අපේ නැවියන්ගේ දස්කම් යළිත් වරක් ලෝකය හමුවේ

කොටි ත‍්‍රස්තවාදීන් තවමත් ඊළම අත්නොහැර ඇති බව පෙරේදා (20) අලුයම මුලතිව් මුහුදේදී ඇති වූ සිද්ධියත් සමඟ මනාවට පෙනීයයි.
කොටි සිය සංවිධානය ශක්තිමත් කිරීම සඳහා හැකි සෑම පියවරක් ගැනීමට උත්සාහ දරයි එහෙත් ති‍්‍රවිධ හමුදාවේ උකුසු ඇසට ඒ සියල්ල හොදින් පෙනෙන බව ඉකුත් දින කිහිපයේ සිදුවු සිදුවීම්වලින් පසක් වෙයි.
නාවික හමුදාව සිය නාවික ශක්තිය යොදමින් ශ‍්‍රී ලංකාව වටා වූ මහ සයුර ජයගෙන ඇති බව ලෝකයාට නැවත වතාවක් කීමට සමත්වූහ.
ඉකුත් සෙනසුරාදා (20) අලුයම කාලයේ නාවික හමුදාව සිය ආරක්ෂක මෙහෙයුම් කි‍්‍රයාත්මක කරමින් සිටියහ. ලංකාව වටා වූ මහසයුරේ කුමන ස්ථානයක කුමන වෙනසක් වේදෝ යන්න පිළිබඳව නාවික හමුදා යාත‍්‍රා සහ නාවික හමුදා මූලස්ථානය දැඩි අවධානයෙන් පසුවූහ.
රාතී‍්‍රය අවසන් වී කෙමෙන් කෙමෙන් අලුයම් කාලය ළගාවෙමින් පැවතුනි. අලුයම 1 පමණ වනවිට මුලතිව් මුහුදේ යමක් සංඥා වනු මුර යාත‍්‍රාවලට රේඩාර් පද්ධතිවලින් නාවික හමුදා නිලධාරිහු දැකගත්හ. කිසිදු ගැටලුවකින් තොරව නාවික හමුදා නිලධාරිහු රේඩාර් පද්ධතියේ සංඥා වන දේ හඳුනා ගත්හ. එය සැක කටයුතු යාත‍්‍රාවක් බව එයට ළඟා වූ මුර යාත‍්‍රාවලට තහවුරු විය.
මීට අමතරව නාවික හමුදාවේ බුද්ධි තොරතුරු රැස්කරන බුද්ධි අංශ සාමාජිකයෝ මේ පිළිබඳව අධ්‍යයනය කරමින් කරුණු රැස්කරමින් සිටියහ.
මුලතිව් මුහුදට ඊශාන දිගින් මුහුදු සැතපුම් 140 ක් පමණ දුරින් සැක කටයුතු යාත‍්‍රාව ගමන් කරමින් තිබුණි. නාවික හමුදා මුර යාත‍්‍රා මගින් සැක කටයුතු යාත‍්‍රාව පිළිබඳ වහාම සොයා බැලීය. එය කුමන රටක සිට කුමන ප‍්‍රදේශයකට ගමන් කරනවාද යන්න ප‍්‍රථමයෙන් සොයා බැලීය. අන්තර්ජාතික ක‍්‍රමයක් භාවිතා කරමින් නාවික හමුදාව සොයා බැලූ මේ නෞකාව සැකකටයුතු එකක් බවත් එහි අයිතිය කිසිවෙකුත් භාර නොගන්නා බව නාවික හමුදාව අනාවරණය කර ගත්තේය.
අනතුරුව නාවික හමුදාව විසින් දිගින් දිගටම මේ නෞකාවට පණිවුඩ නිකුත් කෙළේය. එහෙත් එම පණිවුඩවලට නෞකාවෙන් කිසිදු ප‍්‍රතිචාරයක් නොලැබුණි. නෞකාව කොටින්ට ආයුධ ප‍්‍රවාහනය කරන එකක් බවත් එහි පුපුරණ ද්‍රව්‍ය ඇතුලු අවි ආයුධ රැසක් තිබෙන බව නාවික හමුදාව විසින් තාක්ෂණික ක‍්‍රම භාවිතා කරමින් හඳුනා ගත්තේය. මුර යාත‍්‍රාවල සිටි නාවික නිලධාරිහු වහාම මේ පිළිබඳව උසස් නාවික නිලධාරින්ට දැනුම් දුන්නේය.
