ජාතික හෙළ උරුමය හා සටන් විරාම කතාවක් සම්බන්ධව පසුගිය දිනවල ඇතිවූ දේශපාලන කතා බහ ගැනත්, මෙවර මහවිරු සතියේ ප‍්‍රභාකරන්ට අත්ව ඇති ඉරණම පිළිබඳත්, මුම්බායි ප‍්‍රහාර ආදිය හමුවේ කොටි සංවිධානයට ඉදිරියේ දී මුහුණ දීමට සිදුවන අත්දැකීම කුමක් ද යන්න පිළිබඳ ජාතික හෙළ උරුමයේ නායක එල්ලාවල මේධානන්ද හිමියෝ මෙසේ අදහස් දක්වති.
කොටි සංවිධානය සමග සටන් විරාමයක් ඇති කරගත යුතු බවට ජාතික හෙළ උරුමය කළැයි කියන ප‍්‍රකාශයක් සම්බන්ධයෙන් පසුගිය දිනවල විශාල කතාබහක් ඇතිවුණා. මොකක්ද මේ සටන් විරාම කතාව
සටන් විරාමයක් අවශ්‍යයි කියලා ජාතික හෙළ උරුමය කිසිම ප‍්‍රකාශයක් කරලා නැහැ. ජාතික හෙළ උරුමය එසේ කිව්වා කියල සමහරු අසත්‍ය ප‍්‍රචාර ගෙනියනවා.
ප‍්‍රභාකරන් ඊළම අත්නොහරින කෙනෙක් බව එදා ඉදලා කිව්වේ, ජාතික හෙළ උරුමයයි.
එක් රැස්වීමකදී ප‍්‍රභාකරන් ඔහුගේ සාමාජිකයන්ට කිව්වේ ඊළමට මෙහා විසඳුමකට ගියොත් තමාට වෙඩි තබා ඝාතනය කරන්න කියලයි. ප‍්‍රභාකරන්ට අවශ්‍ය කෙසේ හෝ ඊළාම් රාජ්‍ය පිහිටුවන්නයි.
සටන් විරාම ගැන කතා කරන්නේ, සාම සාකච්ඡා මතක් වෙන්නේ ප‍්‍රභාකරන් අන්ත පරාජයකට පත්වන විටයි. ජාතික හෙළ උරුමය සියලු දේශපාලන පක්ෂවලට වඩා හොඳින් ඒ බව දන්නවා.
මේ ආණ්ඩුවේ කොටස්කාරයන් බවට පත්වෙලා කොටි සංවිධානය පරාජය කරන්න කියලා අපි ජනාධිපතිතුමාගෙන් ඉල්ලා සිටින්නෙත් ඒ නිසයි.
සටන් විරාමයක් ගැන කතා කරලා කොටි සංවිධානය බේරාගන්න හදන්නේ කොටි සංවිධානයට හා බෙදුම්වාදයට හිතවත් පිරිසක් මිසක් අපි නෙමෙයි.
කොන්දේසි සහිත සටන් විරාමයකටවත් ජාතික හෙළ උරුමය කැමැති වෙන්නේ නැද්ද?
ආයුධ බිම තියෙනවයි කියන්නේ භාවිතා නොකර ළඟ තබා ගැනීම. එහෙත් ඕනෑම වෙලාවක එම ආයුධය යළි භාවිත කළ හැකියි. ඒක නිසා අපි කියන්නේ කොටි සංවිධානය සතු සියලු අවි ආයුධ රජයට භාරදිය යුතුයි කියලයි.
ඉන් පසුව අපේ ආරක්ෂක අංශ කොටි සංවිධානයේ තවත් අවි ආයුධ තියෙනවද? කියලා පූර්ණ පරීක්ෂණයකට ලක් කළ යුතුයි. ඊළාම් රාජ්‍යයකට තිබූ අදහස අත්හැරියා.
