රටක යුද්ධයක් පවතින අවධියක ඒ රටේ මහජනතාවගෙන් ඉටුවිය යුතු ප‍්‍රධානම යුතුකම වන්නේ යුද්ධයේ නියැලෙන රණවිරුවා ගේ ආත්ම ශක්තිය, චිත්ත ධෛර්යය නඟා සිටුවීමට කටයුතු කිරීම ය. ඇස් මස් ඉස් ලේ ඇට නහර ආදී වශයෙන් තම ශරීරය රට ජාතිය වෙනුවෙන් පූජා කරන රණවිරුවා වූ කලී අපේ ජාතියේ මුරදේවතාවාය.
අද ඔවුන් මේ රට වෙනුවෙන් කැප නොවුණා නම් ත‍්‍රස්තවාදය විනාශ කර දැමීමට පෙරට එන්නේ කවුද යන ප‍්‍රශ්නයට මේ රටේ කිසිවකුටත් නිසි පිළිතුරක් නම් ලබාදිය නොහැකි වනු නියත ය. යුද්ධය පිළිබඳ ප‍්‍රශ්න අසන්නෝ හා ඒවාට පිළිතුරු සපයන්නෝ ද බොහෝ වෙති. යුද්ධය තවකෙනෙකුගේ බඩගෝස්තරය යැයි පවසන ඇතැම් උදවිය එය තම බඩ වඩවාගැනීමට උපයෝගී කර ගන්නේ, අසා සිටින්නන් හා බලා සිටින්නන් විජ්ජාවෙන් මෙන් මුලාකර ගැනීමෙනි.
යුද්ධයේ කටුක බව හෝ මිහිර විඳින්නන් අන් කවුරුවත් නොව එහි නියැළෙන්නන් වන හමුදා සෙබළුන්ම ය. ඔවුන්ට අපහාස කරන පිරිස් මේ රටේ බොහෝ සිටිති. ඒ අතර මාධ්‍ය යුද්ධය යුද්ධයේ එක් පැතිකඩකි. මේ යුද්ධය තුවක්කුවෙන් හා උණ්ඩයෙන් කරන යුද්ධයට වඩා තියුණු බව මතක් කර දිය යුතු නැත.
වර්තමාන යුධ කි‍්‍රයාදාමය හෙවත් ජනතාව මුදා ගැනීමේ මානුෂීය මෙහෙයුම් හරහා සිත් තැවුලට පත් මේ රටේම ජීවත්වන ජනතාව ගෙන් කොටසක් අන්තවාදීව ගෙන යන අසත්‍ය ප‍්‍රචාර හා නිර්ලජ්ජිත ප‍්‍රකාශ හමුවේ මේ රටේ ජීවත් වන නිදහස අගයන යුක්ති ගරුක ජනතාවට කර ඇති අවමාන සුළුපටු නොවේ.
විටින් විට පත්තර පිටු හරහා මතුවන ඇතැම් දුෂ්‍යමාන චරිත ස්වකීය හිතැගියාවට ජනතාව ඉදිරියේ ඇදබාන ජුගුප්සාජනක මත වාද තවම වෙනස් කර ගෙන නැත්තේ යුද්ධය හරහා තම බඩගෝස්තරය සොයා ගැනීමේ අවස්ථාව නැතිකර ගැනීමට ඇති බලවත් බිය නිසාය.
‘පෙර හෙළයෝ රණ ගොසින් ඉපිල නටති මහ තොසින්’ හෙළයෝ අනාදිමත් කාලයක සිට යුද්ධය පි‍්‍රය කළ ජාතියක් යැයි ද යුධ ශිල්පය මහඟු කොට සැලකු පිරිසක් ලෙසද තැකූ බව කියමින් සෙබළ ජනයා තමා වටා රොක් කරගනිමින් තම යුද හමුදා දිවිය සරුකර ගත් ඇතැම් පුද්ගලයන් විශ‍්‍රාම ගිය පසුවද මේ රටේ සිදුවන මානුෂීය මෙහෙයුම් හෑල්ලුවට ලක් කරමින් රණවිරුවන්ට අපහාස වන ලිපි ඔවුන්ට හිතවත් මාධ්‍යවල පළකර ගනිති.
ත‍්‍රස්තවාදියාට අවශ්‍ය වෙන්නේ කෙසේ හෝ උතුරේ සිදුකෙරෙන මෙහෙයුම් නවතා ගැනීමට ය. ඊට කළ හැකි හොඳම උත්සාහය ලෙස ත‍්‍රස්තවාදියා සලකන්නේ රණවිරුවන් ගේ චිත්ත ධෛර්යය බිඳ දැමීම ය. මේ තත්ත්වය තේරුම් ගත නොහැකි විශ‍්‍රාම ගිය ඇතැම් හමුදා නිලධාරීන් යුද්ධය බොරුවක් යැයි පවසමින් රණවිරුවන් ගේ මනස තුළ පීඩනයක් ඇති කරවීමට උත්සාහ කරති.
