විජයානි එදිරිසිංහ
කොටි සංවිධානයේ සාමාජිකයන්ට එම සංවිධානය අතහැර පැමිණ හමුදාවට බාර වන ලෙසට ජනාධිපති මහින්ද රාජපක්ෂ මහතා කළ ඉල්ලීමට යහපත් ප‍්‍රතිචාර ලැබෙමින් පවතින බව උතුරේ ආරක්ෂක ආරංචි මාර්ග සඳහන් කරයි.
කොටි සාමාජිකයන් මේ වන විට ඔවුන්ගේ නිල ඇඳුම් අතහැර දමා සාමාන්‍ය වැසියන් සේ ආරක්ෂක අංශ වෙත පැමිණෙමින් සිටින බව වාර්තා වේ.
කොටි සාමාජිකයන් ගලවා දැමු කොටි නිළ ඇඳුම් තොග වශයෙන් ඊයේ (02) හා ඊට පෙර දිනත් විශ්වමඩු, පුදුකුඩිඉරිප්පු, ධර්මපුරම් ප‍්‍රදේශවලින් සොයා ගැනීමට හැකි වී තිබේ.
පුදුකුඩිඉරිප්පු, චලෙයි හා කොටින්ට ඉතිරිව ඇති සීමිත බිම් ප‍්‍රමාණයේ රැඳී සිටින කොටි ත‍්‍රස්තවාදීන් විශාල පිරිසක් ඉදිරි සතියේදී යුද හමුදාවට බාරවෙනු ඇතැයි 57 වැනි සේනාංකාධිපති මේජර් ජනරාල් ජගත් ඩයස් පැවැසීය.
ඔවුන් බොහෝ දුරට සාමාන්‍ය වැසියන් සමඟ පැමිණ බාර වීමට ඉඩ ඇති බව මේජර් ජනරාල්වරයා දිනමිණට කීය.
කොටි ත‍්‍රස්තවාදීන්ට උතුරේ තිබූ වර්ග කිලෝමීටර් පහළොස්දහසකින් දැනට ඉතිරිව තිබෙන්නේ වර්ග කිලෝමීටර් 230ක් පමණය.
ඉන් චලෙයි ප‍්‍රදේශය ආසන්නයේ රැඳී සිටින හමුදාවට ඊයේ සහ පෙරේදා කොටි ත‍්‍රස්තවාදීන් බරපතළ ලෙස ප‍්‍රහාර එල්ල කැර තිබේ.
සාමාන්‍ය මිනිසුන් අතරේ සිට ප‍්‍රහාර එල්ල කරන කොටි ත‍්‍රස්තවාදීන් ආරක්ෂක අංශ ලවා සිවිල් වැසියන් සිටින ප‍්‍රදේශවලට ප‍්‍රහාර එල්ල කරවා ගැනීමේ දැඩි උත්සාහයක යෙදී සිටින බවද මේජර් ජෙනරාල් ජගත් ඩයස් පැවැසීය.
කොටි ත‍්‍රස්තවාදීන් සාමාන්‍ය මිනිසුන් අතරේ සිට මොනයම් ආකාරයක ප‍්‍රහාර එල්ල කළත් ආරක්ෂක අංශ කෙසේවත් එම අධි ආරක්ෂක ප‍්‍රදේශවලට ප‍්‍රහාර එල්ල නොකරයි.
තවත් කොටි දහසක් හෝ ඊට වඩා සුළු ප‍්‍රමාණයක් සිටිය හැකි බව ආරක්ෂක අංශවල විශ්වාසයයි. කොටි නායක වේලුපිල්ලේ ප‍්‍රභාකරන්ද ඇතැම් විට එම ප‍්‍රදේශයේ සැඟවී සිටිය හැකි බව ආරක්ෂක අංශවල විශ්වාසයයි. කවුරුන් හෝ මැදිහත් වී තමා බේරාගනු ඇතැයි යන විශ්වාසය මත අවසන් මොහොත දක්වාම ඔහු සැඟවී සිටිය හැකි බව ආරක්ෂක අංශවල විශ්වාසයයි.
ආරක්ෂක අංශ පවසන ආකාරයට ප‍්‍රභාකරන් ඇතුළු කොටි නායකයන් විඳි පහසුකම් සාමාන්‍ය වැසියන්ට පමණක් නොව සෙසු සාමාජිකයන්ට ද ලැබී නොමැත.
කොටි ත‍්‍රස්තවාදීන්ගේ තවත් නිල ඇඳුම් තොගයක් ඊයේ සොයාගෙන ඇත.
කොටි දරුණු ප‍්‍රහාර එල්ල කළත් යුද හමුදා භට පිරිස් ඒවාට සාර්ථකව මුහුණ දෙමින් ඉදිරියට ගමන් කරන බව මේජර් ජෙනරාල්වරයා වැඩිදුරටත් පැවැසීය
Subscribe to:
Post Comments (Atom)
No comments:
Post a Comment