විජයානි එදිරිසිංහ, භක්ති ධර්මපි‍්‍රය මෙන්ඩිස් සහ වෙල්ලස්සේ බණ්ඩාර
කොටි ත‍්‍රස්තවාදීන්ගේ අවසන් වර්ග සැතපුම් 200 අත්පත් කැර ගැනීමේ මෙහෙයුමේ යෙදී සිටින ආරක්ෂක බළසේනාවෝ චලෙයි පිහිටි කොටින්ගේ ප‍්‍රධානම මුහුදු කොටි කඳවුර සමඟ සම්පූර්ණ චලෙයි සහ විශ්වමඩු ප‍්‍රදේශ අත්පත් කැර ගත්හ.
චලෙයි මුහුදු කොටි කඳවුර ඇතුළු එම ප‍්‍රදේශ ආරක්ෂක අංශ යටතට පත්වූයේ වසර 20 කටත් වඩා වැඩි කාලයකට පසුවය.
චලෙයි මුහුදු කොටි බලය සම්පූර්ණයෙන් ම අහිමිවීමත් සමඟ කොටි සංවිධානයේ සමස්ත මුහුදු කොටි බලයම විනාශ වී ගිය බව හමුදා මාධ්‍ය ප‍්‍රකාශක බි‍්‍රගේඩියර් උදය නානායක්කාර මහතා පැවැසීය. එම ප‍්‍රදේශ අත්පත් කැර ගැනීමට ඊයේ (05) පෙරවරුවේ සිට එම ප‍්‍රදේශයේ පැවැති දරුණු සටන්වලදී ප‍්‍රබල කොටි නායකයන් පස්දෙනෙක් ද ජීවිතක්‍ෂයට පත් වූහ.
විනයාගම්, බගලවන්, නාදර්, සින්නත්තන්නන්, අන්නවෙලන් යන අය එම කොටි නායකයෝ වෙති. ඔවුන් කොටි සංවිධානය ආරම්භයේ සිටම කොටි නායක ප‍්‍රභාකරන් සමඟ කටයුතු කැර ඇත.
විනයාගම් වසර 25 ක් එම සංවිධානයේ කටයුතු කළ අතර ඔහු මුහුදු කොටි බළකායේ තෙවැනි අණ දෙන නායකයාය.
සෙසු පිරිස වසර 15, 20 පමණ කාලයක් සංවිධානයේ සිටි සන්නද්ධ නායකයෝ වෙති. ඓතිහාසික වඩමාරච්චි සටනේදී පවා ඔවුන් තුවාල ලබා ඇති බව බි‍්‍රගේඩියර් උදය නානායක්කාර පැවැසීය.
බි‍්‍රගේඩියර් ප‍්‍රසන්න සිල්වාගේ නායකත්වයෙන් යුත් 55 වැනි බළසේනාංකය, මේජර් ජනරාල් ජගත් ඩයස්ගේ නායකත්වයෙන් 57 වැනි බළසේනාංකය, බි‍්‍රගේඩියර් ෂවේන්ද්‍ර සිල්වාගේ නායකත්වයෙන් 58 වැනි සේනාංකය සහ කාර්ය සාධක 1, 2, 3 සේනාංක සමඟ එක්වූ ආරක්ෂක බළසේනා මේ සුවිශේෂී ජයග‍්‍රහණය අත්පත් කැර ගත්හ.
කොටි ත‍්‍රස්තවාදීන්ගේ ප‍්‍රධානම කළු මුහුදු කොටි හෙවත් මරාගෙන මැරෙන මුහුදු කොටි කඳවුර වූ චලෙයි මුහුදු කොටි කඳවුරේ රැඳී සිටි මුහුදු කොටි නායක සුසෙයි පිළිබඳව මෙතෙක් කිසිවක් වාර්තා වී නැත.
අධි ආරක්ෂක කලාපයක් ලෙස නම් කැර තිබූ එම මුහුදු කොටි කඳවුරට අමතරව වෙනත් කිසිදු මුහුදු කොටි කඳවුරක් ඔවුන්ට නැත. මෙය කොටි ත‍්‍රස්තවාදීන් ලැබූ අන්ත පරාජයකි.
Subscribe to:
Post Comments (Atom)
No comments:
Post a Comment