ජාතික කණිෂ්ඨ බර ඉසලීමේ තරගාවලිය චින්තන ගේ වාර්තාවක් දිසානායක බිඳ හෙළයි නව වාර්තා 19ක්

ජගත් පේ‍්‍රමචන්ද්‍ර
ශ‍්‍රී ලංකා බර ඉසිලීමේ සංගමය සංවිධානය කළ ජාතික කණිෂ්ඨ බර ඉසිලීමේ තරගාවලියේ දී පොදු රාජ්‍ය මණ්ඩලීය බර ඉසිලීමේ සූර චින්තන ගීතාල් විදානගේ සතුව තිබූ පාසල් වාර්තාවක් මහනුවර තරුණ කි‍්‍රස්තියානි සංගමයේ ඉන්දික දිසානායක විසින් බිඳහෙළන ලදි.
වයස අවුරුදු 20 න් පහළ ‘ස්නැච්’ ක‍්‍රමයට කිලෝ ග‍්‍රෑම් 105 ක බර ඔසවමින් චින්තන සතුව තිබූ එම වාර්තාව දිසානායක බිඳහෙළනු ලැබූවේ කිලෝ ග‍්‍රෑම් 106 ක් බර ඔසවමිනි. එම දක්ෂතාවෙන් පෙළහර පෑ දිසානායක එම වයස් කාණ්ඩයේ දක්ෂතම කී‍්‍රඩකයා ලෙස ද නම් කෙරුණි.

මෙම තරගාවලියේදී ජාතික සූරයෙකු වන රන්සිලු ජයතිලක සතුව තිබූ වාර්තා 4 ක් පිළිමතලාව ධීරනන්ද විද්‍යාලයේ ඩී. ආර්. එන්. සී. විජේකෝන් සහ කුරුණෑගල එස්. ඒ. සී. ඒ. ශාන්ත විසින් බිඳහෙලන ලදි.
කොළඹ විශ්වවිද්‍යාලයී ගෘහස්ථ කී‍්‍රඩාංගණයේ පැවැති මෙම තරගාවලියේ දී නව කණිෂ්ට වාර්තා 19 ක් බිහිවීම කැපී පෙනුණි.
මහනුවර ති‍්‍රත්ව විද්‍යාලයේ සසික ලියනාරච්චි තමා විසින්ම තබා තිබූ ස්නැච් (කිලෝ ග‍්‍රෑම් 85) ක්ලීන් ඇන්ඩ් පර්ක් (කිලෝ ග‍්‍රෑම් 110) සහ එකතුව (කිලෝ ග‍්‍රෑම් 193) යන ඉසව් ති‍්‍රත්වය නව වාර්තාවක් ලෙස නැවත ලියා තැබීමට සැලැස්වීය.
ඔහු මෙවර එම ඉසව් පිළිවෙලින් කිලෝ ග‍්‍රෑම් 86, 115 සහ 201 ලෙස අලුත් කරමින් 17 න් පහළ වයස් කාණ්ඩයේ දක්ෂතම ක‍්‍රීඩකයා ලෙසද සම්මාන ලැබුවේය.
වයස අවුරුදු 17 න් පහළ බාලිකා නව තරග වාර්තා ති‍්‍රත්වයක් පිහිට වූ වාද්දුව ශක්ති කී‍්‍රඩා සමාජයේ හංසනී ගෝමස් එම වයස් කාණ්ඩයේ දක්ෂතම කී‍්‍රඩිකාව ලෙස සම්මාන ලැබුවාය.
ඇය ‘ස්නැච්’ කිලෝ ග‍්‍රෑම් 42, ක්ලීන් ඇන්ඩ් පර්ක් කිලෝ ග‍්‍රෑම් 50 සහ එකතුව කිලෝ ග‍්‍රෑම් 92 ක් ලෙස තම නව වාර්තා බිහි කළා ය.
වයස අවුරුදු 20 න් පහළ දක්ෂතම කී‍්‍රඩිකාව ලෙස පොළොන්නරුව ආනන්ද බාලිකා විද්‍යාලයේ චමරි වර්ණකුලසූරිය සම්මාන ලැබුවාය.
එම වයස් කාණ්ඩයේ බාලක සුරතාව මහනුවර ති‍්‍රත්ව විද්‍යාලය සහ කුරුණෑගල බර ඉසිලීමේ සමාජය අතර බෙදී යද්දී බාලිකා සූරතාව ගලෙන්බිඳුණුවැව කී‍්‍රඩා සමාජය දිනාගත්තේය.
අනුසූරතා පිළිවෙළින් මහනුවර තරුණ කි‍්‍රස්තියානි සංගමය සහ ආනන්ද බාලිකා, තරුණ කි‍්‍රස්තියානි සංගමය හා දේවිබාලිකා විද්‍යාල අතර බෙදී ගියහ.
වයස අවුරුදු 17 න් පහළ බාලක සූරතාව මහනුවර ති‍්‍රත්ව විද්‍යාලයද අනුසූරතාව පිළිමතලාව ධීරානන්ද විද්‍යාලයද දිනා ගත්හ. බාලිකා සූරතාව මාතලේ විජය විද්‍යාලය සතු වූ අතර අනුසූරතාව ගලෙන්බිඳුණුවැව කී‍්‍රඩා සමාජය සතුවිය.

