තෙවැනි එක්දින තරගය විසැඳුමකින් තොරයි

ශී‍්‍ර ලංකා - බටහිර ඉන්දීය කොදෙව් තුන්වන හා අවසාන එක්දින තරගයට දිගින් දිගටම ඇද හැළුණ වර්ෂාව මත ප‍්‍රතිඵලයක් නොමැතිවම තරගය නිමාවට පත්විය.
ශී‍්‍ර ලංකාව ඕවර 50 අවසානයේ කඩුලු 8කට ලබාගත් ලකුණු 257ට පිළිතුරු ලෙස කොදෙව් පිල ඕවර 18.2 කදී මහා වර්ෂාව මත තරගය නතර කරනවිට කඩුලු 2කට ලබා සිටියේ ලකුණු 81 කි.
එක්දින තරග 3ක මේ තරගාවලියෙන් පෝට් ඔෆ් ස්පේන්හි පසුගිය බ‍්‍රහස්පතින්දා හා සෙනසුරාදා කොදෙව් කණ්ඩායම ප‍්‍රථම හා දෙවන තරග ජයගත් හෙයින් තරගාවලිය ජය කොදෙව් පිලට 2 - 0 ක් ලෙසින් අත්විය.
කොදෙව් නායක කි‍්‍රස්ගේල් පිට පිටම තුන්වන වරටත් මේ තරගයේත් කාසියේ වාසිය දිනා මුලින් පන්දුවට පහර දීම ශී‍්‍ර ලංකා පිලට පැවරීය.
ශී‍්‍ර ලංකා කණ්ඩායම ඕවර 12ක් වනවිට ලකුණු 44 කට කඩුලු 3ක් දැවී ආරම්භයේදීම අසීරු තත්ත්වයකට පත්විණි.
මේ වනවිට ශී‍්‍ර ලංකා කණ්ඩායමේ දැවීගියේ ප‍්‍රබලම පිතිකරුවන් වන උප නායක කුමාර සංගක්කාර (01) නායක මහේල ජයවර්ධන(17) සහ ප‍්‍රබල පිතිකරු චාමර සිල්වාය(06)
ආරම්භක පිතිකරු මහේල උඩවත්ත හා චාමර කපුගෙදර සිව්වන කඩුල්ලට ලකුණු 84ක් රැස් කරමින් ශී‍්‍ර ලංකා කණ්ඩායම නැවත තරගයට අවතීර්ණ කර ගැනීමට දායක වූහ.
ප‍්‍රථම වරට එක්දින ජාත්‍යන්තර තරගාවලියකට සහභාගි වුණ 21 හැවිරිදි මහේල උඩවත්ත පන්දු 121 කදී ලකුණු 73ක් ලබා තරගයේ වැඩිම ලකුණු ලැබූ පිතිකරුවා බවට පත්විය. උඩවත්ත තම අර්ධ ශතකය ලැබුවේ පන්දු 87කදීය.
ඔහුගේ ලකුණු 73ට හයේ පහරක් හා හතරේ පහර පහක් ඇතුළත් විය.
උඩවත්තගේ හා කපුගෙදරගේ සිව්වන කඩුල්ලේ සබඳතාවය කි‍්‍රස්ගේල් නතරකර ගත්තේ කපුගෙදර දුන් උඩපන්දුව ගේල්ම රැකගැනීමෙනි. කපුගෙදර පන්දු 52කට මුහුණ දී හතරේ පහර දෙකක් සමග ලකුණු 40ක් ලැබීය.
කොදෙව් නායකයා මහේල උඩවත්ත දවාලන විට ශී‍්‍ර ලංකාව ඕවර 40කදී කඩුලු 5කට ලබා සිටියේ ලකුණු 172කි.
ඉන්පසුව හයවන කඩුල්ලට තිලකරත්න දිල්ෂාන් සහ කෞෂල්‍ය වීරරත්න වේගවත් ප‍්‍රහාරයක් එල්ල කරමින් පන්දු 56කදී ලකුණු 79ක් රැස් කළහ.
දිල්ෂාන්(64) අවසාන ඕවරයට පෙර ඕවරයේ දැවී යනවිට හයේ පහරක් හා හතරේ පහර තුනක් ලබා සිටියේය.
කෞෂල්‍ය වීරරත්න (41) අවසාන ඕවරයේ දැවී යනවිට හතරේ පහරක් හා දැවැන්ත හයේ පහර දෙකක් එල්ල, කර තිබිණි.
කොදෙව් ආරම්භක පිතිකරුවන් දෙදෙනා චැටර්ගූන් හා රුනාකෝ මෝටන් ඕවර 8.1 කදී ලකුණු 54 ක් රැස්කළ පසු මෝටන් ලකුණු 17කට දැවී ගියේය.
චැටර්ගූන් පන්දු 53කදී හයේ පහරක් හා හතරේ පහර හයක් සමග ලකුණු 46ක් රැස් කළේ ය.
ශ‍්‍රී ලංකාව
කේ. සංගක්කාර ඇ. සැමී බෝ. පවල් 1එම්. උඩවත්ත ස්ටම්ප් කලා. රම්ඩින් බෝ. ගේල් 73එම්. ජයවර්ධන ඇ. පවල් බෝ. බ‍්‍රාවො 17සී. සිල්වා ඇ. රම්ඩින් බෝ. පවල් 6සී. කපුගෙදර ඇ. හා බෝ. ගේල් 40ටී. ඩිල්ෂාන් ඇ. පොලාඩ් බෝ. බ‍්‍රාවො 64කේ. වීරරත්න බෝ. ටේලර් 41සී. වාස් නොදැවී 2ටී. තුෂාර දුවද්දී දැවී ගියා (ටේලර්) 0
අතිරේක 13එකතුව (කඩුලු 8 ට ඕවර 50) 257කඩුලු බිඳ වැටීම : 1 - 3, 2 - 37, 3 - 44, 4 - 128, 5 - 172, 6 - 251, 7 - 257, 8 - 257පන්දු යැවීම : ටේලර් 10 - 0 - 52 - 1, පවල් 10 - 0 - 50 - 2, බ‍්‍රාවො 10 - 0 - 67 - 2, සැමී 10 - 0 - 41 - 0, ගේල් 10 - 0 - 41 - 2
කොදෙව් දූපත්
එස්. චැටර්ගූන් ඇ. සංගක්කාර බෝ. වාස් 46ආර්. මෝටන් ඇ. සංගක්කාර බෝ. තුෂාර 17ආර්. සර්වාන් නොදැවී 13එම්. සැමුවල්ස් නොදැවී 3අතිරේක 2එකතුව (කඩුලු 2 ට, ඕවර 18.2) 81කඩුලු බිඳ වැටීම : 1 - 54, 2 -77පන්දු යැවීම : කුලසේතර 6 - 1 - 33 - 0, වාස් 7 - 0 - 36 - 1, තුෂාර 5.2 - 1 - 12 - 1