ඒකීය ශී‍්‍ර ලංකාවක දේශපාලන විසඳුමකට කැමැතියි කියලා ප‍්‍රභාකරන් ප‍්‍රසිද්ධ ප‍්‍රකාශයක් කළ යුතුයි. ඒ කොන්දේසිවලට යටත් වනවානම් ඒවා නිසි පරිදි කි‍්‍රයාත්මක වෙනවානම් සටන් විරාමයක් ඇතිකර සාම සාකච්ඡා පැවැත්වීමට ජාතික හෙළ උරුමය සූදානම්.
ත කොටි සංවිධානය මේ දක්වා මේ ගමන පැමිණ ඇත්තේ ආයුධ කෙරෙහි විශ්වාසය තබාගෙනයි. ආයුධ භාරදුන්නොත් කේවල් කිරීම සඳහා කිසිම දෙයක් තමන්ට ඉතිරි නොවන බව ඔවුන් කියනවා.
ආයුධ භාරදීලා සාකච්ඡාවලට පැමිණි පසුව ආණ්ඩුව පැත්තෙන් යම් රැවටීමක් වුණොත් ඔවුන්ට විසඳුමකුත් නැහැ. ආයුධත් නැහැ කියලයි ඔවුන් කියන්නේ. මේ කතාවෙත් සාධාරණයක් තියෙනවා නේද?
කොටි සංවිධානයට එහෙම සැකයක් තියෙනවානම් මා ඒ සැකය තරයේ ප‍්‍රතික්ෂේප කරනවා. නැගෙනහිර පළාතේ ජනතාවට ලබාදිය හැකි උපරිම අවස්ථා ලබා දෙමින් ඉන්නවා.
පළාත් සභාව පිහිටුවලා ප‍්‍රජාතන්ත‍්‍රවාදී ලෙස ජනතා නියෝජිතයින් පත් කරගෙන ඒ සඳහා සුදුසු මහ ඇමැතිවරයෙකුත් තෝරාගෙන සංවර්ධන කටයුතු කරගෙන යනවා.
ඒක නිසා දෙමළ ජනතාව රවට්ටන්න වුවමනාවක් නැති බව අපි කි‍්‍රයාවෙන්ම ඔප්පු කළා. ප‍්‍රභාකරන් හෝ දෙමළ ජනතාව රවට්ටන්න ආණ්ඩුවට කිසිම වුවමනාවක් නැහැ.
ප‍්‍රභාකරන් සටන් කළත් දෙමළ ජනතාවට අවශ්‍ය දේ රජය ලබා දෙනවා. මුදා නොගත් ප‍්‍රදේශවල ජනතාවට ආහාර ඇතුළු අත්‍යාවශ්‍ය ද්‍රව්‍ය අපි ලබා දෙනවා.
එම අසරණ ජනතාවට දෙන ආහාරත් පැහැර ගන්නේ කොටි සංවිධානයයි. ඒක නිසා දෙමළ ජනතාවට අපි හැමදාමත් සලකනවා. ඒ ගැන සැකයක් ඇති කරගැනීම අනවශ්‍යයි.
ප‍්‍රභාකරන් ආයුධ භාරදීලා ප‍්‍රජාතන්ත‍්‍රවාදී ප‍්‍රවාහයට ආවොත් කරුණා, පිල්ලෙයාන් ගේ තත්ත්වයට පත්වෙන් පුළුවන්.
ප‍්‍රභාකරන්ට එරෙහිව මේ සියලු මෙහෙයුම් කරන්නේ ඔහු ආයුධ සන්නද්ධව සිටින නිසයි. ඔහු ආයුධ භාරදීලා ප‍්‍රජාතන්ත‍්‍රවාදී ප‍්‍රවාහයට එනවනම් මෙම මෙහෙයුම් නතර කරනවා.
සටන් විරාමයකට කැමැතියි කියලා පසුගිය විරුදින කතාවේදීත් ප‍්‍රභාකරන් කියලා තිබුණා නේද? මේ වතාවේ ඔහු කරන්නේ ඇත්තටම සටන් විරාමයකට ආරාධනයක්ද?
