළු වී බලය අත්පත් කැරගෙන ඇති අතර මේ නිසා කිලිනොච්චියට ඇතුළු වීමේ ගමන පහසු වන බවත් හෙතෙම සඳහන් කෙළේ ය.
මේ මහ පස් බැම්ම ආශි‍්‍රතව යුද අගල්, මර උගුල් සහ බිම් බෝම්බ සිය ගණන් එල්.ටී.ටී.ඊ ය විසින් අතුරා තිබූ අතර හමුදාව දැඩි පරිශ‍්‍රමයකින් යුතුව ඒවා මැඩගෙන ඉදිරියට ගොස් ඇත.
ඊයේ එල්.ටී.ටී.ඊ යට අත්වූ දැඩි හානියත් සමඟම හැකි පමණ ආධාරක භට පිරිස් සටන් බිමට එවන ලෙස කොටින්ගේ සංඥා මගින් මුලතිව් කොටි නායකයන් ගෙන් ආයාචනා කැර තිබේ.
ඊයේ රාතී‍්‍ර වන විටත් කිලිනොච්චි ප‍්‍රදේශයේ ඉතාමත් දරුණු ගැටුම් පැවැතිණි. මේ අතර ඊයේ සවස 6.15 ට පමණ යුද හමුදාවට ප‍්‍රහාර එල්ල කිරීමට යාපනය කළපුව හරහා පැමිණි ත‍්‍රස්ත බෝට්ටු රැසකට ගුවන් හමුදාවේ එම්. අයි. ප‍්‍රහාරක හෙළිකොප්ටර් යානා මගින් ප‍්‍රහාරයක් එල්ලකර කොටි යාත‍්‍රාවක් සම්පූර්ණයෙන්ම විනාශ කැර තිබේ.
ඒ සමඟම සෙසු බෝට්ටු පළාගිය බවත් ගුවන් හමුදා මාධ්‍ය ප‍්‍රකාශක වින්ග් කමාන්ඩර් ජනක නානායක්කාර මහතා කීය.
Subscribe to:
Post Comments (Atom)
No comments:
Post a Comment