තරගාවලියේ සෙසු තරග වාර්තා මෙසේය.
17 න් පහළ බාලිකා - එම්. ශානිකා සංදීපනි (දේවි බාලිකා - කොළඹ) ස්නැච් කිලෝ ග‍්‍රෑම් 53 (පෙර වාර්තාව කිලෝ ග‍්‍රෑම් 52)
අවු. 17 (බාලක),
ඒ. යූ. එම්. එම්. විජේසිංහ (කුරුණෑගල) - ස්නැච් කි.ග‍්‍රෑ. 65 (පෙර වාර්තාව - 57 ඒ. යූ. එම්. එම්. විජේසිංහ, කුරුණෑගල)
යූ. පී. ආර්. පී. කුමාරතුංග (ගලෙන්බිඳුණුවැව) - ස්නැච් කි.ග‍්‍රෑ. 80 (පෙර වාර්තාව - කි.ග‍්‍රෑ 77, ටී. යූ. වෙලගෙදර, මවුන්ට් රෝයල්)
ක්ලීන් ඇන්ඩ් පර්ක් කි.ග‍්‍රෑ. 100 (පෙර වාර්තාව - කි.ග‍්‍රෑ. 98 ඔහුගේම)
එකතුව කි.ග‍්‍රෑ. 180 (පෙර වාර්තාව කි.ග‍්‍රෑ. 173 ඔහුගේම)
එම්. සිරාස් (තරුණ කි‍්‍රස්තියානි සංගමය) - ස්නැච් කි.ග‍්‍රෑ 75 (පෙර වාර්තාව කි.ග‍්‍රෑ. 74, පී. එන්. දයානන්ද ති‍්‍රත්ව විද්‍යාලය)
ක්ලීන් ඇන්ඩ් පර්ක් කි.ග‍්‍රෑ. 96 (පෙර වාර්තාව - කි.ග‍්‍රෑ. 90, ඒ. ඩී. එම්. බණ්ඩාර ධර්මරාජ විද්‍යාලය)
එකතුව කි.ග‍්‍රෑ. 171 (පෙර වාර්තාව - කි.ග‍්‍රෑ. 161, පී. එන්. දයානන්ද ති‍්‍රත්ව විද්‍යාලය)
ඩී. ආර්. එන්. සී. විජේකෝන් (ධීරානන්ද විද්‍යාලය, පිළිමතලාව)
ස්නැච් කි.ග‍්‍රෑ. 75 (පෙර වාර්තාව - කි.ග‍්‍රෑ. 70 රන්සිලු ජයතිලක කිංස්වුඩ් විද්‍යාලය)
ක්ලීන් ඇන්ඩ් පර්ක් කි.ග‍්‍රෑ. 100
(පෙර වාර්තාව - කි.ග‍්‍රෑ. 90 රන්සිලු ජයතිලක කිංස්වුඩ් විද්‍යාලය)
එකතුව කි.ග‍්‍රෑ. 175
(පෙර වාර්තාව - කි.ග‍්‍රෑ. 160 රන්සිලු ජයතිලක කිංස්වුඩ් විද්‍යාලය)
එස්. ඒ. සී. ඒ. ශාන්ත (කුරුණෑගල) – ක්ලීන් ඇන්ඩ් පර්ක් කි.ග‍්‍රෑ. 103
(පෙර වාර්තාව - කි.ග‍්‍රෑ. 102 රන්සිලු ජයතිලක කිංස්වුඩ් විද්‍යාලය)