ඇමැති ජෙයරාජ් ප‍්‍රනාන්දුපුල්ලේ මහතා ඝාතනයට ලක් වූ දිනයේ ඔහුට ආරක්ෂාව සැපයූ කණ්ඩායම පිළිබඳ පරීක්ෂණ පැවැත්වීමට රාජ්‍ය ආරක්ෂක අමාත්‍යාංශය මගින් පරීක්ෂණ මණ්ඩලයක් පත්කැර තිබේ.
එදින සිදු වූ මරාගෙන මැරෙන බෝම්බ ප‍්‍රහාරය වලක්වා ගැනීමට ආරක්ෂකයින් අසමත්වීම හේතුවෙන්ඒ පිළිබඳ වෙනම පරීක්ෂණයක් පැවැත්වීම සඳහා මෙම මණ්ඩලය පත්කර තිබෙන බව පොලිස් මාධ්‍ය ප‍්‍රකාශක ජ්‍යෙෂ්ඨ නියෝජ්‍ය පොලිස්පති එන්.කේ.ඉලංගකෝන් මහතා පැවැසීය.
ඉකුත් 06 වැනිදා පෙරවරුවේ ගම්පහ වැලිවේරිය ප‍්‍රදේශයේ පැවැති අවුරුදු උත්සවයකදී ඇමැති ජෙයරාජ් ප‍්‍රනාන්දුපුල්ලේ මහතා ඉලක්ක කැර එල්ලවූ මරාගෙන මැරෙන කොටි බෝම්බ ප‍්‍රහාරයකින් ඒ මහතා ජිවිතක්ෂයට පත්විය.
හමුදාපති ලුතිනන් ජෙනරාල් සරත් ෆොන්සේකා මහතා ඉලක්කකර මරාගෙන මැරෙන බෝම්බ ප‍්‍රහාරය එල්ලකළ කොටි කත ද වැලිවේරිය ප‍්‍රදේශයේ නිවෙසක නවාතැන්ගෙන සිටි බව හෙළිවී තිබෙන අතර, ඇමැතිවරයා ඝාතනය කිරීමේ සැලසුම කි‍්‍රයාත්මක කිරීම සඳහා මෙම ප‍්‍රදේශයේ සැඟවී සිටි යම් පුද්ගලයකු හෝ පිරිසක් ඝාතනයට උපකාර කෙළේද යන්න පිළිබඳ අනාවරණය කැරගැනීම සඳහා අපරාධ පරීක්ෂණ දෙපාර්තමේන්තුව පරීක්ෂණ පවත්වයි.
No comments:
Post a Comment