වාහම මේ නෞකාව නතර කරන ලෙස නාවික හමුදා යාත‍්‍රාවලින් නෞකාවට පණිවුඩ ලබා දුන්නේය. එහෙත් අවි ආයුධ සන්නද්ධව සිටි පුද්ගලයන් සහිත මේ නෞකාව නතර නොකළේය. වහාම කි‍්‍රයාත්මක වූ නාවික හමුදාව සිය ප‍්‍රහාරක ඩෝරා යාත‍්‍රා ඒ මොහොත වනවිට මුලතිව් මුහුදේ මේ ප‍්‍රදේශයට කැඳවා තිබුණි.
නාවික හමුදාව දිගින් දිගටම කොටි යාත‍්‍රාවට ප‍්‍රහාර එල්ල කළහ. නාවික හමුදා ප‍්‍රහාරවලින් විශාල පිපිරුමක් සහිතව නෞකාව දියබත් විය. ඒ මොහොත වනවිට මුහුදු කොටි බළකාය විසින් ඔවුන්ගේ ප‍්‍රහාරක යාත‍්‍රා හතරක් නාවික හමුදාවට ප‍්‍රහාර එල්ල කිරීමට කැඳවා තිබුණි. එහෙත් නාවික හමුදාවේ ප‍්‍රහාරවලින් කොටින්ගේ මේ යාත‍්‍රා හතරද සම්පූර්ණයෙන්ම විනාශයට පත්විය.
නාවික හමුදාවට ප‍්‍රහාර එල්ල කිරීමට මුලතිව්හි සිට පැමිණි තවත් යාත‍්‍රා කිහිපයක් වහාම පසු බැස්සේය.
නාවික හමුදා ප‍්‍රහාරවලින් විනාශයට පත් වූ නෞකාව දියබත්වන අවස්ථාවේ එයින් නැඟුණු පිපිරුම් හඬවල්වලින් අනාවරණය වන්නේ “මේ නෞකාවේ අවිආයුධ මෙන්ම පුපුරණ ද්‍රව්‍ය විශාල තොගයක් තිබූ බවයි” නාවික හමුදාව මේ සම්බන්ධයෙන් එසේ ප‍්‍රකාශ කරයි.
කොටි ත‍්‍රස්තයෝ මේ නෞකාවේ කාලතුවක්කු උණ්ඩ ඇතුළු පතොරම් වැඩි වශයෙන් ගෙන එන්නට ඇතැයි ආරක්ෂක අංශ සැක කරයි.
කොටි ත‍්‍රස්තයන් භූමියේ ලබා ඇති පරාජය මෙන් ම ඔවුන්ගේ මුහුදු කොටි බළකායට ද එල්ල වූ මේ ප‍්‍රහාරයෙන් තවත් ප‍්‍රබල පසුබෑමකට ලක් වෙයි. මේ වන විට කොටි සාමාජිකයින් ප‍්‍රබල ලෙස පහතට වැටී ඇත. කොටි සාමාජිකයින්ගේ චිත්ත ධෛර්ය ද ඉතා පහත් මට්ටමකට පත්ව තිබේ.
නාවික හමුදාව ඉකුත් වසර තුන මේ ආකාරයේ ප‍්‍රහාරයන් රැසක් කොටින්ට එල්ල කරන්නට සමත් වූහ. කොටි ත‍්‍රස්තයන්ගේ පාවෙන ආයුධ ගබඩා ලෙස සැලකෙන විශාල නෞකාවන් දහයකට වැඩි සංඛ්‍යාවක් මේ ආකාරයෙන් නාවික හමුදාව විසින් විනාශ කර දැම්මේය.
