ගංවතුරෙන් පුද්ගලයින් 82 000 ක් අවතැන් වේ.

මේ වන විට ගංවතුර උවදුරෙන් පවුල් 28 500 ක පුද්ගලයන් 82 000 ක් අවතැන් වී ඇතැයි ආපදා කළමනාකරණ මධ්‍යස්ථානයේ ජාතික සම්බන්ධීකාරක කීර්ති ඒකනායක මහතා ලංකාපුවත් සේවයට පැවසීය.මේ වන විට වැඩිම ආපදා තත්වයට කළුතර දිස්ත්‍රික්කයේ ජනත‍ාව මුහුණ දී ඇති අතර එම සංඛ්‍යාව 12 200 කි. ඊට අමතරව රත්නපුර පවුල් 6000ක් ද කොළඹ පවුල් 4 247 ක් ද ගම්පහ පවුල් 3493ක් ද ගාල්ල පවුල් 3000ක් ද කෑගල්ල පවුල් 150 ක් සහ මාතර පවුල් 11 ක් ද ගංවතුර හේතුවෙන් අවතැන්ව සිටින බව ඒ මහතා ප්‍රකාශ කළේය. සිදු වූ අලාභ හානි පිළිබඳව මෙතෙක් නිගමනයකට පැමිණ නොමැති අතර පුද්ගලයන් ආරක්ෂිත ස්ථාන කරා යොමු කරවීම මේ වනවිට සිදු කරමින් පවතින බවද හෙතෙම පැවසීය. ආපදා කළමණාකරණ මධ්‍යස්ථානය අවතැන් වු පුද්ගලයින් වෙනුවෙන් අවශ්‍ය පානිය ජලය, ජෙනරේටර්, වතුරටැංකි , තෙල්, වතුර මෝටර් වැනි අත්‍යවශ්‍ය ද්‍රව්‍ය රැසක් අදාළ ස්ථාන කරා රැගෙන ගොස් ඇති බවද ඒකනායක මහතා පැවසීය.