ප‍්‍රින්ස් ගුණසේකර
දිවංගත මහාමාර්ග හා මාර්ග සංවර්ධන අමාත්‍ය ජෙයරාජ් ප‍්‍රනාන්දුපුල්ලේ මහතා ඉදිරිපත් කර තිබූ යෝජනාවකට අනුව ශ‍්‍රී ලංකා එල්ලේ සම්මේලනය මෙහෙය වූ ජාතික එල්ලේ සූරතාව තොටළඟ අරුණ කී‍්‍රඩා සමාජය දිනාගත්තේය.
රුපියල් ලක්ෂයක මුදල් ත්‍යාගය දිනාගත් තොටළඟ අරුණ කී‍්‍රඩකයන් වෙතින් පරාජයට පත්වූයේ පිට පිට ජාතික එල්ලේ සූරතා 2 ක් දිනා සිටි ප‍්‍රබල කණ්ඩායමක් වන මූදුකටුව පාතිමා කී‍්‍රඩා සමාජයයි.
සුගතදාස කී‍්‍රඩාංගණයේ විදුලි ආලෝකධාරා මැද පසුගියදා පැවැති ජාතික සූරතා අවසන් එල්ලේ මහා තරගයේදී ඉනිමක හා ලකුණු 2 ක ජයග‍්‍රහණයක් අරුණ ක‍්‍රීඩකයෝ අත්කර ගත්හ.
තොටළඟ අරුණ කී‍්‍රඩා සමාජය මෙතෙක් පැවැති ජාතික එල්ලේ සූරතා 3 ක් දිනා ඇති අතර ඔවුන් මෙයට පෙර 1981 හා 1989 වසරවල සූරතාව දිනා ගැනීමට සමත්ව ඇත.
මෙවර පරාජයට පත්වූ මූදුකටුව පාතිමා පිල 2003 හා 2004 වසරවලදී ජයග‍්‍රහණය හිමිකරගෙන තිබුණි.
දිවංගත අමාත්‍ය ජෙයරාජ් ප‍්‍රනාන්දුපුල්ලේ මහතා ශ‍්‍රී ලංකා එල්ලේ සම්මේලනයේ සභාපති ලෙස පත්වනතුරුම සම්මේලනයේ විටින්විට පැවැති අර්බුද හේතුවෙන් ජාතික එල්ලේ සූරතාවලිය පැවැත්වීමට නොහැකිවිය.
එමෙන්ම ජෙයරාජ් ප‍්‍රනාන්දුපුල්ලේ මහතාගේ අදහසක් අනුව ප‍්‍රථමවරට වැඩිම මුදල් ප‍්‍රමාණයක් ජයග‍්‍රාහකයන්ට පිරිනැමීමටද සංවිධායකයෝ කටයුතු කළහ.
එමෙන්ම තරගාවලියේ වීරයාට රුපියල් ලක්ෂයක් වටිනා යතුරුපැදියක් ප‍්‍රදානය කිරීමට දිවංගත අමාත්‍යතුමා කළ යෝජනාවද කි‍්‍රයාවට නැංවිය. ඒ අනුව තරගාවලියේ වීරයාට හිමි සම්මානයද සමඟ යතුරුපැදිය තොටළඟ අරුණ කී‍්‍රඩා සමාජයේ අරුණ හර්ෂනට හිමිවිය.
එල්ලේ තරග ඉතිහාසයේ දොළොස් දහසකට අධික නරඹන්නන් ඉදිරියේ පැවැති අවසන් තරගයේ ප‍්‍රථමයෙන් පන්දුවට පහරදුන් මූදුකොටුව පාතිමා පිල ලකුණු 3 කට දවා ගැනීමට තොටළඟ අරුණ කී‍්‍රඩකයෝ සමත්වූහ.
තොටළඟ අරුණ පිලේ දක්ෂ උඩපන්දු රැකීම හා පන්දු යැවීම හමුවේ මූදුකටුව පාතිමා පිලට දෙවැනි ඉනිමද ලකුණු 4 කට සීමාවීමට සිදුවිය.තොටළඟ අරුණ කී‍්‍රඩකයෝ ප‍්‍රථම ඉනිමට ලබාගත් ලකුණු නවය ජයග‍්‍රහණයට ප‍්‍රමාණවත් විය.
අවසන් තරගයේ ජය සංකේත ප‍්‍රදානයට පැමිණ සිටි කටාන ශ‍්‍රී ලංකා නිදහස් පක්ෂ ප‍්‍රධාන සංවිධායිකා විශේෂඥ වෛද්‍ය සුදර්ශනී ප‍්‍රනාන්දුපුල්ලේ මහත්මිය තොටළඟ අරුණ කී‍්‍රඩා සමාජයට රුපියල් ලක්ෂයක මුදල් ත්‍යාගයක් පිරිනැමුවාය.
අනුසූරතාව දිනාගත් මූදුකටුව පාතිමා පිලට රුපියල් 50000 ක්ද තෙවැනි ස්ථානය දිනූ කෝපියාවත්ත ජයශ‍්‍රී කී‍්‍රඩා සමාජට රුපියල් 25000 ක්ද පිරිනැමුණි.
තරගාවලියේ වැඩිම ලකුණු ලබාගත් කී‍්‍රඩකයා ලුණුවිල ප‍්‍රදීප කී‍්‍රඩා සමාජයේ අසේල උදයංගම හා වැඩිම උඩපන්දු ලැබූ තොටළඟ අරුණ කී‍්‍රඩා සමාජයේ ප‍්‍රදීප් සුරංගට රුපිල් 7500 බැගින් හිමිවිය.ජය සංකේත ප‍්‍රදානය සඳහා සතොස සභාපති දේශමාන්‍ය නලින් ප‍්‍රනාන්දු හා පළාත් සභා මන්තී‍්‍ර නිහාල් ජයවර්ධන යන මහත්වරුද සහභාගි වූහ.
කී‍්‍රඩාංගණ 20 කදී කණ්ඩායම් 161 ක සහභාගිත්වයෙන් මෙවර ජාතික එල්ලේ සූරතාවලිය පැවැත්වුණි.
Subscribe to:
Post Comments (Atom)
No comments:
Post a Comment