වෙනදා ආයුධ ප‍්‍රවාහනය කරන ක‍්‍රමවලට වඩා වෙනස් ක‍්‍රමයක් මෙවර කොටි භාවිතා කර ඇත. මීට පෙර නාවික හමුදා ප‍්‍රහාරවලින් විනාශයට පත් වූයේ මීටර් හැටක් අසූවක් හෝ ඊට වඩා දිගින් යුත් නෞකාවන් ය.
මෙවර නාවික හමුදා ප‍්‍රහාරවලින් විනාශයට පත් වූ නෞකාවේ දිගට මීටර් තිහක් හතලික් පමණ වන බව නාවික හමුදාව පවසයි. කොටි මෙවැනි නෞකාවක් මෙවර යොදා ගෙන ඇත්තේ නාවික හමුදාවේ සැකයෙන් මිදීමටය. එහෙත් නාවික හමුදාවේ තියුණු ඇස පරාජය කිරීමට කොටි ත‍්‍රස්තවාදීන්ට හැකියාවක් නොමැති බව නාවික හමුදාව මේ ප‍්‍රහාරයෙන් ද ඔප්පු කර හමාරය.
කොටින්ගේ අවි ආයුධ ඇතුළු පුපුරණ ද්‍රව්‍ය රැගෙන ආ නෞකාවක් මෙලෙස නාවික හමුදාව විසින් විනාශ කර දැමීමෙන් කොටින්ට සිදු වූ හානිය අති විශාලය. කොටි ත‍්‍රස්තයන් යුද හමුදා භට පිරිස් වෙත එල්ල කරන කාලතුවක්කු සහ මෝටාර් ප‍්‍රමාණය පහතවැටීමට ප‍්‍රධානතම හේතුවක් වූයේ කොටි අවි නැව් නාවික හමුදාව විසින් විනාශ කර දැමීමය. කොටි සංවිධානයේ යුද ශක්තිය බිද දැමීම සඳහා නාවික හමුදාව විසින් සිදු කරන මෙහෙය අති මහත්ය.
මේ අතර ඉකුත් සතිය පුරාවට යුද බිමේ වූ සුවිශේෂි සිද්ධියක් වන්නේ කොටි සාමාජිකයින් රැසක් යුද බිමෙන් පැනවිත් යුද හමුදාව වෙත භාර වීමයි. මෙලෙස භාර වන වැඩි පිරිසක් ප‍්‍රකාශ කර සිටින්නේ කොටි සංවිධානය මේ වන විට දේශපාලන, ආර්ථික, සමාජීය, යුදමය ඇතුළු සියලුම අංශයන්ගෙන් බිඳවැටී ඇති බවයි. තමන්ට කොටි සංවිධානය පිළිබඳව මේ වන විට ඇත්තේ ඉමහත් කලකිරීමක් බව ද ඔවුහු සඳහන් කරති.
මේ ආකාරයට ඉකුත් සිකුරාදා (19) පරන්තන් දෙසින් පැමිණ 58 වන සේනාංකයේ භට පිරිස් වෙත භාර වූ කොටි සාමාජිකයින් දෙදෙනා වැදගත් තොරතුරු හෙළි කළහ.
‘මගේ නම ශිවචන්ද්‍රනාත් මට අවුරුදු විසිඅටයි. 2002 දී තමයි කොටි සංවිධානයට මාව බඳවා ගත්තේ. මම හැටන්වල පිහිටි ගෞරව තොලුවන් කියන වත්තේ පදිංචිව සිටියේ. 2002 දී මම කිලිනොච්චියට ගිහිල්ලා පාවාහන් වෙළඳ්‍රම් කරා. එහෙම වෙළඳ්‍රමේ යන දවසක තමයි කොටි සාමාජිකයින් දෙදෙනෙක් ඇවිල්ලා මට මරණ තර්ජන එල්ල කරලා කොටි සංවිධානයට මාව බඳවා ගත්තේ.
කොටි සංවිධානයට තිබුණු බය නිසා මට දිගට ම කොටි සංවිධානයේ රැදී සිටින්නට සිදු වුණා. කොටි ත‍්‍රස්තයෝ මට යුද පුහුණුව ලබා දුන්නා. මාව යුද්ධයට යෙදෙව්වා. මට නොයෙක් වද හිංසා කලා. මාව මරන්නත් හැදුවා. සමහර වේලාවට දවස් තුනකට එක සැරයයි කන්න දුන්නේ. නොයෙක් තැන්වලට අපිව අරගෙන යනවා රාති‍්‍ර කාලයේ දී අපි ඉන්න තැනැක්වත් හරියට දන්නේ් නැහැ.
