ජයලත් ජයවර්ධන - වයිකෝ ලන්ඩනයේ දී කොටි නායකයන් හමුවෙති
එජාප පාර්ලිමේන්තු මන්තී‍්‍ර දොස්තර ජයලත් ජයවර්ධන මහතා සහ තමිල්නාඩුවේ එම්. ඩී. එම්. කේ. පක්‍ෂයේ නායක වී. ගෝපාල්ස්වාමි හෙවත් වයිකෝ පසුගිය 15 දා ලන්ඩනයේදී කොටි නායකයන් හමු වී සාකච්ඡා පවත්වා ඇති බව ඒෂියන් ටි‍්‍රබියුන් වෙබ් අඩවිය සඳහන් කරයි.
මෙම සාකච්ඡාවේදී එල්. ටී. ටී. ඊ. සංවිධානයට අරමුදල් එක්රැස් කිරීම ආදී කරුණු රැසක් සාකච්ඡාවට බදුන් වී ඇති බව එම වෙබ් අඩවියේ වැඩිදුරටත් සඳහන් වෙයි.
මොවුන් දෙදෙනා ලන්ඩනයට පැමිණ ඇත්තේ නෝර්වේ හි දී එරික් සොල්හයිම් මහතා හමුවීමෙන් පසුව ය. නෝර්වේ සිට ලන්ඩනයේ හීත්‍රෝ ගුවන් තොටුපළට පැමිණි මොවුන් දෙදෙනා පිළිගැනීමට පැමිණ ඇත්තේ එල්. ටී. ටී. ඊ. සංවිධානයේ ලන්ඩන් ශාඛාවේ ත්‍යාගරාජා නමැත්තෙකි.
ත්‍යාගරාජා ලන්ඩනයේ එල්. ටී. ටී. ඊ. ශාඛාව හෙවත් බි‍්‍රටිෂ් ටැමිල් ෆෝරම් හි (බී. ටී. එෆ්.) හි ප‍්‍රබල සාමාජිකයෙක් වෙයි.
විදෙස් වාර්තා පවසන අන්දමට දොස්තර ජයලත් ජයවර්ධන ඇතුළු පිරිස ලන්ඩනය මූලික කරගෙන කි‍්‍රයාත්මක වන ජ්‍යෙෂ්ඨ එල්. ටී. ටී. ඊ. නායකයන් සමඟ සාකච්ඡා වට කීපයකට සහභාගී වී ඇත.
දොස්තර ජයලත් ජයවර්ධනගේ සහ වයිකෝ ගේ ලන්ඩනයේ සංචාරය සඳහා සියලු පහසුකම් සලසා ඇත්තේ ලන්ඩනයේ එල්. ටී. ටී. ඊ. කාර්යාලය විසිනි.
මෙම සංචාරයේ දී දොස්තර ජයලත් ජයවර්ධන ලන්ඩනයේ කිංග්ස්බරි හි පිහිටි බෞද්ධ විහාරයට ගොස් ඇති අතර ලන්ඩනයේ එක්සත් ජාතික පක්‍ෂ නියෝජිතයන් හමුවක් මෙම විහාරයේ දී පවත්වා තිබේ.
ලන්ඩනයෙන් වාර්තා වන අන්දමට ලන්ඩනයේ එජාප කාර්යාලය එල්. ටී. ටී. ඊ. සංවිධානයේ ශාඛාව වන බි‍්‍රටිෂ් ටැමිල් ෆෝරම් හා එක්ව සහයෝගයෙන් කටයුතු කරන ආයතනයකි.
No comments:
Post a Comment