නෙල්කා මැදගෙදර
ශ්‍රේෂ්ඨාධිකරණයට අපහාස කිරීමේ වරදට වසර 2ක සිර දඬුවම් නියමව සිටි එස්. බී. දිසානායක මහතාගේ නම ඡන්ද හිමි නාම ලේඛනයට ඇතුළත් කිරීම ප‍්‍රතික්‍ෂේප කරමින් මැතිවරණ කොමසාරිස් වරයා විසින් නිකුත් කර ඇති ලිපිය කි‍්‍රයාත්මක වීම අත්හිටවමින් ශ්‍රේෂ්ඨාධිකරණය ඊයේ (16) අතුරු තහනම් නියෝගයක් නිකුත් කෙළේය.
මැතිවරණ කොමසාරිස් වරයාගේ එම තීරණය අභියෝගයට ලක් කරමින් එස්. බී. දිසානායක මහතා ඉදිරිපත් කළ පෙත්සමක් විභාගයට ගැනීමට අවසර දෙමින් ශ්‍රේෂ්ඨාධිකරණය මේ නියෝගය පැනවීය.
පෙත්සම විභාග කර අවසන් වන තෙක් මේ අතුරු තහනම් නියෝගය බල පැවැත් වේ. පෙත්සම් විභාගය 2009 අපේර්ල් මස 01 වැනිදා ඇරැඹීමට නියම කැරිණි.
පෙත්සම විභාගයට ගත් අවස්ථාවේ මැතිවරණ කොමසාරිස්වරයා සහ නීතිපතිවරයා වෙනුවෙන් පෙනී සිටි රජයේ නීතිඥ විරාජ් දයාරත්න මහතා කියා සිටියේ එස්. බී. දිසානායක මහතා දඬුවම් ලැබිය හැකි වරදක් කැර ඇති බවය.
ආණ්ඩු ක‍්‍රම ව්‍යවස්ථාවෙහි 105 (3) වගන්තිය අනුව අධිකරණයට අපහාස කිරිම වෙනුවෙන් දඬුවම් කිරීමේ සීමාවක් දක්වා නැතැයි හෙතෙම කීය. ඒ අනුව ඡන්ද දායකයකු ලෙස ලියාපදිංචි වීමට නුසුදුස්සකු වන බවය.
මෙහිදී විනිසුරු ශිරාණි බණ්ඩාරනායක මහත්මිය සඳහන් කෙළේ දිසානායක මහතාගේ මන්තී‍්‍රධූරය අහෝසි කිරීමට, අදාළ සිර දඬුවම හේතුවක් බවට පාර්ලිමේන්තු මහ ලේකම්වරිය කිසිදු අවස්ථාවක සඳහන් කැර නොමැති බවය.
මාස 1ක් අඛණ්ඩව පාර්ලිමේන්තුවට වාර්තා නොකිරීම ඊට හේතුව නොවේදැයි ප‍්‍රශ්න කළ අවස්ථාවේ රජයේ නීතීඥවරයා එය පිළිගත්තේය. කෙසේ වුවද 2005 වසරේ සිට දිසානායක මහතාගේ නම ඡන්ද හිමි නාම ලේඛනයෙහි ලියාපදිංචි කැර නොමැති අතර ඒ අවස්ථාවේදී එය ඔහු අභියෝගයට ලක්කර නැතැයි රජයේ නීතිඥවරයා කීය.
නීතිඥ ගෞරි තවරාසා මහත්මියගේ උපදෙස් මත ජනාධිපති නීතිඥ ෆයිස් මුස්තාපා මහතා එස්. බී. දිසානායක මහතා වෙනුවෙන් පෙනී සිටියේය.
Subscribe to:
Post Comments (Atom)
No comments:
Post a Comment