මම කසාද බැඳලා හිටියේ සිංහල කාන්තාවක් ඇය මාලිගාවත්ත ප‍්‍රදේශයේ පදිංචි. ඇගේ නම රේණුකා. මම රේණුකාට ගොඩක් ආදරෙයි. ඒත් මට අවුරුදු හයකින් රේණුකාව බලන්න බැරිවුණා. ඒත් මට හමුදාවේ උදව්වෙන් දැන් රේණුකා බලන්න පුළුවන්. මට ඒ ගැන ගොඩක් සතුටුයි.
මාව අන්තිමට පරන්තන් ඉදිරි ආරක්ෂක වළල්ලේ සේවයට යෙදෙව්වා. ඒ අවස්ථාවේ තමයි කොටින්ගෙන් මිදිලා කිලාලි කලපුව පැත්තෙන් ඇවිල්ලා හමුදාවට භාර වුණේ. හමුදාවේ අය වෙඩි තියලා මාව මරයි කියලා හිතුනා ඒත් එහෙම වුණේ නැහැ. හමුදාවේ අය මට කන්න බොන්න දීලා මාව හොඳින් පිළිගත්තා.’
ශිවචන්ද්‍රනාත් හමුදාව වෙත භාර වීමෙන් පසුව හමුදාව වෙත එසේ ප‍්‍රකාශ කර තිබේ.
පරන්තන් සිට පැමිණ හමුදාවට භාර වූ මරියකාර්, හමුදාව වෙත සිය අත්දැකීම් මෙසේ ප‍්‍රකාශ කළහ.
“මම පරන්තන්වල සිටියදී තමයි කොටි ග‍්‍රහණයෙන් පලා ආවේ. මට දැන් අවුරුදු තිස්තුනක්. පුදුකුඩුඉරිප්පු ඉරණපායි පස්වන පටුමගේ මම පදිංචි වෙලා සිටියේ. වසර දහයකට කලින් කොටි ත‍්‍රස්තයෝ මාව පැහැර ගත්තේ එදා ඉදලා මම අනන්ත දුක් වින්දා මගේ ජීවිතේ බේරා ගන්න.
කොටි ත‍්‍රස්තයෝ අහිංසක වැසියන් දහසකට වඩා හිර කරලා සිර ගෙවල්වල දාලා තියෙනවා. සමහර හිරගෙවල් කම්බිකූඩුවලින් හදලා තියෙන්නේ. පොඩි කූඩු වල දෙදෙනා බැගින් සිර කරලා ඒ කූඩු එලිමහනේ් තබලා තියනවා.
වල්ලිපුරම්, වානම්පාළු ඇතුළු ප‍්‍රදේශ කිහියක තමයි කොටි සංවිධානය මේ සිර කඳවුරු සකස් කරලා තිබෙන්නේ. මමත් ඒ සිරකදවුරක කාලයක් සිටියා. එහිදී සිදුවුනු දේවල් මතක් වන විට ඇස්වලට කඳුලු එනවා.
කොටින්ගේ නොයෙක් වද හිංසා විඳී කාලය දැන් අවසන් බව මට දැනෙනවා. මා දැන් ගොඩක් සතුටෙන් ඉන්නේ.
මේ ආකාරයට කොටි සාමාජිකයින් මෙන්ම සිවිල් වැසියන් හැත් තෑවකට වැඩි පිරිසක් ඉකුත් සතියේ හමුදා ප‍්‍රදේශවලට පැමිණ භාර වූහ.
මේ සියලුම දෙනා ප‍්‍රකාශ කර සිටින්නේ කොටි ත‍්‍රස්තයන් දස දහස් ගණනක් සිවිල් වැසියන් බලහත්කාරයෙන් රදවාගෙන සිටින බවයි.