සටන් විරාම , සාම සාකච්ඡා ප‍්‍රභාකරන්ට හැමදාම මතක් වෙන්නේ ඔහු අන්ත පරාජයට පත්වන විටයි. මේක කොටි සංවිධානයේ ඉතිහාසය පුරාම කළ දෙයක්.
තමන් පරදිනකොට සටන් විරාම ගහලා ප‍්‍රභාකරන් ක‍්‍රම ක‍්‍රමයෙන් ශක්තිමත් වෙනවා. මාවිල්ආරු අමුණ වහපු වෙලාවේ අමුණ විවෘත කරන්න කියලා අපේ ජනාධිපතිතුමා කිහිපවතාවක්ම කොටි සංවිධානයෙන් ඉල්ලීම් කළා.
එදා තමන්ට බලය තිබුණු නිසා රජය ඉදිරිපත් කළ කිසිම කරුණකට ප‍්‍රභාකරන් ප‍්‍රතිචාර දැක්වූයේ නැහැ.
ඒ වෙලාවේ මතක් නොවුණු සටන් විරාම, සාම සාකච්ඡා දැන් ප‍්‍රභාකරන්ට මත්වෙලා තියෙන්නේ ඔහු දරුණු වශයෙන් පරාජය වෙලා ඉන්න නිසයි.
ඒ නිසා කෙතරම් බලපෑම් ආවත් ප‍්‍රභාකරන්ගේ සටන් විරාම යෝජනාවට රජය නැඹුරු විය යුතු නැහැ. ඔහු යටත්වනතුරු නැත්නම් ආයුධ භාරදී ප‍්‍රජාතන්ත‍්‍රවාදයට පැමිණෙන තුරු ආරක්ෂක මෙහෙයුම් කෙරෙන්න ඕන.
මෙවර මහ විරුදිනයේදී ප‍්‍රභාකරන් කළ කතාවේ වෙනසක් තියෙනවාද? නැත්නම් පරණ කතාවමද?
මහාවීර දිනයේ තමයි ප‍්‍රභාකරන් ඔදගැන්විලා දෙමළ ජනතාවගේ ලේ උණුවෙන්නෙ. එහෙත් ඉස්සර වගේ එහෙම කතා කරන්න පුළුවන්කමක් දැන් ප‍්‍රභාට නැහැ. මොකද ප‍්‍රභාකරන්ගේ ඇඟේ ලේ බයටම උණුවෙලා ඉවරයි. තමාට ඉදිරියේදී අත්වෙන ඉරණම ගැන ප‍්‍රභාකරන්ට තියෙන්නේ ලැජ්ජාවක්, බියක්.
ප‍්‍රභාකරන්ගේ ළඟ ඉන්න ඔහුගේ ගෝලයොත් හමුදා මෙහෙයුම්වලට මුහුණ දෙන්න මැළිකමක් දක්වනවා. ඒ නිසා සමහරුන් කොටි සංවිධානය හැර යනවා.
මේ වගේ අත්දැකීම්වලට ප‍්‍රභාකරන් මීට පෙර මුහුණ දුන්නේ නැහැ. ඒ වගේම මුදා නොගත් ප‍්‍රදේශවල ඉන්න දෙමළ ජනතාව දැන් ක‍්‍රම ක‍්‍රමයෙන් ප‍්‍රභාකරන්ගේ ග‍්‍රහණයෙන් මිදී රජයේ පාලන ප‍්‍රදේශවලට පැමිණෙන්න පටන් අරගෙන.
මෙම කරුණුවලින් පෙන්නුම් කරන්නේ දෙමළ ජනතාවට වගේම කොටි සාමාජිකයන්ටත් ප‍්‍රභාකරන් එපා වී ඇති බවයි.
තමන්ගේ නිජ භූමියට ඇවිල්ලා සිංහල හමුදාව කලබල ඇතිකරනවා කියලා ප‍්‍රභාකරන් විරුදින කතාවෙදී කීවා. ඔහු තවමත් නිජභූමි සංකල්පය පිළිගැනීම ගැන ඔබවහන්සේ හිතන්නේ කුමක්ද?