අද යුද බිමේ සිටින රණවිරුවා මේ තත්ත්වය හොඳ හැටි අවබෝධ කරගෙන කටයුතු කරන බව මේ සම්බන්ධව කළ විමසීමක දී හමුදා නායකයෝ ගණනාවක්ම පැවසූහ. පසුගිය සති අන්ත පුවත්පතක පළවූ වාර්තාවක් ගැන සඳහන් කළ හමුදා නිලධාරීන් කිහිප දෙනකුම “දිනමිණ” ට පැවසුවේ යුද හමුදා සේවයේම යෙදී සිට විශ‍්‍රාම ගිය ඇතැම් නිලධාරීන් යුද්ධය බොරුවක් බව කියා පාමින් රණවිරුවන් ගේ මානසික තත්ත්වය චිත්ත ධෛර්යය කඩා බිඳ දැමීමේ සූක්‍ෂම වැඩ පිළිවෙළක් කි‍්‍රයාත්මක කර ඇති බවයි.
මෙහි අරමුණ ත‍්‍රස්තවාදීන්ගෙන් උතුර බේරා ගැනීමේ ඉලක්කය වෙනස් කිරීමට කරන බොළඳ උත්සාහයක් බව එම හමුදා නිලධාරීහු පවසති. මෙහිදී කළයුත්තේ පිටින් සිට කියනවාට වඩා ති‍්‍රවිධ හමුදාව රුදුරු කොටි ත‍්‍රස්තවාදයේ අවසානය වෙත යන ගමනේ ජය තහවුරු කිරීමත් එයට සකී‍්‍රයව දායකවීමත්ය.
ත‍්‍රස්තවාදයේ අවසන් හුස්ම පොද සුළඟට මුසුකරන්නට වෙර දරන අභීත යුද හමුදා සෙබලුන් ගේ අප‍්‍රතිහත ධෛර්යය දේශපාලන පරමාර්ථයකට ඈදා ගනිමින් අසත්‍ය ප‍්‍රකාශ පළකිරීම යුද බිමේ සටන් කරනා සෙබළ චිත්ත ධෛර්යයට දැඩි පහරක් යැයි කිව යුතුය.
සමස්ත නැෙඟනහිර කොටි බලමුළු සිඳ බිඳ දමා මානුෂිය මෙහෙයුමෙන් අහිංසක ජනතාව බේරාගත් යුද හමුදා රණවිරුවෝ ජයග‍්‍රහණයේ හිනි පෙත්තට නැග තම ධජ පතාක ඉහළට ඔසවා ප‍්‍රකාශ කෙළේ කවදා හෝ දවසක උතුර ද මේ ආකාරයෙන් ජයග‍්‍රහණය කරනවා යන්න මිස හමුදාව විවේචනය කරන පිරිස් පවසන ආකාරයට අතරමඟ මෙහෙයුම් කඩා වැටෙන බව නම් නොවේ.
අව්ව වැස්ස නොබලා මහා ගණ කැළෑ මැද සතුරා සොයා ඉදිරියට ඇදෙන රණවිරුවා වෙනුවෙන් මේ රටේ සුවහසක් ජනතාවට බොහෝ දේ කළ හැකි බව රණවිරුවාගේ අගය ගැන කතා කරන මේ රටේ අහිංසක ජනතාව පවසති.
අපි අද නිදහසේ ජීවත් වෙන්නේ ඔවුන් නිසා බවත් ඔවුන්ට අපහාස කරන පුද්ගලයන් බයේ හැංගී නොසිට යුද්ධයට මුහුණ දිය යුතු බවත් බොහෝ දෙනා පවසති. යුදබිමේ සිටින රණවිරුවාට පමණක් නොවේ ඔවුන් මෙලොවට බිහි කළ මාපියන්ටද අප ගරු කළ යුතු යැයි ද පවසති.
“මේ රටේ ත‍්‍රස්තවාදය නමැති පිළිලය සහමුලින් ම නැති කිරීමට අප කැප වී සිටින්නේ ඉදිරි දරු පරම්පරාවන් ට නිදහසේ ජීවත්විය හැකි පරිසරයක් උරුම කර දිමට යි. නැගෙනහිර පළාත තුළ පැල් බැඳගෙන සිටි ත‍්‍රස්තවාදීන් සහමුලින්ම විනාශ කළා.
අද නැගෙනහිර ජනතාව මොන තරම් සැනසීමකින් ජීවත් වෙනවාද කියලා මේ රටේ සැම කෙනකුටම ඇස්දෙකට පෙනෙනවා. වැඩි කාලයක් යාමට පෙර උතුරේ ජනතාවටත් ඒ නිදහසම උරුම වෙන බව ස්ථිරයි. අප කියන්නේ ඒ සඳහා අපට සහයෝගය දෙන්න කියලයි.” රණවිරුවෝ පවසති.
“යුද්ධය කියන්නේ මිහිරි දෙයක් නොවේ. එහෙත් අප කැප නොවුනොත් එහි වාසිය ත‍්‍රස්තවාදියාට යි. නියපොත්තෙන් කඩන්න තිබූ දෙයක් පොරවෙන් තියා ඊටත් වඩා තියුණු ආයුධයකින් වත් කපා දැමීමට නොහැකි තත්ත්වයක් දක්වා වර්ධනය වී තිබුණා.
මේ ඉතිරි ටික කරගෙන යාමට සහයෝගය දෙනවා වෙනුවට අප යන මාර්ගය ඉදිරියට ගල් පෙරලන්න එපා කියා මේ රටෙන් ත‍්‍රස්තවාදය පළවා හරිනවාට අකමැති පිරිසගෙන් ඉල්ලා සිටිනවා” යැයි රණවිරුවෝ තවදුරටත් පැවසූහ.
දිනමිණ ඇසුරෙන්
Subscribe to:
Post Comments (Atom)
No comments:
Post a Comment