මේ අතර උතුරේ මානුෂීය මෙහෙයුම් ඉතා උණුසුම් වෙමින් පවතියි. කොටින්ගේ ප‍්‍රබලම ප‍්‍රදේශයක් ලෙස සැලකෙන නැදුන්කර්නි ප‍්‍රදේශය ඊයේ (21) දහවල් වන විට සම්පූර්ණයෙන්ම අත්පත් කර ගැනීමට 4 වන කාර්යසාධක බළකායේ භට පිරිස් සමත් වූහ.
ඉතාම උපායශීලීව මේ ප‍්‍රදේශයට ඇතුළු වූ හමුදා භට පිරිස් නැදුන්කර්නි මුළුමනින්ම අත්පත් කරගනු ලැබුවේ කොටි ත‍්‍රස්තයෝ හතළිහකට වැඩි පිරිසක් ඝාතනය කරමිනි.
මේජර් ජනරාල් ජගත් ඩයස් යටතේ කි‍්‍රයාත්මක වන 57 වන සේනාංකයේ භට පිරිස් ඉරණමඩු වැවේ සිට අක්කරායන්කුලම් අඩම්පන් ප‍්‍රදේශය හරහා කිලිනොච්චි නගරය ආවරණය වන පරිදි කොටි පස් බැම්ම බිඳ දැමීමට කටයුතු කළහ.
මේ අතර බි‍්‍රගේඩියර් ශවේන්ද්‍ර සිල්වා සේනාංකාධිපති වශයෙන් කටයුතු කරන 58 වන සේනාංකයේ භට පිරිස් අඩම්පන් සිට යාපනය කලපුව දක්වා පරන්තන් මාර්ගයෙන් දිවෙන කොටි පස් බැම්ම අත්පත් කර ගත්හ. මේ සඳහා සෙබළුන් පුරා දින දෙකක් කොටින් සමග මුහුණට මුහුණලා දරුණු සටනක නිරත වූහ.
58 වන සහ 57 වන සේනාංකයේ ප‍්‍රහාර කි‍්‍රයාත්මක වන මොහොතේම කොටින්ගේ මුලතිව් ප‍්‍රදේශයට දැවැන්ත ප‍්‍රහාරයක් එල්ල කිරීමට 59 වන සේනාංකය ද කටයුතු කෙළේ ය.
මේ සේනාංක වලට කාර්ය සාධක බළකාය 2, 3, 4 යන බළකායන් ගෙන් ද විශාල සහයෝගයක් ලැබුණි. කොටි ත‍්‍රස්තයෝ නොසිතූ මොහොතක එල්ල කළ මේ ප‍්‍රහාරවලින් කොටින්ට ඔවුන්ගේ කිලිනොච්චි ප‍්‍රදේශයේ සහ මුලතිව් කුමදමුනේ ඉදිරියේ පිහිටා තිබූ ශක්තිමත් පස් බැම්ම අතහැර දමා පළායාමට සිදු විය. මේ ස්ථානවල දී කොටි මෙලෙස ආපස්සට හැර වීම හමුදාව ලද විශාල ජයග‍්‍රහණයක් මෙන්ම කොටින්ට තවත් ප‍්‍රදේශ රැසක් අහිමි කිරීමට බලයක් විය.
මේ මෙහෙයුම් වලට ගුවන් හමුදාව ද විශාල සහයක් ලබා දෙමින් ඉකුත් සතියේ කොටින්ගේ ප‍්‍රබල ඉලක්ක රැසක් විනාශ කර දැමීමට සමත් වූහ.
මේ අතර දියතලාවේ පිහිටි යුද හමුදාවේ පුහුණු කඳවුරේ නිලධාරීන් විසිර යාමේ උත්සවයට සහභාගි වූ සේනාධි නායකයා වන ජනාධිපති මහින්ද රාජපක්‍ෂ මහතා සඳහන් කළේ ලෝකයේ ප‍්‍රබලතම හමුදාවක් වන අපේ හමුදාව තව නොබෝ දිනකින් ත‍්‍රස්තවාදයට විරුද්ධව ශී‍්‍ර ලංකා මාතෘ භූමිය ජයග‍්‍රහණය කරන බවයි.
සටහන භක්ති ධර්මපි‍්‍රය මෙන්ඩිස්