මහේල ජයවර්ධන ශී‍්‍ර ලංකා කි‍්‍රකට් නායකත්වයෙන් ඉවත්වන බව ඊයේ නිවේදනය කෙළේය.
ජාතික කි‍්‍රකට් කී‍්‍රඩකයන් තෝරන නිලධාරීන් සමග ඊයේ උදේ සාකච්ඡාවක් කැඳ වූ මහේල ජයවර්ධන තමන්ගේ තැන ගන්නා නව නායකයාට 2011 ලෝක කුසලාන තරගාවලියට සුදුසු කණ්ඩායමක් ගොඩනැගීම ප‍්‍රමාණවත් කාලයක් ලබාදීම සඳහා තමාට නායකත්වයෙන් ඉවත්වීමට කාලය පැමිණ ඇතැයි ප‍්‍රකාශ කෙළේය.
පාකිස්තානයේ පැවැත්වෙන ද්විත්ව ටෙස්ට් තරගාවලියේදී ශී‍්‍ර ලංකා පිලේ නායකත්වය දැරීමට ජයවර්ධන මේ සාකච්ඡාවේදී එකඟ විය.
මහේල ජයවර්ධන ශී‍්‍ර ලංකා කි‍්‍රකට් නායකත්වයට පිවිසියේ 2006 පෙබරවාරියේදීය. ඒ තෙවසරක කාලයේදී ඔහු ටෙස්ට් තරග 26 ක් හා අන්තර්ජාතික එක්දින තරග 97 කට නායකත්වය දුන්නේය.
ටෙස්ට් තරග ක්ෂේත‍්‍රයේ සියයට 62.50 ක ජයග‍්‍රාහී අනුපාතයක්ද එක්දින තරග බිමේ සියයට 57 ක අනුපාතයක්ද ජයවර්ධන සටහන් කර තිබේ. ටෙස්ට් අනුපාතය ශී‍්‍ර ලංකා කි‍්‍රකට් ඉතිහාසයේ නායකයකු වාර්තා කළ වැඩිම අනුපාතය වේ. නායකයා ලෙසින් ටෙස්ට් තරග බිමේ 64.70 ක සාමාන්‍යක්ද පසුගිය තෙවසරේදී ශතක 11 ක්ද ඔහු වාර්තා කොට තිබේ. අන්තර්ජාතික එක්දින තරග ක්ෂේත‍්‍රයේ නායකයෙකු වශයෙන් ඔහුගේ සාමාන්‍යය 34.22 කි.
මහේල ජයවර්ධන කි‍්‍රකට් නායකත්වයෙන් ඉවත්වීම සම්බන්ධයෙන් නිකුත් කළ නිවේදනය මෙසේය.
ශී‍්‍ර ලංකා කි‍්‍රකට් කණ්ඩායමේ යහපත වෙනුවෙන් නායකත්වයෙන් ඉවත්වීමට මා තීරණය කළා. ළඟ එන පාකිස්තාන සංචාරයෙන් පසුව මා ඉවත් වෙනවා. මෙය මා දිගු කලක් තිස්සේ සලකා බලාගෙන ආ කාරණයකි. හේතුව 2011 ලෝක කුසලානය සඳහා වන කණ්ඩායම සඳහා නව නායකයාගේ දර්ශනය කාවැද්දීමට ඔහුට අවම වශයෙන් මාස දහඅටක් තිබිය යුතුය යන්න මම දීර්ඝ කාලයක පටන් විශ්වාස කිරීමයි.
සෑහෙන සිතා බැලීමකින් පසුව මා එළැඹි තීරණය වී ඇත්තේ නව නායකත්වයක් විසින් කණ්ඩායම බාර ගැනීමේ කාලය උදා වී ඇති බවයි. මේ තීරණය ලෙහෙසි එකක් නොවන්නේ ශී‍්‍ර ලංකා ජාතික කි‍්‍රකට් කණ්ඩායමේ නායකයාව සිටීම ඉමහත් ආඩම්බරයක් වූ බැවිනි. පසුගිය තෙවසරේ කණ්ඩායමේ නායකයාව සිටීමේ ගෞරවය මට ලබාදීම පිළිබඳ මම ඉතාමත් කෘතඥ වෙමි.
මගේ කාර්යය පහසු කිරීම පිළිබඳ කණ්ඩායමේ සගයන්ටත්, මා කෙරෙහි විශ්වාසය තැබූ ශී‍්‍ර ලංකා කි‍්‍රකට් නිලධාරීන් හා තේරීම් නිලධාරීන්ටත් මගේ පවුලේ අයටත් මට සහාය දුන් හිතමිතුරන් හා කී‍්‍රඩා ලෝලීන්ටත් විශේෂ ස්තූතිය පිරිනැමීමට මම මෙය අවස්ථාව කර ගනිමි. මගේ දැන් ඉදිරි දැක්ම වනුයේ මගෙන් පසුව එන නායකයාට මගේ උපරිම සහාය ලබාදීම හා ඉදිරියේ එන වසරවලදී පිතිකරුවකු ලෙසින් ප‍්‍රධාන කාර්යභාරයක් ඉටුකිරීමයි.
Subscribe to:
Post Comments (Atom)
No comments:
Post a Comment