ප‍්‍රභාකරන් දෙමළ නිජභූමි සංකල්පය ඉදිරිපත් කෙළේ උතුරු නැඟෙනහිර පළාත් දෙකම එකතු කරලයි. දෙමළ නිජභූමිය වශයෙන් උතුරු නැඟෙනහිර පළාත් නම් කරන අතර ප‍්‍රභාකරන්ගේ තව සැලැස්මක්.
ඒ තමයි තමිල්නාඩු ප‍්‍රාන්තයත් මේ උතුරු නැඟෙනහිරට ඇඳාගෙන දෙමළ අධිරාජ්‍යයක් ගොඩනැංවීම. මේක දෙමළ ජනතාවගේ විමුක්තිය උදෙසා කරන්නක් නෙමෙයි, ප‍්‍රභාකරන්ගේ මහේශාක්‍ය බව ගොඩනඟා ගන්න කරන පෞද්ගලික සැලැසුමක්.
උතුරු නැඟෙනහිර පළාත් දෙකෙන් එක පළාතක්වත් දෙමළ නිජභූමියක් වශයෙන් ප‍්‍රකාශ කරන්න ප‍්‍රභාකරන්ට කිසිම අයිතියක් නැහැ.
අපි නැඟෙනහිර පළාත පැත්තකින් තියමු. මේ වෙනකොට නැඟෙනහිර පළාත මුළුමනින්ම ත‍්‍රස්තවාදයෙන් මුදාගෙන සංවර්ධන කටයුතු කරගෙන යනවා. නැඟෙනහිර පළාතේ ප‍්‍රභාකරන්ගේ ඊළාම් සිහිනය දැනටමත් බොඳවෙලා.
ඒ නිසා උතුරු පළාත ගැන අවධානය යොමු කරමු. උතුරෙනුත් ප‍්‍රභාකරන් මුලතිව් ප‍්‍රදේශයට සීමාවෙලා. කිළිනොච්චියත් දැන් ඔවුන්ට අහිමි වෙලා.
ප‍්‍රභාකරන් දැනට ඉන්න මුලතිව් ප‍්‍රදේශයත් දෙමළ නිජභූමියක් වශයෙන් හඳුන්වන්න බැහැ. පැරැණි සිංහල ගම්වලට හා වැව්වලට තියපු දෙමළ නම් හැරෙන්නට වෙන කිසිම සාධකයක් නැහැ.
මං වසර ගණනාවක් තිස්සේ වන්නි පළාතේ පුරා විද්‍යා සමීක්‍ෂණ කරල තියෙනවා. දෙමළ නිජබිමක් වශයෙන් ප‍්‍රකාශ කිරීමට තරම් කිසිම පිළිගත හැකි සාධකයක් මේ දක්වා හමුවෙලා නැහැ.
දෙමළ නිජබිම් සංකල්පය මිථ්‍යාවක්. ඒක නිසා ප‍්‍රභාකරන්ට තියෙන්නේ එම මිථ්‍යාව අතහැරලා සිංහල ජනතාව සමග සහෝදරත්වයෙන් සිටීමට ආයුධ භාරදීලා ප‍්‍රජාතන්ත‍්‍රවාදී ප‍්‍රවාහයට පිවිසීමයි.
සිංහල ජනතාව බුද්ධාගමට අනුව කටයුතු කරනවා නම් හමුදාවන්ගෙන් ඔවුන්ට සිදුවන හිරිහැර ගැන නිහඬව සිටින්නේ ඇයිද? කියාත් ප‍්‍රභාකරන් ප‍්‍රශ්න කරනවා.
එහෙම අහන්න ප‍්‍රභාකරන්ට කිසිම සදාචාරාත්මක අයිතියක් නැහැ. සිංහලයන් පමණක් නොවෙයි, ඇතැම් දෙමළ, මුස්ලිම් ජාතිකයනුත් ඒ වගේම ඇතැම් බටහිර ජාතීන් පවා බුද්ධාගම අදහනවා.
ආගමත් රටේ පාලනයත් දෙකක්. රටේ පාලකයා ආගමානුකූලව රට පාලනය කරන්න ඕන. ආගම සමඟ තිබෙන සංස්කෘතිය රකින්න ඕන. ඒ සංස්කෘතියට එරෙහිව එය විනාශ කිරීමට යම් බලවේග කි‍්‍රයාත්මක වෙනවා නම් ඒවා පරාජය කිරීමට රටේ පාලකයාට අයිතියක් තියෙනවා.
පාලකයාගේ ප‍්‍රධාන වගකීම රටේ සාමය ඇතිකිරීම. කිසිම ආගමකින් ඊට බාධාවක් නැහැ. හැම ආගමකින්ම කියන්නේ රටේ සාමයක් ඇතිකරන්න කියලයි.
සිංහල, දෙමළ, මුස්ලිම් යන ජාතීන් අපේ ආරක්ෂක අංශ නියෝජනය කරනවා. ඔවුන් සටන් කරන්නේ ත‍්‍රස්තවාදය පරාජය කරලා මේ රටේ සාමය ඇතිකිරීමට මිසක් දෙමළ ජනතාවට විරුද්ධව නොවෙයි.
ප‍්‍රභාරකන් හින්දු හෝ කි‍්‍රස්තියානු භක්තිකයෙකු නම් ඒ ආගම්වල මනුෂ්‍ය ඝාතන ගැන කියල තියෙනවද කියලා මං ප‍්‍රභාකරන්ගෙන් අහන්න කැමැතියි.
මේ රටේ අහිංසක ජනතාව ඝාතනය කරලා ලේ විල් බවට පත්කරලා, බෝම්බ ගහලා දේපළ විනාශ කරලා ප‍්‍රභාකරන් කි‍්‍රයාකරන්නෙත් ඔහු අදහන ආගමට අනුකූලවද කියලා මං අහන්න කැමැතියි.
නෝර්වේ රාජ්‍ය කොටි සංවිධානයට හිතවාදීව කි‍්‍රයාකළා කියලා ජාතික හෙළ උරුමය බරපතළ ලෙස චෝදනා කළා. එහෙත් ප‍්‍රභාකරන් මෙවර මහ විරු දින කතාවේදී නෝර්වේ රාජ්‍යයටත් බරපතළ චෝදනා එල්ල කරලා තියෙනවා.
නෝර්වේ රාජ්‍යයෙන් ගන්න තියෙන උපරිම ප‍්‍රයෝජන ප‍්‍රභාකරන් ගත්තා. නෝර්වේ රාජ්‍යයත් ප‍්‍රභාකරන්ගේ බලය වර්ධනය කිරීමට කි‍්‍රයා කළා.
ඒක නිසා නෝර්වේ රාජ්‍ය කි‍්‍රයා කෙළේ අපේ රටට ද්‍රෝහි වන ආකාරයෙන්. එසේ කි‍්‍රයා නොකරන ලෙස අපි නෝර්වේ රාජ්‍යයෙන් දිගින් දිගටම ඉල්ලා සිටියත් ඒ කිසිවක් ගණන් ගත්තේ නැහැ.
මේ අවස්ථාවේදී ප‍්‍රභාකරන් නෝර්වේ රාජ්‍යයට දොස් පවරලා තියෙන්නේ නෝර්වේ සමාජය සුදනෙකු කිරීමේ උපාය මාර්ගික කටයුත්තක් සඳහායි. අද පවතින තත්ත්වය අනුව ශී‍්‍ර ලංකා රජයේ හොඳ හිත දිනාගැනීමටත් නෝර්වේ රාජ්‍යයේ උපක‍්‍රමයක් කි‍්‍රයාත්මක වෙන්න පුළුවන්.
නෝර්වේ රාජ්‍යය අපේ රටට ද්‍රෝහි වූ බව අකා මකා දමන්න යම් සැලසුමකට අනුව ප‍්‍රභාකරන් මෙසේ චෝදනා කරනවා කියල හිතන්නත් පුළුවන්.
කොටි සංවිධානය බරපතළ ආකාරයෙන් පරාජයට පත්වෙමින් තිබෙනවා නම්, කොටි සංවිධානය අත්හැර පිරිස් පලා යනවා නම්, තමන් මේ සටන අත්නොහරින බව ප‍්‍රභාකරන් ප‍්‍රකාශ කරන්නේ කොහොමද?
කොටි සංවිධානයට ශක්තිය ලබා දුන්නේ මේ රටේ ඉන්න ජාතිද්‍රෝහීන් හා ඇතැම් රාජ්‍ය නොවන සංවිධානයි. රාජ්‍ය නොවන සංවිධාන තුන්දහසක් පමණ කිළිනොච්චියේ ඉඳගෙන කොටි සංවිධානයට සහයෝගය දක්වලා තියෙන බව ඔප්පු වෙලා තියෙනවා.
නැඟෙනහිර පළාතෙන් කි‍්‍රයාත්මක වූ බොහෝ රාජ්‍ය නොවන සංවිධානත් මේ කාර්යයන් කරල තියෙනවා.
මේ සංවිධානවලින් ඩොලර් මිටි ගණන් ලබාගත්තු ප‍්‍රභාකරන් දෙමළ ජනතාවගෙනුත් බලහත්කාරයෙන් මුදල් එකතු කරන වැඩපිළිවෙළක් කි‍්‍රයාත්මක කළා.
දැන් මේ දේවල් ප‍්‍රභාකරන්ට ලැබීම බොහෝ දුරට සීමා වෙලා. දැන් ඔහුට ඉතිරිව තිබෙන්නේ මරණයට මුහුණදීම පමණයි. මරණයට මුහුණ දීලා ඉන්න මිනිහා වියරුවෙන් කෑගහනවා, මං මරණයට බය නැහැ කියලා. ඒක තමයි මේ දවස්වල ප‍්‍රභාකරන් කියන කතාවලින් පෙන්නුම් කරනුයේ.
ඔහුගේ සටනට උදවු උපකාර කරන්න කියලා ලෝකයේ දෙමළ ජනතාවගෙන් ප‍්‍රභාකරන් ඉල්ලීමක් කරල තියෙනවා. මෙම ඉල්ලීමට මොන වගේ ප‍්‍රතිචාරයක් ලැබේවිද?
දරුණු ත‍්‍රස්තවාදයක් තමන්ගේ පටු අරමුණක් වෙනුවෙන් ගෙන යන කෙනෙකුට සහයෝගය ලබා දීමට කිසිම රටකට සදාචාරාත්මක අයිතියක් නැහැ.
මුම්බායි ප‍්‍රහාරයෙන් ඉන්දියාවටත් දැන් හොඳින්ම වැටහෙනවා. ත‍්‍රස්තවාදයේ තිබෙන කුරිරු භාවය, අමෙරිකාවටත්, බි‍්‍රතාන්‍යයටත් තේරිලා බොහෝ කල්. මුළු ලෝකයටම ත‍්‍රස්තවාදය පිළිකාවක් බවට පත්වෙලා.
ඒක නිසා හැම රටක්ම එකතු වෙන්නේ ත‍්‍රස්තවාදයට එරෙහිවයි. ත‍්‍රස්තවාදය නැතිකිරීමේ තීරණාත්මක අවස්ථාවකට මුළු ලෝකයම පරිවර්තනය වෙමින් පවතිනවා.
වසර 30 ක් ප‍්‍රභාකරන්ලා ත‍්‍රස්තවාදී කි‍්‍රයාකාරකම් කෙළේ ලෝකයේ මෙවැනි විපර්යාසයක් නොවුණු නිසයි. දැන් ප‍්‍රභාකරන්ලා දඟලපු කාලේ ඉවරයි.
සාකච්ඡා කෙළේ ඩබ්ලිව්.කේ. ප‍්‍රසාද් මංජු
Subscribe to:
Post Comments (Atom)
No comments:
Post a Comment